వివాహానికి ముందు ఆ తరువాత అమలాపాల్ నటనలో మార్పును సులభంగానే గ్రహించవచ్చు. ఆమె చిత్రాల ఎంపికలోను అది స్పష్టంగా కనిపిస్తోంది.పెళ్లికి ముందు అందరు హీరోయిన్ల మాదిరిగానే ఆ వయసుకు తగ్గట్టుగా హీరోలతో ఆటాపాట అంటూ లవ్, రొమాన్స్ పాత్రల్లో జాలీగా నటించేశారు.  పెళ్లి తరువాత అమలాపాల్ నిర్ణయంలో చాలా మార్పు కనిపిస్తోందని స్పష్టంగా చెప్పవచ్చు.
  
   వివాహానంతరం సెలెక్టెడ్ చిత్రాలే చేస్తాను అని ప్రకటించిన అమలాపాల్ అదే విధంగా ఇప్పుడు పాత్రల ఎంపిక విషయంలో తీసుకుంటున్న శ్రద్ధ, జాగ్రత్తలు ఆమె పరిపక్వతను తెలియజేస్తున్నాయి. అమలాపాల్ అంగీకరించిన తొలి చిత్రం పసంగ-2. అందులో సూర్యకు అర్ధాంగిగా ఇద్దరు పిల్లలకు తల్లిగా పరిణితి చెందిన నటనను ప్రదర్శించి ప్రశంసలు అందుకున్నారు.
  
  ఎంతగా అంటే ఆ పాత్రలో నటించే అవకాశాన్ని తాను వదులుకుని ఉండకూడదు అని నటి జ్యోతిక వ్యక్తం చేసినంత. పసంగ-2లో అమలాపాల్ పాత్రను జ్యోతికతో నటింపజేయాలని ఆ చిత్ర దర్శకుడు పాండిరాజ్ ఆశించారు. ఆమె ఆసక్తి చూపకపోవడంతో అమలాపాల్‌ను ఎంపిక చేశారు. అమలాపాల్ తాజాగా మరోసారి అమ్మగా మారనున్నారు.ఈ చిత్రం పేరు అమ్మ కణక్కు(అమ్మలెక్క)విశేషం ఏమిటంటే పసంగ-2 చిత్రాన్ని నటుడు సూర్య నిర్మిస్తే, ఈ చిత్రాన్ని నటుడు ధనుష్ నిర్మిస్తున్నారు.
  
   దనుష్ తన వండర్ బార్ ఫిలింస్ పతాకంపై ఎదిర్‌నీశ్చల్,వేలై ఇల్లా పట్టాదారి, కాక్కముట్టై, నానుమ్ ైరౌడీదాన్, తంగమగన్ వంటి పలు విజయవంతమైన చిత్రాలను నిర్మించారు. తాజాగా అమలాపాల్ ప్రధాన పాత్రలో నటిస్తున్న అమ్మ కణక్కు చిత్రాన్ని నిర్మిస్తున్నారు. దర్శకుడు సముద్రకని,రేవతి ముఖ్యపాత్రలు పోషిస్తున్న ఈ చిత్రానికి అశ్వినీ అయ్యర్ కథ,దర్శకత్వం బాధ్యతల్ని నిర్వహిస్తున్నారు.
  
  
   ఇది హిందీలో తెరకెక్కిన నిల్ బెట్టే సన్నాట్టా చిత్రానికి రీమేక్. అక్కడ మంచి విజయం సాధించి అంతర్జాతీయ స్థాయిలో అవార్డును, ప్రశంసలను పొందిన ఈ చిత్రం తల్లీ కూతుళ్ల అనుబంధాన్ని ఆవిష్కరించే కథాంశం అని ధనుష్ ఇంతకు ముందే వెల్లడించారు. ఈ చిత్రం శుక్రవారం పూజా కార్యక్రమాలతో ప్రారంభమైంది.
  


 కోలీవుడ్లో స్టార్ హీరోగా మంచి ఫాంలో ఉన్న సూర్య నిర్మాతగాను మంచి పేరు తెచ్చుకునే ప్రయత్నం చేస్తున్నాడు. ఇప్పటికే జ్యోతిక లీడ్ రోల్లో 36 వయోధినిలే సినిమాను తెరకెక్కించిన సూర్య, మరో సందేశాత్మక చిత్రంతో ప్రేక్షకుల ముందుకు వచ్చే ప్రయత్నం చేస్తున్నాడు. జాతీయ అవార్డు గెలిచిన దర్శకుడు పాండిరాజ్ దర్శకత్వంలో తెరకెక్కిన పసంగ 2 సినిమాను 'మేము' పేరుతో తెలుగు లోనూ రిలీజ్ చేయాలని భావిస్తున్నాడు.
 
 చాలా కాలం క్రితమే అన్నికార్యక్రమాలు పూర్తి చేసుకున్న ఈ సినిమా, రిలీజ్ విషయంలో మాత్రం ఎటూ తేల్చుకోలేకపోతున్నాడు సూర్య. డిసెంబర్ తొలి వారంలోనే రిలీజ్ ప్లాన్ చేసినా ప్రొడక్షన్ పనులు పూర్తి కాకపోవటంతో వాయిదా పడింది. ఆ తరువాత క్రిస్టమస్ బరిలో నిలపాలని భావించినా, తెలుగులో మూడు సినిమాల రిలీజ్ ఉండటంతో వాయిదా వేశారు.  జనవరిలో కూడా వరుసగా పెద్ద సినిమాలు రిలీజ్ అవుతుండటంతో ఇక చేసేదేమి లేక జనవరి నెలాఖరున మేము సినిమాను రిలీజ్ చేయడానికి ప్లాన్ చేస్తున్నారు.
 
 తన సొంత నిర్మాణ సంస్థ 2డి ఎంటర్టైన్మెంట్స్ బ్యానర్పై సూర్య నిర్మిస్తున్న ఈ సినిమాలో, తనూ ఓ ముఖ్యపాత్రలో నటిస్తున్నాడు. దాదాపు 40 నిమిషాల పాటు సూర్య ఈ సినిమాలో కనిపించనున్నాడు. అమలాపాల్, బిందు మాధవి ఇతర లీడ్ రోల్స్లో నటిస్తున్న ఈ సినిమా కథ మానసిక వ్యాధితో బాధపడుతున్న చిన్నారుల చుట్టూ తిరుగుతోంది. తమిళంలో ఇప్పటికే రిలీజ్ అయిన ఈ సినిమాకు మంచి రెస్పాన్స్ వస్తోంది.


 కోలీవుడ్ స్టార్ హీరోలు కమర్షియల్ సినిమాలతో పాటు సోషల్ మెసేజ్ ఉన్న సినిమాల మీద కూడా దృష్టి పెడుతున్నారు. హీరోలుగానే కాదు నిర్మాతలుగా కూడా అలాంటి సినిమాలతో తమ బాధ్యతను నిర్వర్తిస్తున్నారు. ఇటీవల ధనుష్ 'కాకముటై' సినిమాతో బస్తీల్లో పిల్లల జీవనాన్ని పరిచయం చేయగా, సూర్య కూడా అదే బాటలో నడుస్తున్నాడు.
 
 సూర్య తన సొంత నిర్మాణ సంస్థ 2డి ఎంటర్టైన్ మెంట్స్ బ్యానర్పై 'పసంగ 2' అనే బాలల చిత్రాన్ని తెరకెక్కిస్తున్నాడు. నేషనల్ అవార్డ్ విన్నర్ పాండిరాజ్ దర్శకత్వంలో తెరకెక్కుతున్న ఈ సినిమా తెలుగు వర్షన్కు 'మేము' అనే టైటిల్ను ఫైనల్ చేశారు. సూర్య, అమలా పాల్ గెస్ట్ అపియరెన్స్ ఇస్తున్న ఈ సినిమాను డిసెంబర్లో రిలీజ్ చేయడానికి ప్లాన్ చేస్తున్నారు.
 
 పాండిరాజ్ దర్శకత్వంలోనే బాలల చిత్రాలుగా తెరకెక్కిన 'పసంగ', 'మెరినా' సినిమాలు మంచి విజయాలు సాధించటంతో అదే జానర్ లో మరోసారి 'పసంగ 2'ను తెరకెక్కించారు. తొలుత తమిళ్ లోనే రిలీజ్ చేయాలని భావించినా, సూర్య గెస్ట్ అపియరెన్స్ ఇస్తుండటంతో తెలుగులో కూడా మంచి మార్కెట్ ఉంటుందని భావించి 'మేము' పేరుతో తెలుగులో రిలీజ్ చేయడానికి రెడీ అవుతున్నారు.