అఖండ సినిమాలో కనిపించి అలరించిన వృషభం బండలాగుడు పోటీల్లో ప్రత్యేక ఆకర్షణగా నిలిచింది. అనంతపురం జిల్లా గార్లదిన్నె నుంచి వచ్చిన ఈ వృషభాన్ని తిలకించేందుకు ప్రజలు భారీగా తరలివచ్చారు. ఎమ్మిగనూరు జాతర సందర్భంగా వైడబ్ల్యూసీఎస్‌ మైదానంలో ఎద్దుల బండలాగుడు పోటీలు ఆదివారం ముగిశాయి. సీనియర్‌ వృషభాల విభాగ పోటీల్లో మొదటి స్థానాన్ని ఏ. నారాయణపురానికి చెందిన ఎద్దులు సాధించాయి. వాటి యజమాని మహమ్మద్‌ ఫరీద్‌కు రూ.లక్ష బహుమతి ఇచ్చారు. ద్వితీయ బహుమతి రూ. 75 వేలు ధర్మవరం సుబ్బారెడ్డి, తృతీయ బహుమతి రూ.50 వేలను ప్రొద్దుటూరుకు చెందిన మర్తల చంద్రఓబుల్‌రెడ్డి తీసుకున్నారు. అఖండ వృషభానికి నాలుగో బహుమతి వచ్చింది. – ఎమ్మిగనూరు టౌన్‌

ఆళ్లగడ్డ: పార్వేట ఉత్సవాల్లో భాగంగా ఆదివారం అహోబిలేశుడి మండలంలోని కోటకందుకూరు గ్రామానికి చేరుకున్నారు. గ్రామస్తులు ఊరి పొలిమేర వద్దకు చేరి జ్వాలా నరసింహస్వామి, లక్ష్మీనరసింహాస్వాములు ఉత్సవ పల్లకీకి ఘనస్వాగతం పలికారు. తర్వాత ఉత్సవమూర్తులను గ్రామ తెలుపులపై కొలువుంచి పూజలు నిర్వహించారు. అహోబిలేశుడి రాకతో గ్రామంలో ఎక్కడ చూసినా పండుగ వాతావరణం కనిపించింది. అపూర్వ సమ్మేళనం మహానంది: గాజులపల్లె జిల్లా పరిషత్‌ పాఠశాల 2008–09 బ్యాచ్‌ పూర్వ విద్యార్థుల ఆత్మీ య సమ్మేళనం ఆదివారం ఘనంగా జరిగింది. 17 సంవత్సరాల తర్వాత కలుసుకున్న వారు చదువుకున్నప్పటి జ్ఞాపకాలను నెమరువేసుకుంటూ కబుర్లు చెప్పుకున్నారు. నాడు చదువు చెప్పిన ఉపాధ్యాయులను సన్మానించి తమ గురుప్రేమ చాటుకున్నారు. కుంభాభిషేకానికి ముస్తాబు కౌతాళం: కుంభాభిషేకానికి ఉరుకుంద ఈరన్నస్వామి క్షేత్రం ముస్తాబవుతోంది. ఈ కార్యక్రమాన్ని ఫిబ్రవరి 1నుంచి 3వ తేదీ వరకు నిర్వహించనున్నారు. క్షేత్ర పరిధిలో భక్తులకు ఇబ్బంది లేకుండా వివిధ అభివృద్ధి పనులు చేస్తున్నారు. ప్రధాన అర్చ్‌గేట్‌కు ఇరువైపులా ఉన్న డివైర్లను తొలగించి చదును చేస్తున్నారు. ఉత్తర ద్వారం వద్ద ఉన్న పాత కార్యాలయాన్ని పూర్తిగా పడగొట్టి చదును చేశారు. దక్షిణ ద్వారం నుంచి ప్రధాన అర్చిగేట్‌ వరకు ప్లాట్‌ఫాం నిర్మిస్తున్నారు. కొత్తగా నిర్మించిన నాలుగు రాజగోపురాలకు రంగుల వేయడం పూర్తి చేశారు. అలరించిన ‘కనక పుష్య రాగం’ కర్నూలు కల్చరల్‌: నగరంలోని సీక్యాంప్‌ టీజీవీ కళాక్షేత్రంలో ఆదివారం ప్రదర్శించిన ‘కనక పుష్య రాగం’ సాంఘిక నాటిక ప్రేక్షకులను అలరించింది. విజయవాడ దృశ్య వేదిక వారి ఆధ్వర్యంలో రాఘవ రచనలో ఎస్‌.కె.మిశ్రో దర్శకత్వం వహించిన ఈ నాటిక ప్రదర్శన ఆకట్టుకుంది. ఈ సందర్భంగా శ్రీశైలం ప్రాజెక్ట్‌ డిప్యూటీ కలెక్టర్‌ పి.కొండయ్య మాట్లాడుతూ నాటకాలు సామాజిక మార్పునకు ఉపయోగపడతాయన్నారు. రవీంద్ర విద్యా సంస్థల చైర్మన్‌ జీవీఎమ్‌ మోహన్‌ మాట్లాడుతూ నాటకాల ద్వారా ప్రజల్లో చైతన్యం కలుగుతుందన్నారు. నాటక దర్శకులు ఎస్‌.కె.మిశ్రో మాట్లాడుతూ సామాజిక పరవర్తనకు సాంఘిక నాటికలు మూలమన్నారు. నాటక దర్శకుడికి టీజీవీ కళాక్షేత్రం కార్యవర్గ సభ్యులు రూ. 30వేల పారితోషికం అందించారు.

పాణ్యం: ఆర్‌అండ్‌బీ అధికారులు ఇష్టారాజ్యంగా వ్యవహరిస్తున్నారు. రోడ్డు విస్తరణ, కాల్వల నిర్మాణ పేరుతో పాణ్యం మండలం ఆలమూరు గ్రామంలో హడావుడిగా రోడ్డు పక్కన ఉన్న ఇళ్ల ముందు మెట్లు, గోడలను కూల్చివేశారు. గత నెల 5వ తేదీన యంత్రాలతో తొలగింపు పనులు జరిగాయి. సాక్షాత్తు రాష్ట్ర ఆర్‌అండ్‌బీ మంత్రి బీసీ జనార్దన్‌రెడ్డి ఈ పనులను పరిశీలించారు. మరి నేటికి నెలన్నరరోజులవుతున్నా రోడ్డు విస్తరణ జరగలేదు..కాల్వల నిర్మాణం మొదలుకాలేదు. ఇళ్ల ముందు కూల్చివేతలతో జనం మాత్రం తీవ్ర ఇబ్బందులు పడుతున్నారు. రాకపోకలకు కూడా తీవ్ర సమస్యగా మారిందని వాహనదారులు వాపోతున్నారు. ఇదిలా ఉంటే జాప్యంపై ఆర్‌అండ్‌బీ అధికారి వెంకటేశ్వరరెడ్డి వివరణ కోరగా ఆలమూరు గ్రామం మలుపు వద్ద నుంచి ముందున్న కాల్వలో వర్షపునీటిని కలిపేందుకు రూ. 14లక్షలతో ప్రతిపాదనలు పంపామని, అయితే, ఈ పనులకు సంబంధించి ఇంకా అనుమతులు రాలేదని పేర్కొనడం గమనార్హం. రోడ్డు విస్తరణ పేరుతో ఇళ్ల ముందు మెట్లు, గోడలు కూల్చివేత నెలన్నరవుతున్నా మొదలుకాని పనులు

జూపాడుబంగ్లా: పోతిరెడ్డిపాడు హెడ్‌రెగ్యులేటర్‌ వద్ద రోజు రోజుకు నీటిమట్టం తగ్గిపోతుండటంతో రైతన్నలు ఆందోళన చెందుతున్నారు. ఆదివారం శ్రీశైలం జలాశయంలో 855.90 అడుగుల నీటిమట్టం ఉండగా పోతిరెడ్డిపాడు హెడ్‌రెగ్యులేటర్‌ వద్ద 854.90 అడుగుల నీటిమట్టం నమోదైంది. ప్రస్తుతం హెడ్‌రెగ్యులేటర్‌ రెండు గేట్ల నుంచి 2,500 క్యూసెక్కుల నీటిని ఎస్సారెమ్సీ కాల్వలోకి సరఫరా చేస్తున్నారు. ఈ నీటిని బానకచర్ల నీటి నియంత్రణ వ్యవస్థ నుంచి కేసీ ఎస్కేప్‌ కాల్వకు 1,300 క్యూసెక్కులు, ఎస్సార్బీసీ(జీఎన్‌ఎస్‌ఎస్‌) కాల్వకు 1,200 క్యూసెక్కుల నీరు వదులుతున్నారు. తెలంగాణ ప్రభుత్వం విద్యుత్‌ ఉత్పత్తి కోసం శ్రీశైలం జలాశయంలోని నీటిని ఎడాపెడా వినియోగిస్తుంది. దీంతో రోజు రోజుకు జలాశయంలో నీటిమట్టం తగ్గుతోంది. ఫలితంగా పోతిరెడ్డిపాడు హెడ్‌రెగ్యులేటర్‌ వద్ద కూడా నీటిమట్టం తగ్గిపోతుండటంతో అధికారులు కాల్వలకు నీటిసరఫరాను క్రమేణా తగ్గిస్తూ వస్తున్నారు. ఎస్సార్బీసీ, కేసీ ఎస్కేప్‌, తెలుగుగంగ కాల్వల కింద రబీ సీజన్‌ సాగుచేసిన పంటలు పూర్తిస్థాయిలో చేతికందాలంటే కనీసం మార్చి నెలాఖరు వరకు కాల్వలకు సాగునీరు సరఫరా కావాలి. శ్రీశైల డ్యాంలో మరో ఆరు అడుగుల మేర నీటిమట్టం తగ్గితే పోతిరెడ్డిపాడు ద్వారా నీటి విడుదలకు ఇబ్బంది అవుతుంది. అలాంటి పరిస్థితి ఎదురైతే తమ పంటల పరిస్థితి ఏమిటని రైతులు ఆందోళన చెందుతున్నారు. పక్షం రోజుల్లో పోతిరెడ్డిపాడు నుంచి నిలిచిపోనున్న నీటి సరఫరా ఆందోళనలో రైతన్నలు

శ్రీశైలంటెంపుల్‌: ఇకపై ప్రతి గురువారం స్వచ్ఛ శ్రీశైలం కార్యక్రమం చేపట్టనున్నట్లు దేవస్థాన కార్యనిర్వహణాధికారి ఎం.శ్రీనివాసరావు తెలిపారు. ఆదివారం స్వచ్ఛ శ్రీశైలంలో భాగంగా ఏనుగుల చెరువు వద్ద ప్రత్యేక పారిశుద్ధ్య కార్యక్రమాన్ని నిర్వహించారు. మన ఊరు–మనగుడి–మన బాధ్యత స్వచ్ఛంద సేవాసంస్థ నంద్యాల విభాగానికి చెందిన సుమారు 180మంది సేవకులు హాజరై పలుచోట్ల పరిశుభ్రత పనులు చేపట్టారు. అనంతరం ఈఓ శ్రీనివాసరావు మాట్లాడుతూ స్వచ్ఛ శ్రీశైలంలో భాగంగా క్షేత్ర పరిధిలో విస్త్రతంగా పారిశుద్ద్య పనులు చేపట్టడం జరుగుతుందన్నారు. అందరి సహకారంతో ఈ కార్యక్రమం చేపడతామన్నారు. ఇలకైలాసాన్ని పరిశుభ్రంగా ఉంచడమే లక్ష్యంగా పెట్టుకున్నామని చెప్పారు. స్వచ్ఛంద సేవకులకు ఈఓ వృక్ష ప్రసాదంగా ఊసిరి, బిల్వం మొక్కలు అందజేశారు. కార్యక్రమంలో ఎగ్జిక్యూటీవ్‌ ఇంజినీర్‌ ఎం.నరసింహారెడ్డి, ఏఈఓ మల్లికార్జునరెడ్డి, ఉద్యానవన అధికారి లోకేష్‌ పాల్గొన్నారు.

● దివ్యాంగులకు 23 నుంచి ఆసుపత్రుల్లో మళ్లీ వైద్య పరీక్షలు ● అర్హత ఉన్నప్పటికీ అనర్హత వేటు వేసే అవకాశంకర్నూలు(అగ్రికల్చర్‌): దివ్యాంగులపై కూటమి ప్రభుత్వం పగ పట్టింది. రూ.6,000 పింఛన్‌ పొందుతున్న దివ్యాంగులందరూ మళ్లీ అర్హత పరీక్షకు హాజరు కావాలని ఆదేశాలు జారీ చేసింది. పింఛన్‌దారులైన దివ్యాంగులకు ఈ నెల 20 నుంచి నోటీసులు ఇవ్వడం, 23 నుంచి డాక్టర్ల ద్వారా పరీక్షలు నిర్వహించేందుకు చర్యలు చేపట్టింది. ఎన్నికల సమయంలో దివ్యాంగుల పింఛన్‌ను రూ.6,000కు పెంచుతామని చంద్రబాబు నాయుడు ప్రకటించారు. అధికారంలోకి వచ్చిన తర్వాత దివ్యాంగులపై అనర్హత అనే కొరడా ఝుళిపిస్తున్నారు. ఇలా చేస్తారు... ఉమ్మడి కర్నూలు జిల్లాలో రూ.6,000 ప్రకారం పింఛన్‌ తీసుకుంటున్న దివ్యాంగులు జనవరి నెలలో 56,645 మంది ఉన్నారు. కర్నూలు జిల్లాలో పూర్తి స్థాయిలో అర్హత పరీక్షలు నిర్వహిస్తుండగా.. నంద్యాల జిల్లాలో పైలెట్‌ ప్రాజెక్టు కింద ఈ నెల 21 నుంచి 23 వరకు అంధులు, బధిరులు (చెవిటి, మూగ) వారికి మాత్రమే వైద్య పరీక్షలు చేయనున్నారు. కర్నూలు జిల్లాలో పింఛన్‌ పొందుతున్న దివ్యాంగులు 31,002 మంది ఉన్నారు. వీరందరూ మళ్లీ వైద్య పరీక్షలకు హాజరు కావాల్సిందే. ప్రస్తుతం పింఛన్‌ పొందుతున్న దివ్యాంగుల్లో 85–90 శాతం మంది టీడీపీ హయాం నుంచి ఉన్నారు. 30 వేల దివ్యాంగుల్లో 10–15 శాతం వరకే వైఎస్సార్‌సీపీ ప్రభుత్వంలో పింఛన్‌ మంజూరైంది. పింఛన్ల భారాన్ని తగ్గుంచుకోవడమే లక్ష్యంగా ప్రస్తుతం అనర్హత అస్త్రాన్ని ప్రయోగిస్తున్నారు. కర్నూలు సర్వజన వైద్యశాలతో పాటు ఆదోని ఏరియా హాస్పిటల్‌ తదితర ఆసుపత్రుల్లో కూడా దివ్యాంగులకు వైద్య పరీక్షలు (రీఅసెస్‌మెంటు) చేస్తారు. రోజుకు ఒక్కో ఆసుపత్రిలో 60 మంది దివ్యాంగులకు పరీక్షలు నిర్వహిస్తారు. పరీక్షలకు హాజరు కాకపోతే అనర్హులుగా పరిగణించి పింఛన్‌ తొలగించే అవకాశం ఉందని అధికారులు చెబుతున్నారు. నంద్యాల జిల్లాలో.. నంద్యాల జిల్లాలో దివ్యాంగుల పింఛన్లు పొందుతున్న వారు 25,643 మంది ఉన్నారు. నంద్యాల జిల్లా ఆసుపత్రిలో రోజుకు 120 మందికి పరీక్షలు నిర్వహిస్తారు. ఇందుకు కంటి వైద్యులు, చెవి–ముక్కు–గొంతు వైద్యులతో రెండు టీములు ఏర్పాటు చేశారు. మంగళ, బుధ, గురువారాల్లో రోజుకు 120 మంది ప్రకారం వైద్య పరీక్షలు నిర్వహించేందుకు నోటీసులు జారీ చేయనున్నారు. సర్వత్రా ఆందోళన రాష్ట్రంలో కూటమి ప్రభుత్వం ఏర్పాటైన తర్వాత కొత్త పింఛన్లు ఒక్కటీ ఇవ్వక పోగా.. పింఛన్లు తొలగిస్తూ లబ్ధిదారులను భయభ్రాంతులకు గురి చేస్తోంది. వీలైనంత ఎక్కువ దివ్యాంగులకు అనర్హత చూపాలని టీడీపీ నేతలు ఇప్పటికే సంబంధిత ఆసుపత్రుల సూపరింటెండెట్లకు మౌఖికంగా ఆదేశాలు ఇచ్చినట్లు సమాచారం. అర్హత ఉన్నప్పటికీ అనర్హత వేటు వేసేందుకు ఇప్పటికి రంగం సిద్ధమైనట్లు తెలుస్తోంది.

జిల్లాలో రీసర్వే జరిగే గ్రామాలు మండలం రీసర్వే జరిగే గ్రామం నంద్యాల కానాల మహానంది తమ్మడపల్లె గోస్పాడు ఎస్‌.కూలూరు పాణ్యం గగ్గుటూరు శిరివెళ్ల జీనేపల్లి గడివేముల కొర్రపోలూరు రుద్రవరం బీరవోలు కొలిమిగుండ్ల కల్వటాల ఉయ్యాలవాడ ఎస్‌.కొత్తపల్లి సంజామల హోత్రమాన్‌దిన్నె ఆళ్లగడ్డ గూబగుండం దొర్నిపాడు అర్జునాపురం చాగలమర్రి నీలంపాడు ఆత్మకూరు ఇందిరేశ్వరం బండి ఆత్మకూరు కడమలకాల్వ కొత్తపల్లి బట్టువారిపల్లి వెలుగోడు వేల్పనూరు పగిడ్యాల పగిడ్యాల మిడుతూరు దేవనూరు జూపాడుబంగ్లా ఎనభైబన్నూరు పాములపాడు కంబాలపల్లి డోన్‌ యాపదిన్నె బేతంచెర్ల బుగ్గానిపల్లె ప్యాపిలి పెద్దపోడిల్లా బనగానపల్లె నందవరం అవుకు ఉప్పలపాడు కోవెలకుంట్ల అమడాలరీసర్వేతో ఆందోళన తీరింది వైఎస్‌ జగన్‌మోహన్‌రెడ్డి ముఖ్యమంత్రిగా ఉన్న సమయంలో మా గ్రామంలో రీ సర్వే జరిగింది. నా పేరు మీద సర్వే నెం.507లో 80 సెంట్ల మాగాని భూమి ఉన్నట్లు తేలింది. ఈ విస్తీర్ణానికి సంబంధించిన పత్రం కూడా నాకు ఇచ్చారు. హద్దుల్లో రాల్లోకటి పాతాల్సి ఉంది. ఎన్నికలు రావడంతో ఈ పని ఆగిపోయింది. రీసర్వే మంచిది కాదని ప్రచారం చేశారు. ఏదిఏమైనా జగన్‌ ప్రభుత్వంలో రీసర్వేతో నాకు పక్కాగా భూమి ఎంత ఉందో చెప్పి రికార్డుల్లో , పాస్‌ పుస్తకంలో నమోదు చేశారు. ఎలాంటి ఆందోళన లేకుండా ఈ భూమిలోనే పంటలు పండించుకుంటూ జీవనాధారం పొందుతున్నా. –దూదేకుల హుసేనమ్మ, కానాల గ్రామం, నంద్యాల(మం) రైతుల సమక్షంలో సర్వే గతంలో ఎక్కడైతే రీసర్వే నిలిచిపోయిందో మళ్లీ అక్కడి నుంచే ప్రారంభం అవుతుంది. మండలానికో గ్రామాన్ని పైలట్‌గా ఎంపిక చేశాం. జిల్లాలో 28 గ్రామాల్లో రీసర్వే మొదటి విడతలో జరుగుతుంది. రైతుల సమక్షంలోనే రీసర్వే చేయాలని ఆదేశాలు ఇచ్చాం. డ్రోన్‌ సర్వే, గ్రౌండ్‌ ట్రూతింగ్‌, గ్రౌండ్‌ వ్యాలిడేషన్‌ పనులు గతంలో మాదిరిగానే యథాతథంగా జరుగుతాయి. – జయరాజు, జిల్లా సర్వే విభాగం అధికారి, నంద్యాల నంద్యాల(అర్బన్‌)/కొలిమిగుండ్ల: తాము అధికారంలోకి వస్తే భూముల రీసర్వే చేయబోమని ఎన్నికల ముందు చంద్రబాబునాయుడు, పవన్‌ కల్యాణ్‌ హామీ ఇచ్చారు. వారిచ్చిన మాటపైనే వారికి నమ్మకం లేదో ఏమో.. భూ సమస్యల పరిష్కారం కోసం వైఎస్సార్‌సీపీ ప్రభుత్వం హయాంలో చేపట్టిన రీసర్వేను కొనసాగించాలని నిర్ణయించారు. భూ సమస్యల పరిష్కారానికి ఇంతకంటే మంచి మార్గం మరొకటి లేదని వారు గ్రహించి ఉంటారనే చర్చ రైతుల్లో జోరుగా సాగుతోంది. ఈ క్రమంలో వైఎస్సార్‌ జగనన్న భూ హక్కు భూరక్ష పథకం పేరు ఏపీ రీసర్వే ప్రాజెక్టు పేరుతో మార్చి ఈనెల 20వ తేదీ నుంచి మళ్లీ రీసర్వేను ప్రారంభించనున్నారు. గత ప్రభుత్వ హయాంలో ఎక్కడి నుంచి అయితే రీసర్వే నిలిచిపోయిందో అక్కడి నుంచే తిరిగి ప్రారంభించడానికి అధికారులు చర్యలు తీసుకుంటున్నారు. 2019–24 మధ్య సీఎంగా ఉన్న వైఎస్‌ జగన్‌మోహన్‌రెడ్డి హయాంలో జరిగిన రీసర్వే చరిత్రాత్మకం. ఈ సర్వేతో రైతుల సమస్యలు ఒక్కొక్కటిగా తొలగిపోతున్నాయని కేంద్ర ప్రభుత్వం ప్రశంసలు గుప్పించింది. ఏళ్లకు ఏళ్లుగా భూసమస్యల పరిష్కారం కోసం ప్రభుత్వ కార్యాలయాల ఎదుట బాధిత రైతులు బారులు తీరే వారు. వాటికి పరిష్కారం చూపడం అధికారులకు కష్టతరమైన పని. ఈక్రమంలో ఎప్పుడో నూరేళ్ల కింద బ్రిటీషు ప్రభుత్వ హయాంలో జరిగిన సర్వేను మళ్లీ సర్వే చేసి అన్నదాతలకు ఇబ్బంది లేకుండా చేయాలని అప్పటి వైఎస్సార్‌సీపీ ప్రభుత్వం సంకల్పించింది. అందులో భాగంగా భూముల రీసర్వేతోపాటు రికార్డుల ఫ్యూరిఫికేషన్‌కు శ్రీకారం చుట్టింది. ఇందులో భాగంగా జిల్లాలో మొత్తం మూడు విడతల్లో 449 రెవెన్యూ గ్రామాలకుగాను 211 గ్రామాల్లో రీసర్వేను పూర్తి చేసి రెండు లక్షల మందికి పైగా రైతులకు భూ హక్కు పత్రాలు ఇచ్చింది. ఇంకా 238 గ్రామాల్లో రీసర్వే చేయాల్సి ఉండగా ఎన్నికలు జరగడంతో చరిత్రాత్మక ప్రాజెక్టు నిలిచిపోయింది. వైఎస్సార్‌ జగనన్న భూ హక్కు..భూరక్ష పథకంపై ఎన్నికల ముందు చంద్రబాబునాయుడు విషం చిమ్మారు. రైతుల భూములను సర్వే చేసే హక్కు ఎవరు ఇచ్చారని ఏక వచనంతో అప్పటి సీఎం వైఎస్‌ జగన్‌మోహన్‌రెడ్డి దూషించారు. అందుకు ఎల్లో మీడియా వంతపాడింది. టీడీపీ సోషల్‌ మీడియా లేనిపోని భయాందోళన ప్రజల్లో రేకెత్తించింది. కూటమి ప్రభుత్వం అధికారంలోకి వస్తే రీసర్వేను మళ్లీ చేపట్టబోమని హామీ ఇచ్చారు. కూటమి ప్రభుత్వం అధికారంలోకి రావడంతో అందరూ రీసర్వే జరగదని భావించారు. అయితే వారి అంచనాలను తలకిందులు చేస్తూ జగన్‌ సర్కారు చేపట్టిన రీసర్వే కొనసాగించేందుకు సీఎం చంద్రబాబునాయుడు పచ్చజెండా ఊపారు. ఈ క్రమంలో ఆనాడు ఎల్లో మీడియా, సోషల్‌ మీడియా చేసిన వ్యాఖ్యలు అబద్ధమని తెలిపోయింది. మండలానికో పైలెట్‌ గ్రామం ఎంపిక నేటి నుంచి రీసర్వే తిరిగి ప్రారంభం కానున్నది. వైఎస్సార్‌ జగనన్న భూ హక్కు–భూరక్ష పేరును ఏపీ రీసర్వే ప్రాజెక్టు పేరుతో మార్చి రీసర్వే చేయనున్నారు. మండలానికో గ్రామాన్ని పైలెట్‌ ప్రాజెక్టుగా ఎంపిక చేసుకొని రీసర్వే చేస్తారు. జిల్లాలోని 28 మండలాల్లో 28 గ్రామాలను రీసర్వే పైలట్‌ ప్రాజెక్టు కోసం ఎంపిక చేశారు. ఇందుకోసం రీసర్వే డీటీలు, మండల సర్వేయర్లు, విలేజ్‌ సర్వేయర్లకు ఇప్పటికే శిక్షణ కూడా ఇచ్చారు. అయితే, రైతుల సమక్షంలోనే రీసర్వే జరగాలనే చిన్న మెలికను మాత్రం పెట్టారు. జిల్లాలో 28 గ్రామాల పరిధిలోని 95,136 ఎకరాల భూమిని 86 సర్వే బృందాలతో రీసర్వే చేస్తారు. ఎన్నికల ముందు విషం చిమ్మి.. నేటి నుంచి మళ్లీ భూముల ‘రీసర్వే’ జగనన్న బాటలోనే కూటమి ప్రభుత్వం నాడు ఎన్నికల్లో లబ్ధి కోసం రాద్ధాంతం చేసిన వైనం అధికారంలోకి వచ్చాక తిరిగి రీ సర్వేకు పచ్చజెండా గతంలో ఎక్కడ నిలిచిందో అక్కడి నుంచే మొదలు తొలుత జిల్లాలో 28 గ్రామాల్లో నిర్వహణ రీ సర్వే చే సే విస్తీర్ణం 95,136 ఎకరాలు ప్రస్తుతం రీ సర్వే జరిగే ఊర్లు 28 రోవర్లు, ల్యాప్‌టాప్‌ల కొరత.. జిల్లా వ్యాప్తంగా నేటి నుంచి చేపట్టనున్న రీ సర్వేకు 86మంది సర్వేయర్లను అధికారులు నియమించారు. ప్రతి సర్వే బృందానికి తప్పని సరిగా రోవర్‌, ల్యాప్‌టాప్‌లు ఉండాలి. అయితే, ప్రస్తుతం వాటి కొరత తీవ్రంగా ఉన్నట్లు సమాచారం. పూర్తి స్థాయిలో రోవర్లు, ల్యాప్‌టాప్‌లు సమకూర్చుకోకుండా రీ సర్వే చేస్తే కచ్చితత్వం రాదని రైతులు ఆందోళన వ్యక్తం చేస్తున్నారు. వైఎస్సార్‌సీపీ పాలనలో రీ సర్వే పూర్తయిన గ్రామాలు 211 జిల్లా మొత్తం భూ విస్తీర్ణం 16,98,307 ఎకరాలు గత ప్రభుత్వంలో పూర్తైన రీ సర్వే విస్తీర్ణం 6,03,487 ఎకరాలుజిల్లాలో రెవెన్యూ గ్రామాలు 449

శ్రీశైలంప్రాజెక్ట్‌: ట్రైకార్‌తో గిరిజనుల ఆర్థికాభివృద్ధికి ఏఏ పథకాలను తీసుకు వస్తే బాగుంటుంది అనే అంశంపై రాష్ట్ర ట్రైకార్‌ చైర్మన్‌ బొరగం శ్రీనివాసులు సమీక్ష నిర్వహించారు. శ్రీశైలం సమీకృత గిరిజనాభివృద్ధి (ఐటీడీఏ)లో శనివారం నిర్వహించిన ఈ కార్యక్రమానికి డైరెక్టర్లు, సిబ్బంది, గిరిజన నాయకులు హాజరయ్యారు. ఐటీడీఏ పరిధిలోని గిరిజనులకు గతంలో ఏఏ పథకాలు వర్తించాయి, వాటి కోసం ఎంత మొత్తం నిధులు వినియోగించారు తదితర అంశాలపై సమర్పి ంచిన నివేదికలను పరిశీలించారు. ప్రస్తుతం ట్రైకార్‌ ద్వారా ఏఏ పథకాలను తీసుకు వస్తే బాగుంటుందనే అనే అంశంపై చర్చించారు. సమావేశంలో డైరెక్టర్లు పి.లావణ్య, టి.అనురాధ, పీఓ కె.వెంకటశివప్రసాద్‌, ఏపీఓ ఎ.సురేష్‌కుమార్‌, స్టేట్‌ గవర్నింగ్‌ బాడీ కమిటీ సభ్యులు చెవుల అంజయ్య, భూమని మంతన్న, డీఈఈ రియాజ్‌అహ్మద్‌, జీసీసీ డీవీఎం పుల్లయ్య, హార్టికల్చర్‌ అధికారి బీసీ ధనుంజయ, ఎన్‌ఆర్‌ఈజీ ఎస్‌ ప్రాజెక్ట్‌ మేనేజర్‌ కె.గుండాలనాయక్‌ పాల్గొన్నారు. ● ఐటీడీఏ ప్రాజెక్ట్‌ అధికారి పర్యవేక్షణలో గిరిజనులకు ఉపాధి హామీ పనులు కల్పించాలని కొమరంభీం చెంచుగిరిజన సంఘం సభ్యులు వై.ఆశీర్వాదం, వీరయ్య, కొలమయ్య, అక్ష్మీదేవి, మూగమ్మ, వీరమ్మ తదితరులు ట్రైకార్‌ చైర్మన్‌ శ్రీనివాసులుకు వినతి పత్రం ఇచ్చారు.

బొమ్మలసత్రం: నంద్యాల సబ్‌డివిజన్‌ పోలీస్‌ అధికారిణిగా ఐపీఎస్‌ మందా జావళి ఆల్ఫోన్‌ శనివారం బాధ్యతలు స్వీకరించారు. అనంతరం ఆమె మాట్లాడుతూ తాను 2022 ఐపీఎస్‌ బ్యాచ్‌కు సెలెక్ట్‌ అయ్యానన్నారు. శాంతి భద్రతల పరిరక్షణతో పాటు నేర నియంత్రణకు కృషి చేస్తానన్నారు. అలాగే మహిళలు, బాలల భద్రతకు ప్రాధాన్యత ఇస్తానని చెప్పారు. ప్రత్యేకంగా టీం ఏర్పాటు చేసి రౌడీషీటర్లపై ప్రత్యేక నిఘా ఉంచనున్నట్లు వెల్లడించారు. గడ్డిమైదానాల పర్యవేక్షణకు ప్రత్యేక శిక్షణ ఆత్మకూరు రూరల్‌: నాగార్జునసాగర్‌ – శ్రీశైలం పెద్దపులుల అభయారణ్యంలో గడ్డి మైదానాల పర్యవేక్షణకు నంద్యాల సర్కిల్‌ పరిధిలో ప్రత్యేక శిక్షణ ప్రారంభమైంది. ఆత్మకూరు డివిజన్‌ పరిధిలోని బైర్లూటి రేంజ్‌లో ప్రాజెక్ట్‌ టైగర్‌ ఆత్మకూరు డీడీ సాయిబాబా ఆధ్వర్యంలో శనివారం ఈ కార్యక్రమం జరిగింది. గ్రాస్‌మాన్‌ ఆఫ్‌ ఇండియాగా ప్రసిద్ధి పొందిన డాక్టర్‌ ముర్తుకర్‌ నల్లమలలోని గడ్డి మైదానాలపై అధ్యయనం చేసి ఇచ్చిన రిపోర్ట్‌ ఆధారంగా ఈశిక్షణ కార్యక్రమాలు రూపొందించారు. భూమి స్థితి, రంగును బట్టి గడ్డి జాతుల ఎంపిక, సంవత్సర కాలవ్యవధి గల జాతుల ఎంపిక ,వన్యప్రాణులకు మేయడానికి అక్కరకు రాని కలుపు మొక్కల తొలగింపు, గడ్డి విత్తనాల సేకరణ తదితర అంశాలపై సిబ్బందికి ట్రైనింగ్‌ ఇచ్చారు. కార్యక్రమంలో నంద్యాల డీడీఅనురాగ్‌ మీన , శ్రీశైలం సబ్‌ – డీఎఫ్‌ఓ అబ్దుల్‌ రౌఫ్‌, ఎఫ్‌ఆర్‌ఓలు, ఎఫ్‌ఎస్‌ఓలు ఇతర సిబ్బంది పాల్గొన్నారు. ‘ప్రధానమంత్రి ఇంటర్న్‌ షిప్‌’ని సద్వినియోగం చేసుకోండి నంద్యాల: జిల్లావ్యాప్తంగా నిరుద్యోగ యువతకు ఉపాధి నైపుణ్య అవకాశాలు కల్పించడమే లక్ష్యంగా కేంద్ర ప్రభుత్వం పీఎం ఇంటర్న్‌ షిప్‌ పథకాన్ని ప్రారంభించిందని జిల్లా కలెక్టర్‌ రాజకుమారి శనివారం ఒక ప్రకటనలో తెలిపారు. ఆసక్తిగల యువతీ యువకులు ఈనెల 21వ తేదీలోగా కేంద్ర ప్రభుత్వం ప్రవేశపెట్టిన ప్రత్యేక పోర్టల్‌ https://pminternship.mca. gov.in/login/ లాగిన్‌ అయి ఆన్‌లైన్‌లో దరఖాస్తు చేసుకోవాలన్నారు. ఈ స్కీంలో ఎంపికై న అభ్యర్థులకు దేశంలోని టాప్‌ 500 కంపెనీల్లో ఇంటర్న్‌ షిప్‌ అవకాశాలు కల్పిస్తారన్నారు. వన్‌టైం గ్రాంట్‌ కింద రూ.6వేలతో పాటు ప్రతి నెల రూ.5వేలు స్టైఫండ్‌ కూడా చెల్లించనున్నట్లు కలెక్టర్‌ తెలిపారు. సీహెచ్‌ఎస్‌సీ, ఐటీఐ, పాలిటెక్నిక్‌, బీఎస్సీ, బీకాం, బీసీఏ, బీఫార్మసీ తదితర గ్రాడ్యుయేషన్‌ పూర్తి చేసి 21 నుంచి 24 ఏళ్ల మధ్య వయస్సు కలిగి ఉన్న వారు అర్హులన్నారు. వివరాలకు 6300324076, 8297812530 నంబర్లను సంప్రదించాలన్నారు. పనితీరు మార్చుకోకపోతే తొలగిస్తాం ● ఉపాధి సిబ్బందికి డ్వామా పీడీ హెచ్చరిక చాగలమర్రి: పనితీరు మార్చుకోకపోతే ఉద్యోగాల నుంచి తొలగిస్తామని డ్వామా పీడీ జనార్దన్‌రావు ఉపాధి సిబ్బందిని హెచ్చరించారు. శనివారం స్థానిక ఎంపీడీఓ కార్యాలయంలో ఎన్‌ఆర్‌ఈజీఎస్‌ సిబ్బందితో సమావేశమై మాట్లాడారు. ఏపీఓ నిర్మల, టెక్నికల్‌ అసిస్టెంట్లు బాలు నాయక్‌, రవి, మద్దిలేటి, నరసింహరెడ్డిల పనితీరును పరిశీలించి ఆగ్రహం వ్యక్తం చేశారు. మండలంలో ఎన్‌ఆర్‌ఈజీఎస్‌ కింద ఈ ఏడాది కూలీలకు 2.85 లక్షల పని దినాలు కల్పించాల్సి ఉండగా ఇప్పటి వరకు 1.65 లక్షల పని దినాలు మాత్రమే కల్పించారని, గోకులం షేడ్లు 20 మంజూరైతే వాటిలో 10 మాత్రమే పూర్తి చేశారని మండిపడ్డారు. ఇలా ప్రతి విషయంలో వారు నిర్లక్ష్యంగా వ్యవహరిస్తున్నారని అక్కడికక్కడే నోటీసులు జారీ చేశారు. మూడురోజుల్లో సమాధానం చెప్పి, పనితీరు మార్చుకోకపోతే తొలగిస్తామని హెచ్చరించారు. సమావేశంలో ఎంపీడీఓ రాజేంద్రప్రసాద్‌, ఏపీడీ సాంబశివారావు తదితరులు పాల్గొన్నారు.

నంద్యాల(న్యూటౌన్‌): ఉమ్మడి కర్నూలు జిల్లాలో శనివారం జవహర్‌ నవోదయ 6వ తరగతి ప్రవేశ పరీక్ష ప్రశాంతంగా జరిగింది. 80 సీట్ల కోసం 6,035 మంది విద్యార్థులు దరఖాస్తు చేసుకోగా 4,879 మంది విద్యార్థులు పరీక్షకు హాజరయ్యారు. మొత్తం 22 కేంద్రాల్లో పరీక్షలు జరిగాయి. నంద్యాల జిల్లాలో ఆళ్లగడ్డ, ఆత్మకూరు, బనగానపల్లె, డోన్‌, కోవెలకుంట్ల, నంద్యాల, నందికొట్కూరులో కేంద్రాలు ఏర్పాటు చేశారు. నంద్యాల పట్టణంలోని ప్రభుత్వ బాలికోన్నత , నంద్యాల సెయింట్‌ జోసెఫ్‌, ఎస్టీ సెయింట్‌ జోసెఫ్‌ పాఠశాలల్లో ఏర్పాటు చేసిన కేంద్రాల్లో పరీక్షల నిర్వహణను డీఈఓ జనార్దన్‌రెడ్డి పరిశీలించారు. అన్ని చోట్ల పరీక్ష ప్రశాంతంగా జరిగిందని ఆయన వెల్లడించారు.

● మినుము రైతుల ఆశలు అడియాసలు ● జిల్లాలో 45 వేల ఎకరాల్లో సాగు ● వెంటాడిన చీడపీడలు ● పూత దశలో అకాల వర్షం ● ఎకరాకు రూ. 30 వేల పెట్టుబడి ● 5 క్వింటాళ్లలోపే దిగుబడులు ● లబోదిబోమంటున్న రైతులు కోవెలకుంట్ల: ఈ ఏడాది రబీసీజన్‌ రైతులకు కలిసిరాలేదు. సీజన్‌లో సాగు చేసిన వివిధ పంటలకు వాతావరణం అనుకూలించకపోవడంతో రైతులు దిగుబడులపై పెట్టుకున్న ఆశలు అడియాసలయ్యాయి. జిల్లాలో ఈ ఏడాది విస్తారంగా సాగైన పప్పుశనగలో తుఫాన్‌ ప్రభావంతో పూత, పిందె రాలిపోయాయి. ప్రస్తుతం జిల్లా వ్యాప్తంగా సాగైన మినుము పంట చేతికందటంతో కోత, నూర్పిడి పనుల్లో రైతులు బిజీ అయ్యారు. జిల్లాలోని 29 మండలాల పరిధిలో 69,842 ఎకరాల్లో మినుము సాగు సాధారణ విస్తీర్ణం కాగా ఆయా ప్రాంతాల్లో వర్షాధారం, సాగునీటి వనరుల ఆధారంగా 44,958 ఎకరాల్లో ఈ పంట వేశారు. ఇందులో స్థానిక వ్యవసాయ సబ్‌ డివిజన్‌లోని కోవెలకుంట్ల మండలంలో 1,300 ఎకరాల్లో, సంజామల మండలంలో 1,162 ఎకరాల్లో, దొర్నిపాడు మండలంలో 603 ఎకరాల్లో, అవుకు మండలంలో 465 ఎకరాల్లో, ఉయ్యాలవాడ మండలంలో 413 ఎకరాల్లో, కొలిమిగుండ్ల మండలంలో 267 ఎకరాల్లో సాగైంది. వెంటాడిన తెగుళ్లు జిల్లాలోని ఆయా ప్రాంతాల్లో విత్తనానికి ముందు ఆశించిన స్థాయిలో వర్షాలు కురవకపోవడంతో సాగు విస్తీర్ణం తగ్గింది. దాదాపు 70 వేల ఎకరాల్లో సాగు చేయాల్సి ఉండగా వర్షాభావ పరిస్థితులతో సాగు 45 వేల ఎకరాలకు పరిమితమైంది. 90 రోజుల పంట కాలం కలిగిన మినుములో విత్తనాలు, రసాయన ఎరువులు, క్రిమి సంహారక మందులు, కలుపునివారణ, కోత, నూర్పిడి, తదితర పెట్టుబడుల రూపంలో ఎకరాకు రూ. 30 వేలు వెచ్చించారు. కౌలు రైతులపై కౌలు రూపంలో అదనంగా మరో రూ. 10 వేలు భారం పడింది. పైరు పూత దశలో ఉండగా తుఫాన్‌ ప్రభావంతో మోస్తరు వర్షాలు కురవడంతో పూత రాలిపోయింది. వర్షానికి తోడు రసం పీల్చుపురుగు, కాండం తొలుచు, పూతలో పురుగుతో పాటు బూడిద, బొంత తెగుళ్లు ఆశించాయి. ఈ తెగుళ్ల బారి నుంచి పైరును కాపాడు కునేందుకు రైతులు అష్టకష్టాలు పడ్డారు. అయినా, పూత రాలిపోయి దిగుబడులపై తీవ్ర ప్రభావం పడింది. ఎకరాకు 7 నుంచి 8 క్వింటాళ్ల దిగుబడులు వస్తాయనుకుంటే నాలుగున్నర క్వింటాళ్లకు మించి దిగుబడులు రాకపోవడంతో రైతులు ఆవేదన వ్యక్తం చేస్తున్నారు. అకాల వర్షాలు, తెగుళ్లే కొంప ముంచాయని వారు వాపోతున్నారు. గతేడాది ఆశించినస్థాయిలో దిగుబడులు జిల్లాలో గతేడాది రబీ సీజన్‌లో 48 వేల ఎకరాల్లో రైతులు మినుము పంట సాగు చేశారు. విత్తనానికి ముందు ఆశించిన స్థాయిలో వర్షాలు కురవడంతోపాటు పైరు వివిధ దశల్లో వాతావరణం అనుకూలంగా మారటంతో మంచి దిగుబడులొచ్చాయి. ఎకరాకు రూ. 25 వేలు పెట్టుబడుల రూపంలో వెచ్చించగా ఎకరాకు 8 క్వింటాళ్ల దిగుబడులు లభించాయి. గత ప్రభుత్వం విత్తనానికి ముందే క్వింటా రూ. 8 వేలు మద్దతు ధర ప్రకటించింది. మార్కెట్‌లో గిట్టుబాటు ధర ఉండటంతో రైతులు కల్లాల్లోనే పంటను విక్రయించి లాభాలు గడించారు. ఈ ఏడాది కోటి ఆశలతో మినుము సాగు చేయగా ప్రకృతి వైపరీత్యాలు దెబ్బతీయడంతో దిగుబడులు తగ్గి నష్టాల ఊబిలో కూరుకుపోయారు. మినుము సాగుతో నష్టపోయిన రైతులను ప్రభుత్వం ఆదుకోవాలని రైతులు కోరుతున్నారు. గిట్టుబాటు ధర కల్పించాలి ఈ ఏడాది మినుముసాగుతో దిగుబడులు తగ్గిపోయాయి. నాకున్న ఎనిమిది ఎకరాల్లో మినుము పంట సాగు చేశాను. గత ఏడాది ఎకరాకు 8 క్వింటాళ్ల దిగుబడులు వచ్చాయి. ఈ ఏడాది చీడపీడలతో ఐదు క్వింటాళ్లకు మించి దిగుబడులు రావడం లేదు. ప్రస్తుతం మార్కెట్‌లో క్వింటా రూ. 7 వేల నుంచి రూ. 8 వేలలోపు ఉంది. క్వింటాకు రూ. 10 వేలు గిట్టుబాటు ధర కల్పిస్తే రైతులు నష్టాల బారి నుంచి కాస్త బయటపడతారు. – రామయ్య, రైతు, జోళదరాశి, కోవెలకుంట్ల మండలం

నంద్యాల: ఇంటితో పాటు చుట్టుపక్కల పరిసరాలను పరిశుభ్రంగా ఉంచుకోవాలని జిల్లా కలెక్టర్‌ రాజకుమారి ప్రజలకు పిలుపునిచ్చారు. శనివారం స్వచ్ఛ ఆంధ్ర– స్వచ్ఛ దివస్‌లో భాగంగా కలెక్టర్‌ నంద్యాల పట్టణంలోని ఆర్టీసీ బస్టాండ్‌ ప్రాంగణమంతా కలియతిరిగి పరిశుభ్రత కార్యక్రమంలో పాల్గొన్నారు. అనంతరం కలెక్టర్‌ మాట్లాడుతూ ప్రభుత్వ ఆదేశాల మేరకు ప్రతి నెల మూడో శనివారం స్వచ్ఛ ఆంధ్ర–స్వచ్ఛ దివస్‌ను జిల్లా వ్యాప్తంగా అన్ని నివాసిత ప్రాంతాలు, గ్రామ పంచాయతీలు, మున్సిపాలిటీలు, పాఠశాలలు, ఆసుపత్రులు, బస్‌ స్టాపులు, రైల్వేస్టేషన్లు, పరిశ్రమలతో పాటు ప్రభుత్వ, ప్రైవేటు కార్యాలయాల్లో పరిశుభ్రత కార్యక్రమాలు ముమ్మరం చేయనున్నట్లు తెలిపారు. ఈ నెల నుంచి 12 నెలల పాటు నెలకు ఒక ఽథీమ్‌తో స్వచ్ఛత కార్యక్రమం చేపడుతున్నట్లు పేర్కొన్నారు. జనవరి మాసానికి సంబంధించి న్యూ ఇయర్‌ – క్లీన్‌ స్టార్‌ థీమ్‌తో కార్యక్రమం చేపట్టామన్నారు. పర్యావరణ పరిరక్షణలో భాగంగా ప్రతి ఒక్కరూ ఇంటి పరిసరాలను ఆహ్లాదకరంగా తీర్చిదిద్దుకోవాలన్నారు. పట్టణాల్లో పెద్ద పెద్ద గార్బేజ్‌ పాయింట్లను తొలగించి వాటి స్థానంలో మొక్కలు నాటే కార్యక్రమం చేపడుతున్నామన్నారు. ఇళ్ల నుంచి సేకరించిన చెత్తను తడి చెత్త, పొడి చెత్తగా విభజించి తడి చెత్త నుంచి కంపోస్ట్‌ తయారు చేసి సంపద సృష్టించే కార్యక్రమం చేపడతామని చెప్పారు. ‘స్వచ్ఛ ఆంధ్ర–స్వచ్ఛ దివస్‌’లో ప్రతి ఒక్కరూ భాగస్వామ్యం కావాలన్నారు. ఈ సందర్భంగా కలెక్టర్‌ దుకాణదారులతో మాట్లాడుతూ వేస్ట్‌ మెటీరియల్‌ను ఎక్కడ పడితే అక్కడ పడేయకుండా చెత్తకుండీల్లో వేసేందుకు పెద్దపెద్ద చెత్తకుండీలను ఏర్పాటు చేసి సైన్‌ బోర్డులు ప్రదర్శించాలన్నారు. కలెక్టర్‌ వెంట స్వచ్ఛత కార్యక్రమంలో పబ్లిక్‌ ట్రాన్స్‌పోర్ట్‌ ఆఫీసర్‌ రజియా సుల్తానా, డిపో మేనేజర్‌ గంగాధర్‌, వార్డు కౌన్సిలర్‌ శేషయ్య తదితరులు పాల్గొన్నారు. అంతకుముందు నంద్యాల మున్సిపల్‌ కార్యాలయము నుంచి మున్సిపల్‌ టౌన్‌హాల్‌ వరకు నిర్వహించిన స్వచ్ఛత భారీ ర్యాలీని కలెక్టర్‌ రాజకుమారితో పాటు ఎమ్మెల్సీ ఇసాక్‌ బాషా, మునిసిపల్‌ చైర్‌పర్సన్‌ మాబున్నిసా జెండా ఊపి ప్రారంభించారు. అనంతరం మధ్యాహ్న సమయంలో కలెక్టరేట్‌ ముఖ ద్వారం నుంచి పీజీఆర్‌ఎస్‌ సెంటినరీ హాల్‌, కలెక్టర్‌ కార్యాలయ పరిసర ప్రాంతాలను పరిశుభ్రం చేసే కార్యక్రమంలో కలెక్టర్‌తో పాటు జాయింట్‌ కలెక్టర్‌ విష్ణు చరణ్‌, డీఆర్‌ఓ రాము నాయక్‌, జిల్లా వ్యవసాయ అధికారి మురళీకృష్ణ, అన్ని సెక్షన్ల సూపరింటెండెంట్లు, కలెక్టరేట్‌ కార్యాలయ సిబ్బంది పాల్గొన్నారు. స్వచ్ఛ ఆంధ్ర– స్వచ్ఛ దివస్‌లో జిల్లా కలెక్టర్‌ రాజకుమారి

ప్యాలకుర్తి వద్ద ఢీకొన్న కారు, ఐచర్‌ వాహనం ● రోడ్డు ప్రమాదంలో ముగ్గురు వ్యక్తులు మృతి కోడుమూరు రూరల్‌: అతివేగం ముగ్గురు వ్యక్తులను బలితీసుకుంది. లారీ, ఐచర్‌ వాహనం ఎదురెదురుగా వేగంగా ఢీకొనడంతో ఈ దుర్ఘటన శుక్రవారం ప్యాలకుర్తి వద్ద చోటు చేసుకుంది. కోడుమూరుకు చెందిన సోమశేఖర్‌ (56), బండ శ్రీనివాసులు (46), రాజోలి శ్రీను (36) పట్టు వస్త్రాల వ్యాపారం చేస్తున్నారు. వీరు ముగ్గరు కారులో కర్నూలుకు వెళ్లి తిరిగి వస్తున్నారు. ప్యాలకుర్తి గ్రామ సమీపాన ఆర్‌టీసీ బస్సును ఓవర్‌టేక్‌ చేస్తూ ఎదురుగా వేగంగా వస్తున్న ఐచర్‌ వాహనం, కారు ఢీకొన్నాయి. ఈ ప్రమాదంలో కారులోని బండ శ్రీనివాసులు తీవ్ర గాయాలతో అక్కడికక్కడే మృతిచెందారు. తీవ్రగాయాలకు గురైన సోమశేఖర్‌, రాజోలి శ్రీనులను చికిత్స నిమిత్తం కోడుమూరు ప్రభుత్వాసుపత్రికి తరలిస్తుండగా మార్గమధ్యలో మృతిచెందారు. మృతుడు సోమశేఖర్‌ కోడుమూరులోని 16వార్డు సభ్యుడు. ఈయనకు భార్య జయలక్ష్మి, ఇద్దరు కుమార్తెలు ఉన్నారు. బండ శ్రీనివాసులుకు భార్య శ్రీలలిత, ఇద్దరు కుమారులు, రాజోలి శ్రీనుకు భార్య సుమశ్రీ, ఇద్దరు కుమార్తెలు, ఏడాదిలోపు బాబు ఉన్నారు. ప్రమాదం విషయం తెలుసుకున్న కోడుమూరు సీఐ తబ్రేజ్‌, ఎస్‌ఐ శ్రీనివాసులు ఘటన స్థలానికి చేరుకున్నారు. కేసు నమోదు చేసుకుని దర్యాప్తు చేస్తున్నారు. మృతుల కుటుంబ సభ్యులకు పరామర్శ విషయం తెలుసుకున్న కుడా మాజీ చైర్మన్‌ కోట్ల హర్షవర్ధన్‌రెడ్డి, జెడ్‌పీటీసీ సభ్యుడు రఘునాథ్‌రెడ్డి, గ్రామ సర్పంచ్‌ భాగ్యరత్న, మాజీ సింగిల్‌ విండో అధ్యక్షుడు క్రిష్ణారెడ్డి, మాజీ సర్పంచ్‌ సీబీ లత, మాజీ ఉప సర్పంచ్‌ ప్రవీణ్‌కుమార్‌ తదితరులు కోడుమూరు ప్రభుత్వాసుపత్రి చేరుకున్నారు. మార్చురీలో ఉన్న మృతదేహాలను సందర్శించారు. మృతుల కుటుంబ సభ్యులను పరామర్శించారు. తమ ప్రగాఢ సానుభూతి తెలియజేశారు. రోడ్డు ప్రమాదంలో మృతిచెందిన ముగ్గురిది ఒకే సామాజిక వర్గం, వరుసకు బంధువులు కావడంతో కోడుమూరులో విషాదఛాయలు అలుము కున్నా యి. కోడుమూరు ప్రభుత్వాసుపత్రి వద్ద మృతుల కుటుంబీకులు, బంధువుల రోదనలు మిన్నంటాయి.

నంద్యాల(అర్బన్‌): టీడీపీ నేతలు పథకం ప్రకారమే విజయ డెయిరీ డైరెక్టర్ల ఎన్నిక వాయిదా వేయించారని వైఎస్సార్‌సీపీ నంద్యాల జిల్లా అధ్యక్షుడు కాటసాని రాంభూపాల్‌రెడ్డి విమర్శించారు. అధికారం కలకాలం ఎవరి వద్ద ఉండదనే విషయాన్ని కూటమి నేతలు గుర్తుంచుకోవాలన్నారు. స్థానిక ఉదయానంద రెసిడెన్షిలో శుక్రవారం విలేకరుల సమావేశం నిర్వహించారు. ఎమ్మెల్యే అఖిల ప్రియ చెప్పింది.. నామినేషన్లను అడ్డుకుంటామని టీడీపీ నాయకులు చెప్పడం దుర్మార్గమన్నారు. ఎవరినీ నామినేషన్‌ వేయనివ్వమని బెదిరించడం ఎంత వరకు సమంజసమన్నారు. మున్ముందు ఇలాంటి పరిస్థితులు పునరావృతం కాకుండా చూడాల్సిన బాధ్యత పోలీసులపై ఉందన్నారు. బయటి వ్యక్తులను డెయిరీ ఆవరణలోకి రాకుండా ప్రశాంత వాతావరణంలో ఎన్నికలు జరిగేలా చూడాలన్నారు. హైకోర్టులో పిటిషన్‌ వేయడం దారుణం.. విజయ డెయిరీ ముగ్గురు డైరెక్టర్ల ఎన్నికను వాయిదా వేయాలంటూ టీడీపీ నాయకులు హైకోర్టులో పిటిషన్‌ వేయడం దారుణమని మాజీ ఎమ్మెల్సీ గంగుల ప్రభాకర్‌రెడ్డి విమర్శించారు. పటిష్టమైన పోలీసు బందోబస్తు ఉన్నా .. వాయిదా ఎందుకు కోరారో అర్థం కావడం లేదన్నారు. ఎన్నికలు నిర్వహించాల్సిన బాధ్యత ప్రభుత్వంపై ఉందన్నారు. విజయ డెయిరీకి అప్పు ఉన్న జగత్‌ విఖ్యాత్‌రెడ్డి డీఫాల్టర్‌ అయ్యారని, అటువంటి వారికి సంస్థలో చోటు లేదన్నారు. అడ్డదారిలో డైరెక్టర్‌ పదవులు దక్కించుకునేందుకు కుట్రలు చేస్తున్నారన్నారు. ప్రజాస్వామ్య పద్ధతిలో ఎన్నికలు జరగాలి.. విజయడెయిరీ డైరెక్టర్ల ఎన్నికలు ప్రజాస్వామ్య పద్ధతిలో జరగాలని బనగానపల్లె మాజీ ఎమ్మెల్యే కాటసాని రామిరెడ్డి అన్నారు. శాంతిభద్రతల సమస్య ఉందని, నియంత్రణ చేయలేమంటూ ఎన్నికలు వాయిదా వేయాలని పోలీసులు కోరడం విడ్డూరంగా ఉందన్నారు. ఎవరి ప్రోద్బలంతో వాయిదా వేయించారో పోలీసులే సమాధానం చెప్పాలని డిమాండ్‌ చేశారు. కూటమి ప్రభుత్వం ఏర్పాటైన నాటి నుంచి డెయిరీలో టీడీపీ నాయకులు అలజడులు సృష్టిస్తూనే ఉన్నారన్నారు. పోలీసులు, అధికారులు పునరాలోచన చేసి డెయిరీ డైరెక్టర్ల ఎన్నికలు సజావుగా జరిగేలా చూడాలన్నారు. సమావేశంలో నాయకులు విజయసింహారెడ్డి, సూర్యనారాయణరెడ్డి, తదితరులు ఉన్నారు. డెయిరీ ఎన్నిక సజావుగా నిర్వహించాల్సిన బాధ్యత ప్రభుత్వానిదే వైఎస్సార్‌సీపీ నంద్యాల జిల్లా అధ్యక్షుడు కాటసాని రాంభూపాల్‌రెడ్డి

ఆళ్లగడ్డ: పార్వేటగా బయలుదేరిన అహోబిలేశుడు ఊరూరా పూజలందుకుంటూ శుక్రవారం ఆర్‌కృష్ణాపురం చేరుకున్నారు. బాచేపల్లి, కొండపల్లిలో పూజలు ముగించుకున్న అనంతరం ఆర్‌. కృష్ణాపురం చేరుకున్న స్వామి వారి ఉత్సవ పల్లకీకి గ్రామ పెద్దలు సంప్రదాయ బద్ధంగా పూజలు నిర్వహించి మంగళ వాయిద్యాలతో గ్రామంలోకి తోడ్కొని వచ్చారు. స్వామి రాకతో గ్రామంలోని ఇళ్లు బంధుగణంతో కిటకిటలాడాయి. ప్రధాన రహదారి వెంట బొమ్మల అంగళ్లు, మిఠాయి కొట్లు, రంగులరాట్నాలు కొలువు దీరటంతో గ్రామంలో తిరునాల సందడి నెలకొంది. నేడు ‘స్వచ్ఛ ఆంధ్ర’ ● జిల్లా కలెక్టర్‌ రాజకుమారి నంద్యాల: ముఖ్యమంత్రి ఆదేశాల మేరకు శనివారం జిల్లా వ్యాప్తంగా స్వచ్ఛ ఆంధ్ర – స్వచ్ఛ దివాస్‌ కార్యక్రమాన్ని పెద్ద ఎత్తున నిర్వహిస్తున్నట్లు జిల్లా కలెక్టర్‌ రాజకుమారి తెలిపారు. ప్రతి నెల మూడో శనివారం ఈ కార్యక్రమాన్ని చేపట్టాలన్నారు. ఇందులో భాగంగా నంద్యాల మున్సిపల్‌ కార్యాలయం నుంచి భారీ ర్యాలీని ప్రారంభించడంతో పాటు ఆర్టీసీ బస్టాండ్‌లో స్వచ్ఛత కార్యక్రమంలో తాను పాల్గొంటున్నట్లు కలెక్టర్‌ తెలిపారు. స్వచ్ఛ ఆంధ్ర – స్వచ్ఛ దివస్‌ కార్యక్రమానికి సంబంధించి ప్రతి శాఖకు ఒక నోడల్‌ అధికారిని నియమించామన్నారు. అన్ని మున్సిపాలిటీలు, గ్రామపంచాయతీలలో పరిశుభ్రత కార్యక్రమాలు ముమ్మరంగా చేపట్టి చెత్తాచెదారం తొలగించాలన్నారు. పరిశుభ్రత నెలకొల్పే అంశాలను పరిగణనలోకి తీసుకొని ఉత్తమ ప్రతిభ కనబరిచిన అధికారులకు బహుమతులు ప్రదానం చేస్తామన్నారు.

కర్నూలు సిటీ: పదో తరగతిలో ఉత్తమ ఫలితాలు సాధించేందు కు రాష్ట్ర వ్యాప్తంగా ఒకే ప్రణాళికను విద్యాశాఖ తయారు చేసింది. ఆ ప్రణాళిక ప్రకారం చదువులో వెనుకబడిన విద్యార్థులకు ప్రత్యేకంగా సబ్జెక్టు నిపుణులతో తయారు చేయించిన స్టడీ మెటీరియల్‌ను అందజేయాల్సి ఉంది. అయితే ఇంత వరకు ఆ వైపుగా చర్యలు చేపట్టలేదు. స్టడీ మెటీరియల్‌ ఇచ్చేందుకు తమ దగ్గర నిధులు లేవు అంటూ విద్యార్థులపైనే భారం వేస్తున్నారు. ఉమ్మడి కర్నూలు జిల్లాలో ప్రభుత్వ యాజమాన్యంలోని ఏపీ మోడల్‌ స్కూల్‌, జిల్లా పరిషత్‌ ఉన్నత పాఠశాలలు, కస్తూర్బా గాంధీ బాలికల విద్యాలయాలు, ఎయిడెడ్‌, ప్రభుత్వ హైస్కూల్స్‌ మొత్తం 560 ఉన్నాయి. ఈ స్కూళ్లలో చదువుతున్న విద్యార్థులు 35,014 మంది విద్యార్థులు పదో తరగతి పరీక్షలకు హాజరుకానున్నారు. ప్రతి ఏటా జిల్లా సాధారణ పరీక్షల విభాగం నుంచి స్టడీ మెటీరియల్‌ ఇచ్చేవారు. అయితే ఈ ఏడాది నిధులు లేవని, రాష్ట్ర విద్యాశాఖ తయారు చేసిన క్వశ్చన్‌ బ్యాంకు, మోడల్‌ ప్రశ్నపత్రాలతో కూడిన బుక్‌లెట్లను పీడీఎఫ్‌ ఫైల్‌ రూపంలో వచ్చినవి అలాగే స్కూళ్లకు పంపించారు. విద్యార్థులనే ప్రింట్‌ తీసుకుని చదువుకోవాలని సూచనలు చేయనున్నారు. లాంగ్వేజెస్‌ బుక్‌లెట్‌ 198, నాన్‌ లాంగ్వేజెస్‌ 218 పేజీలు ఉంది. ఈ రెండింటిని ప్రింట్‌ తీసుకోవాలంటే ఒక్కో పేపరుకు కనీసం రూ.2 చొప్పున తీసుకుంటారు. దీని వలన విద్యార్థులపై స్టడీ మెటీరియల్‌ భారం రూ.2.91 కోట్లకుపైగానే ఉంటుందని ఉపాధ్యాయ వర్గాలు అభిప్రాయ పడుతున్నాయి. పరీక్షల నిర్వహణ ఇలా.. 2020లో ఆరో తరగతిలో ఉన్న విద్యార్థులు ఈ ఏడాది మార్చిలో పదో తరగతి పరీక్షలు ఇంగ్లిషు మీడియంతో పాటు ఎన్‌సీఈఆర్‌టీ సిలబస్‌తో కూడిన పరీక్షలు రాయనున్నారు. ఈ పరీక్షలను మాత్రం ఎస్‌ఎస్‌సీ నిర్వహిస్తుంది. ఆరు సబ్జెక్టులు, ఏడు పేపర్ల విధానంలో పదో తరగతి పరీక్షలు నిర్వహించేందుకు ప్రభుత్వ పరీక్షల విభాగం నిర్ణయించింది. సైన్స్‌ సబ్జెక్టులో భౌతిక, రసాయన శాస్త్రం ఒకటిగా, జీవ శాస్త్రం ఒకటిగా 50 మార్కుల చొప్పున రెండు పరీక్షలు నిర్వహించున్నారు. మిగిలిన ఐదు సబ్జెక్టులకు సంబంధించి ఐదు పరీక్షలు 100 మార్కులకు ఉంటుంది. వంద మార్కుల విభాగంలో 33 ప్రశ్నలు ఇస్తారు. సెక్షన్‌–1లో అబ్జెక్టివ్‌ తరహా ప్రశ్నలు 12 ఉంటాయి. వీటిలో ఒక్కో ప్రశ్నకు ఒక మార్కు ఉండగా.. అన్ని రాయాలి. సెక్షన్‌–2లో రెండు మార్కుల ప్రశ్నలు ఎనిమిది ఉండగా.. అన్ని రాయాలి. సెక్షన్‌–3లో ఎనిమిది ప్రశ్నలు ఉండగా.. ఒక్కోదానికి నాలుగు మార్కులు ఉంటాయి. సెక్షన్‌–4లో ఐదు ప్రశ్నలు.. ఎనిమిది మార్కుల చొప్పున ఉంటాయి. ఈ విభాగంలో మాత్రమే ఒక్కో ప్రశ్నకు ఏ,బీ అని రెండు ప్రశ్నలు ఉండగా.. ఒకటి చాయిస్‌ ఉంటుంది. మొత్తం 3.15 గంటల సమయం ఇస్తుండగా అన్ని ప్రశ్నలు రాయాలి. 24 పేజీల ఆన్సర్‌ బుక్‌లెట్‌ ఇస్తారు, ఆ తరువాత అడిగితే మరో 12 పేజీల బుక్‌లెట్‌ ఇవ్వనున్నారు. అప్పుడిలా.. ఇప్పుడు ఇలాగత వైఎస్సార్‌సీపీ ప్రభుత్వం పదో తరగతి విద్యార్థులపై ప్రత్యేక దృష్టి సారించింది. ఫలితాల పెంపునకు ప్రత్యేక పర్యవేక్షణ బాధ్యతలు ఆయా మండలాల ఎంఈఓలపైనే కాకుండా జిల్లా అధికారులకు సైతం అప్పగించింది. విద్యార్థులను ఆయా సబ్జెక్టు టీచర్లకు దత్తత ఇచ్చేలా చర్యలు తీసుకుంది. విద్యార్థులకు స్టడీ మెటీరియల్‌ ఉచితంగా అందించింది. అయితే రాష్ట్రంలోని ఉన్న ప్రస్తుత ‘కూటమి’ ప్రభుత్వం అలాంటి చర్యలేవీ చేపట్టలేదు. విద్యార్థులకు ఉచితంగా స్టడీ మెటీరియల్‌ ఇవ్వకుండా అ‘ధనం’ భారం వేసేందుకు సిద్ధం అయ్యింది. పదో తరగతి విద్యార్థులకు అందని స్టడీ మెటీరియల్‌ పీడీఎఫ్‌ కాపీ ఇచ్చి ప్రింట్‌ చేయించుకోవాలంటున్న అధికారులు విద్యార్థులపై రూ.2.91కోట్ల భారం ఆరు సబ్జెక్టులు.. ఏడు ప్రశ్నపత్రాలుగా పరీక్షలు మారిన ప్రశ్నపత్రాలపై సాధన చేయలేని విద్యార్థులు పదో తరగతి పరీక్షలపై రాష్ట్ర ప్రభుత్వం ప్రత్యేక ప్రాధాన్యత ఇవ్వాల్సి ఉంది. అయితే సమయం సమీపిస్తున్నా స్పందించడం లేదు. నామమాత్రంగా ప్రత్యేక తరగతులతో కాలయాపన చేస్తోంది. స్టడీ మెటీరియల్‌ ఇవ్వడంలోనూ ఉత్సాహం చూపడం లేదు. ప్రశ్నపత్రాలు మారడం.. స్టడీ మెటీరియల్‌ తీసుకోవడానికి అ‘ధన’పు భారం మోపడం..తదితర కారణాలతో విద్యార్థులు సతమతమవుతున్నారు.

ఆత్మకూరు పట్టణంలో ఓ హోటల్‌ వద్ద టిఫిన్‌ చేస్తున్న ఈ పిల్లలను చూస్తుంటే సంక్రాంతి సెలవుల్లో శ్రీశైలమో.. మహానంది క్షేత్రాలకో వెళ్తూ మార్గమధ్యలో ఆకలితో ఆగినట్లు అనిపిస్తుంది కదూ.. ఆ చిన్నారులకు ఇప్పుడు ‘సుగ్గి’ సెలవులు.. అదేంటీ మరో రెండు రోజుల్లో పాఠశాలలకు సంక్రాంతి సెలవులు ముగుస్తుంటే ఈ సుగ్గి సెలవులు ఏంటని ఆశ్చర్యపోతున్నారా?. కర్నూలు జిల్లా పశ్చిమ ప్రాంతాల్లో పనులు లేక పోవడంతో గుంటూరులో మిర్చి కోతలకు పిల్లాపాపలతో వ్యవసాయ కూలీలు, రైతులు వలస పోతున్నారు. ఆత్మకూరు మీదుగా రోజూ పదుల సంఖ్యలో కుటుంబాలు వలస వెళ్తున్నాయి. ‘ఊళ్లో పనుల్లేవు.. ప్రభుత్వం ఆదుకోవడం లేదు.. అమ్మఒడి.. రైతు భరోసా ఏమి ఇవ్వలేదు. ఎట్లా బతకాలి’.. అంటూ ఆలూరు మండలం బిల్లేకల్లుకు చెందిన రాజశేఖర్‌, సుంకన్న తదితరులు వాపోయారు. – ఆత్మకూరురూరల్‌

నంద్యాల(న్యూటౌన్‌): అన్ని వాహనాలకు యజమానులు ఈనెల 31వ తేదీలోగా పన్ను చెల్లించాలని జిల్లా రవాణా శాఖ అధికారి ఐశ్వర్యారెడ్డి శుక్రవారం ఒక ప్రకనటలో పేర్కొన్నారు. రవాణా శాఖకు సంబంధించి అన్ని సేవలను జాతీయ వెబ్‌సైట్‌ వాహన పోర్టల్‌లో vahan.privahan.nic.inలో పొందవచ్చని ఆమె తెలిపారు. పన్ను చెల్లించకపోతే రోడ్లపై తిరుగుతున్నప్పుడు జరిమానా విధిస్తారని పేర్కొన్నారు. జాతీయ భద్రత మాసోత్సవాల్లో భాగంగా శనివారం నంద్యాల పరిసర ప్రాంతాల్లో ఈఐ చెకప్‌ క్యాంపును నిర్వహిస్తున్నట్లు తెలిపారు.మహానందీశ్వరుడి భూములు అప్పగింత ● పట్టాదారు పాసుపుస్తకాలు వెనక్కి ఇచ్చేసిన ఇనాందారులు మహానంది: ఇనాందారుల నుంచి మహానందీశ్వరస్వామి దేవస్థానానికి చెందిన తమ్మడపల్లె గ్రామ పరిధిలోని 303 సర్వే నెంబరులో ఉన్న 8.74 ఎకరాల భూములు తిరిగి దేవస్థానానికి చేరాయని ఈఓ నల్లకాలువ శ్రీనివాసరెడ్డి తెలిపారు. తహసీల్దార్‌ కార్యాలయంలో ఇన్‌చార్జ్‌ తహసీల్దార్‌ రమాదేవి ఆధ్వర్యంలో ఇనాందారులతో సమావేశం నిర్వహించారు. ఈ సందర్భంగా ఈఓ నల్లకాలువ శ్రీనివాసరెడ్డి మాట్లాడుతూ 8.74 ఎకరాల భూములను అనకల ఇనాం సర్వీస్‌ కింద ఇస్తే నలుగురు అన్నదమ్ములు నాగమోహన్‌, వెంకటసుబ్బయ్య, అనకల సుబ్బరాయుడు, మరొకరు పట్టాదారు పాసుపుస్తకాలు తీసుకున్నారన్నారు. అయితే తాము కేవలం పంట నష్టపరిహారాలు, ప్రభుత్వం నుంచి అందేసాయం కోసం మాత్రమే తీసుకున్నామని చెప్పగా ఇన్‌చార్జ్‌ తహసీల్దార్‌ రమాదేవి కౌలుకార్డులు తీసుకుంటే వస్తాయన్నారు. అప్పగించిన పట్టాదారు పాసుపుస్తకాలను రద్దు చేసేందుకు జాయింట్‌ కలెక్టర్‌కు పంపిస్తామని చెప్పారు. కార్యక్రమంలో ఏఈఓ ఎరమల మధు, ఆలయ సూపరింటెండెంట్‌ అంబటి శశిధర్‌రెడ్డి తదితరులు పాల్గొన్నారు. కర్నూలు సర్కిల్‌ ఎస్‌ఈగా ద్వారకానాథ్‌ రెడ్డి కర్నూలు (సిటీ): జలవనరుల శాఖలో ఎగ్జిక్యూటివ్‌ ఇంజినీర్లుకు పర్యవేక్షక ఇంజినీర్లుగా పదోన్నతులు లభించాయి. ఇందులో భాగంగా కర్నూలు సర్కిల్‌ ఎస్‌ఈగా ద్వారకానాథ్‌ రెడ్డిని నియమిస్తూ ఆ శాఖ ప్రిన్సిపల్‌ సెక్రటరీ సాయిప్రసాద్‌ శుక్రవారం ఉత్తర్వులు జారీ చేశారు. ప్రస్తుతం ఇక్కడ పర్యవేక్షక ఇంజినీర్‌గా రెగ్యులర్‌ అధికారి లేకపోవడంతో డిప్యూటీ ఎస్‌ఈగా పనిచేస్తున్న బాలచంద్రారెడ్డి ఇన్‌చార్జ్‌ పనిచేస్తున్నారు. తెలుగుగంగ కడప సర్కిల్‌ కార్యాలయంలో డిప్యూటీ పర్యవేక్షక ఇంజినీర్‌గా పనిచేస్తున్న ద్వారకానాథ్‌ రెడ్డిని రెగ్యులర్‌ ఏస్‌ఈగా నియమించారు. ఈయన ఈ ఏడాది ఏప్రిల్‌ నెలలో పదవీ విరమణ పొందనున్నారు. అలాగే తెలుగుగంగ పర్యవేక్షక ఇంజినీర్‌గా ఎన్‌.శివప్రసాద్‌రెడ్డిని నియమించారు. ఈయన ప్రస్తుతం జలవనరుల శాఖ విజయవాడ కార్యాలయంలో ఈఈగా పనిచేస్తున్నారు.

అహోబిలం ట్రస్ట్‌తో దేవస్థానానికి ఎటువంటి సంబంధం లేదు. మొబైల్‌ మెడికల్‌ సర్వీస్‌ వాహనం ఇక్కడ ఉన్నది వాస్తవమే. దేవస్థానం పేరు చెప్పి వసూలు చేస్తున్నారని ఎవరైనా ఫిర్యాదు చేస్తే చర్యలు తీసుకుంటాం. వేలంపాటలు, ఇతర లావాదేవీల గురించి నాకు సంబంధం లేదు. టిక్కెట్‌ ధరల పెంపు ఉన్నతాఽధికారుల ఆదేశానుసారమే చేశాం. – మురళీధన్‌, జనరల్‌మేనేజర్‌, అహోబిలం దేవస్థానం గుడి ప్రతిష్టతను మంటగలుపుతున్నారు సుమారు 40 ఏళ్లుగా ఇలాంటి పరిస్థితి చూడలేదు. స్థానిక నాయకులతోను, గ్రామస్తులతో గాని ఏమాత్రం ఆలోచించకుండానే ఇష్టమొచ్చినట్లు నిర్ణయాలు తీసుకుంటున్నారు. మఠం నిర్వాహుకులు అందరూ తమిళనాడులో ఉంటూ ఇంత పెద్ద దేవస్థానాన్ని గాలికొదిలేయడంతో ఇక్కడున్న అధికారులు గుడి ప్రతిష్టతను మంటగలుపుతున్నారు. – నాసారి వెంకటేశ్వర్లు, అహోబిలం భక్తులను దోచుకునేందుకే.. అహోబిలంకు అత్యధికంగా వచ్చేదంతా గ్రామీణ ప్రాంతాల భక్తులే. ఇప్పటికే దిగువ అహోబిలంకు ఒక గేటు, ఎగువ అహోబిలంకు మరో గేటు వసూలు చేస్తుండటంతో ఇబ్బందులు పడుతున్నారు. తాజాగా ప్రసాదం, దర్శనం, తలనీలాల టిక్కెట్ల ధరలు పెంచడమంటే భక్తులను దోచుకోవడమే. ఆదాయమే లక్ష్యంగా నిర్ణయాలు తీసుకుంటున్నట్లుగా ఉంది. – నాగార్జున రెడ్డి, దొరకొట్టాల ●

● జిల్లాలో ఆక్సిటోసిన్‌ విచ్చలవిడిగా వినియోగం ● పాడిపశువుల పాలసేపునకు నిషేధ ఇంజెక్షన్‌ ● కర్ణాటక రాష్ట్రం నుంచి పెద్ద ఎత్తున దిగుమతి ● స్పందించని పశుసంవర్ధక శాఖ అధికారులు కర్నూలు (అగ్రికల్చర్‌): పశువైద్యుల సిఫార్సు లేకుండా ఆక్సిటోసినన్‌ ఇంజెక్షన్‌ వినియోగించరాదని ప్రభు త్వం కొన్నేళ్ల క్రితమే ఆదేశాలు ఇచ్చింది. అయితే ఉమ్మ డి కర్నూలు జిల్లాలో సగం మంది పాడి పరిశ్రమల నిర్వాహకుల్లో దీనిని వాడుతున్నారు. దీని ప్రభావంతో నాలుగైదు నిమిషాల్లోనే పాడిపశువులు సేపునకు వస్తా యి. ఇలాంటి పాలు తాగడంతో పిల్లల్లో దృష్టిలోపం, వినికిడి లోపం వస్తోంది. సూదులు వేసిన పశువుల్లో ఆరోగ్య సమస్యలు పెరుగుతున్నాయి. పాల సేపునకు ఆక్సిటోసిన్‌ సూదులను వినియోగించకుండా నివారించాల్సిన పశుసంవర్ధక శాఖ అధికారులు పట్టనట్లు వ్యవహరిస్తున్నారనే విమర్శలు వ్యక్తమవుతున్నాయి. అధిక పాల కోసం.. ప్రస్తుతం కొందరు పాడి పరిశ్రమ నిర్వాహకులు ‘ఆక్సిటోసిన్‌’ ఇంజెక్షన్‌ను కేవలం అధిక పాల ఉత్పత్తి కోసం వాడుతున్నారు. సాధారణంగా గేదెలు శరీరంలో ఉండే మొత్తం పాలను బయటకు ఇవ్వవు. పొదుగులో ఉండే మొత్తం పాలు పిండినప్పుడు సులువుగా వచ్చేస్తుంది. అయితే వాటి శరీర కండరాల్లో, ఎముకల మూలన ఇంకా కొంత పాలు అలానే ఉంటుంది. ఎప్పుడైతే ఇంజె క్షన్‌ వాడుతారో గేదె శరీర కండరాలపై తీవ్ర ఒత్తిడి పెరుగుతుంది. సాధారణంగా ఐదు లీటర్ల పాలు ఇచ్చే గేదెం ఈ ఇంజెక్షన్‌తో శరీరం ఉత్తేజాన్ని గురై మరో రెండు, మూడు లీటర్ల పాలు అధికంగా ఇస్తుంది. దూడలను దూరం చేస్తూ.. ఉమ్మడి కర్నూలు జిల్లాలో పాడి పరిశ్రమ నేడు వ్యాపా రం అయ్యింది. దూడలకు వదిలితే పాలు తక్కువవుతాయనే ఉద్దేశం చాలా మందిలో ఉంది. వాటికి పాలు సరిగ్గా ఇవ్వకపోవడంతో కొద్ది రోజులకే మృత్యవాత పడుతున్నాయి. పాడి పశువుల్లో 40 శాతం వరకు మగదూడలు పుడుతున్నాయి. అయితే వీటిని సరిగ్గా పట్టించుకోకపోవడం లేదు. పెయ్య దూడల పోషణలోనూ సరైన శ్రద్ధ వహించకపోవడంతో వాటిలో 20 శాతం వరకు మూడు నెలల్లోనే మృత్యువాత పడుతున్నాయి. దూడలు లేని పాడి పశువులకు ఈ సూది వేస్తున్నారు. సేపునకు తెచ్చుకొని పాలు పితుకుతున్నారు. గుట్టుచప్పుడు కాకుండా.. ఆక్సిటోసిన్‌ హార్మోన్‌ సూది వినియోగంపై కట్టడి చేయడంతో పాడిపరిశ్రమ నిర్వాహకులు గుట్టుచప్పుడు కా కుండా కర్ణాటక రాష్ట్రం నుంచి దిగుమతి చేసుకుంటున్నారు. స్థానికంగా కూడా కొందరు చాటుగా విక్రయి స్తున్నట్లు సమాచారం. కర్ణాటక నుంచి ఒకేసారి 500 ఎంఎం తెచ్చుకొని, ఒక ఎంఎల్‌ ఒక డోసుగా వినియోగిస్తున్నారు. ప్రస్తుతం గ్రామాల్లో పాల ఉత్పత్తి తగ్గింది. కొన్నేళ్లుగా విద్యావంతులు, ఇంకొందరు పాడి పరిశ్ర మలో రాణిస్తున్నారు. అయితే దూడలను పట్టించుకోకుండా వాటి మృత్యువుకు కారణమవుతున్నారు. స్వస్తి పలకాలి పాలు పితకడానికి ముందు కొద్ది సేపు దూడలను వదిలితే పాడిపశువులు సేపునకు వస్తాయి. ఫలితంగా పశువు ఆరోగ్యం బాగుండి వెంటనే ఎదకు వస్తుంది. పాలసేపునకు ఆక్సిటోసిన్‌ ఇంజెక్షన్‌ను ఎట్టి పరిస్థితుల్లో వాడరాదు. దీనిని వాడితే పాడి పశువులకు కృత్రిమ గర్భధారణ సూదులు పని చేయడం లేదు. రైతులు, డెయిరీ నిర్వాహకులు ఆక్సిటోసిన్‌ సూదితో పరోక్షంగా నష్టపోతున్నారు. దీనికి స్వస్తి పలకాలి. – ఆర్‌.నాగరాజు, సహాయ సంచాకులు, పశుసంవర్ధక శాఖ, డోన్‌ కల్లూరు మండలం పెద్దటేకూరు గ్రామంలో 2018లో ఒక పాడి పరిశ్రమ నిర్వాహకుడి దగ్గర ఆక్సిటోసిన్‌ 100 ఎంఎల్‌ నాలుగు బాటిళ్లను డ్రగ్‌ ఇన్‌స్పెక్టర్లు, పశుసంవర్థక శాఖ అధికారులు సంయుక్తంగా దాడులు నిర్వహించి సీజ్‌ చేయడంతో పాటు కేసు నమోదు చేశారు. తర్వాత వైఎస్సార్‌సీపీ ప్రభుత్వం నిఘాను కట్టుదిట్టం చేసింది. పశుపోషకుల షెడ్ల వద్ద దాడులు విస్తృతం చేసింది. ఇంతవరకు ఆక్సిటోసిన్‌ దాఖలాలు లేవు. కూటమి ప్రభుత్వం ఏర్పాటు అయిన తర్వాత మళ్లీ వినియోగం భారీగా పెరిగింది. కర్ణాటక నుంచి దిగుమతి చేసుకుని వినియోగిస్తున్నారు. లేబుల్‌ లేకుండా పశు పోషకులకు అంటగడుతున్నారు. 100 ఎంఎల్‌ ఆక్సిటోసిన్‌ రూ. 300 ప్రకారం విక్రయిస్తున్నారు. కర్నూలు, నంద్యాల, డోన్‌, ఆదోని, ఎమ్మిగనూరు తదితర పట్టణ ప్రాంతాల్లో విచ్చలవిడిగా వినియోగిస్తున్నారు.

● ఎస్పీ అధిరాజ్‌సింగ్‌రాణా బొమ్మలసత్రం: రహదారులపై అతివేగంతో వెళ్తే వాహనదారుని ప్రాణాలకే ప్రమాదమని జిల్లా ఎస్పీ అధిరాజ్‌సింగ్‌రాణా అన్నారు. జాతీయ రహదారి భద్రత మాసోత్సవాల సందర్భంగా ఎంవీఐ శ్రీకాంత్‌ ఆధ్వర్యంలో గురువారం పోస్టర్‌ను విడుదల చేశారు. అనంతరం ఎస్పీ మాట్లాడుతూ.. రహదారులపై వాహనాలను నిబంధనల మేరకు నడపాలన్నారు. రోడ్డు భద్రతపై అవగాహన కల్పించేందుకు ఫిబ్రవరి 15 వరకు మాసోత్సవాలు జరుపుతున్నామన్నారు. ప్రతి విద్యాలయాల్లో, ఆటో డ్రైవర్లకు, ప్రధాన కూడళ్ల వద్ద వాహనదారులకు అవగాహన కల్పిస్తామన్నారు. కార్యక్రమంలో అడిషనల్‌ ఎస్పీ అడ్మిన్‌ యుగంధర్‌బాబు, ఎంవీఐ నాయుడు తదితరులు పాల్గొన్నారు. డ్రైవర్లు జాగ్రత్తలు పాటించాలి నంద్యాల (వ్యవసాయం): రోడ్డు ప్రమాదాల నివారణకు ఆర్టీసీ డ్రైవర్లు జాగ్రత్తలు పాటించాలని జిల్లా ప్రజా రవాణాధికారి రజియా సుల్తానా అన్నారు. రోడ్డు భద్రత మసోత్సవాల సందర్భంగా నంద్యాల ఆర్టీసీ డిపోలో గురువారం నిర్వహించిన సభలో ఆమె మాట్లాడారు. వన్‌టౌన్‌ సీఐ సుధాకర్‌ రెడ్డి , ట్రాఫిక్‌ ఎస్‌ఐ మధు, డిపో మేనేజర్‌ గంగాధర్‌ రావు, అసిస్టెంట్‌ మేనేజర్‌ మాధవి, ఆర్టీసీ ఉద్యోగులు పాల్గొన్నారు.

● రూ. 30 లక్షలతో చేయించిన భక్తుడు ఆళ్లగడ్డ: ప్రసిద్ధ పుణ్యక్షేత్రం ఎగువ అహోబిలం జ్వాలనరసింహ స్వామి గర్భాలయానికి నంద్యాలకు చెందిన భక్తుడు రూ. 30 లక్షలతో వెండి కవచం చేయించాడని దేవస్థాన మేనేజర్‌ రాంభూపాల్‌ తెలిపారు. నంద్యాలకు చెందిన శ్రీ హనుమాన్‌ హార్డ్‌వేర్‌ దుకాణ నిర్వాహకుడు వెంకటసుబ్బయ్య శెట్టి తన మొక్కుబడిలో భాగంగా రూ. 30 లక్షలతో సుమారు 27 కిలోలతో ద్వారానికి వెండి తొడుగులు చేయించారన్నారు. వాటిని ఆలయ ద్వారాలకు గురువారం అలంకరించామన్నారు. శ్రీశైలం నుంచి 7,430 క్యూసెక్కులు విడుదల శ్రీశైలంప్రాజెక్ట్‌: శ్రీశైలం జలాశయం నుంచి బుధవారం నుంచి గురువారం వరకు దిగువ ప్రాజెక్ట్‌లకు 7,430 క్యూసెక్కుల నీటిని విడుదల చేశారు. హంద్రీనీవా సుజలస్రవంతికి 1,702 క్యూసెక్కులు, మల్యాల ఎత్తిపోతలకు 338, ముచ్చమర్రి ఎత్తిపోతలకు 490, పోతిరెడ్డిపాడు హెడ్‌రెగ్యులేటరీ ద్వారా 2,500, కల్వకుర్తి ఎత్తిపోతలకు 2,400 క్యూసెక్కుల నీటిని విడుదల చేశారు. గురువారం సాయంత్రానికి జలాశయంలో 96.2698 టీఎంసీల నీరు నిల్వ ఉంది. డ్యాం నీటిమట్టం 856.70 అడుగులకు చేరుకుంది. అప్రెంటిస్‌కు అభ్యర్థుల ఎంపిక ● 25న ధ్రువీకరణ పత్రాల పరిశీలన కర్నూలు(అర్బన్‌): కర్నూలు ఏపీఎస్‌ఆర్‌టీసీలో 2024–25 సంవత్సరానికి సంబంధించి వివిధ ట్రేడ్‌లలో అప్రెంటిస్‌కు అర్హులైన అభ్యర్థులను ఎంపిక చేసినట్లు ఆర్‌టీసీ జోనల్‌ సిబ్బంది శిక్షణ కళాశాల ప్రిన్సిపాల్‌ ఎస్‌. నజీర్‌ అహ్మద్‌ తెలిపారు. డీజిల్‌ మెకానిక్‌, మోటారు మెకానిక్‌, ఎలక్ట్రీషియన్‌, వెల్డర్‌, ఫిట్టర్‌, డ్రాఫ్ట్‌మెన్‌ ట్రేడ్ల వారీగా ఎంపికై న వారి సీరియల్‌ నంబర్లను ఆయన గురువారం ప్రకటించారు. ఎంపికై న అభ్యర్థులు తమ ఒరిజినల్‌ ఎస్‌ఎస్‌సీ, ఐటీఐతో పాటు ఎస్టీ, ఎస్టీ, బీసీ అభ్యర్థులైతే కుల ధ్రువీకరణ పత్రాలను (పర్మినెంట్‌ సర్టిఫికెట్‌ లేని పక్షంలో ఆరు నెలల లోపు జారీ చేయబడిన తాత్కాలిక కుల ధ్రువీకరణ పత్రం ) తీసుకురావాలన్నారు. అలాగే వికలాంగులు తమ వైకల్య ధ్రువీకరణ పత్రం, ఎన్‌సీసీ, స్పోర్ట్స్‌ సర్టిఫికెట్ల జిరాక్స్‌ కాపీలతో ఈ నెల 25వ తేదీన ఉదయం 9 గంటలకు జోనల్‌ స్టాఫ్‌ ట్రైనింగ్‌ కాలేజ్‌లో హాజరు కావాలన్నారు. ఈ ఫలితాల అధికార నిర్ధారణ కోసం జోనల్‌ ట్రైనింగ్‌ కాలేజ్‌, డిపోల నోటీసు బోర్డుల్లో ఉంచామని వివరించారు. నవోదయ ప్రవేశ పరీక్షకు పకడ్బందీ ఏర్పాట్లు కర్నూలు (సిటీ): జవహర్‌ నవోదయ విద్యాలయం 2025–26 సంవత్సరానికి గాను 6వ తరగతి ప్రవేశానికి ఈనెల 18వ తేదీన నిర్వహించే పరీక్షకు పకడ్బందీ ఏర్పాట్లు చేశామని సి.బెళగల్‌ ఎంఈఓ–2 కె.ఆదాం బాషా, బన వాసి నవోదయ ఇన్‌చార్జ్‌ ప్రిన్సిపాల్‌ పద్మావతి తెలిపారు. ప్రవేశ పరీక్ష నిర్వహణపై గురువారం స్థానిక మాంటిస్సోరి స్కూల్‌లో సూపరింటెండెంట్లు, అబ్జర్వర్లకు అవగాహన సద స్సు నిర్వహించారు. ఈ సందర్భంగా వారు మాట్లాడుతూ.. ఉమ్మడి జిల్లాలో 6,035 మంది విద్యార్థులు ప్రవేశ పరీక్షకు హాజరు కానున్నారని, కర్నూలులో 13, నంద్యాలలో 9 పరీక్ష కేంద్రాలు ఏర్పాటు చేశామన్నారు. అందరూ సమన్వయంతో పనిచేసి పరీక్షలో ఎలాంటి తప్పు లు జరగకుండా అప్రమత్తంగా ఉండాలన్నారు. 18వ తేదీ 11.30 గంటలకు ప్రారంభమయ్యే పరీక్షకు గంట ముందుగానే విద్యార్థులు పరీక్ష కేంద్రాలకు చేరుకోవాలన్నారు.

నంద్యాల: మహాత్మా గాంధీ జాతీయ గ్రామీణ ఉపాధి హామీ పథకం కింద పనిచేస్తున్న కూలీలకు హౌసింగ్‌ మ్యాండేస్‌లో భాగంగా 90 రోజుల పని దినాలు కల్పించాలని, వారికి దినసరి సరాసరి రేటు పెరుగుతుందని క్షేత్రస్థాయి అధికారులను జిల్లా కలెక్టర్‌ రాజకుమారి ఆదేశించారు. కలెక్టరేట్‌లోని ఎన్‌ఐసీ వీడియో కాన్ఫరెన్స్‌ హాల్‌ నుంచి ఉపాధి హామీ పథకం కింద నిర్దేశించిన లేబర్‌ బడ్జెట్‌, హౌసింగ్‌ మ్యాండేస్‌, సచివాలయ సర్వీసులపై వీడియో కాన్ఫరెన్స్‌ ద్వారా క్లస్టర్ల వారీగా గురువారం సమీక్ష నిర్వహించారు. ఈ సందర్భంగా జిల్లా కలెక్టర్‌ మాట్లాడుతూ.. మంజూరు చేసిన 850 గోకులం షెడ్ల నిర్మాణాలకు గాను 276 మాత్రమే పూర్తి చేశారని, మిగిలిన వాటిని త్వరితగతిన పూర్తిచేసేందుకు చర్యలు తీసుకోవాలన్నారు. గ్రామీణ, పట్టణ ప్రాంతాల్లో నిర్దేశించిన 4,772 గృహ నిర్మాణాల లక్ష్యాన్ని మార్చి 31వ తేదీలోగా పూర్తి చేసేలా హౌసింగ్‌ డీఈ, ఏఈలు ప్రత్యేక శ్రద్ధ తీసుకోవాలన్నారు. ఉపాధి హామీ పథకం కింద నిర్దేశించిన లేబర్‌ బడ్జెట్‌ మొబిలైజేషన్‌కు సంబంధించి ఇంకా 16 లక్షల 5 వేల పని దినాలు కల్పించాల్సి ఉందన్నారు. ప్రతిరోజు ప్రతి గ్రామపంచాయతీలో వందమంది ఉపాధి వేతనదారులకు మార్చి 31వ తేదీలోగా పనులు కల్పించేలా ప్రత్యేక శ్రద్ధ తీసుకోవాలని ఏపీఓ, ఎపీడీ, ఎంపీడీఓలను ఆదేశించారు. సచివాలయ సిబ్బందికి కేటాయించిన ఎనిమిది రకాల సర్వేలను నిర్దేశిత గడువులోగా పూర్తి చేయించాలని ఎంపీడీఓలకు సూచించారు. సచివాలయ ఉద్యోగుల హాజరు ఇన్‌టైం, అవుట్‌ టైం కచ్చితంగా నమోదు చేసేలా చర్యలు తీసుకోవాలన్నారు. వీడియో కాన్ఫరెన్స్‌లో డ్వామా పీడీ జనార్దన్‌ రావు, హౌసింగ్‌ పీడీ వెంకటసుబ్బయ్య, పశుసంవర్ధక అధికారి గోవింద నాయక్‌, జిల్లా పరిషత్‌ డిప్యూటీ సీఈఓ సుబ్బారెడ్డి తదితరులు పాల్గొన్నారు. లేబర్‌ మొబిలైజేష పై ప్రత్యేక శ్రద్ధ సారించాలి జిల్లా కలెక్టర్‌ రాజకుమారి

శ్రీశైలంటెంపుల్‌: శ్రీశైల మహాక్షేత్రంలో సంక్రాంతి బ్రహ్మోత్సవాల్లో యాగ పూర్ణాహుతి కార్యక్రమాన్ని గురువారం నిర్వహించారు. శ్రీభ్రమరాంబా మల్లికార్జున స్వామిఅమ్మవార్లకు అర్చకులు, వేదపండితులు విశేష పూజలు చేశారు. అనంతరం స్వామివారి యాగశాలలో చండీశ్వరస్వామికి ప్రత్యేక పూజాదికాలు జరిపారు. అనంతరం పూర్ణాహుతి, కలశోద్వాసన, త్రిశూలస్నానం, మహదాశీర్వచనం చేశారు. పూర్ణాహుతి కార్యక్రమంలో శాస్త్రోక్తంగా నారికేళాలు, పలు సుగంధద్రవ్యాలు, నూతన వస్త్రాలు మొదలైన ద్రవ్యాలను హోమగుండంలోకి ఆహుతిగా సమర్పించారు. అనంతరం వసంతోత్సవం జరిపించారు. చండీశ్వరస్వామికి సరస్వి పుష్కరిణిలో అర్చకులు, ఈఓ ఎం.శ్రీనివాసరావు శాస్త్రోక్తంగా అవబృథస్నానం నిర్వహించారు. ● సంక్రాంతి బ్రహ్మోత్సవాల్లో భాగంగా గురువారం సాయంత్రం స్వామిఅమ్మవార్ల నిత్యకల్యాణ మండపంలో సదస్యం, నాగవల్లి కార్యక్రమాలను నిర్వహించారు. సదస్యం కార్యక్రమంలో వేదపండితులు వేదస్వస్తి చేశారు. నాగవల్లి కార్యక్రమంలో సంక్రాంతి పర్వదినాన కల్యాణోత్సవం జరిపించిన అమ్మవారికి ఆగమశాస్త్ర సంప్రదాయం మేరకు మెట్టెలు, నల్లపూసలను సమర్పించారు. ● సంక్రాంతి బ్రహ్మోత్సవాల్లో భాగంగా మొదటి రోజున ఆలయ ధ్వజస్తంభంపై అవిష్కరింపజేసిన ధ్వజపటం అవరోహణ చేశారు. ● శుక్రవారం శ్రీభ్రమరాంబా మల్లికార్జున స్వామిఅమ్మవార్లు అశ్వవాహనసేవలో భక్తులకు దర్శనమిస్తారు. అనంతరం స్వామిఅమ్మవార్లకు పుష్పోత్సవం, శయనోత్సవం, ఏకాంతసేవ జరిపిస్తారు. ఆయా ఉత్సవాలతో సంక్రాంతి బ్రహ్మోత్సవాలు ముగుస్తాయి. వేదపారాయణం అమ్మవారి ఆలయ ప్రాంగణంలో మూడు గంటల పా టు నిరంతరాయంగా వేదపారాయణలు కొనసాగా యి. దేవస్థాన పండితులతో పాటు సింహాచలం, విశాఖపట్నం కనకమహాలక్ష్మీ ఆలయం, కాణిపాకం, శ్రీకాళహస్తి, అన్నవరం, ద్వారక తిరుమల, ఇంద్రకీలాద్రి–విజయవాడ దేవస్థానాల నుంచి వచ్చిన పండితులు, తిరుపతి, హైదరాబాద్‌ నుంచి వచ్చిన పలువురు పండితులు పాల్గొన్నారు. రుత్విగ్వరణ కార్యక్రమంలో పండితులకు నూతన వస్త్రాలు అందజేశారు. దేవస్థాన ఈఓ శ్రీనివాసరావు దంపతులు పాల్గొన్నారు. నేటితో ముగియనున్న సంక్రాంతి బ్రహ్మోత్సవాలు

● ఆక్సిటోసిన్‌ సూదులు వాడితే పాడి పశువులు సకాలంలో ఎదకు రావు. ఎదకువచ్చినా చూలు నిలువకపోగా, కొన్ని సందర్భాల్లో గర్భస్రావం జరుగుతుంది. ● ఈ హార్మోన్‌ కలిసిన పాలు తాగితే చిన్నపిల్లలకు దృష్టి, వినికిడి లోపం వచ్చే అవకాశం ఉంది. అలాగే పలు సైడ్‌ ఎఫెక్ట్స్‌ ఉంటాయని పశువైద్యులు హెచ్చరిస్తున్నారు. ● కళ్ల జబ్బులతో పాటు ప్రమాదకర క్యాన్సర్‌ వ్యాధుల బారిన పడే అవకాశం ఉంది. ● బాలికలు చిన్న వయస్సులోనే మెచ్యూరు అవుతారు. ● ఈ హార్మోన్‌ ప్రభావంతో శరీరంలో శక్తి నశించి త్వరగా అలసట వస్తుంది.