సాక్షి,అమరావతి: వైద్య పరికరాల తయారీ కోసం కేంద్ర ప్రభుత్వం మెడ్‌టెక్‌ జోన్‌ను కేటాయిస్తే మాజీ ముఖ్యమంత్రి చంద్రబాబు అవినీతికి పాల్పడ్డారని వైఎస్సార్‌ కాంగ్రెస్‌ పార్టీ ఎంపీ విజయసాయిరెడ్డి అన్నారు. ఈమేరకు ఆయన ట్విటర్‌లో..  ‘వైద్య పరికరాల తయారీ కోసం కేంద్రం మెడ్ టెక్ జోన్ ను కేటాయిస్తే లడ్డూ దొరకినట్లుగా దాని నిర్మాణ వ్యయాన్ని 400 కోట్ల నుంచి 2500 కోట్లకు పెంచి లగడపాటికి అప్పగించి  స్కాంకు పాల్పడ్డాడు బాబు. సీఎం వైఎస్‌ జగన్ గారు నిధులు కేటాయించి కోవిడ్ టెస్టింగ్ కిట్లు, వెంటిలేటర్ల తయారీ మొదలు పెట్టించారు’అని విజయసాయిరెడ్డి పేర్కొన్నారు.

సాక్షి, అమరావతి: రాష్ట్ర వైద్య ఆరోగ్యశాఖలో అతిపెద్ద కుంభకోణంగా మారిన ‘మెడ్‌టెక్‌ జోన్‌’ మెడకు ఉచ్చు బిగుసుకుంటోంది. వైద్య ఉపకరణాల తయారీ పేరుతో విశాఖపట్నం ఉక్కు ఫ్యాక్టరీ సమీపంలో అత్యంత విలువైన 270 ఎకరాల ప్రభుత్వ భూమిని ఇష్టారాజ్యంగా కార్పొరేట్‌ సంస్థలకు కట్టబెట్టడంతో పాటు అక్కడ జరిగిన నిర్మాణాల్లో భారీగా అవకతవకలు జరిగినట్లు ఫిర్యాదులు వెల్లువెత్తాయి. దీంతో విజిలెన్స్‌ విభాగం విచారణ చేపట్టింది. అందులో భాగంగా విశాఖలోని ఏఎంటీజడ్‌ (ఆంధ్రా మెట్‌టెక్‌ జోన్‌) కార్యాలయానికి  తాజాగా నోటీసులు జారీచేశారు. ఇందులో ప్రధానంగా భూముల కేటాయింపుతో పాటు, అక్కడ నిర్మాణాలకు భారీగా అంచనాలు పెంచి కోట్లాది రూపాయలు దోచుకున్నట్లు బలమైన ఆరోపణలున్నాయి. చంద్రబాబు సర్కారు నియమించిన కేపీఎంజీ అనే కన్సల్టెన్సీ సంస్థ అక్కడ నిర్మాణాలకు రూ.708 కోట్లతో  అంచనాలు రూపొందిస్తే.. ఏఎంటీజడ్‌ అధికారులు మాత్రం అడ్డగోలుగా దీన్ని రూ.2,350 కోట్లకు పెంచేశారు. డిఫాల్టర్‌గా పేరుపొందిన మాజీ ఎంపీ లగడపాటి రాజగోపాల్‌ సంస్థ అయిన ల్యాంకో ఇన్‌ఫ్రాకు కాంట్రాక్టు అప్పగించడం.. మొబిలైజేషన్‌ అడ్వాన్సు కింద రూ.53 కోట్లు ఇవ్వడం, ఆ తర్వాత టెండరు రద్దయినా ఆ మొత్తాన్ని రికవరీ చేయకపోవడం వంటి ఆరోపణలపై విజిలెన్స్‌ అధికారులు నోటీసులు జారీచేశారు. లగడపాటి సంస్థకు సంబంధించిన టెండరు రద్దుచేయగానే పవర్‌మెక్‌ అనే మరో సంస్థను తెరమీదకు తెచ్చి పనులు చేయించారు. అంతేకాక.. ఎన్నికల ఫలితాలు వెలువడిన మే 23కు నాలుగు రోజుల ముందే పవర్‌మెక్‌కు రూ.100 కోట్లు చెల్లింపులు చేయడంతో దీనిపై అనుమానాలు పెరిగాయి. పైగా దీనిపై కోర్టులో వ్యాజ్యం కూడా ఉందన్న కనీస అవగాహన లేకుండా కోట్లాది రూపాయలు చెల్లించారు. ఈ నేపథ్యంలో.. రాష్ట్ర ఖజానా ఖాళీ అయినా సదరు కాంట్రాక్టు సంస్థకు వంద కోట్లు ఎలా చెల్లించారని విజిలెన్స్‌ అధికారులు ఆరా తీస్తున్నారు. ఇందులో మెడ్‌టెక్‌ జోన్‌ సీఈఓ జితేంద్రకుమార్‌ శర్మ కీలకపాత్ర పోషించినట్టు విజిలెన్స్‌ వర్గాలు చెబుతున్నాయి. కాగా, చంద్రబాబునాయుడు, లోకేశ్‌కు మెడ్‌టెక్‌ జోన్‌ సీఈఓ సన్నిహితుడిగా పేరుంది.  అవినీతిని చూసి డైరెక్టర్ల రాజీనామా ఇదిలా ఉంటే.. మెడ్‌టెక్‌ జోన్‌లో అవినీతి ఏ స్థాయిలో జరిగిందో అప్పటి ఉన్నతాధికారుల రాజీనామాలే సాక్ష్యంగా చెప్పుకుంటున్నారు. ఇది ఏర్పాటైన  కొత్తలో ఐపీఎస్‌ అధికారి (నాటి ఔషధ నియంత్రణ డీజీ) డా.రవిశంకర్‌ అయ్యన్నార్, అప్పటి కుటుంబ సంక్షేమశాఖ కమిషనర్‌ సుజాతాశర్మలు డైరెక్టర్లుగా ఉన్నారు. డైరెక్టర్లుగా నియమితులైన కొద్ది నెలల్లోనే అక్కడ పరిస్థితులను చూసి నివ్వెరపోయిన అధికారులు.. ఉన్నతాధికారులతో తీవ్రంగా విభేదించి రాజీనామా చేశారు. ఈ ఫైళ్లపై తాము సంతకాలు చేయలేమని, తమను డైరెక్టర్లుగా తప్పించాలని కోరుతూ ప్రభుత్వానికి లేఖ రాసి మరీ తప్పుకున్నారు. వీరిరువురూ తప్పుకోక ముందే అప్పట్లో మెడ్‌టెక్‌ జోన్‌కు వైస్‌ ప్రెసిడెంట్‌గా పనిచేసిన జుడిష్‌ రాజును కూడా అక్రమాలపై ఫిర్యాదు చేశారనే కారణంగా తొలగించి, కేసు నమోదు చేసి జైలుకు పంపిన విషయం విదితమే.  ఇప్పుడు ప్రభుత్వం మారడంతో ఈ బాగోతం తీగలాగుతున్నారు. కాగా, మెడ్‌టెక్‌ అక్రమాలపై వారం రోజుల్లో పూర్తి సమాచారం ఇవ్వాలని విజిలెన్స్‌ అధికారులు ఆ నోటీసుల్లో పేర్కొన్నారు. 


 రూ.1,733 కోట్లు కాజేసేందుకు వ్యూహం
 - అంచనా వ్యయం రూ.709 కోట్ల నుంచి రూ.2,432 కోట్లకు పెంపు
  
 విశాఖపట్నం జిల్లా మెడ్‌టెక్‌ జోన్‌ పార్కు నుంచి సాక్షి ప్రత్యేక ప్రతినిధి: ఆంధ్రప్రదేశ్‌ మెడికల్‌ టెక్నాలజీ పార్కులో అవినీతి మొక్కలు చెట్లుగా మారాయి. ప్రహరీ కూడా పూర్తి కాకముందే వందలాది కోట్లు కాజేసేందుకు మంత్రాంగం పూర్తయింది. కేబినెట్‌ అనుమతి లేకుండానే రాత్రికి రాత్రి అంచనాలు పెంచేశారు. కోటి కాదు.. రెండు కోట్లు కాదు.. ఏకంగా రూ.1733 కోట్లు జేబులో వేసుకునేందుకు పక్కా వ్యూహం రచించారు. కాదు కూడదన్న డైరెక్టర్లకు శంకరగిరి మాన్యాలు చూపిం చారు. ఇలాగైతే ఎలా అంటూ వాస్తవాన్ని నివేదించిన వారిని ఉద్యోగాల్లోంచి తొలగించారు. ఎవరేమనుకున్నా ఫరవాలేదనుకుని బ్లాక్‌ లిస్టులో ఉన్న కంపెనీకి నిర్వహణ బాధ్యతలు అప్పజెప్పారు. మీడియాకు సమాచారమిచ్చారనే కారణంతో ఓ డైరెక్టర్‌ను ఏకంగా అరెస్టు చేయడం చూస్తుంటే రాష్ట్రంలో పాలన ఎలా సాగుతోందో.. ప్రభుత్వ పెద్దల లక్ష్యం, దశ, దిశ ఏమిటనేది ఇట్టే అర్థమవుతోంది.  ప్రభుత్వ ముఖ్య నేత, ఆయన తనయుడి కనుసన్నల్లోనే ఈ వ్యవహారం సాగుతోందని ప్రభుత్వ వర్గాలు కోడై కూస్తున్నాయి. ఆరోగ్య శాఖ సలహాదారు ముందుండి ఈ తతంగాన్ని నడిపించారని విమర్శలు వెల్లువెత్తుతున్నాయి.
 
 వైద్య ఉపకరణాల ఖరీదు చాలా ఎక్కువగా ఉందని, వాటిని ఇక్కడే తయారు చేసి తక్కువ ధరకు పేదలకు అందించాలని విశాఖపట్నం జిల్లా పెదగంట్యాడ మండలంలో స్టీల్‌ ప్లాంట్‌ ఎదురుగా 270 ఎకరాలు మెడ్‌టెక్‌ జోన్‌ (ఏఎంటీజెడ్‌ – ఆంధ్రా మెడికల్‌ టెక్నాలజీ జోన్‌)కు కేటాయించారు. గతేడాది ఈ ప్రాజెక్టు కోసం సీఎం చంద్రబాబు అట్టహాసంగా శంకుస్థాపన చేశారు.  ప్రపంచంలోనే తొలి మెడికల్‌ టెక్నాలజీ పార్కు అని, ఇది భారతదేశానికే తలమానికమని ప్రభుత్వం బాగా ప్రచారం చేసుకుంది. ఈ సంస్థకు ఉత్తరాదికి చెందిన జితేందర్‌ కుమార్‌ శర్మ అనే ఓ ప్రైవేటు కన్సల్టెంట్‌ను సీఈఓగా నియమించారు.
 
 ఇతను వైద్య ఆరోగ్య శాఖలో ఓ ఉన్నతాధికారి చెల్లెలు భర్తకు సన్నిహితుడని ప్రచారం ఉంది. ఈ ప్రాజెక్టుకు సంబంధించిన డీపీఆర్‌(డీటెయిల్డ్‌ ప్రాజెక్ట్‌ రిపోర్ట్‌)ను తయారు చేసే బాధ్యత కేపీఎంజీ అనే ప్రముఖ సంస్థకు అప్పజెప్పారు. ప్రాజెక్టు పూర్తి చేసేందుకు రూ.709 కోట్లు వ్యయం అవుతుందని ఆ సంస్థ నివేదించింది. ఇందులో రూ.500 కోట్లు అభివృద్ధి పనులకు, రూ.200 కోట్లు మౌలిక సదుపాయాలకు, మిగతా రూ.9 కోట్లు ఇతర పనులకు వెచ్చించాలని వివరించింది. 
  
 ఊహకందని రీతిలో అంచనాల పెంపు
 విశాఖ స్టీల్‌ సిటీ ఎదురుగా ఉన్న స్థలాన్ని మెడ్‌టెక్‌ పార్కుకు కేటాయించారు. అనుకున్న మేరకు నిధులతో ప్రాజెక్టు పూర్తి చేయడం వీలుకానప్పుడు ఐదు లేదా పది శాతం అంచనాలను పెంచుకోవడం మామూలే. అలాంటిది ప్రభుత్వ పెద్దలు మరో రకంగా ఆలోచించారు. అవకాశం ఉంది కదా అని ఏకంగా 350 శాతం అంచనాలను పెంచేశారు. రూ.709 కోట్లు ఉన్న అంచనా వ్యయాన్ని రూ.2,432 కోట్లకు పెంచి.. రూ.1733 కోట్లు జేబులో వేసుకునేందుకు పథక రచన చేశారు. ఇందులో భాగంగా కేటగిరీ 1లో 11 శాతం స్థలంలో ఆర్‌సీసీ కన్‌స్ట్రక్షన్‌కు చదరపు అడుగు అభివృద్ధికి రూ.1200 కేటాయించొచ్చని కేపీఎంజీ చెబితే దానిని ఏకంగా రూ.6,081కు పెంచారు. 27 శాతం స్థలం అభివృద్ధికి చదరపు అడుగుకు రూ.250 కేటాయించాలని చెబితే.. దానిని రూ.1596.6 చేశారు. మూడవ కేటగిరి కింద 62 శాతం స్థలంలో షెడ్‌ల నిర్మాణానికి చదరపు అడుగుకు రూ.640 చొప్పున ఇవ్వాలని చెబితే.. ఏకంగా రూ.1,579గా మార్చేశారు. ప్రభుత్వ పెద్దల సూచన మేరకు మెడ్‌టెక్‌ సీఈఓ రాత్రికి రాత్రే ఇలా అంచనాలు పెంచేసి నిబంధనలకు విరుద్ధంగా వారికి లబ్ధి కలిగించడానికి పూనుకున్నారు. దీంతో అంచనా వ్యయం రూ.2,460 కోట్లకు పెరిగింది. కనీసం మంత్రివర్గ అనుమతి కూడా లేకుండా మెడ్‌టెక్‌ జోన్‌ పార్క్‌ సీఈఓ నేరుగా ప్రభుత్వ ముఖ్య నేతతో మాట్లాడుకుని అంచనాలు పెంచేసినట్టు స్పష్టమవుతోంది. 
  
 టెండర్ల దశలోనే మాయాజాలం
 మెడ్‌టెక్‌ జోన్‌ పార్కు టెండర్ల దశలోనే అవినీతికి బీజం పడింది. అభివృద్ధి పనులకు మొత్తం 11 కంపెనీలు వస్తే అందులో 9 కంపెనీలను తొలిదశలోనే ఇంటికి పంపించేశారు. మిగిలిన రెండు కంపెనీలు.. ల్యాంకో ఇన్‌ఫ్రా, ఎన్‌సీసీ. ఈ రెండింటిలో ల్యాంకో ఇన్‌ఫ్రా ఎల్‌1గా వచ్చింది. ఈ కంపెనీ ఇప్పటికే డీఫాల్ట్‌ కంపెనీగా బ్లాక్‌ లిస్టులో ఉంది. ఆర్థిక బిడ్‌ల దశలో బ్యాంకు నుంచి ఇవ్వాల్సిన సాల్వేషన్‌ సర్టిఫికెట్‌ కూడా ఈ కంపెనీ ఇవ్వలేదు. ఈ పరిస్థితుల్లో దీనిపై అనర్హత వేటు వేయాల్సింది పోయి, దీనికే పట్టం కట్టారు. డీఫాల్ట్‌ కంపెనీకి పనులు కట్టబెట్టడంపై ప్రశ్నించాల్సిన ఎన్‌సీసీ కంపెనీ కూడా అభ్యంతరాలు వ్యక్తం చేయలేదు. ఈ కంపెనీని కూడా మాట్లాడకుండా మేనేజ్‌ చేసి మెడ్‌టెక్‌ పనులను ల్యాంకోకు నజరానాగా అప్పజెప్పారు.
  
 ఫిర్యాదు చేసిన వారిపైనే చర్యలు
 మెడ్‌టెక్‌ జోన్‌ పార్కులో అక్రమాలు జరుగుతున్నాయని, వీటిని అరికట్టాలని కోరుతూ వైద్య ఆరోగ్య శాఖ ముఖ్య కార్యదర్శి పూనం మాలకొండయ్యకు 2017 మార్చి 8వ తేదీన అప్పటి వైస్‌ ప్రెసిడెంట్‌లు, మేనేజర్లు జుడీష్‌ రాజు (వైస్‌ ప్రెసిడెంట్‌ – ప్లానింగ్‌), షిబా దత్తా మిస్త్రీ (వైస్‌ ప్రెసిడెంట్‌ – ఆపరేషన్స్‌), డా.నిరంజన్‌ జోషి (వైస్‌ ప్రెసిడెంట్‌ – టెక్నికల్‌), సోహాన్‌ దత్తా (సీనియర్‌ మేనేజర్‌ – మార్కెటింగ్‌), గంభీర్‌ జైన్‌ (సీనియర్‌ మేనేజర్‌ – ఫైనాన్స్‌), అమృతా దత్తా (మేనేజర్‌ – టెక్నికల్‌), నికిన్‌ జైన్‌ (మేనేజర్‌ – మార్కెటింగ్, ఐటీ)లు లేఖ రాశారు. కోట్లాది రూపాయల నిధులు దుర్వినియోగం చేస్తున్నారని, ప్రైవేటు వ్యక్తుల చేతుల్లోకి కోట్లు వెళుతున్నాయని లేఖలో వివరించారు. దీనిపై చర్యలు తీసుకోవాల్సిన సదరు ఉన్నతాధికారి అలా చేయకపోగా ఎవరైతే లేఖ రాశారో వారిని ఉద్యోగం నుంచి ఊడపీకేయించారు.
 
 సీఈఓ జితేంద్రశర్మకు వీళ్లెవరూ నచ్చడం లేదన్న ఉద్దేశ్యంతో వారిని పదవుల నుంచి తొలగించినట్టు ఉద్యోగులు వాపోతున్నారు. మెడ్‌టెక్‌ జోన్‌ పార్కులో అవినీతి జరుగుతోందని, ఇందులో పనిచేసిన కొంతమంది ఉద్యోగులు ఆగస్టు 2వ తేదీన విజయవాడలో మీడియా సమావేశం నిర్వహించారు. ఇందులో మాజీ వైస్‌ ప్రెసిడెంట్‌ జుడీష్‌రాజు ఒకరు. మీడియాకు సమాచారమిచ్చారన్న అక్కసుతో ఇతనిపై విశాఖపట్నం జిల్లా పీఎం పాలెం పోలీస్‌ స్టేషన్‌లో మెడ్‌టెక్‌ జోన్‌ ఉద్యోగి ఒకరు కేసు నమోదు చేశారు. హైదరాబాద్‌లో ఉన్న ఆయనను శనివారం అరెస్ట్‌ చేసి విశాఖపట్నం తీసుకెళ్లారు. మరికొంత మంది ఉద్యో గులను కూడా పోలీసులు అదుపులోకి తీసుకున్నారు.
 
 మెడ్‌టెక్‌ జోన్‌ సీఈఓ పేరిట నకిలీ ఈ మెయిల్‌ సృష్టించి సమాచారాన్ని ఇతరులకు చేరవేశారన్న అభియోగంతో వీరిపై కేసులు నమోదు చేశారు. కాగా, మెడ్‌టెక్‌ జోన్‌లో జరుగుతున్న అవినీతి అక్రమాలు ఒక్కొక్కటే బయటకు రావడంతో ఈ నెల 2వ తేదీ రాత్రి సంస్థకు సంబంధించిన అధికారిక వెబ్‌సైట్‌లో పలు మార్పులు చేశారు. భారీగా పెంచిన అంచనాలను ఒక్కసారిగా తగ్గిస్తూ కొత్త సమాచారాన్ని వెబ్‌సైట్‌లో అప్‌లోడ్‌ చేశారు. విషయం బయటకు పొక్కడంతోనే ఇలా చేశారని సంబంధిత ఉద్యోగి ఒకరు ‘సాక్షి’కి వివరించారు.  
  
 మోసం చేసినందుకే..
 సాక్షి, విశాఖపట్నం: మెడ్‌టెక్‌ కంపెనీని మోసం చేసినందుకే వైస్‌ ప్రెసిడెంట్‌తో పాటు మరికొందరిని మార్చిలోనే విధుల నుంచి తొలగించారని విశాఖ కలెక్టర్‌ ప్రవీణ్‌కుమార్‌ సాక్షికి ఫోన్‌లో తెలిపారు. మెడ్‌టెక్‌ సీఈఓ పేరిట ఐడీ క్రియేట్‌ చేసి సుమారు 800 కంపెనీలకు తప్పుడు ఈ మెయిల్స్‌ చేశారని, కంపెనీ సమాచారాన్ని బయట వ్యక్తులకు చేరవేశారని చెప్పారు. ఈ వ్యవహారంపై పోలీసులు కేసు నమోదు చేసి.. వైస్‌ ప్రెíసిడెంట్‌ జుడిస్‌ రాజ్‌ను అరెస్ట్‌ చేసి విశాఖకు తీసుకొస్తున్నారని తెలిపారు.  
 –కలెక్టర్‌ ప్రవీణ్‌కుమార్‌
  
 20 వేల ఉద్యోగాలు ఎక్కడ?
 విశాఖలో వైద్య ఉపకరణాల తయారీ పరిశ్రమలు వస్తే ప్రత్యక్షంగా 20 వేల ఉద్యోగాలు వస్తాయని, పరోక్షంగా 2 లక్షల మందికి ఉపాధి లభిస్తుందని ప్రభుత్వం భారీగా ప్రచారం నిర్వహించింది. కానీ సంస్థ సీఈఓ తెచ్చిన 11 సంస్థల్లో ఇప్పటికే 5 సంస్థలు వెనక్కు వెళ్లిపోయాయి. ఉన్న ఆరు సంస్థలు కూడా చోటా మోటా కంపెనీలని, వీటికి మార్కెట్లో అంతగా పేరులేదని చెబుతున్నారు. ఇప్పటి వరకు ప్రహరీ  కూడా పూర్తి కాలేదు.. ఇక ఉద్యోగాలెక్కడ ఇస్తారని స్థానికులు ప్రశ్నిస్తున్నారు.
 
 మెడ్‌టెక్‌ జోన్‌కు పరిశ్రమలను ఆకర్షించే పేరుతో సీఈఓ జితేందర్‌ కుమార్‌ శర్మ, వైద్య ఆరోగ్య శాఖ ముఖ్య కార్యదర్శి పూనం మాలకొండయ్యలు పలు దేశాలు తిరిగొచ్చారు. కానీ పరిశ్రమలు మాత్రం రాలేదు. రెండేళ్లలో జితేందర్‌ శర్మ ఆరు సార్లు, పూనం మాలకొండయ్య ఐదుమార్లు విదేశీ పర్యటనలు చేశారు. ఇందులో అమెరికా, జర్మనీ, చైనా, సింగపూర్‌ దేశాలు ఉన్నాయి. ఈ పర్యటనలకు ఇప్పటి వరకు రూ.30 లక్షలకు పైనే ఖర్చు అయినట్లు తెలిసింది.