న్యూఢిల్లీ: ఇదో కొత్త తరహా చాలెంజ్‌.. యువతను నడి రోడ్లపై నాట్యం చేయిస్తున్న  సరికొత్త సోషల్‌ మీడియా సవాల్‌.. ఇదే కికీ డ్యాన్స్‌ చాలెంజ్‌. కదిలే వాహనంలో నుంచి కిందకు దూకి, ఆ వాహనంతో పాటే సమాంతరంగా లయబద్ధంగా కదులుతూ.. కెనడా ర్యాప్‌ స్టార్‌ డ్రేక్‌ పాడిన ‘ఇన్‌ మై ఫీలింగ్స్‌’ పాటకు నాట్యం చేయడమే ఈ చాలెంజ్‌. ఈ సవాలును స్వీకరించినవారు ఈ మొత్తం ప్రక్రియను రికార్డు చేసి ఇన్‌స్టాగ్రామ్‌ లేదా ఇతర సోషల్‌ మీడియా సైట్లలో అప్‌లోడ్‌ చేస్తారు. ఈ డ్యాన్స్‌ సవాల్‌ ఇప్పుడు దేశవిదేశాల్లో యువతను ఉర్రూతలూగిస్తోంది. సాధారణ యువతరం మొదలుకొని సెలబ్రిటీస్‌ వరకూ ఈ చాలెంజ్‌ను స్వీకరించి తమ వీడియోలను అప్‌లోడ్‌ చేస్తున్నారు. విల్‌ స్మిత్, సియారా లాంటి ప్రముఖులూ ఈ చాలెంజ్‌లో పాల్గొన్నారు. అయితే, ఈ డ్యాన్స్‌ ఫీట్‌ ప్రమాదకరమైనదని, దీని జోలికి వెళ్లవద్దంటూ పోలీసులు హెచ్చరిస్తున్నారు. తెరచి ఉన్న అంబులెన్స్‌ డోర్‌ పక్కగా ఓ యువకుడు డ్యాన్స్‌ చేస్తున్న వీడియోను షేర్‌ చేస్తూ ఢిల్లీ పోలీసులు ఒక ట్వీట్‌ చేశారు. ‘రోడ్లపై నాట్యం చేస్తే మీ కోసం మరో ద్వారాలు తెరుచుకుంటాయి’ అనే హెచ్చరిక ఆ ట్వీట్‌ లో ఉంటుంది.   ప్రమాదాలతో డ్యాన్స్‌ ఈ కికీ చాలెంజ్‌ మైకంలో పడి చాలా మంది ప్రమాదాలను కొనితెచ్చుకుంటున్నారు. కారు దిగే సమయంలో జారిపడి గాయపడుతున్న వారు కొందరైతే, నడుస్తున్న కారు పక్కనే డాన్స్‌ చేస్తూ, కారు తనని దాటిపోకుండా ఓ పక్క జాగ్రత్త పడుతూ చేసే ఈ నృత్యం మత్తులో పడి ఎదురుగా ఏముందో కూడా చూసుకోకుండా ఎదురొస్తున్న వాహనాలు, లేదా రోడ్డు పక్కనున్న స్తంభాలకు గుద్దుకొని, లేదా రోడ్లపైనున్న గుంతల్లో పడి గాయాల పాలవుతున్నవారు మరికొందరు. అసలెక్కడిదీ చాలెంజ్‌: కికీ చాలెంజ్‌ అనే ఈ ఇంటర్‌నెట్‌ సంచలనానికి మరో పేరు ‘ ఇన్‌ మై ఫీలింగ్స్‌’. డ్రేక్‌ గ్రాహం అనే 24 ఏళ్ల కెనడియన్‌ యువ గాయకుడు ఇటీవల విడుదలైన తన ‘స్కార్పియన్‌’ ఆల్బంలోని ‘ఇన్‌మై ఫీలింగ్స్‌’ అనే పాటలో ‘కికీ డూ యూ లవ్‌ మీ’ అని ప్రశ్నిస్తాడు. అయితే ఈ పాటకీ, ‘కికీ చాలెంజ్‌’కీ ఏ సంబంధమూ లేదు. అయితే ఇంటర్‌నెట్‌ కమెడియన్‌ షిగ్గీ ఈ పాటకు డాన్స్‌ చేసి దాన్ని ఇన్‌ స్టాగ్రాంలో పోస్ట్‌ చేయడంతో వేలాది మంది అనుసరిస్తున్నారు. ప్రపంచవ్యాప్తంగా ఆంక్షలు అత్యంత ప్రమాదకరమైన ఈ నృత్యంపై యిప్పుడు ఇండియా, అమెరికా, స్పెయిన్,  మలేషియా, యునైటెడ్‌ అరబ్‌ ఎమిరేట్స్‌లో ఆంక్షలు విధించారు. ప్రమాదకరమైన ఈ కారు నృత్యాన్ని అనుకరించొద్దంటూ ముంబై, చండీగఢ్, లక్నోలాంటి నగరాల్లో పోలీసులు ప్రచారం చేస్తున్నారు. ప్రపంచంలోని అనేక దేశాల్లో ఈ కికీ ఛాలెంజ్‌లో పాల్గొంటున్న వారి ని నిర్బంధంలోకి తీసుకుంటున్నారు. స్పెయిన్‌ పోలీసులు ఈ నృత్యం చేయొద్దని హెచ్చరికలు జారీ చేశారు.ఫ్లోరిడాలో దీన్ని నేరంగా భావించి వెయ్యి డాలర్ల జరిమానా విధిస్తున్నారు.


 న్యూటన్ మొదటి సూత్రం ప్రకారం చలనంలో ఉన్న వస్తువు చలన జడత్వాన్ని, నిశ్చల స్థితిలో ఉన్న వస్తువు నిశ్చల జడత్వాన్ని కలిగి ఉంటారుు. జడత్వం అంటే వస్తువు తనంతట తానే తన స్థితిని మార్చకోలేకపోవటం. అంటే కదిలే బస్సుకు ఎంత వేగం ఉంటుందో, బస్సులోని వ్యక్తికీ అంతే వేగం ఉంటుంది. ఎవరైనా ఒక వ్యక్తి కదిలే బస్సులో నుంచి ఒక్కసారిగా కిందకు దిగితే పడిపోతాడు. దీనికి కారణం బస్సులో నుంచి దిగగానే అతని దిశ బస్సు ప్రయాణించే దిశలో ఉండటం.
 పైగా అతని వేగం బస్సు వేగంతో సమానంగా ఉండటమే. ఇందువల్ల తన చలన జడత్వాన్ని, దిశా జడత్వాన్ని అధిగమించటం కోసం బస్సు నుంచి దిగిన వ్యక్తి తన క్షేమం కోసం బస్సు ప్రయాణించే దిశలో కొన్ని సెకన్లపాటు పరుగెత్తాల్సిందే. అలా కాకుంటే ప్రమాదానికి గురికాక తప్పదు. అందుకే కదిలే వాహనాల నుంచి దిగరాదని హెచ్చరిస్తుంటారు.