తెలుగు ప్రజలకు వైఎస్‌ జగన్‌ సంక్రాంతి శుభాకాంక్షలు  
 
 సాక్షి, హైదరాబాద్‌: సంక్రాంతి పర్వదినాన్ని పురస్కరించుకుని విశ్వవ్యాప్తంగా ఉన్న తెలుగు వారందరికీ వైఎస్సార్‌ కాంగ్రెస్‌ పార్టీ అధ్యక్షుడు వైఎస్‌ జగన్‌మోహన్‌రెడ్డి శుభాకాంక్షలు తెలియజేశారు.
 
 భోగి పండుగ అందరికీ భోగభాగ్యాలు ప్రసాదించాలని, భోగిమంటలు, రంగవల్లులు, హరిదాసుల కీర్తనలు, గంగిరెద్దుల ఆటలు, గాలిపటాల సందళ్లతో ఇంటింటా వేడుకలతో సంక్రాంతి వేళ తెలుగు ప్రజలు అలరారాలని ఆయన ఆకాంక్షించారు. సంక్రాంతి పేరు చెప్పగానే పల్లెలు, రైతులు గుర్తుకొస్తారని, రైతన్న, పల్లెసీమలు సుభిక్షంగా పాడిపంటలతో సంతోషంగా ఉండాలని తాను ఎల్లప్పుడూ కోరుకుంటానని తన సంక్రాంతి సందేశంలో జగన్‌ పేర్కొన్నారు.


 సాక్షి, హైదరాబాద్‌: ముఖ్యమంత్రి కె.చంద్రశేఖర్‌రావు రాష్ట్ర ప్రజలకు సంక్రాంతి శుభాకాంక్షలు తెలిపారు. ఈసారి వర్షాలు సంతృప్తికర స్థాయిలో కురవడంతో రాష్ట్ర వ్యాప్తంగా సంతోషకరమైన వాతావరణంలో పండుగ జరుగుతుందని ఆయన పేర్కొన్నారు. ప్రజలు ఆనందోత్సాహాలతో సంక్రాంతి పండుగ నిర్వహించుకోవాలన్నారు. పాడిపంటలతో రాష్ట్రం తులతూగేలా దీవించాలని భగవంతుడిని ఆయన ప్రార్థించారు.