వాషింగ్టన్‌: హెచ్‌–1బీ వీసాల వల్ల అమెరికన్లకు జరిగే నష్టం లేదని తాజా పరిశోధన ఒకటి స్పష్టం చేసింది. ఈ రకమైన వీసాలున్న విదేశీ ఉద్యోగులు ఉండటం ఉపాధి అవకాశాలను పెంచుతాయని పరిశోధన తెలిపింది. అమెరికా కంపెనీలు విదేశీ ఉద్యోగులతో పని చేయించుకునేందుకు హెచ్‌–1బీ వీసాలు వీలు కల్పిస్తాయన్నది తెలిసిందే. విదేశీ ఉద్యోగులు.. అమెరికన్ల ఉద్యోగ అవకాశాలను దెబ్బతీస్తున్నారని ట్రంప్‌ ప్రభుత్వం భావిస్తూండగా.. ఇందుకు హేతువు లేదని పరిశోధన చెబుతోంది. హెచ్‌1బీ వీసాదారుల వల్ల నిరుద్యోగ సమస్య తక్కువగా ఉంటున్నట్లు తెలుస్తోందని ఈ పరిశోధనను నిర్వహించిన నేషనల్‌ ఫౌండేషన్‌ ఫర్‌ అమెరికన్‌ పాలసీ తెలిపింది.


 వాషింగ్టన్: అమెరికాలో ఉద్యోగం చేయాలనుకునేవారు ఎంతో ఆతురతతో చూసే హెచ్-1బీ వీసాలకు దరఖాస్తులను స్వీకరించేందుకు అమెరికా విస్తృత ఏర్పాట్లు చేసింది. దరఖాస్తుల స్వీకరణ మంగళవారం నుంచే ప్రారంభించగా.. ఏప్రిల్ 7 నాటికి రెండు రకాల పరిమితులకు సరిపోయేంత సంఖ్యలో దరఖాస్తులు రావచ్చని యూఎస్ సిటిజన్‌షిప్ అండ్ ఇమ్మిగ్రేషన్ సర్వీసెస్ (యూఎస్‌సీఐఎస్) అంచనా వేసింది. ఈ నేపథ్యంలో ర్యాండమ్ (అక్కడక్కడ) పద్ధతిలో లాటరీ ద్వారా దరఖాస్తులను ఎంపిక చేయాలని ఆ సంస్థ భావిస్తోంది. తిరస్కరించిన దరఖాస్తులను ఫీజుతో సహా వాపసు చేస్తారని యూఎస్‌సీఐఎస్ అధికారులు వెల్లడించారు. కాగా అమెరికా విధించిన పరిమితి ప్రకారం.. అక్టోబరు 1, 2014 నుంచి ప్రారంభమయ్యే 2015 ఆర్థిక సంవత్సరానికి గరిష్టంగా 65 వేల హెచ్-1బీ వీసాలను మాత్రమే యూఎస్‌సీఐఎస్ కేటాయించనుంది. అయితే యూ ఎస్ మాస్టర్స్ డిగ్రీ లేదా అంతకు మించిన ఉన్నత విద్య ఉన్న తొలి 20 వేల మందికి 65 వేల పరిమితి నుంచి మినహాయింపు లభించనుంది.
  
  ఎల్-1 వీసాల తిరస్కారం భారతీయులకే ఎక్కువ...
  నాన్-ఇమ్మిగ్రెంట్ ఎల్-1 వీసాల కోసం చేసే దరఖాస్తుల్లో ఎక్కువగా భారతీయుల దరఖాస్తులే తిరస్కరణకు గురవుతున్నాయని నేషనల్ ఫౌండేషన్ ఫర్ అమెరికన్ పాలసీ ఓ నివేదికలో వెల్లడించింది. 2009 ఆర్థిక సంవత్సరంలో 1,640 మంది భారతీయుల ఎల్-1బీ పిటిషన్లను యూఎస్‌సీఐఎస్ తిరస్కరించిందని, ఆ సంఖ్య అంతకుముందు 9 ఆర్థిక సంవత్సరాలలో తిరస్కరించిన (1,341) కన్నా కాస్త ఎక్కువేనని ఆ సంస్థ పేర్కొంది. విదేశాల్లో కనీసం ఏడాది పనిచేసిన నిపుణులైన తమ ఉద్యోగులను ఆయా కంపెనీలు అమెరికాకు పంపేందుకు ఎల్-1బీ వీసాలు అవసరం. అయితే కెనడా, బ్రిటన్, చైనా వంటి అనేక దేశాలతో పోల్చితే భారతీయులకే ఈ వీసాలను ఎక్కువగా తిరస్కరిస్తున్నారని ఫౌండేషన్ తెలిపింది.