మిషన్ కాకతీయతో శాశ్వత కరువు నివారణ : మంత్రి జూపల్లి
  
 కొల్లాపూర్ రూరల్: రెండోవిడత మిషన్ కాకతీయ పనులకు జిల్లావ్యాప్తంగా 2040 చెరువులకు ప్రభుత్వం రూ.151.14కోట్లు మంజూరు చేసిందని మంత్రి జూపల్లి కృష్ణారావు వెల్లడించారు. శనివారం ఆయన పట్టణంలోని ఎంజీఎల్‌ఐ అతిథిగృహంలో విలేకరులతో మాట్లాడారు. మొదటి విడత 1073 చెరువుల పనులను మంజూరుచేసినట్లు తెలిపారు. అవి చివరిదశ కు చేరుకున్నాయని, మిగిలిపోయిన పనులను పూర్తిచేయాలని కాంట్రాక్టర్లకు సూచించినట్లు పేర్కొన్నారు. నియోజకవర్గంలో మిషన్ కాకతీయ రెండోవిడత పనుల కింద 181చెరువులను మంజూరు చేసినట్లు వివరించారు. ఈ పనులను జూన్ నాటికి పూర్తిచేయాలని కోరారు.
 
 ఎల్లూరు డబుల్‌రోడ్డు నిర్మాణానికి రూ.రెండుకోట్లు మంజూరుచేసినట్లు తెలిపారు. పీజీ కళాశాల భవన నిర్మాణానికి రూ.4.60కోట్లు మంజూరయ్యాయని, త్వరలో ప్రారంభమవుతాయన్నారు. జిల్లాలో 900 గ్రామాల్లో ఓఆర్‌సీసీ ట్యాంకులను, పైపులైన్లను నిర్మించేందుకు ప్రతిపాదనలు సిద్ధమయ్యాయన్నారు. ఆగస్టు నాటికి జొన్నలబొగుడ లిఫ్ట్ నుంచి తాగునీటిని అందిస్తామని చెప్పారు. కొల్లాపూర్‌లో రూ.మూడుకోట్లతో ఆడిటోరియం, షాదీఖానా, అధునాతన గ్రంథాలయాన్ని ఏర్పాటుచేస్తామన్నారు. అనంతరం పట్టణంలో ఇటీవల మరణించిన రామస్వామి కుటుంబాన్ని మంత్రి పరామర్శించారు.
 
 ఈనెల 14న కొల్లాపూర్ నియోజకవర్గ యువతీ, యువకులకు ప్రైవేట్ కంపెనీల్లో ఉద్యోగాలు కల్పించేందుకు జాబ్‌మేళా నిర్వహిస్తున్నట్లు మంత్రి జూపల్లి తెలిపారు. ఈ ఇంటర్వ్యూలకు పదో తరగతి పాసైన యువతీయువకులు హాజరుకావాలని కోరారు. సమావేశంలో స్పెషల్ అధికారి కృష్ణయ్య, ఎంపీపీ చిన్న నిరంజన్‌రావు, జెడ్పీటీసీ సభ్యుడు హన్మంతునాయక్, సింగిల్‌విండో చైర్మన్ రఘుపతిరావు, టీఆర్‌ఎస్ నాయకులు నర్సింహారావు, బాలస్వామి, మేకల రాముడు, సుబ్బారావు పాల్గొన్నారు.


 అచ్చంపేట రూరల్ : రాష్ట్ర ప్రభుత్వం అమలు చేస్తున్న కల్యాణలక్ష్మి పథకాన్ని ఏప్రిల్ నుంచి బీసీలకూ వర్తింపజేయనున్నట్లు భారీ పరిశ్రమల శాఖ మంత్రి జూపల్లి కృష్ణారావు తెలిపారు. అచ్చంపేట నగరపంచాయతీ ఎన్నికల ప్రచారంలో భాగంగా పట్టణంలోని ఇందిరానగర్, పదో వార్డులో మంత్రి ప్రచారం నిర్వహించారు.
 
 సీఎం కేసీఆర్ మాటకు కట్టుబడి ఉండే మనిషని, అచ్చంపేటకు ఎమ్మెల్యే బాలరాజు కృషి వల్లే వెయ్యి ఇళ్లు అదనంగా మంజూరయ్యాయని తెలిపారు. అర్హులందరికీ డబుల్ బెడ్‌రూం అందజేస్తామని, వచ్చే విద్యాసంవత్సరం నుంచే కేజీ టూ పీజీ విద్యను ప్రారంభిస్తామన్నారు. అర్హులైన మహిళా సంఘాలకు రుణాలు మంజూరు చేయిస్తామన్నారు. ప్రచారంలో జెడ్పీటీసీ రామకృష్ణారెడ్డి, టీఆర్‌ఎస్ నాయకులు నర్సింహగౌడ్, ఉస్సేన్, గణేష్, మాధవి, మల్లేశ్వరీ, శివ పాల్గొన్నారు.