సాక్షి, ముంబై: ఆన్‌లైన్‌ వీడియో గేమ్‌ పబ్జీ పిచ్చి మహారాష్ట్రలో ఇద్దరు యువకులను బలితీసుకుంది. హింగోలి ప్రాంతంలో నాగేశ్‌ గోరే (22), స్వన్నిల్‌ అన్నపూర్ణ (24) అనే ఇద్దరు ఈ ఆటలో మునిగిపోయి ఉండగా వారిని రైలు ఢీకొంది. శనివారం సాయంత్రం ఖటకాళీ బైపాస్‌ వద్ద ఉన్న రైల్వే ట్రాక్‌ దగ్గరకు వీరిద్దరూ మోటర్‌ సైకిల్‌పై వచ్చారు. ట్రాక్‌ పక్కన బైక్‌ను ఉంచి పట్టాలపై కూర్చుని పబ్జీ ఆడసాగారు. ఆటలో నిమగ్నమైన వీరు అజ్మీర్‌–హైదరాబాద్‌ రైలు వస్తున్న విషయాన్ని కూడా గమనించలేదు. రైలు డ్రైవర్‌ హార్న్‌ కొట్టినా పట్టించుకోలేదు. దీంతో వేగంగా దూసుకొచ్చిన రైలు ఇద్దరినీ ఢీ కొంది. అక్కడికక్కడే వారు మరణించారు. ప్రమాదవశాత్తూ సంభవించిన మరణంగా పోలీసులు కేసు నమోదు చేశారు.


 22 రోజులు గేమ్ ఆడి చనిపోయిన రష్యా టీనేజర్
 మాస్కో: వీడియో గేమ్ పిచ్చి ముదిరితే ప్రాణాలే పోతాయని హెచ్చరించే ఉదంతమిది. రష్యాలో ఓ టీనేజర్ 22 రోజుల పాటు ఏకధాటిగా వీడియో గేమ్ ఆడి అనారోగ్యంతో మృతిచెందాడు. బాష్కోర్తోస్తాన్ రిపబ్లిక్‌లోని ఉల్చాయ్‌కి చెందిన 17 ఏళ్ల రుస్తాం కాలు విరగడంతో గత నెల 8 నుంచి ఇంటికే పరిమితమయ్యాడు. విసుగు పుట్టడంతో ఆన్‌లైన్‌లో ‘డిఫెన్స్ ఆఫ్ ది ఏన్షియంట్స్’ గేమ్‌ను విపరీతంగా ఆడాడు.
 
 తిండి, నిద్ర తప్పిస్తే మిగతా సమయమంతా అదే పని. తల్లిదండ్రులు వాళ్ల ఉద్యోగాల్లో పడిపోయి అతని సంగతి పెద్దగా పట్టించుకోలేదు. గత నెల 30న అతని గదిలోంచి కీ బోర్డు చప్పుడు వినిపించలేదు. తల్లిదండ్రులు లోనికెళ్లి చూడగా అతడు స్పృహ తప్పి కనిపించాడు. వెంటనే ఆస్పత్రికి తరలించగా, అప్పటికే చనిపోయినట్లు వైద్యులు ధ్రువీకరించారు. నడక, ఇతర శారీకర కదలికల్లేకపోవడంతో రక్తం గడ్డకట్టడం వల్ల రుస్తాం చనిపోయి ఉంటాడని వైద్యులు భావిస్తున్నారు.
 
 అన్నట్టు.. రుస్తాం విగతజీవి అయ్యేముందు తనకిష్టమైన ఆ గేమ్‌లోని తన పాత్ర చనిపోవడం చూశాడట. అతడు గత ఏడాదిన్నరలో 2 వేల గంటలకు పైగా గేమ్ అడినట్లు దర్యాప్తు అధికారులు తేల్చారు. రుస్తాం మృతి తల్లిదండ్రులకు గట్టి హెచ్చరిక అని బాలల హక్కుల అధికారి పావెల్ అస్తాఖోవ్ అన్నారు.
 
 వారు తమ పిల్లలను వారి మానాన వారిని వదిలేయకుండా ఒక కన్నేసి ఉంచాలని, కంప్యూటర్లకు, ఇంటర్నెట్‌కు, వీడియోగేమ్‌లకు బానిసలను చేయొద్దని సూచించారు. ఈ ఏడాది మార్చిలో చైనాలో ఓ 23 ఏళ్ల యువకుడు ఇంటర్నెట్ కఫేలో 19 గంటలు ఏకధాటిగా వీడియో గేమ్ ఆడి చనిపోవడం తెలిసిందే.