‘‘నిజ జీవితంలో ప్రతి ఒక్కరికీ కనెక్ట్ అయ్యే సినిమా ఇది. డిఫరెంట్ కాన్సెప్ట్‌తో దర్శకుడు చాలా బాగా తెరకెక్కించారు. మంచి విజయం సాధిస్తుందనే నమ్మకం ఉంది’’ అని డి.రామానాయుడు చెప్పారు. రాహుల్, తన్వి జంటగా పి.సునీల్‌కుమార్‌రెడ్డి దర్శకత్వంలో సురేష్ ప్రొడక్షన్స్ పతాకంపై ఆయన నిర్మించిన ‘నేనేం చిన్న పిల్లనా’ రేపు ప్రేక్షకుల ముందుకు రానుంది. ఈ సందర్భంగా బుధవారం హైదరాబాద్‌లో జరిగిన ప్రెస్‌మీట్‌లో దర్శకుడు మాట్లాడుతూ -‘‘ఇది పూర్తి స్థాయి కుటుంబ కథా చిత్రం. పాటలు, సంగీతం ప్రేక్షకుల్ని అలరిస్తాయి. కష్టానికి తగిన ఫలితం దక్కుతుందనే నమ్మకం ఉంది’’ అన్నారు. ప్రతి ఒక్కరూ చూడాల్సిన సినిమా ఇదని రాహుల్ పేర్కొన్నారు. ఈ కార్యక్రమంలో ఇంకా అన్నపూర్ణమ్మ, సంజన, అలీ, సుమన్, కాశీవిశ్వనాథ్, అనిత తదితరులు మాట్లాడారు.
  


 ‘‘ఈ పాటలు విన్నాను. చాలా బాగున్నాయి. శ్రీలేఖ మంచి ట్యూన్స్ ఇచ్చారు. సురేష్ ప్రొడక్షన్స్ నుంచి మంచి చిత్రాలు వచ్చాయి. ఈ సినిమా కూడా ఆ కోవకు చెందుతుందనే నమ్మకం ఉంది’’ అన్నారు వెంకటేష్. రాహుల్, తన్వి వ్యాస్ జంటగా పి. సునీల్‌కుమార్‌రెడ్డి దర్శకత్వంలో డా. డి.రామానాయుడు నిర్మించిన చిత్రం ‘నేనేం చిన్నపిల్లనా?’. హైదరాబాద్‌లో జరిగిన ఈ చిత్రం ఆడియో వేడుకలో పాల్గొన్న వెంకటేష్ సీడీని ఆవిష్కరించి, రామానాయుడు, రానాకి ఇచ్చారు.
  
  ఈ సందర్భంగా రానా మాట్లాడుతూ -‘‘వందేళ్ల భారత సినిమా చరిత్రలో సురేష్ ప్రొడక్షన్స్‌ది 49 ఏళ్ల చరిత్ర. ఎంతోమంది ఈ బేనర్లో నటించారు. కానీ ఇప్పటివరకు నాకు అవకాశం రాలేదు. ఇప్పటివరకు మా సంస్థలో వచ్చిన చిత్రాల్లానే ఈ చిత్రం కూడా పెద్ద హిట్ అవ్వాలని కోరుకుంటున్నాను’’ అన్నారు. రామానాయుడు మాట్లాడుతూ -‘‘మా సంస్థ నుంచి వచ్చిన ‘ప్రేమనగర్’ తర్వాత ఆరు పాటలూ అద్భుతంగా వచ్చిన సినిమా ఇది.
  
  అలాగే ‘కలిసుందాం రా’లాంటి మంచి ఫ్యామిలీ ఎంటర్‌టైనర్. సంగీతం, సాహిత్యం బాగా కుదిరాయి. మా సంస్థలో సునీల్‌కుమార్‌రెడ్డి దర్శకత్వం వహించిన తొలి సినిమా ఇది’’ అన్నారు. ఈ సంస్థలో 14 సినిమాలు చేశానని, అన్నీ మ్యూజికల్ హిట్ అయ్యాయని, ఈ సినిమా కూడా విజయం సాధిస్తుందనే నమ్మకం ఉందని శ్రీలేఖ చెప్పారు. సునీల్‌కుమార్‌రెడ్డి మాట్లాడుతూ -‘‘దర్శకుడిగా చాలా సినిమాలు చేసినా, సినిమా పరిశ్రమతో ఏదో గ్యాప్ ఉందనే ఫీలింగ్ ఉండేది.
  
  అది ఈ చిత్రంతో తీరిపోయింది. నాయుడిగారి బేనర్లో సినిమా చేయడం నా అదృష్టం. చక్కని కథ, మాటలు, టైటిల్, పాటలు కుదిరాయి. సినిమా పెద్ద హిట్ అవుతుందని నమ్మకంగా చెప్పగలను’’ అన్నారు. ఇంకా ఈ సమావేశంలో శరత్‌బాబు, బలభద్రపాత్రుని రమణి, భాస్కరభట్ల, రాహుల్, తన్వి, సంజనా, అనంత్ శ్రీరామ్ తదితరులు పాల్గొన్నారు.