హైదరాబాద్, బిజినెస్‌ బ్యూరో: ప్రస్తుత ఆర్థిక సంవత్సరం మూడో త్రైమాసికంలో జీఎంఆర్‌ ఇన్‌ఫ్రాస్ట్రక్చర్‌ నష్టాలు కన్సాలిడేటెడ్‌ ప్రాతిపదికన రూ.279 కోట్లకు తగ్గాయి. అంతక్రితం ఆర్థిక సంవత్సరం ఇదే కాలంలో నష్టాలు రూ.542 కోట్లు. మరోవైపు స్థూల ఆదాయాలు రూ.1,958 కోట్ల నుంచి రూ. 2,196 కోట్లకు పెరిగాయి. కీలకమైన ఎయిర్‌పోర్ట్స్‌ విభాగం ఆదాయాలు రూ. 1,358 కోట్ల నుంచి రూ. 1,615 కోట్లకు, విద్యుత్‌ విభాగం ఆదాయాలు రూ.146 కోట్ల నుంచి రూ.207 కోట్లకు పెరిగినట్లు జీఎంఆర్‌ వెల్లడించింది. హైదరాబాద్‌ ఎయిర్‌పోర్ట్‌ సామర్థ్యాన్ని 1.2 కోట్ల నుంచి (వార్షికంగా) 3.4 కోట్లకు పెంచే దిశగా విస్తరణ పనులు షెడ్యూల్‌ ప్రకారం జరుగుతున్నాయని పేర్కొంది. క్యూ3లో హైదరాబాద్‌ ఎయిర్‌పోర్ట్‌లో ప్రయాణికుల ట్రాఫిక్‌ 55 లక్షల నుంచి 9 శాతం వృద్ధితో 59 లక్షలకు చేరగా, ఢిల్లీ విమానాశ్రయంలో 6 శాతం పెరిగి 1.87 కోట్లకు చేరినట్లు తెలిపింది. 


 న్యూఢిల్లీ : టూవీలర్ దిగ్గజం హీరో మోటార్ కార్పొ, స్ట్రీట్ అంచనాలను అధిగమించి రయ్మని దూసుకుపోయింది. బుధవారం వెలువరిచిన రెండో క్వార్టర్ ఫలితాల్లో పన్నుల అనంతరం లాభాల్లో 28 శాతం వృద్ధి సాధించి, రూ.1,004 కోట్ల లాభాలను నమోదుచేసింది. గతేడాది ఇదే క్వార్టర్లో ఈ లాభాలు రూ.772 కోట్లగా ఉన్నాయి.  మార్కెట్ విశ్లేషకుల అంచనాల ప్రకారం హీరో మోటార్ కార్పొ ఈ క్వార్టర్లో కేవలం రూ.926 కోట్ల లాభాలను మాత్రమే రికార్డు చేస్తుందని తెలిసింది. కానీ అంచనాలు మించి హీరో మోటార్ కార్పొ దూసుకుపోయింది.
  
 అన్ని త్రైమాసిక ఫలితాల్లో కెల్లా ఇవే అత్యంత ఉత్తమమైన క్వార్టర్లీ ఫలితాలుగా హీరో మోటార్ కార్పొకు నిలిచాయి. ఈ త్రైమాసికంలో హీరో మోటార్ కార్పొ రికార్డు స్థాయిల్లో 18,23,498 మోటార్ సైకిల్స్ విక్రయాలను చేపట్టినట్టు ప్రకటించింది. ఇవి గతేడాది కంటే 15.8 శాతం వృద్ధి అని కంపెనీ వెల్లడించింది. కాగ, కంపెనీ రూ.1000కోట్లకు పైగా క్వార్టర్లీ లాభాలను నమోదుచేయడం ఇదే మొదటిసారని హీరో మోటార్ కార్పొ చైర్మన్, మేనేజింగ్ డైరెక్టర్ పవన్ ముంజల్ తెలిపారు. గతేడాది ఇదే క్వార్టర్లో రూ.7,386 కోట్లగా ఉన్న కంపెనీ రెవెన్యూలు, ఈ త్రైమాసికంలో 15 శాతం ఎగిసి, రూ.8,449 కోట్లగా నమోదయ్యాయి.