రాయగడ: రాయగడ జిల్లా కాశీపూర్‌ సమితి రెల్లిగుమ్మ రైల్వేస్టేషన్‌ వద్ద నడుస్తున్న ట్రైన్‌ నుంచి గుర్తు తెలియని వ్యక్తి ఇద్దరు బాలురును  బయటకు తోసివేయడంతో వారి పరిస్థితి విషమంగా ఉంది.  వివరాలిలా ఉన్నాయి. జిల్లాలోని టికిరి ప్రాంతం డబుడ గ్రామానికి చెందిన సంతోష్‌నాయక్‌ (13) లచన్‌నాయక్‌(15)లు వివాహానికి హాజరయ్యేందుకు కొరాపుట్‌ నుంచి రాయగడకు ఇంటర్‌సిటీ ఎక్స్‌ప్రెస్‌లో వస్తుండగా కదులుతున్న ట్రైన్‌ నుంచి రెల్లిగుమ్మ స్టేషన్‌ దగ్గరలో గుర్తు తెలియని వ్యక్తులు ఇద్దరినీ తోసివేయడంతో   ప్రమాదకరమైన గాయాలయ్యాయి. ఈ పరిస్థితిని గుర్తించిన   తోటి ప్రయాణికులు తక్షణం శ్యామలేశ్వరి ఎక్స్‌ప్రెస్‌లో వారిద్దరినీ రాయగడ జిల్లా ఆస్పత్రికి పంపించారు. ఇద్దరి పరిస్థితి విషమంగా ఉన్నట్లు తెలుస్తోంది. 


 లక్నో: ఉత్తరప్రదేశ్లో దిగ్భ్రాంతికర సంఘటన చోటుచేసుకుంది. కదులుతున్న రైలులో ఓ మహిళపై రాత్రి ఇద్దరు వ్యక్తులు లైంగిక దాడికి పాల్పడటమే కాకుండా ఆమెను అదే రైలులోంచి ఖాజాకుర్ద్ అనే గ్రామంవద్ద కిందికి తోసేశారు. దీంతో ఆమె కాలు విరిగిపోయింది. నొప్పి బాధతో అరుస్తున్న ఆ మహిళను అక్కడి గ్రామస్తులు గుర్తించారు. ఆ సమయంలో ఆమె వివస్త్రగా పడి ఉంది. దీంతో ఆమెపై లైంగిక దాడి జరిగిందనే నిర్ణయానికి వచ్చారు.
 
 బాధితురాలిని ప్రశ్నించగా తాను షాగంజ్ ప్రాంతానికి చెందిన మహిళనని, ఇంటికి వెళుతున్న తనపై ఇద్దరు వ్యక్తులు లైంగికంగా వేధించి రైలులో నుంచి తోసేశారని చెప్పింది. దీంతో ఆమెను తొలుత జిల్లా ఆస్పత్రికి అనంతరం వారణాసిలోని ప్రముఖ ఆస్పత్రికి తరలించారు. ఆమె పరిస్థితి విషమంగానే ఉంది. ఈ ఘటనపై పోలీసు అధికారులు స్పందిస్తూ నిందితులను పట్టుకుంటామని, ఎలాంటి వారైనా వదిలిపెట్టబోమని చెప్పారు.