సాక్షి, హైదరాబాద్‌: ఇటీవల సినీరంగాన్ని కుదిపేసిన డ్రగ్స్‌ రాకెట్‌ వ్యవహారంలోని ప్రధాన నిందితుడు మైక్‌ కమింగకు హైకోర్టు ఊరటనిచ్చింది. ఎక్సైజ్‌ పోలీసులు నమోదు చేసిన కేసులో బెయిల్‌ మంజూరు చేసింది. రూ.25 వేలతో రెండు పూచీకత్తు సమర్పించాలని, దేశం విడిచి వెళ్లకూడదని పలు షరతులు విధించింది. ప్రతీ రెండో శనివారం సంబంధిత పోలీసుల ముందు హాజరుకావాలని స్పష్టం చేసింది. ఈ మేరకు న్యాయమూర్తి జస్టిస్‌ షమీమ్‌ అక్తర్‌ సోమవారం ఉత్తర్వులు జారీ చేశారు. డ్రగ్స్‌ రాకెట్‌ వ్యవహారంలో ఎక్సైజ్‌ పోలీసులు డచ్‌ దేశస్తుడైన కమింగను జూలై 26న అరెస్ట్‌ చేసి, అతని ఇంటి నుంచి కొన్ని మత్తు పదార్థాలను స్వాధీనం చేసుకున్నారు. అప్పటినుంచి అతను జైలులోనే ఉన్నాడు. ఈ నేపథ్యంలో కమింగ తనకు బెయిల్‌ మంజూరు చేయాలంటూ హైకోర్టులో పిటిషన్‌ దాఖలు చేశాడు. పిటిషనర్‌ తరఫు న్యాయవాది శివరాజు శ్రీనివాస్‌ వాదనలు వినిపిస్తూ.. కమింగ ఇంటిలో సోదాలు జరిపి డైమిథిల్‌ ట్రైపటమైన్‌ (డీఎంటీ)ని స్వాధీనం చేసుకున్నారని.. ఆ సమయంలో ఎక్సైజ్‌ అధికారులు తమ సొంత కానిస్టేబుళ్లను సాక్షులుగా చూపారని అన్నారు. ఇది నిబంధనలకు విరుద్ధమని వివరించారు. స్వాధీనం చేసుకున్న డ్రగ్స్‌ను ఇప్పటివరకు నిర్ధారించ లేదని వెల్లడించారు. దీనిపై న్యాయమూర్తి ఎక్సైజ్‌ అధికారుల వివరణ కోరగా.. ఎఫ్‌ఎస్‌ఎల్‌ నివేదికను సమర్పిస్తామని చెప్పారు. సోమవారం నాటి విచారణకు ఈ రిపోర్టును అధికారులు కోర్టుకు అందజేయలేకపోయారు. నివేదిక సమర్పణకు తమకు మరింత గడువు కావాలని కోరారు. దీనిని పరిగణనలోకి తీసుకున్న ధర్మాసనం కమింగకు బెయిల్‌ మంజూరు చేస్తూ ఉత్తర్వులిచ్చింది.


 - మూడు రోజులపాటు ప్రశ్నించనున్న అధికారులు
 - డ్రగ్స్‌ దందాలో టెక్కీల సంగతి తేల్చడంపైనే దృష్టి
  
 సాక్షి, హైదరాబాద్‌: విదేశాల నుంచి డ్రగ్స్‌ తెప్పించి సరఫరా చేసినట్లుగా ఆరోపణలున్న నెదర్లాండ్స్‌ ఐటీ నిపుణుడు మైక్‌ కమింగను సిట్‌ అధికారులు 3 రోజులపాటు ప్రశ్నించనున్నారు. డ్రగ్స్‌ కేసులో కీలక సూత్రధారిగా కమింగ ఉన్నాడని, అతడి నుంచి సమాచారం సేకరించాల్సి ఉందని సిట్‌ కోర్టు దృష్టికి తీసుకెళ్లింది. 3 రోజుల పాటు కస్టడీకి ఇవ్వాలని కోరింది. దీనికి అనుమతించిన మియాపూర్‌ కోర్టు.. శుక్రవారం నుంచి 3 రోజుల కస్టడీకి అప్పగిస్తూ ఆదేశాలిచ్చింది. మైక్‌ కమింగ సీనియర్‌ సాఫ్ట్‌వేర్‌ ఇన్‌స్టాలర్‌ నిపుణుడిగా పేరు పొందాడు. హైదరాబాద్‌తో పాటు దేశంలోని ప్రముఖ నగరాల్లో ఉన్న ఐటీ కంపెనీల్లో సదస్సులు, శిక్షణ కార్యక్రమాలు నిర్వహిస్తుంటాడు.
 
 హైదరాబాద్‌తోపాటు ముంబై, పూణెలలో కార్యాలయాలు కూడా ఉన్నాయి. దీంతో కమింగకు భారీ స్థాయిలో నెట్‌వర్క్‌ ఉందని.. వృత్తిని అడ్డుగా పెట్టుకుని డ్రగ్స్‌ దందా చేశాడని సిట్‌ అనుమానిస్తోంది. కమింగ ఫోన్‌లో 2 వేలకు పైగా టెక్కీల ఫోన్‌ నంబర్లు, వాట్సాప్‌ చాటింగ్‌లు ఉన్నట్టు అధికారులు గుర్తించారు. వాస్తవానికి సినీ ప్రముఖుల విచారణ సమయంలోనే ఆరుగురు సాప్ట్‌వేర్‌ ఇంజనీర్లను ప్రశ్నించిన సిట్‌.. మైక్‌ కమింగను అరెస్ట్‌ చేసింది. అతడి నుంచి 2.8 డీఎంటీ డ్రగ్‌ను స్వాధీనం చేసుకుంది. ఈ నేపథ్యంలో ఐటీ ఉద్యోగులకు డ్రగ్స్‌ అలవాటు చేసినట్లుగా పలు ఆధారాలు కూడా సంపాదించింది. తాజాగా కస్టడీలో లోతుగా ప్రశ్నించి డ్రగ్స్‌ లింకును ఛేదించేందుకు అధికారులు ప్రయత్నిస్తున్నారు. శుక్రవారం మధ్యాహ్నమే కమింగను కస్టడీలోకి తీసుకుని విచారిస్తున్నట్లు వెల్లడించారు.