తండ్రి కాష్టం వద్దనే గొడ్డలితో నరికి చంపిన వైనం
 దౌల్తాబాద్, న్యూస్‌లైన్ : మంత్రాలతో కుటుంబ సభ్యులను హతమారుస్తున్నాడనే అనుమానంతో తాతను పట్టపగలే మనవడు గొడ్డలితో నరికి చంపాడు. ఈ సంఘటన మెదక్ జిల్లా దౌల్తాబాద్‌లో శనివారం చోటుచేసుకుంది.
  
 ఎస్‌ఐ శేఖర్‌రెడ్డి కథనం మేరకు.. ఆవుల మల్లయ్య(80), మల్లమ్మ దంపతులు కుటుంబం కొన్నేళ్లుగా దౌల్తాబాద్‌లో స్థిరపడింది. కుమార్తె లింగమ్మ, అల్లుడు స్వామిలు మల్లయ్య పొరుగింటిలో నివాసం ఉంటున్నారు. మల్లయ్య మంత్రాలు వేస్తాడన్న అనుమానం ఇటు కుటుంబ సభ్యులతోపాటు గ్రామస్తులకు కూడా ఉంది. ఈ క్రమంలో పదిరోజుల క్రితం మల్లయ్య అల్లుడు స్వామి మృతి చెందాడు. శనివారం ఆయన దశదినకర్మ జరగాల్సి ఉంది.  
  
  తెల్లవారుజామున మల్లయ్య పెద్ద మనుమడు మహేష్ కుమార్తె మూడు నెలల రేవతి అకస్మాత్తుగా మృతి చెందింది. ఇదిలా ఉండగా.. శనివారం మధ్యాహ్నం పొలం వద్ద ఉన్న స్వామి కాష్టం పక్కన మల్లయ్య మృతదేహం రక్తపు మడుగులో పడి ఉంది. మృతుడి మెడపై గొడ్డలి గాయమైంది. మృతదేహం పక్కన నిమ్మకాయలు, పసుపు, కల్లు సీసాలు పడి ఉన్నాయి. కాగా.. మల్లయ్య చిన్న మనవడు గణేష్ ఇంటికెళ్లి ‘మీ నాన్నను, చిన్నారిని చంపిన విధంగా నిన్నూ చంపుతానని తాత బెదిరించాడు’ దీంతో తానే అతడిని హతమార్చానని తెలిపాడు. పోలీసులు కేసు నమోదు చేసుకొని దర్యాప్తు చేస్తున్నారు.
  


 కొత్తచెరువు, న్యూస్‌లైన్ : ‘అయ్యో.. ఓరి దేవుడా.. బియ్యం గింజలతో సహా అన్నీ కాలిపోయాయి.. ఇప్పుడెలా బతకాలయ్యా..’ అంటూ వారు ఏడుస్తుంటే ఓదార్చడం ఎవరి వల్లా కాలేదు. బుధవారం మధ్యాహ్నం 12 గంటలకు ఉన్నట్లుండి మంటలు వ్యాపించి కొత్తచెరువు మండలం బండమీదపల్లిలో 34 గుడిసెలు, కొట్టాలు బుగ్గిపాలయ్యాయి. తొలుత ఓ గుడిసెకునిప్పంటుకున్న విషయం ఓ బాలుడు గుర్తించి కేకలు వేశాడు.
  
  సమీపంలోని ఇళ్లలో ఉన్న గ్రామస్తులు బయటికొచ్చే లోగానే మంటలు పక్కనే ఉన్న గుడిసెలు, కొట్టాలకు వ్యాపించాయి. మంటలు అదుపు చేయలేని స్థాయికి చేరుకోవడంతో గ్రామస్తులు నిస్సహాయ స్థితిలో పడిపోయారు. సమాచారం అందుకున్న ఎస్‌ఐ రాజశేఖరరెడ్డి సిబ్బందితో కలసి సంఘటన స్థలానికి చేరుకున్నారు.
  
  పుట్టపర్తి నుంచి వచ్చిన ఫైరింజన్ మంటలు అదుపు చేయలేక పోవడంతో, పెనుకొండ నుంచి మరో ఫైరింజన్‌ను రప్పించి మంటలార్పారు. ఈ సంఘటనలో 34 గుడిసెలు అగ్నికి ఆహుతయ్యాయి. కట్టుబట్టలు తప్ప మరే మీ మిగలకపోవడంతో గ్రామస్తులు కన్నీరుమున్నీరయ్యారు. ఈ ప్రమాదంలో సుమారు రూ. 60 లక్షల ఆస్తి నష్టం వాటిల్లినట్లు అంచనా. ధర్మవరం ఏఎస్పీ అభిషేక్ మహంతి, సీఐ శ్రీధర్ గ్రామానికి చేరుకుని సంఘటనకు గల కారణాలపై ఆరా తీశారు. పుట్టపర్తి నియోజవర్గ వైఎస్సార్‌సీపీ సమన్వయకర్త కడపల మోహన్‌రెడ్డి, ప్రచార కార్యదర్శి కొత్తకోట సోమశేఖర్‌రెడ్డి, ఎమ్మెల్యే పల్లె రఘునాథరెడ్డి సతీమణి ఉమ బాధితులను పరామర్శించారు.