ఆక్లాండ్‌: యూఏఈ వేదికగా సెప్టెంబర్‌ 19 నుంచి అక్టోబర్‌ 10 వరకు జరిగే ఐపీఎల్‌ 2021 రెండో అంచెలో పాల్గొనేందుకు తమ క్రికెటర్లకు న్యూజిలాండ్‌ క్రికెట్‌ బోర్డు గ్రీన్‌ సిగ్నల్‌ ఇచ్చింది. దాంతో విలియమ్సన్‌ (సన్‌రైజర్స్‌), బౌల్ట్‌ (ముంబై ఇండియన్స్‌), జేమీసన్‌ (బెంగళూరు), సాట్నర్‌ (చెనై సూపర్‌ కింగ్స్‌) తరఫున బరిలోకి దిగనున్నారు. వాస్తవానికి ఐపీఎల్‌ జరిగే సమయంలో న్యూజిలాండ్‌ బంగ్లాదేశ్‌తో ఐదు మ్యాచ్‌ల టి20 సిరీస్‌... పాకిస్తాన్‌తో మూడు వన్డేలతో పాటు ఐదు టి20 మ్యాచ్‌లు ఆడాల్సి ఉంది. అయితే ఈ సిరీస్‌ల నుంచి ఐపీఎల్‌లో ఆడే ప్లేయర్లకు విశ్రాంతినిచ్చింది. అంతేకాకుండా టి20 ప్రపంచకప్, భారత్‌తో జరిగే టి20 సిరీస్‌ల కోసం కేన్‌ విలియమ్సన్‌ నాయకత్వంలో ఒక జట్టును... బంగ్లాదేశ్, పాక్‌లతో ఆడేందుకు టామ్‌ లాథమ్‌ సారథ్యంలో మరొక జట్టును ప్రకటించారు. టి20 ప్రపంచకప్, భారత్‌తో జరిగే టి20 సిరీస్‌ లో పాల్గొనే న్యూజిలాండ్‌ జట్టు: విలియమ్సన్‌ (కెప్టెన్‌), టాడ్‌ ఆస్టల్, బౌల్ట్, చాప్‌మన్, కాన్వే, ఫెర్గూసన్, గప్టిల్, జేమీసన్, డరైల్‌ మిచెల్, నీషమ్, ఫెలిప్స్, సాన్‌ట్నెర్, సీఫెర్ట్‌ (వికెట్‌ కీపర్‌), ఇష్‌ సోధీ, టిమ్‌ సౌతీ, ఆడమ్‌ మిల్నే (రిజర్వ్‌ ప్లేయర్‌).


 ⇒ 1-1తో సిరీస్ సమం
 ⇒ పాక్‌తో మూడో టెస్టు
 ⇒ అసద్ షఫీఖ్ సెంచరీ వృథా
 షార్జా: ఫిలిప్ హ్యూస్ మరణంతో తీవ్ర భావోద్వేగానికి గురైన న్యూజిలాండ్ ఆటగాళ్లు మైదానంలో మాత్రం సత్తా చూపారు. పాకిస్తాన్‌తో జరిగిన చివరిదైన మూడో టెస్టులో ఇన్నింగ్స్ 80 పరుగుల తేడాతో కివీస్ ఘనవిజయం సాధించింది. దీంతో సిరీస్ 1-1తో సమమైంది. కివీస్ జట్టు తమ తొలి ఇన్నింగ్స్‌లో 143.1 ఓవర్లలో 690 పరుగులకు ఆలౌటయ్యింది. ఇది ఆ జట్టు టెస్టు చరిత్రలో అత్యధిక స్కోరు కావడం విశేషం. ఓవరాల్‌గా కివీస్ 339 పరుగుల తొలి ఇన్నింగ్స్ ఆధిక్యం సాధించగా... రాహత్ అలీ, యాసిర్ షాలకు నాలుగేసి వికెట్లు దక్కాయి. అనంతరం రెండో ఇన్నింగ్స్‌లో బరిలోకి దిగిన పాక్ జట్టును సీమర్ ట్రెంట్ బౌల్ట్ (4/38), మార్క్ క్రెయిగ్ (3/109) ఇబ్బంది పెట్టారు.
 
 వీరి ధాటికి 63.3 ఓవర్లలో 259 పరుగులకు పాక్ ఆలౌటయ్యింది. అసద్ షఫీఖ్ (148 బంతుల్లో 137; 18 ఫోర్లు; 6 సిక్సర్లు) శతకం సాధించినప్పటికీ మిగతా బ్యాట్స్‌మెన్ నుంచి సహకారం కరువైంది. ఈ మ్యాచ్‌లో పది వికెట్లు తీసిన క్రెయిగ్‌కు ‘మ్యాన్ ఆఫ్ ది మ్యాచ్’ పురస్కారం... మహ్మద్ హఫీజ్‌కు ‘మ్యాన్ ఆఫ్ ది సిరీస్’ పురస్కారాలు  లభించాయి.  ఈ రెండు జట్ల మధ్య గురువారం నుంచి రెండు టి20 మ్యాచ్‌లు, ఐదు వన్డేల సిరీస్ మొదలవుతుంది. మూడో టెస్టులో మొత్తం 35 సిక్సర్లు నమోదయ్యాయి (ఇందులో కివీస్ నుంచే 22 ఉన్నాయి). టెస్టుల్లో ఇది ప్రపంచ రికార్డు. గతంలో ఇది 27గా ఉంది. అలాగే ఒక ఇన్నింగ్స్‌లో ఆరుగురు కివీస్ బ్యాట్స్‌మెన్ 50కి పైగా పరుగులు సాధించడం కూడా ఇదే తొలిసారి.