అమృత్‌సర్: నభా జైలుపై సాయుధులు దాడి చేసి.. ఖలీస్థాన్‌ ఉగ్రవాది హర్మిందర్‌ సింగ్‌ మింటూను విడిపించుకొని వెళ్లిన ఘటనతో పంజాబ్లో హైఅలర్ట్ ప్రకటించారు. మింటూతో పాటు మరో నలుగురు క్రిమినల్స్ సైతం జైలు నుంచి పారిపోయిన ఈ ఘటనను ఆ రాష్ట్ర ప్రభుత్వం సీరియస్‌గా తీసుకుంది. వీరిని పట్టుకునేందుకు స్పెషల్‌ టాస్క్ఫోర్స్‌ను ఏర్పాటు చేసినట్లు పంజాబ్‌ డిప్యూటీ సీఎం సుఖ్‌బీర్‌ సింగ్‌ బాదల్ వెల్లడించారు. రాష్ట్ర వ్యాప్తంగా భారీ ఎత్తున పోలీసులు తనిఖీలు నిర్వహిస్తున్నారు. మరోవైపు ఢిల్లీ, హరియాణాల్లో సైతం అధికారులు అప్రమత్తమయ్యారు.
  
 జైలుపై దాడి, నేరస్తుల పరారీ ఘటనపై ఏడీజీపీ ఆధ్వర్యంలో విచారణ జరుగుతుందని.. బాధ్యులపై కఠిన చర్యలు తీసుకుంటామని బాదల్‌ తెలిపారు. జైళ్ల శాఖ డీజీని సస్పెండ్‌ చేసినట్లు సుఖ్‌బీర్ సింగ్ బాదల్ తెలిపారు.
  


 పంజాబ్‌: పంజాబ్‌లో ఖలీస్థాన్‌ లిబరేషన్‌ ఫోర్స్‌ చీఫ్‌ హర్మిందర్‌ సింగ్‌ అలియాస్‌ మింటూతోపాటు నలుగురు తప్పించుకున్న నేపథ్యంలో పంజాబ్‌ జైళ్ల శాఖ డీజీపై సస్పెన్షన్‌ వేటు పడింది. అనంతరం పంజాబ్‌లో హై అలర్ట్‌ విధించారు. పోలీసులు అప్రమత్తమయ్యారు.
 
 జైలు నుంచి సుమారు 50 కిలో మీటర్ల దూరంలో పికెటింగ్‌ ఏర్పాటు చేశారు. ఖైదీల పరారీ నేపథ్యంలో ఢిల్లీ, హరియాణాలోనూ హై అలర్ట్‌ విధించారు. పంజాబ్‌లో ఆదివారం ఉదయం పోలీసు దుస్తుల్లో వచ్చిన సాయుధులు జైలుపై విరుచుకుపడిన విషయం తెలిసిందే. పంజాబ్‌లోని నభా జైలుపై 10మంది సాయుధులు దాడి చేసి.. ఖలీస్థాన్‌ లిబరేషన్‌ ఫోర్స్‌ చీఫ్‌ హర్మిందర్‌ సింగ్‌ అలియాస్‌ మింటూతోపాటు మరో నలుగురిని విడిపించుకొని తీసుకెళ్లారు. మింటూతోపాటు పరారైన నలుగురు కూడా గ్యాంగ్‌స్టర్లే కావడం గమనార్హం.