అనంతపురం కల్చరల్‌ : ‘తొమ్మిది నెలలవుతోంది.. ఇంత వరకు జీతాలు ఇవ్వలేదు. ఎలా బతకాలి మేడమ్‌’ అంటూ దేవదాయ శాఖ సహాయ కమిషనర్‌ వాణి ఎదుట అర్చకులు వాపోయారు. అనంతపురంలోని మొదటిరోడ్డు కాశీవిశ్వేశ్వర స్వామి ఆలయంలో బుధవారం ఉదయం అర్చక పురోహిత గ్రీవెన్స్‌ను, మధ్యాహ్నం కో ఆర్డినేటర్ల సమావేశాన్ని నిర్వహించారు. జిల్లా వ్యాప్తంగా పలు ఆలయాల నుంచి వచ్చిన అర్చకులు తమ సమస్యలను ఈ సందర్భంగా దేవదాయ శాఖ ఏసీకు వివరించారు. తొమ్మిది నెలలుగా జీతాలు అందకపోవడం జీవనం దుర్భరంగా మారిందని విడపనకల్లు మండలం పాల్తూరు గ్రామం అభయాంజనేయస్వామి ఆలయ అర్చకుడు మురళీస్వామి ఆవేదన వ్యక్తం చేశారు.  దాదాపు 30 ఎకరాల ఆలయ భూములను రెవెన్యూ శాఖ ప్లాట్లు వేసి ప్రజలకిచ్చారని, ఒప్పందం మేరకు ప్రతినెలా వడ్డీ ఆలయానికి అందక పోవడంతో ఇబ్బందులు పడుతున్నామన్నారన్నారు. అధికారుల చుట్టూ తిరిగినా న్యాయం జరగడం లేదని వాపోయారు. పుట్లూరు మండలంలో ఆలయంలో హుండీ నిర్వహణకు గ్రామ పెద్దలు అడ్డుపడుతున్నారని న్యాయం చేయాలని విన్నవించుకున్నారు.  అనంతరం జరిగిన సమావేశంలో అర్చక  సమాఖ్య జిల్లా అధ్యక్షులు అంజన్‌కుమారాచార్యులు, ఉపాధ్యక్షులు ఆంజనేయులు, ప్రధాన కార్యదర్శి పూజారి భీమప్ప మాట్లాడుతూ జిల్లా అర్చక సమస్యలను త్వరితగతిన పరిష్కరించాలని అధికారులను కోరారు. ఆలయ భూములను 13వ కాలమానంలోకి ఎక్కిస్తే  ఇన్‌పుట్‌ సబ్సిడీ, విత్తన పంపిణీ, క్రాప్‌ డ్యామేజ్‌ లాంటివి వర్తిస్తాయన్నారు. అర్చక సమాఖ్య కోశాధికారి రాములు, ఈసీ మెంబర్లు నరసింహులు, పుల్లమాచార్యులు  పాల్గొన్నారు.  కో ఆర్డినేటర్ల నియామకం జిల్లా ఏఆర్‌సీటీ (అర్చక రిలీజియన్‌ చారిటబుల్‌ ట్రస్టు) జిల్లా కోర్డినేటర్‌గా రవిచంద్ర శర్మ నియమితులయ్యారు. ఈ మేరకు ఆయనకు నియామక పత్రాన్ని ఆ సంఘం అధ్యక్షుడు అంజనకుమారాచార్యులు అందించారు. వజ్రకరూరుకు రాజేంద్రప్రసాదశర్మ, తాడిపత్రికి రంగనాథశర్మ, అమరాపురానికి శ్రీనాథభట్టును మండల కో ఆర్డినేటర్లుగా నియమించారు.


 తిరుపతి : ఎన్నికల హామీల్లో భాగంగా ఏపీ సీఎం చంద్రబాబునాయుడు రాష్ట్రంలోని అర్చకులకు నెలకు రూ.5 వేల జీతం ఇస్తామన్న హామీని అమలు చేసేందుకు టీటీడీ నిధులకు ఎసరు పెట్టేందుకు సిద్ధమయ్యారని సీపీఐ రాష్ట్ర కార్యదర్శివర్గ సభ్యుడు పి.హరినాథరెడ్డి విమర్శించారు. స్థానిక సీపీఐ కార్యాలయంలో సోమవారం ఆ పార్టీ జిల్లా కార్యవర్గ సమావేశం నిర్వహించారు. ఈ సమావేశానికి ఆయన ముఖ్య అతిథిగా హాజరై మాట్లాడారు.
 
 అర్చకుల జీతాల చెల్లింపునకు అక్రమంగా శ్రీవారి నిధులను తీసుకుపోవాలనుకోవడం విడ్డూరంగా ఉందన్నారు. సీపీఐ జిల్లా కార్యదర్శి ఎ.రామానాయుడు మాట్లాడుతూ జూలై 3, 4 తేదీల్లో మహిళా సమాఖ్య జిల్లా శిక్షణాతరగతులు, 11న జిల్లా సర్వసభ్య సమావేశం, 17, 18, 19 తేదీల్లో మదనపల్లెలోని హార్సిలీ హిల్స్‌లో సభ్ కమిటీ సభ్యులకు రాజకీయ తరగతులు నిర్వహిస్తామన్నారు. ఈ సమావేశంలో సీపీఐ నాయకులు చిన్నం పెంచలయ్య, ఆర్.వెంకయ్య, పి,.వెంకటరత్నం, పి.మురళి, ఆర్.హరిక్రిష్ణ, నాగరాజు, పిఎల్.నరసింహులు, రామచంద్రయ్య పాల్గొన్నారు.