చిట్యాల (నకిరేకల్‌) : ఎన్నికల ముందు ఇచ్చిన హామీలన్నింటినీ అధికారంలోకి వచ్చిన మూడేళ్లలోనే సీఎం కేసీఆర్‌ అమలు చేశారని విద్యుత్‌ శాఖ మంత్రి గుంటకండ్ల జగదీశ్‌రెడ్డి పేర్కొన్నారు. అందులో భాగంగానే తెలంగాణ.. అభివృద్ధిలో దేశంలోనే నంబర్‌ వన్‌ రాష్ట్రంగా దూసుకుపోతోందని తెలిపారు. చిట్యాల మండలం వెలిమినేడులో దశమి ల్యాబ్స్‌ పరిశ్రమ యజమాన్యం ఏర్పాటు చేసిన వాటర్‌ప్లాంట్‌ను గురువారం ఆయన నకిరేకల్‌ ఎమ్మెల్యే వేముల వీరేశంతో కలిసి ప్రారంభించారు. అనంతరం గుండ్రాంపలిలో డబుల్‌ బెడ్‌ రూం ఇళ్ల నిర్మాణ పనులకు శంకుస్థాపన చేసి మాట్లాడారు. నకిరేకల్‌ నియోజకవర్గంలో గడిచిన నాలుగేళ్ల కాలంలోనే  రూ.రెండు వేల కోట్లతో ఆభివృద్ధి పనులు చేపట్టినట్లు తెలిపారు. నకిరేకల్‌ ఎమ్మెల్యే వేముల వీరేశం మాట్లాడుతూ గుండ్రాంపల్లి గ్రామంలో మరో 150 డబుల్‌ బెడ్‌ రూం ఇళ్లను మంజూరు చేయాలని, కమ్యూనిటీ హాల్‌కు నిధులు మంజూరు చేయాలని కోరారు. ఇందుకు మంత్రి సానుకూలంగా స్పందించారు. ఆయా కార్యక్రమాల్లో జేసీ నారాయణరెడ్డి ,ఆర్డీఓ వెంకటాచారి, ఎంపీపీ బట్టు అరుణ అయిలేష్, జెడ్పీటీసీ శేపూరి రవీందర్, సర్పంచ్‌ రాచకొండ లావణ్య క్రిష్టయ్య, తహసీల్దార్‌ సీహెచ్‌.విశాలాక్షి, ఎంపీడీఓ జి.కాంతమ్మ, ఈఓపీఆర్‌డీ బి.లాజర్, టీఆర్‌ఎస్‌ మండల అధ్యక్షుడు కాటం వెంకటేశం, ఎద్దులపురి క్రిష్ణ, గుండెబోయిన సైదులు, బెల్లి సత్తయ్య, బక్క శేఖర్, గోలి మహేష్, బైకాని నాగరాజు, బోడిగె అంజయ్య, నర్సింహ పాల్గొన్నారు. ప్రజా సంక్షేమానికి ప్రభుత్వం కృషి నార్కట్‌పల్లి (నకిరేకల్‌) : ప్రజా సంక్షేమానికి ప్రభుత్వం కృషి చేస్తోందని విద్యుత్‌ శాఖ మంత్రి గుంటకండ్ల జగదీశ్‌రెడ్డి పేర్కొన్నారు. మండలంలోని బి.వెల్లెంలలో రూ.5కోట్లతో డబుల్‌బెడ్‌రూమ్‌ ఇళ్ల నిర్మాణానికి గురువారం ఆయన శంకుస్థాపన చేసి మాట్లాడారు.రాష్ట్రంలో నేటి వరకు 2లక్షల  ఇళ్ల నిర్మాణం జరిగిందన్నారు. రూ.700కోట్లతో ప్రభుత్వ గురుకుల హాస్టళ్లలో మెరుగైన సౌకర్యాలు, నాణ్యమైన విద్య అందిస్తున్నామని తెలిపారు. రూ.30కోట్లతో ప్రతి జిల్లాలో మత్సకార్మికుల సమస్యలు పరిష్కరిస్తున్నట్లు తెలిపారు. బి.వెల్లెంల ఉదయ సముద్రంప్రాజెక్టు రెండు నెలల్లో పూర్తిచేయనున్నట్లు తెలిపారు. ఎమ్మెల్యే వేముల వీరేశం మాట్లాడుతూ నార్కట్‌పల్లి మండల అభివృద్ధికి ప్రత్యేక నిధులు మంజూరు  చేయిస్తున్నట్లు తెలిపారు.


 వలిగొండ : మల్లన్న సాగర్‌ ప్రాజెక్టు కడితే తమ ఉనికి కోల్పోతామని ప్రతిపక్షాలు అనవసర రాద్ధాంతం చేస్తున్నాయని రాష్ట్ర విద్యుత్‌శాఖ మంత్రి గుంటకండ్ల జగదీశ్‌రెడ్డి అన్నారు. మండలంలోని వెల్వర్తిలో నూతనంగా నిర్మించిన ఆస్పత్రి భవనాన్ని బుధవారం ఆయన ప్రారంభించారు.  సర్పంచ్‌ మల్లం శ్రీనివాస్‌ ఆధ్వర్యంలో భారీ ర్యాలీ తీశారు. అనంతరం ఆస్పత్రి ఆవరణలో మొక్కలు నాటారు. ఈ సందర్భంగా ఏర్పాటు చేసిన సమావేశంలో ఆయన మాట్లాడుతూ తెలంగాణ రాష్ట్ర ముఖ్యమంత్రి  కేసీఆర్‌ ఎన్నికల్లో ఇచ్చిన హామీలను తూచ తప్పకుండా అమలు చేస్తున్నారని అన్నారు.  ఇచ్చిన మాట నిలబెట్టుకోవడంలో కేసీఆర్‌ దేశంలోనే నంబర్‌ వన్‌ అని  అన్నారు. మంత్రులు, ఎమ్మెల్యేలు ఒళ్లు దగ్గర పెట్టుకుని పనిచేయాలన్న ఉద్దేశంతోనే మిషన్‌ భగీరథకు మూడేళ్ల సమయం పెట్టారన్నారు. తెలంగాణ సాధించుకున్నందునే మన నీళ్లు, మన ఉద్యోగాలు, మన నిధులు మనమే ఉపయోగించుకుంటూ ముందుకు పోతున్నామన్నారు. జిల్లాలో 24 నెలల్లో రూ. 25 వేల కోట్లు ఖర్చు చేశామన్నారు.  భువనగిరి ఎమ్మెల్యే పైళ్ల శేఖర్‌రెడ్డి మాట్లాడుతూ మల్లన్నసాగర్‌కు రైతుల మద్దతు ఉంది కాబట్టే భువనగిరిలో నిర్వహించిన ర్యాలీకి రైతులు, కార్యకర్తలు పెద్ద ఎత్తున తరలి వచ్చారని అన్నారు. డీఎంహెచ్‌ఓ భానుప్రసాద్‌ మాట్లాడుతూ వలిగొండ వైద్యశాల భవనం శిథిలావస్థకు చేరడంతో అక్కడి స్టాఫ్‌ను వెల్వర్తికి పంపుతున్నామని, వలిగొండలో ఓపీ అందుబాటులో ఉంచుతామన్నారు. నూతన భవనం నిర్మించాలని మంత్రి దృష్టికి తీసుకువచ్చారు. గ్రామస్తులు, ఉపాధ్యాయులు పలు సమస్యలపై మంత్రికి వినతులు అందజేశారు. ఈ కార్యక్రమంలో భువనగిరి ఆర్డీఓ భూపాల్‌రెడ్డి,  టీఆర్‌ఎస్‌ రాష్ట్ర నాయకులు పైళ్ల రాజవర్ధన్‌రెడ్డి, వంగాల వెంకన్న, ఎంపీపీ శ్రీరాముల నాగరాజు, జెడ్పీటీసీ మొగుళ్ల శ్రీనివాస్, టీఆర్‌ఎస్‌ మండల అధ్యక్షుడు వాకిటి అనంతరెడ్డి, వెల్వర్తి ఎంపీటీసీ గుండు శేఖర్, తహసీల్దార్‌ అరుణారెడ్డి, ఎంపీడీఓ సరస్వతి, ప్రత్యేక అధికారి సుకీర్తి,  పీఆర్‌ డీఈ రాజేందర్‌రెడ్డి, ఏఈ ఇంద్రసేనారెడ్డి, ఏఓ శోభారాణి, డాక్టర్‌ సుమన్‌కల్యాణ్, సంతోష్‌రెడ్డి, ఏపీఓ ఇమ్మానియేల్‌ తదితరులు పాల్గొన్నారు.