సాక్షి, హైదరాబాద్‌ : చెరువుల పునరుద్ధరణకు ఉద్దేశించిన ‘మిషన్‌ కాకతీయ’పనులు చివరి దశలో చతి కిలపడ్డాయి. ఏడాదిగా నిధుల చెల్లింపుల్లో జాప్యం జరగడంతో నిర్మాణ పనులు ఆగిపోయాయి. దీంతో మూడు, నాలుగో విడతలో చేపట్టిన 5,553 చెరువుల పనుల్లో స్తబ్దత ఏర్పడింది. నిధులు విడుదల చేస్తే తప్ప ముందుకు కదిలే పరిస్థితి ఏర్పడింది. ఎక్కడివక్కడే... రాష్ట్రంలో 4 విడతలుగా చేపట్టిన మిషన్‌ కాకతీయ కార్యక్రమం కింద 27,625 చెరువులను పునరుద్ధరించాలని నిర్ణయించగా, అందులో 26,989 చెరువుల పనులు ఆరంభించారు. ఇప్పటి వరకు 21,436 పనులు పూర్తయ్యాయి. మొదటి, రెండో విడతలో చేసినంత వేగంగా మూడు, నాలుగో దశల్లో ముం దుకు కదలడం లేదు. మూడో దశలో 5,958 పనులు చేపట్టగా 3,918 చెరువులే పూర్తయ్యాయి. మరో 2,040 చెరువుల పనులు ఎక్కడివక్కడే ఉన్నాయి.  వీటిని గతేడాది జూన్‌ నాటికే పూర్తి చేయాలని లక్ష్యంగా పెట్టినా అవి ముందుకు సాగడం లేదు. ఇక 4వ విడతలో 4,214 చెరువుల పనుల్లో ఇప్పటివరకు 1,742 పనులే పూర్తయ్యాయి. మరో 2,472 పనులు పూర్తి కాలేదు. భారీ ప్రాజెక్టుల అవసరాలకే నిధుల మళ్లింపు జరగడంతో ‘మిషన్‌ కాకతీయ’కు అనుకున్న మేర నిధుల ఖర్చు జరుగలేదు. దీంతో కాంట్రాక్టర్లు చేతులెత్తేశారు. బిల్లుల చెల్లింపుపై ఆర్థిక శాఖను సంప్రదించినప్పుడల్లా అరకొర నిధులను విదిల్చి చేతులు దులుపుకుంటోంది. పెండింగులో రూ.450 కోట్లు... ప్రస్తుతం రూ.450 కోట్ల మేర బిల్లులు పెండింగ్‌లో ఉన్నాయి. దీంతో కాంట్రాక్టర్లు పనులు చేసేందుకు నిరాకరిస్తున్నారు. దీంతో ప్రస్తుతం పనులు చేయాల్సిన సీజన్‌ అంతా వృథాగా పోతోంది. జూన్‌ నుంచి వర్షాలు మొదలైతే పనులు కొనసాగించే వీలుం డదు. ఈ నేపథ్యంలో చెరువుల పునరుద్ధరణను నీటిపారుదల శాఖ ఎలా ముగిస్తుందన్నది పెద్ద ప్రశ్నగా మారింది. ఇక ‘మిషన్‌ కాకతీయ’ప్రభావం ప్రస్తుతం ప్రభుత్వం తలపెట్టిన చెక్‌డ్యామ్‌ల నిర్మాణంపై చూపనుంది. రూ.4 కోట్లకు పైగా అంచనాలతో చెక్‌డ్యామ్‌లకు టెండర్లు పిలవనున్నారు. వీటి బిల్లుల చెల్లింపులో జాప్యం భయంతో నిర్మాణాలకు కాంట్రాక్టర్లు ముందుకు వస్తారా? అన్నది ప్రశ్నగా ఉందని నీటి పారుదల వర్గాలు చెబుతున్నాయి.


 సాక్షి, హైదరాబాద్: రాష్ట్రంలో కొనసాగుతున్న సాగునీటి ప్రాజెక్టులకు పెరిగిన ధరలకు అనుగుణంగా నిధుల చెల్లింపున (ఎస్కలేషన్)కు కేబినెట్ సబ్ కమిటీ స్థూలంగా పచ్చజెండా ఊపింది. ఉమ్మడి ఆంధ్రప్రదేశ్‌లో 2014 ఫిబ్రవరిలో ఇచ్చిన జీవో 13ను కొద్దిపాటి మార్పులతో అమలు చేసేందుకు సానుకూలత తెలిపింది. పనులు జరగని చోట టెండర్ రద్దుచేసి కొత్తగా టెండర్లు పిలిస్తే భారం దాదాపు వందరెట్లు పెరుగుతుండటం, న్యాయపరమైన చిక్కులు తప్పని దృష్ట్యానే అదనపు చెల్లింపులపై సబ్ కమిటీ ఏకాభిప్రాయానికి వచ్చినట్లు తెలుస్తోంది.
 
 అయితే ఎస్కలేషన్ కింద చెల్లింపులను కాంట్రాక్టర్లకు ఒకేమారు కాకుండా మూడు విడతల్లో చేపట్టాలని, ఇందులోనూ పనులు చేస్తున్న కాంట్రాక్టర్లకే తొలి ప్రాధాన్యం ఇవ్వాలని నిర్ణయించినట్లు సమాచారం. ప్రస్తుతం కేబినెట్ సబ్ కమిటీ తీసుకున్న నిర్ణయంతో ప్రాజెక్టులపై అదనంగా రూ.3వేల కోట్ల మేర భారం పడే అవకాశం ఉంది. దీనిపై కమిటీ ఒకట్రెండు రోజుల్లో ముఖ్యమంత్రి కె.చంద్రశేఖర్‌రావుకు నివేదిక సమర్పించే అవకాశాలున్నాయి.
  
 కొత్త టెండర్లతో భారమనే...
 రాష్ట్రంలో జలయజ్ఞం కింద చేపట్టిన 33 సాగునీటి ప్రాజెక్టుల ద్వారా మొత్తంగా 387 టీఎంసీల మేర నీటిని వినియోగించుకుంటూ సుమారు 47.75 లక్షల ఎకరాల ఆయకట్టుకు నీరందించాలని లక్ష్యంగా పెట్టుకున్నారు. ఈ మొత్తం ప్రాజెక్టులకు రూ.1,11,240 కోట్ల పరిపాలనా అనుమతులు లభించగా, కాంట్రాక్టర్లతో రూ.88,148 కోట్ల విలువైన ఒప్పందాలు జరిగాయి. ఇందులో 2014-15 ఆర్థిక సంవత్సరం ముగిసే నాటికి రూ.45 వేల కోట్ల మేర పనులు జరగ్గా కొన్ని పూర్తయ్యాయి, మరికొన్ని పనులు వివిధ దశల్లో ఉన్నాయి.
 
 ప్రస్తుతం నిర్మాణంలో ఉన్న 25 ప్రాజెక్టుల పరిధిలోని 111 ప్యాకేజీల్లో రూ.23వేల కోట్ల విలువైన పనులు కొనసాగుతున్నాయి. ఈ పనులకు సంబంధించి స్టీల్, సిమెంట్, పెట్రోల్, డీజిల్, లేబర్, ఇతర సామగ్రికి పెరిగిన మార్కెట్ ధరలకు అనుగుణంగా నిధులు చెల్లించాలని కాంట్రాక్టర్లు డిమాండ్ చేస్తున్న దృష్ట్యా ప్రభుత్వం దీనిపై డిప్యూటీ సీఎం కడియం శ్రీహరి నేతృత్వంలో మంత్రి హరీశ్‌రావు, తుమ్మల నాగేశ్వరరావు, ఈటల రాజేందర్ సభ్యులుగా సబ్ కమిటీని ఏర్పాటు చేసింది. పలు దఫాలుగా భేటీఅయిన ఈ కమిటీ బుధవారం అధికారులతో మరోమారు సమీక్షించింది.
 
 సమీక్షలో అధికారులు ఎస్కలేషన్‌తో పడే భారం, రీ టెండరింగ్‌తో వచ్చే సమస్యలను గణాంకాలతో సహా వివరించారని తెలిసింది. నెట్టెంపాడు ప్రాజెక్టులోని ప్యాకేజీ 49ని రద్దు చేసి కొత్తగా టెండర్లు పిలిస్తే రూ.48 కోట్ల నుంచి రూ.114 కోట్లకు వ్యయం పెరిగిందని, మిడ్‌మానేరులో తొలుత రూ.261కోట్లతో వేసిన టెండర్‌కు రీ టెండర్ పిలిస్తే దాని వ్యయం ఏకంగా రూ.454 కోట్లకు పెరిగిందని అధికారులు వివరించారు. ఇలా పనులు జరగని ప్యాకేజీల్లో రీ టెండరింగ్ అంటే ఆ భారం రూ.9వేల కోట్ల వరకు ఉంటుందని, ఇది ఎస్కలేషన్‌తో పెరిగే భారానికి మూడు రెట్లని తెలిపారు.
 
 ప్రస్తుత పరిస్థితుల్లో ఏపీ మాదిరిగా జీవో 13ను అమలు చేస్తూ, 2013 ఏప్రిల్ నుంచి జరిగిన పనులన్నింటికి కొత్త ధరల ప్రకారం ఎస్కలేషన్ ఇవ్వడం ఉత్తమమని చెప్పినట్లుగా తెలుస్తోంది. ఈ నేపథ్యంలో అధికారుల వాదనతో ఏకీభవించిన సబ్ కమిటీ సూత్రప్రాయంగా ఎస్కలేషన్‌కు ఓకే చెప్పినట్లుగా సమాచారం. అయితే ఎస్కలేషన్‌తో పెరిగే వ్యయాన్ని కాంట్రాక్టర్లకు ఒకేమారు చెల్లించకుండా, మొదలు ఒకమారు, పనుల మధ్యలో ఒకమారు, పనులు పూర్తయ్యాక మరోమారు విడతల వారీ చెల్లించాలని కమిటీ అభిప్రాయపడినట్లు సమాచారం.