పెద్ద హీరోను డైరెక్ట్‌ చేసి లైఫ్‌లో సెటిల్‌ అయిపోదామనుకున్న అబ్బాయి ఓ అమ్మాయితో లవ్‌లో పడతాడు. అలా డైరెక్షన్‌ దారి తప్పుతుంది. కానీ, మేడ మీద అబ్బాయి దారిలోకి అమ్మాయి వస్తుంది. డైరెక్టర్‌ కావాలనుకున్న ఆ అబ్బాయి లవ్‌ను ఎలా డైరెక్షన్‌ చేసుకున్నాడు? అన్న అంశాలతో రూపొందిన చిత్రం ‘మేడ మీద అబ్బాయి’. ‘అల్లరి’ నరేశ్‌ హీరోగా జి. ప్రజిత్‌ దర్శకత్వంలో శ్రీమతి నీలిమ సమర్పణలో బొప్పన చంద్రశేఖర్‌ నిర్మించారు.
 
 ఈ చిత్రం టీజర్‌ను శుక్రవారం సాయంత్రం విడుదల చేశారు. రెండు రోజుల్లో పది లక్షలు వ్యూస్‌ సాధించింది. ‘ఈ మేడమీద అబ్బాయిని అందరూ మీ ఇంటి అబ్బాయిలా ఆదరించాలని కోరుకుంటున్నాను’’ అన్నారు నరేశ్‌. ‘‘రొమాంటిక్‌ కామెడీ థ్రిల్లర్‌ చిత్రమిది. నరేశ్‌ కేరీర్‌లో మరపురాని చిత్రంగా నిలిచిపోతుంది. ఈ నెలలో ఆడియోను, సెప్టెంబర్‌లో చిత్రాన్ని రిలీజ్‌ చేయాలనుకుంటున్నాం’’ అన్నారు చంద్రశేఖర్‌. అవసరాల శ్రీనివాస్, జయప్రకాష్, తులసి, సుధ తదితరులు నటించిన ఈ చిత్రానికి సంగీతం: షాన్‌ రెహమాన్, ఎగ్జిక్యూటివ్‌ నిర్మాత: ఎమ్‌.ఎస్‌ కుమార్‌.


 మేడ మీదున్న ఈ అబ్బాయి పేరు ‘అల్లరి’ నరేశ్‌. అక్కణ్ణుంచి చూస్తే ఊళ్లో చాలావరకు కనిపిస్తుంది. కానీ, ఓ అమ్మాయి నిఖిలా విమల్‌ మాత్రం బైనాక్యులర్‌లోంచి చూస్తే తప్ప కనిపించడం లేదు. ఎందుకంటే... తను కొంచెం దూరంగా ఉన్న అపార్ట్‌మెంట్‌లో ఉంటుంది. ఈ అబ్బాయి, ఆ అమ్మాయి మధ్య ప్రేమకథతో తెరకెక్కుతోన్న సినిమా ‘మేడ మీద అబ్బాయి’. జాహ్నవి ఫిల్మ్స్‌ పతాకంపై జి. ప్రజిత్‌ దర్శకత్వంలో బొప్పన చంద్రశేఖర్‌ నిర్మిస్తున్న ఈ సినిమా ఫస్ట్‌ లుక్‌ను ఈవీవీ సత్యనారాయణ జయంతి (శనివారం) సందర్భంగా విడుదల చేశారు.
 
 నిర్మాత మాట్లాడుతూ – ‘‘సరికొత్త కథ, కథనాలతో రొమాంటిక్‌ కామెడీ థ్రిల్లర్‌గా రూపొందుతోన్న ఈ సినిమాలో స్క్రీన్‌ప్లే హైలైట్‌గా ఉంటుంది. అలాగే, నరేశ్‌ శైలి కామెడీ కూడా ఉంటుంది. ఓ పాట చిత్రీకరణ మాత్రమే మిగిలుంది. త్వరలో ఆ పాటను చిత్రీకరించి, జూలైలో సినిమాను విడుదల చేయాలనుకుంటున్నాం’’ అన్నారు. అవసరాల శ్రీనివాస్, జయప్రకాశ్, తులసి, సుధ, ‘సత్యం’ రాజేశ్, మధునందన్‌ తదితరులు నటిస్తున్న ఈ చిత్రానికి మాటలు: చంద్రశేఖర్‌ (‘పిల్ల జమీందార్‌’ ఫేమ్‌), కెమేరా: ఉన్ని ఎస్‌.కుమార్, కళ: రాజీవ్‌ నాయర్, కూర్పు: నందమూరి హరి, ఎగ్జిక్యూటివ్‌ నిర్మాత: ఎం.ఎస్‌.కుమార్, సంగీతం: షాన్‌ రెహమాన్, సమర్పణ: శ్రీమతి నీలిమ.