గ్రనాడా (స్పెయిన్): ప్రపంచ షూటింగ్ చాంపియన్‌షిప్‌లో పతకం నెగ్గుతాడని ఆశించిన భారత అగ్రశ్రేణి ట్రాప్ షూటర్ మానవ్‌జిత్ సింగ్ సంధూ కీలకదశలో తడబడ్డాడు. క్వాలిఫయింగ్ తొలి నాలుగు రౌండ్లలో 25కు 25 పాయింట్లు స్కోరు చేసి 100 పాయింట్లతో ఉమ్మడిగా అగ్రస్థానంలో నిలిచిన ఈ ప్రపంచ మాజీ చాంపియన్ చివరిదైన ఐదో రౌండ్‌లో రెండుసార్లు గురితప్పాడు. 25 పాయింట్లకు 23 సాధించాడు. ఓవరాల్‌గా 123 పాయింట్లతో మరో ఆరుగురితో కలిసి ఉమ్మడిగా రెండో స్థానంలో నిలిచాడు. మరో నలుగురు 124 పాయింట్లతో సంయుక్తంగా అగ్రస్థానంలో నిలిచి ఫైనల్‌కు చేరారు. దాంతో ఫైనల్లో మిగిలిన రెండు స్థానాల కోసం ఆరుగురి మధ్య ‘షూట్ ఆఫ్’ను నిర్వహించారు. ‘షూట్ ఆఫ్’లో మానవ్‌జిత్ విఫలమయ్యాడు. తుదకు పదో స్థానంలో నిలిచాడు. టాప్-6లో ఉన్నవారు ఫైనల్‌కు అర్హత సాధిస్తారు. మహిళల 25 మీటర్ల పిస్టల్ ఈవెంట్‌లో భారత షూటర్లు అనీసా సయ్యద్ 14వ, రాహీ సర్నోబాత్ 21వ, పుష్పాంజలి రాణా 53వ స్థానాల్లో నిలిచారు.
  


 న్యూఢిల్లీ: రియో ఒలింపిక్స్‌లో పతకం సాధించడమే లక్ష్యంగా సిద్ధమయ్యేందుకు తనకు ఈ ఏడాది ఎంతో కీలకం కానుందని భారత షూటర్ మానవ్‌జిత్‌సింగ్ సంధూ అన్నాడు. ఇటీవల ఐఎస్‌ఎస్‌ఎఫ్ ప్రపంచకప్‌లో రెండుసార్లు ఒలింపిక్ చాంపియన్ అయిన మైకేల్ డైమండ్‌ను ఓడించి స్వర్ణం సాధించిన మానవ్‌జిత్ చక్కటి ఫామ్‌లో ఉన్నాడు.
  
  ప్రపంచకప్‌లో విజయం తాను సరైన మార్గంలోనే పయనిస్తున్న విషయాన్ని స్పష్టం చేస్తోందని తెలిపాడు. ‘నా శిక్షణ, టెక్నిక్ సరైన విధంగానే ఉన్నాయని తాజా విజయం చాటుతోంది. మున్ముందు కూడా దీన్ని కొనసాగించాల్సిన అవసరముంద’ని మానవ్‌జిత్ అన్నాడు.