సాక్షి, ముంబై: నగరానికి ఆనుకుని ఉన్న అరేబియా సముద్రంలో అశ్వం అధిరోహించిన భారీ శివాజీ విగ్రహం (స్మారకం) ఏర్పాటుకు రంగం సిద్ధమైంది. అనుమతి కోసం కేంద్ర పర్యావరణ శాఖకు పంపిన ప్రతిపాదనకు వారం రోజుల్లో ఆమోదం లభించే అవకాశాలుండడంతో పనులు ప్రారంభించడంపై దృష్టి సారించింది. ‘సముద్రం ఒడ్డు నుంచి కిలోమీటరున్నర లోపల నీటిపై భారీ ప్లాట్‌ఫారం నిర్మించనున్నాం. దీనిపై అంతర్జాతీయ స్థాయిలో స్మారకాన్ని ఏర్పాటుచేస్తాం.
 
  దీనికోసం రూ.1,400 కోట్లు ఖర్చవుతుందని ప్రభుత్వం అంచనా వేసింద’ని ముంబై జిల్లా ఇన్‌చార్జి మంత్రి, స్మారక నిర్మాణ కమిటీ అధ్యక్షుడు జయంత్ పాటిల్ బుధవారం మీడియాకు తెలిపారు. పనులు ప్రత్యక్షంగా ప్రారంభించిన తర్వాత పూర్తికావడానికి దాదాపు రెండున్నర సంవత్సరాల సమయం పడుతుందన్నారు. స్మారక నమూన (ఊహా చిత్రాన్ని) జేజే స్కూల్ ఆఫ్ ఆర్కిటెక్చర్ విద్యార్ధులు రూపొందించారని వివరించారు. స్మారకాన్ని సందర్శించేవారు వెళ్లాల్సిన స్టీమర్ సేవలను కూడా అందుబాటులో ఉంచేలా చర్యలు తీసుకుంటామని వెల్లడించారు.


  
  సాక్షి ముంబై: ఛత్రపతి శివాజీ స్మారకాన్ని అరేబియా మహాసముద్రంలోనే ఏర్పాటుచేసేందుకు సర్కారు నిర్ణయించింది. ఈ మేరకు పనులు చేపట్టేందుకు విదేశీ ఆర్కిటెక్ట్‌లు, శిల్పకారులకు ఆహ్వానం పంపింది. ‘రాజ్‌భవన్’ (గవర్నర్ నివాసం) నుంచి సుమారు 1.5 కిలోమీటర్ల దూరంలో సముద్రంలో 16 కిలోమీటర్ల విస్తీర్ణంలో ఛత్రపతి శివాజీ మహారాజు స్మారకాన్ని ఏర్పాటు చేయనున్నారు. దీనిపై రాష్ట్ర సమాచార శాఖ వెబ్‌సైట్‌లో ఓ ప్రకటనను కూడా విడుదల చేసినట్టు ముంబై జిల్లా ఇన్‌చార్జ్ మంత్రి జయంత్ పాటిల్ తెలిపారు. ఆర్కిటెక్టులు, శిల్పకారుల నుంచి అన్ని వివరాలను సేకరించిన అనంతరం ఓ ప్రణాళిక రూపొందిస్తామన్నారు. దీని కోసం సుమారు తొమ్మిది నుంచి పది నెలల సమయం పట్టవచ్చని మంత్రి చెప్పారు.  2002లో సముద్రతీరంలో అంతర్జాతీయ స్థాయి స్మారకాన్ని ఏర్పాటు చేయనున్నట్టు ప్రభుత్వం ప్రకటించిన విషయం విదితమే. అనేక అవరోధాల అనంతరం ఎట్టకేలకు ఈ స్మారకానికి గ్రీన్‌సిగ్నల్ లభించింది. త్వరలోనే ప్రాథమిక పనులను ప్రారంభించే ప్రయత్నాలు జరుగుతున్నాయి.