వరుణుడు కరుణించకపోతే పంటలకు తీవ్ర నష్టం
   *   సీఎస్ ఐవైఆర్ కృష్ణారావుకు వివరించిన జిల్లా కలెక్టర్లు
   *   నిధులు విడుదల చేస్తామని సీఎస్ వెల్లడి
 సాక్షి, హైదరాబాద్: ‘తీవ్ర వర్షాభావ పరిస్థితులు నెలకొన్నాయి. పక్షం రోజుల్లో వరుణుడు కరుణించకపోతే సాగు చేసిన పంటలకు తీవ్ర నష్టం వాటిల్లుతుంది. ఉద్యానవన పంటలూ ఎండిపోవడం ఖాయం. గ్రామాలు, పట్టణాల్లోనూ తాగునీటి ఎద్దడి నెలకొంది. నిధులు లేకపోవడం వల్ల సహాయక చర్యలు చేపట్టలేకపోతున్నాం.
 
 తక్షణమే నిధులు విడుదల చేస్తే.. రైతులను ఆదుకోవడానికి అవకాశం ఉంటుంద’ని అనంతపురం, కర్నూలు, వైఎస్సార్ కడప, నెల్లూరు, ప్రకాశం జిల్లాల కలెక్టర్లు ప్రభుత్వ ప్రధాన కార్యదర్శి(సీఎస్) ఐవైఆర్ కృష్ణారావుకు వివరించారు. కలెక్టర్ల ప్రతిపాదనలపై ఐవైఆర్ కృష్ణారావు స్పందిస్తూ.. తక్షణమే నిధులు విడుదల చేస్తామనీ  సహాయక చర్యలను వేగంగా చేపట్టాలని  ఆదేశించారు. రాష్ట్రంలో వర్షాభావ పరిస్థితులపై వ్యవసాయ, నీటిపారుదల, పంచాయతీరాజ్, గ్రామీణ నీటిసరఫరా శాఖల కార్యదర్శులతో కలిసి సీఎస్ గురువారం సచివాలయం నుంచి 13 జిల్లాల కలెక్టర్లతో వీడియో కాన్ఫరెన్స్ నిర్వహించారు.
 
 సాగు చేసిన బత్తాయి, నిమ్మతోటల్లో అనంతపురం జిల్లాలో 4వేల హెక్టార్లు, వైఎస్సార్ కడప జిల్లాలో 15,163 హెక్టార్లలో, నెల్లూరు జిల్లాలో 6,437 హెక్టార్లలో, ప్రకాశం జిల్లాలో 2,443 హెక్టార్లలో ఎండిపోయే దశకు చేరుకున్నాయని, వెంటనే ట్యాంకర్లతో నీటిని అందిస్తే వాటిని కాపాడుకోవచ్చని కలెక్టర్లు, జేసీలు వివరించారు. ఇందుకు నిధులు మంజూరు చేయాలని కోరారు.
  
 ఆయకట్టుకు నీళ్లందించలేం..
 శ్రీశైలం, నాగార్జునసాగర్ జలాశయాల్లో నీటి నిల్వలు నిండుకున్న నేపథ్యంలో ఆయకట్టుకు నీళ్లందించలేమని నీటిపారుదల శాఖ ప్రిన్సిపల్ సెక్రటరీ ఆదిత్యనాథ్‌దాస్ స్పష్టం చేశారు. కృష్ణా, గుంటూరు, ప్రకాశం జిల్లాల్లో 2.5లక్షల హెక్టార్లలో ఆరుతడి పంటల సాగుకు వీలుగా విత్తనాలు సిద్ధంగా ఉంచాలని వ్యవసాయ శాఖ స్పెషల్ చీఫ్ సెక్రటరీ విజయ్‌కుమార్ ఆ జిల్లాల కలెక్టర్లను ఆదేశించారు. కరువు మండలాల్లో పనిదినాలను ఏడాదికి వంద నుంచి 150కి పెంచుతూ ప్రభుత్వం తీసుకున్న నిర్ణయానికి సంబంధించి ఉత్తర్వులేవీ అందలేదని సీఎస్‌కు అనంతపురం జిల్లా కలెక్టర్ శశిధర్ తెలిపారు. దీనిపై సీఎస్ గ్రామీణాభివృద్ధి శాఖ అధికారులపై మండిపడ్డారు.


 - అడుగంటిన భూగర్భ జలాలు
 - రాయచూరు జిల్లాలో
 - తీవ్ర తాగునీటి ఎద్దడి
 రాయచూరు రూరల్: ప్రస్తుత వేసవి కాలంలో మండుతున్న ఎండలకు భూగర్భ జలాలు అడుగంటుతుండటంతో తాగునీటి కోసం ప్రజలు అష్టకష్టాలు పడుతున్నారు. పట్టణంలోని కొళాయిల్లో నీళ్లు రాకపోవడంతో బోర్లలోని ఉప్పు నీటితోనే సరిపెట్టుకోవాల్సి వస్తోంది. రాయచూరు పట్టణం లో దాదాపు 4 లక్షలకు పైగా జనాభా వుంది. పట్టణంలో నేతాజీ నగర్, ఎన్‌జీఓ కాలనీ, వాసవీనగర్, పంచముఖీ కాలనీ, మడ్డిపేట, విద్యానగర్, గంజ్‌ఏరియా, షియాతలాబ్, సిటీ టాకీస్ ఏరియా, స్టేషన్ ఏరియా, రామలింగేశ్వర కాలనీ, నీలకంఠేశ్వర నగర్, ఐడీఎంఎస్ లేఅవుట్, నిజలింగప్ప కాలనీ, హరిజనవాడ, బెస్తవారి పేటల్లో నీటి కోసం గంటల తరబడి బోర్ల దగ్గర, కొళాయిల వద్ద పడిగాపులు కాయాల్సి వస్తుంది. రాత్రి పూట కొన్ని ప్రాంతాల్లో నీటిని విడుదల చేస్తుండటంతో జాగరణ చేయాల్సిన పరిస్థితులు నెలకొన్నాయి.
 
 పట్టణంలో ఏ కొళాయి వద్ద, బోరింగుల వద్ద చూసినా జనాలు బారులు తీరి కనిపిస్తున్నారు. కొన్ని పథకాల కింద నిర్మించిన ట్యాంకులు నీటి నిల్వ సామర్థ్యం తక్కువగా ఉన్నందున అవి ప్రజల అవసరాలను ఏమాత్రం తీర్చలేకపోతున్నాయి. వేసవి కాలంలో పట్టణంలోని ప్రజల నీటి అవసరాలను గుర్తించి చేపట్టిన కొత్త పథకం పనులు మందకొడిగా జరుగుతున్నా మరో వైపు వున్న మంచినీటి పథకాల ద్వారా నీటిని అందించడంలో అధికారులు విఫలం అవుతున్నారు. జిల్లాలోని దేవదుర్గ తాలుకా క్యాదిగేర, రంగనాయకి తండా, మల్లాపూర, సింధనూరు తాలుకా శ్రీనివాస్ క్యాంపు, మాన్వి తాలుకా ఇరకల్, కవితాళ, వక్రాణి, చీకలపర్వి క్యాంపుల్లో తాగునీటిని ట్యాంకుల ద్వారా సరఫరా చేపడుతున్నారు. రాయచూరు తాలుకాలో 16, మాన్విలో 33, దేవదుర్గలో 27, సింధనూరులో 52, లింగసూగూరు తాలూకాలో ఐదు గ్రామాల్లో తాగునీటి ఎద్దడి నెలకొం దని అధికారులు చెపుతున్నారు. మరోవైపు గుల్బర్గ ప్రాంతీయ కమిషనర్ బిస్వాస్ రాయచూరు మినహా ఏ ప్రాంతాల్లో తాగునీటి ఎద్దడి లేదని చెప్పడానికి పైగ్రామాలే సాక్ష్యంగా చెప్పవచ్చు.
 
 రాయచూరు జిల్లాలో తాగునీటి ఎద్దడి నివారణకు సంబంధించి రూ.1.30 కోట్లు మంజూరైనా ప్రతిపాదనలు కాగితాలకే పరిమితమయ్యాయి. వేసవి కాలంలో తాగునీటి ఎద్దడి నివారణకు జిల్లా అధికార యంత్రాంగం నిధులు కేటాయిం చినా ఫలితం లేకుండా పోతోంది. ఈనేపథ్యంలో పట్టణంలోని ప్రజల అవసరాలను గుర్తించి ఇప్పటికైనా నీటి సరఫరాను మెరుగుపరచాల్సిన అవసరం ఎంతైనా ఉంది.