సాక్షి, న్యూఢిల్లీ : గోప్యత ప్రాథమిక హక్కేనని సుప్రీం కోర్టు చరిత్రాత్మక తీర్పుతో దీని ప్రభావం ఆధార్‌పై ఎలా ఉండబోతుందనే ఉత్కంఠ సర్వత్రా నెలకొంది. కేం‍ద్ర ప్రభుత్వం సంక్షేమ పథకాల అమలు సహా అన్నింటికీ ఆధార్‌ అనుసంధానం అనివార్యం చేయడంతో తాజా తీర్పు పర్యవసానాలపై పలు సందేహాలు ముందుకొచ్చాయి. సుప్రీం తీర్పు ప్రాతిపదికగా ఆధార్‌ చెల్లుబాటుపై ఐదుగురు న్యాయమూర్తులతో కూడిన సుప్రీం ధర్మాసనం ఓ నిర్ణయం తీసుకోనుంది. ఆధార్‌ అనుసంధానంపై కోర్టు సహేతకు నియం‍త్రణలకు అనుమతించడంతో సామాజిక సంక్షేమ పథకాలకు ఆధార్‌ జోడింపును మినహాయించే అవకాశం ఉందని భావిస్తున్నారు.
 
 మరోవైపు గోప్యత ప్రాథమిక హక్కని సర్వోన్నత న్యాయస్థానం నిర్ధేశించడంతో పౌరుల గోప్యతను కాపాడేందుకు ప్రభుత్వం విదేశీ కంపెనీలను స్థానికంగా కార్యాలయాలు ఏర్పాటు చేయాలని, ఇక్కడ సర్వర్లు నెలకొల్పాలని కోరుతుందని నిపుణులు అంచనా వేస్తున్నారు.ఇక పౌరుల సమాచారాన్ని సేకరించే గూగుల్‌, ఫేస్‌బుక్‌, మైక్రోసాఫ్ట్‌ వంటి కంపెనీలపైనా సుప్రీం రూలింగ్‌ ప్రభావం చూపుతుందని భావిస్తున్నారు.


 సాక్షి, న్యూఢిల్లీ : గోప్యతను ప్రాథమిక హక్కుగా పరిణించడాన్ని సర్వోన్నత న్యాయస్థానం ఎదుట తాను వ్యతిరేకించానని మాజీ అటార్నీ జనరల్‌ ముకుల్‌ రోహత్గి చెప్పారు.  గోప్యత ప్రాథమిక హక్కు కాదని, అది సాధారణ హక్కు మాత్రమేనని ప్రభుత్వం కోర్టులో వాదించిందని ఈ ఏడాది జూన్‌ వరకూ సుప్రీంలో ప్రభుత్వం తరపున వాదనలు వినిపించిన రోహత్గి తెలిపారు. గతంలో గోప్యత అంశంపై భిన్నతీర్పులు వచ్చిన ఉదంతాన్ని ప్రస్తావించి దీనిపై రాజ్యాంగ ధర్మాసనానికి నివేదించేలా సుప్రీం కోర్టును రోహత్గి ఒప్పించారు.
 
 జులైలో గోప్యత అంశాన్ని విచారించేందుకు సుప్రీం తొమ్మిది మంది న్యాయవాదులతో కూడిన బెంచ్‌ ఏర్పాటు చేసే సమయానికి ఆయన అటార్నీ జనరల్‌ పదవి నుంచి వైదొలిగారు. 2015 నుంచి రోహత్గి ప్రభుత్వం తరపున వాదనలు వినిపిస్తూ గోప్యత ప్రాథమిక హక్కు కాదని నొక్కిచెబుతూ వచ్చారు.
 భారత రాజ్యాంగంలో అసలు గోప్యత అనే భావన లేదన్న విషయాన్నితాను మొదటినుంచి చెబుతున్నానన్నారు. అయితే ప్రభుత్వం తర్వాత తన వైఖరి మార్చుకుని గోప్యత కొంతమేరకు హక్కుగా పరిగణించవచ్చని కోర్టు ముందు అంగీకరించిందని చెప్పారు. ఇక గోప్యత ప్రాథమిక హక్కేనని సుప్రీం  కోర్టు తేల్చిచెప్పడాన్ని పలువురు స్వాగతించారు.