● కలెక్టర్‌ మిక్కిలినేని మనుచౌదరి ● ఆరోగ్య కార్యక్రమాల సేవలపై కలెక్టర్‌ సమీక్ష సిద్దిపేటరూరల్‌: ప్రభుత్వ ఆస్పత్రుల్లో సాధారణ ప్రసవాల సంఖ్య పెంచేలా చొరవ చూపాలని కలెక్టర్‌ మిక్కిలినేని మనుచౌదరి వైద్యాధికారులను ఆదేశించారు. గురువారం కలెక్టరేట్‌లో ఆరోగ్య కార్యక్రమాల సేవలు, పనితీరుపై వైద్యాధికారులతో కలెక్టర్‌ సమీక్ష నిర్వహించారు. కలెక్టర్‌ మాట్లాడుతూ ప్రభుత్వ ఆస్పత్రుల్లో ఓపీ తోపాటు ఇన్‌పేషెంట్‌ సంఖ్య పెంచాలన్నారు. వ్యాధి నిరోధక టీకాలను పిల్లలకు, గర్భిణులకు వందశాతం టీకాలు అందించాలన్నారు. ఈ –సంజీవనిలో వెనకబడి ఉన్న పీహెచ్‌సీలు దృష్టి సారించాలన్నారు. సమయపాలన పాటించాలని ఉద్యోగులపై చర్యలు ఉంటాయని ఆదేశించారు. కార్యక్రమంలో అదనపు కలెక్టర్‌ అబ్దుల్‌ హమీద్‌, జిల్లా వైద్య ఆరోగ్యశాఖ అధికారి డాక్టర్‌ పల్వన్‌కుమార్‌, డిప్యూటీ డీఎంహెచ్‌ఓ డాక్టర్‌ శ్రీనివాస్‌, డాక్టర్‌ నారాయణరావు, ప్రోగ్రాం ఆఫీసర్లు డాక్టర్‌ ఆనంద్‌, డాక్టర్‌ అరుణ్‌ కుమార్‌, డాక్టర్‌ శ్రీకళ, డాక్టర్‌ శ్రీకాంత్‌ యాదవ్‌, తదితరులు పాల్గొన్నారు.

సిద్దిపేటకమాన్‌: భారత రాజ్యాంగ నిర్మాత డాక్టర్‌ బీఆర్‌ అంబేడ్కర్‌ను అవమానించేలా వ్యాఖ్యలు చేసిన అమిత్‌ షాను కేంద్రమంత్రి పదవి నుంచి బర్తరఫ్‌ చేయాలని డీసీసీ అధ్యక్షుడు నర్సారెడ్డి డిమాండ్‌ చేశారు. ఈ మేరకు గురువారం సిద్దిపేట బస్టాండ్‌ చౌరస్తాలో కాంగ్రెస్‌ నాయకులు అంబేడ్కర్‌ విగ్రహానికి వినతిపత్రం అందజేసి, అమిత్‌ షా ఫ్లెక్సీని దహనం చేశారు. ఈ సందర్భంగా నర్సారెడ్డి మాట్లాడుతూ బాధ్యతాయుతమైన పదవిలో ఉండి ఇలాంటి వాఖ్యలు చేయడం బాధాకరమన్నారు. దళితుల పట్ల బీజేపీకి ఉన్న చిత్తశుద్ధి ఏపాటిదో బయటపడిందన్నారు. బేషరతుగా అమిత్‌ షా క్షమాపణలు చెప్పాలన్నారు. కార్యక్రమంలో పార్టీ నియోజకవర్గ ఇన్‌చార్జి హరికృష్ణ, నాయకులు జి శ్రీనివాస్‌, మార్క సతీష్‌కుమార్‌, ముద్దం లక్ష్మి, తదితరులు పాల్గొన్నారు. అడ్వకేట్‌ అసోసియేషన్‌ ఆధ్వర్యంలో.. సిద్దిపేటకమాన్‌: ఎస్సీ ఎస్టీ అడ్వకేట్‌ అసోసియేషన్‌ ఆధ్వర్యంలో గురువారం పట్టణంలో ర్యాలీ నిర్వహించారు. ఈ సందర్భంగా అసోసియేషన్‌ ప్రధాన కార్యదర్శి రవిబాబు, సీనియర్‌ న్యాయవాది బాపురావు మాట్లాడుతూ అమిత్‌ షా అంబేడ్కర్‌ పట్ల చేసిన వాఖ్యలను వెనక్కి తీసుకుని దేశ ప్రజలకు క్షమాపణ చెప్పాలన్నారు. ప్రపంచంలోనే అతి గొప్ప రాజ్యాంగాన్ని నిర్మించిన అంబేడ్కర్‌ ని అవమానించడం అంటే ప్రజలందరినీ అవమానించినట్లేననాన్రు. కార్యక్రమంలో పత్రి ప్రకాష్‌, యాదగిరి, ప్రవీణ్‌, ప్రసాద్‌, లావణ్య, అరుణ, వెంకటేశ్‌, శ్రీనివాస్‌, రాజేష్‌ తదితరులు పాల్గొన్నారు. బాధ్యతాయుతమైన పదవిలో ఉండి అంబేడ్కర్‌ను అవమానించడమా? డీసీసీ అధ్యక్షుడు నర్సారెడ్డి సిద్దిపేటలో అమిత్‌ షా ఫ్లెక్సీ దహనం

సిద్దిపేట, హుస్నాబాద్‌కు జాతీయ స్థాయి గుర్తింపుసిద్దిపేటజోన్‌: సిద్దిపేట, హుస్నాబాద్‌ మున్సిపాలిటీలు జాతీయ స్థాయిలో అవార్డులు సొంతం చేసుకున్నాయి. ఢిల్లీలో కేంద్ర పట్టణాభివృద్ద్ధి శాఖ ఆధ్వర్యంలో గురువారం నిర్వహించిన సదస్సులో ది చేంజ్‌ మేకర్‌ –2022 అవార్డును సిద్దిపేట మున్సిపల్‌ కమిషనర్‌ ఆశ్రిత్‌ కుమార్‌ అందుకున్నారు. సాలీడ్‌ వెస్ట్‌ మేనేజ్మెంట్‌ కేటగిరీలో సిద్దిపేట మున్సిపాలిటీ అవార్డు సాధించింది. స్వచ్ఛ్‌ భారత్‌ మిషన్‌ 2.0లో భాగంగా సెంటర్‌ ఫర్‌ సైన్స్‌ ఎన్విరాన్మెంట్‌ ఆధ్వర్యంలో నిర్వహించిన పారిశుద్ధ్య నిర్వహణ లో సిద్దిపేట మెరుగైన ఫలితాలు సాధించడంతో ది చేంజ్‌ మేకర్‌ అవార్డు ప్రకటించారు. ఈ సందర్భంగా ఢిల్లీలో నిర్వహించిన సదస్సులో మున్సిపల్‌ కమిషనర్‌ ఆశ్రిత్‌ కుమార్‌ మాట్లాడారు. పారిశుద్ధ్య నిర్వహణ, సాలీడ్‌ వెస్ట్‌ మేనేజ్మెంట్‌ ప్రక్రియ, స్వయం సహాయక సంఘాల పనితీరు, ఇంటింటికీ వందశాతం చెత్త సేకరణ, పట్టణంలో తడి, పొడి, హానికర చెత్త విభజన, స్వచ్ఛ్‌ బడి ద్వారా చెత్త ప్రాముఖ్యత గూర్చి అవగాహన కల్పించారు. అలాగే డీఆర్సీ కేంద్రం పనితీరు, తదితర అంశాలపై వివరించారు. కార్యక్రమంలో మున్సిపల్‌ శానిటరీ ఇన్‌స్పెక్టర్‌ వనిత పాల్గొన్నారు. హుస్నాబాద్‌ మున్సిపాలిటీకి.. హుస్నాబాద్‌: సాలిడ్‌ వేస్ట్‌ మేనేజ్‌మెంట్‌లో ఉత్తమ ప్రతిభ కనబరిచిన హుస్నాబాద్‌ మున్సిపాలిటీకి అవార్డు దక్కింది. ఈ సందర్భంగా గురువారంలో ఢిల్లీలో జరిగిన కార్యక్రమంలో సీఎస్‌ఈ డైరెక్టర్‌ చేతుల మీదుగా చేంజ్‌ మేకర్‌ అవార్డును ఎన్విరాన్మెంటల్‌ ఇంజనీర్‌ డి.రవికుమార్‌ ఆదుకున్నారు. స్థానికులు హర్షం వ్యక్తం చేస్తున్నారు.

గజ్వేల్‌: పత్తి కొనుగోళ్లలో జిల్లా హబ్‌గా మారుతోంది. జిల్లాకు సరిహద్దున ఉన్న మెదక్‌, జనగామ, యాదాద్రి, మేడ్చల్‌ జిల్లాల రైతులు పత్తిని అమ్ముకోడానికి తరలివస్తుండటంతో కొనుగోళ్లు రికార్డుస్థాయిలో జరుగుతున్నాయి. ఈ జిల్లాలో వానాకాలానికి సంబంధించి 1.04లక్షల ఎకరాలు పత్తి సాగులోకి వచ్చింది. గతంతో పోలిస్తే ఈసారి తొలుత అనావృష్టి, ఆ తర్వాత అతివృష్టితో భిన్నమైన వాతావరణం ఉండటంతో పంట ఉత్పత్తులు గణనీయంగా పడిపోయే పరిస్థితి వచ్చింది. అయినా ఈసారి జిల్లా వ్యాప్తంగా 9లక్షల క్వింటాళ్ల దిగుబడులు రావొచ్చని మార్కెటింగ్‌ శాఖ అంచనా వేసింది. అంచనాలకు మించి కొనుగోళ్లు.. ఇప్పటికే అంచనాలకు మించి కొనుగోళ్లు సాగాయి. గతేడాది సీసీఐ ద్వారా 7.46లక్షల క్వింటాళ్లు, ప్రైవేటు వ్యాపారులు మరో 2.49లక్షల క్వింటాళ్ల పత్తిని కొనుగోలు చేయగా మొత్తంగా 9.95లక్షల క్వింటాళ్ల లావాదేవీలు సాగాయి. కానీ ఈసారి డిసెంబర్‌ 18నాటికే సీసీఐ ద్వారా 7.27లక్షల లక్షల క్వింటాళ్లు, మరో 1.69లక్షల క్వింటాళ్లు ప్రైవేటు వ్యాపారుల కొనుగోలు చేశారు. మొత్తంగా ఇప్పటికే 8.96లక్షల క్వింటాళ్ల లావాదేవీలు సాగాయి. జిల్లాలో పత్తి కొనుగోళ్లు రికార్డు స్థాయిలో కొనసాగుతున్నాయి. గతేడాది సీజన్‌ ముగిసే నాటికి 9.95లక్షల క్వింటాళ్ల లావాదేవీలు జరిగితే.. ఈసారి ఇప్పటికే 8.96లక్షల క్వింటాళ్ల కొనుగోళ్లు జరిగాయి. సీజన్‌ ముగిసేందుకు మరో రెండు నెలలకుపైగా సమయం ఉంది. కొనుగోళ్ల సందర్భంగా ఆన్‌లైన్‌ రికార్డుల్లో తప్పులున్నా.. వాటిని సరిచేసి ఉత్పత్తులను అమ్ముకునే వీలు కల్పించడం.. సరిహద్దున ఉన్న పొరుగు జిల్లాలు మెదక్‌, జనగామ, యాదాద్రి, మేడ్చల్‌ జిల్లాల నుంచి ఇక్కడికి ఉత్పత్తులు తరలిరావడం ఇందుకు కారణం. తరలివస్తున్న పత్తి ఉత్పత్తులు ఇప్పటికే 8.96 లక్షల క్వింటాళ్ల లావాదేవీలు నిబంధనల సడలింపు.. మరోవైపు పొరుగు జిల్లాల నుంచి తరలివస్తున్న సరుకు నిబంధనలు సరళతరంతో.. పత్తిని అమ్ముకోవడానికి వచ్చే రైతులు తప్పనిసరిగా ఆన్‌లైన్‌లో పంటను సాగుచేసినట్లు నమోదు చేసిన సర్టిఫికెట్‌ను ఏఈఓలతో ధ్రువీకరించుకొని సీసీఐ అధికారులకు సమర్పించాల్సి ఉంటుంది. ఏదేనీ కారణంతో ఆన్‌లైన్‌లో పత్తి పంట నమోదు కాకుంటే గతంలో ఉత్పత్తులను తిరస్కరించేవారు. కానీ ఈసారి ఇలాంటి రైతులకు అప్పటికప్పుడు ఏఈఓలు తాత్కాలిక సర్టిఫికెట్లు ఇచ్చేందుకు కలెక్టర్‌ అనుమతివ్వడంతో ఇబ్బందులు తొలిగిపోయాయి. ఇతర జిల్లాల రైతులకు సైతం తాత్కాలిక సర్టిఫికెట్లు ఇచ్చి కొనుగోళ్లు సజావుగా సాగేలా చూస్తున్నారు. ఇకపోతే ప్రైవేటు వ్యాపారులు తక్కువ ధరకు పత్తిని కొనుగోలు చేస్తుండటం వల్ల రైతులంతా సీసీఐ కేంద్రాలపైనే ఆధారపడుతున్నారు. ప్రస్తుత సీజన్‌లో పింజి పెద్ద పత్తికి గరిష్టంగా రూ.7,521, కనిష్టంగా రూ.7,124 మద్దతు ధరగా ప్రభుత్వం నిర్ణయించిన సంగతి తెల్సిందే. జిల్లాలోని 24 జిన్నింగ్‌ మిల్లులను సీసీఐ కేంద్రాలుగా నోటిఫై చేయడంతో కొనుగోళ్లు వేగంగా సాగడానికి మరో కారణంగా చెప్పొచ్చు. పొరుగు జిల్లాల ఉత్పత్తులు రాకతో.. పొరుగు జిల్లాల నుంచి కూడా ఇక్కడికి పత్తి ఉత్పత్తులు తరలివస్తున్నాయి. దీంతో భారీగా కొనుగోళ్లు సాగుతున్నాయి. కొనుగోళ్ల సందర్భంగా రైతులకు ఎలాంటి ఇబ్బందులు రాకుండా అన్ని రకాల చర్యలు తీసుకుంటున్నాం. సీసీఐ సిబ్బందికి ఎప్పటికప్పుడు సూచనలు చేస్తున్నాం. ప్రైవేటు వ్యాపారుల లావాదేవీలను సైతం పర్యవేక్షిస్తున్నాం. – నాగరాజు, జిల్లా మార్కెటింగ్‌ అధికారి

● జిల్లా గ్రంథాలయ సంస్థ చైర్మన్‌ లింగమూర్తి ● ముగిసిన సీఎం కప్‌ క్రీడలుసిద్దిపేటజోన్‌: సీఎం కప్‌ క్రీడలతో గ్రామీణ క్రీడాకారులకు మంచి గుర్తింపు తేనుందని, జాతీయ స్థాయిలో రాణించేలా దోహదపడుతుందని జిల్లా గ్రంథాలయ సంస్థ చైర్మన్‌ లింగమూర్తి అన్నారు. స్థానిక డిగ్రీ కళాశాల మైదానంలో గురువారం సాయంత్రం సీఎం కప్‌ క్రీడల ముగింపు కార్యక్రమంలో ఆయన పాల్గొన్నారు. ఈ సందర్భంగా మాట్లాడుతూ గ్రామీణ క్రీడాకారులను ప్రోత్సహిస్తామన్నారు. సీఎం రేవంత్‌ రెడ్డి చేపట్టిన యంగ్‌ ఇండియా, స్కిల్‌ ఇండియా వల్ల భవిష్యత్తులో సానుకూలంగా ఫలితాలు వస్తాయని అన్నారు. అంతకుముందు ఆదనపు కలెక్టర్‌ హమీద్‌ మాట్లాడుతూ.. ఈనెల 27నుంచి సీఎం కప్‌ రాష్ట్ర స్థాయి పోటీలు జరుగనున్నాయని, జిల్లాలో విజయం సాధించిన వారు రాష్ట్ర స్థాయిలో పాల్గొంటారని పేర్కొన్నారు. ఓవరాల్‌ ఛాంపియన్‌ సిద్దిపేట.. మూడు రోజుల పాటు సాగిన జిల్లా స్థాయి సీఎం కప్‌ పోటీల్లో సిద్దిపేట ఓవరాల్‌ ఛాంపియన్‌గా నిలిచింది. బాలురుల, బాలికల విభాగాల్లో ఉత్తమ ప్రతిభ కనబర్చింది. వాలీబాల్‌ బాలురుల విభాగంలో కొండపాక ప్రథమ స్థానం, నంగనూర్‌ ద్వితీయ స్థానంలో నిలిచింది. అదేవిధంగా వాలీబాల్‌ బాలికల విభాగంలో గజ్వేల్‌ మొదటి స్థానం, కొండపాక రెండవ స్థానంలో నిలిచింది. ఖోఖో బాలురుల విభాగంలో సిద్దిపేట విన్నర్‌, గజ్వేల్‌ రన్నర్‌గా నిలిచింది. బాలికల విభాగంలో జగదేవపూర్‌ విన్నర్‌, దుబ్బాక రన్నర్‌గా నిలిచాయి. కబడ్డీ బాలురుల విభాగంలో మద్దూర్‌ విజేతగా, హుస్నాబాద్‌ రన్నర్‌గా నిలిచాయి. అదేవిధంగా బాలికల విభాగంలో గజ్వేల్‌ విన్నర్‌, దుబ్బాక రన్నర్‌గా నిలిచాయి. వీటితో పాటు మిగతా15 అంశాల్లో విజయం సాధించిన వారికి బహుమతులు అందజేశారు. ఇరువర్గాల మధ్య ఘర్షణసీఎం కప్‌ క్రీడల ముగింపు రోజు ఇరువర్గాల మధ్య ఘర్షణ చోటు చేసుకుంది. ఒకరికి తీవ్ర గాయాలయ్యాయి. హుస్నాబాద్‌, మద్దూర్‌ జట్ల మధ్య కబడ్డీ ఫైనల్‌ మ్యాచ్‌ జరుగుతుండగా అభిమానుల మధ్య జరిగిన వాగ్వాదం పరస్పర దాడులకు దారి తీసింది. ఇరువర్గాల వారు దాడులకు దిగడంతో హుస్నాబాద్‌ క్రీడాకారుడు నాగరాజు తలకు తీవ్ర గాయాలయ్యాయి. వెంటనే పోలీసులు జోక్యం చేసుకొని ఇరువర్గాలను శాంతింపజేశారు.

● ఏర్పాట్లు వేగిరం చేయాలి ● అధికారులను ఆదేశించిన జిల్లా జడ్జి సాయిరమాదేవిచేర్యాల(సిద్దిపేట): పట్టణ పరిధిలో ఈ నెల 29న జూనియర్‌ సివిల్‌ (సెషన్‌) కోర్టు భవనం ప్రారంభం నేపథ్యంలో ఏర్పాట్లు వేగిరం చేయాలని జిల్లా జడ్జి సాయిరమాదేవి సంబంధిత అదికారులను ఆదేశించారు. గురువారం కలెక్టర్‌ మనుచౌదరితో కలిసి భవనాన్ని పరిశీలించారు. ఈ సందర్భంగా ఆమె అధికారులకు పలు సూచనలు చేశారు. కోర్టు ఆవరణలో ప్లాంటేషన్‌ చేయాలన్నారు. భవనంలోపల సరిపడా ఫర్నిచర్‌, వసతి, తదితర చిన్న చిన్న మరమ్మతులు వెంటనే పూర్తి చేయాలని సూచించారు. ప్రారంభోత్సవ కార్యక్రమానికి హైకోర్టు నుంచి పలువురు ప్రముఖులు హాజరవుతున్నందున భారీ బందోబస్తుకు చర్యలు తీసుకోఆవలని హుస్నాబాద్‌ ఏసీపీ సతీష్‌కి సూచించారు. వారి వెంట ఆర్డీఓ సదానందం, డీఎల్పీఓ మల్లికార్జున్‌, తహసీల్దార్‌ సమీర్‌ ఆహ్మద్‌ ఖాన్‌, మున్సిపల్‌ కమిషనర్‌ నాగేందర్‌, ఎంపీడీఓ మహమ్మద్‌ అలీ, పోలీస్‌ అధికారులు ఉన్నారు.

ఉద్యాన శాఖ అధికారి సువర్ణజగదేవ్‌పూర్‌(గజ్వేల్‌): రైతులు ఆయిల్‌పామ్‌ సాగు చేసి అధిక లాభాలు పొందాలని జిల్లా ఉద్యానశాఖ అధికారి సువర్ణ, వ్యవసాయ అధికారి రాధిక అన్నారు. గురువారం జగదేవ్‌పూర్‌ రైతు వేదికలో ఆయిల్‌పామ్‌ సాగుపై అవగాహన సదస్సు నిర్వహించారు. ఈ సందర్భంగా వారు మాట్లాడుతూ జిల్లాలో 12 వేల ఎకరాల్లో ఆయిల్‌పామ్‌ పంట సాగు అవుతోందని, మరో 50 వేల ఎకరాలు లక్ష్యంగా పెట్టుకున్నట్లు వివరించారు. ఆయిల్‌పామ్‌ సాగుకు ప్రభుత్వం రాయితీ అవకాశం కల్పిస్తోందని, ఈ అవకాశాలను రైతులు సద్వినియోగం చేసుకోవాలన్నారు. నాలుగేళ్ల వరకు అంతర పంటలను సాగు చేసుకోవాలని చెప్పారు. జగదేవ్‌పూర్‌లో బాల్‌రెడ్డి సాగు చేసిన ఆయిల్‌పాం, అంతర పంట అరటిసాగును పరిశీలించారు. అలాగే వరికొయ్యలను కాల్చవద్దని తెలిపారు.

● జార్ఖండ్‌లో అక్కన్నపేట వాసి మృతి ● విధులకు వెళ్తుండగా ఢీకొట్టిన వ్యాన్‌అక్కన్నపేట(హుస్నాబాద్‌): బతుకుదెరువు కోసం జార్ఖండ్‌ రాష్టానికి వెళ్లిన యువకుడు రోడ్డు ప్రమాదంలో మృత్యువాత పడ్డాడు. స్థానికుల కథనం మేరకు.. అక్కన్నపేట మండలం మసిరెడ్డితండా గ్రామ పంచాయతీ పరిధిలోని ర్యాగటోనిపల్లెకి చెందిన ర్యాగటి సారవ్వ–చంద్రయ్య దంపతులకు ఇద్దరు కుమారులు ఉన్నారు. చిన్న కుమారుడైన ప్రవీణ్‌(25) బీటెక్‌ పూర్తి చేసి జార్ఖండ్‌లో హెచ్‌సీఎల్‌ సూర్థ మైన్స్‌ మైనింగ్‌ కంపెనీలో ఫోర్‌ మెన్‌గా ఉద్యోగం చేస్తూ అక్కడే ఉంటున్నాడు. రోజు మాదిరిగా గురువారం విధులకు హాజరయ్యేందుకు బైక్‌పై వెళ్తుండగా వెనుక నుంచి వ్యాన్‌ ఢీకొట్టింది. ఈ ప్రమాదంలో ప్రవీణ్‌ అక్కడికక్కడే మృతి చెందాడు. పోస్టుమార్టం అనంతరం శుక్రవారం మృతదేహం స్వగ్రామానికి చేరుకోనున్నట్లు పేర్కొన్నారు. ఉన్నత చదువులు చదివి ఉద్యోగం చేస్తూ తల్లిదండ్రులకు చేదోడు వాదోడుగా ఉన్న ప్రవీణ్‌ మృతి చెందడం పల్లెవాసులకు కలచివేసింది.

బెజ్జంకి(సిద్దిపేట) : పర్యావరణ కాలుష్యానికి కారణమయ్యే ఇథనాల్‌ ఫ్యాక్టరీ రద్దు కోసం ప్రజలతో కలిసి ఉద్యమిస్తామని సీపీఐ జాతీయ కార్యవర్గ సభ్యుడు చాడ వెంకట్‌రెడ్డి హెచ్చరించారు. మండలంలోని గుగ్గిల్ల శివారులో నిర్మిస్తున్న ఇథనాల్‌ ఫ్యాక్టరీ వద్ద గ్రామస్తులతో కలిసి విలేకరుల సమావేశం నిర్వహించారు. ఈ సందర్భంగా ఆయన మాట్లాడుతూ.. ప్రజలకు అసౌకర్యంగా మారే ఫ్యాక్టరీ రద్దు కోరుతూ ప్రభుత్వ దృష్టికి తీసుకెళ్తామన్నారు. వారు స్పందించకుంటే రద్దు చేసే వరకు ఐక్యంగా పోరాటం చేస్తామన్నారు. కార్యక్రమంలో జిల్లా కార్యదర్శి మంద పవన్‌, కార్యవర్గ సభ్యుడు వెంకట్‌రెడ్డి, రూపేశ్‌, భాస్కర్‌, మధు, జనార్దన్‌, నరేశ్‌, మహేశ్‌, శ్రవణ్‌, సతీష్‌ తదితరులు పాల్గొన్నారు. అలాగే, బెజ్జంకిలో గురువారం నిర్వహించిన కార్యకర్తల సమావేశానికి ముఖ్య అతిథిగా హాజరై మాట్లాడారు. సీపీఐని గ్రామ స్థాయిలో బలోపేతం చేసి రానున్న స్థానిక సంస్థల ఎన్నికలలో విజయవంతం చేయాలని పిలుపునిచ్చారు. ప్రజా సమస్యల పరిష్కారం కోసం ప్రజలకు అండగా ఉండి పోరాడాలన్నారు.సీపీఐ జాతీయ కార్యవర్గసభ్యుడు చాడ వెంకట్‌రెడ్డి

● సీపీ అనురాధ ● సిద్దిపేటలో రాపిడ్‌ యాక్షన్‌ ఫోర్స్‌సిబ్బందితో ఫ్లాగ్‌ మార్చ్‌సిద్దిపేటకమాన్‌: శాంతి భద్రతల పరిరక్షణకు ప్రజలకు మేమున్నామని భరోసా కల్పించడం ఫ్లాగ్‌ మార్చ్‌ ముఖ్య ఉద్దేశ్యమని సీపీ అనురాధ తెలిపారు. సిద్దిపేట పట్టణంలో రాపిడ్‌ యాక్షన్‌ ఫోర్స్‌ సిబ్బందితో నిర్వహించిన ఫ్లాగ్‌ మార్చ్‌ను బస్టాండ్‌ చౌరస్తా వద్ద ఏసీపీ మధు, సీఐలు వాసుదేవరావు, ఉపేందర్‌, విద్యాసాగర్‌లతో కలిసి సీపీ గురువారం జెండా ఊపి ప్రారంభించారు. ఈ సందర్భంగా సీపీ మాట్లాడుతూ.. రాష్ట్రంలోని అన్ని జిల్లాల్లో నిర్వహిస్తున్న అవగాహన కార్యక్రమాల్లో భాగంగా ఆర్‌ఏఎఫ్‌ సిద్దిపేటకు రావడం జరిగిందన్నారు. శాంతి భద్రతల సమస్య తలెత్తినప్పుడు పోలీసు అధికారులతో కలిసి బందోబస్తు నిర్వహించి, ఫ్లాగ్‌ మార్చ్‌ ద్వారా ప్రజలకు సెన్సాఫ్‌ సెక్యూరిటీ, మేమున్నామనే భరోసా కల్పించడం జరుగుతుందన్నారు. ఈ నెల 20న హుస్నాబాద్‌ పట్టణం, 21న గజ్వేల్‌ పట్టణంలో, 22న కొమురవెల్లి మండల కేంద్రంలో, 23న దుబ్బాక పట్టణంలో, 24న సిద్దిపేట వన్‌ టౌన్‌ పీఎస్‌ పరిధిలో ఫ్లాగ్‌ మార్చ్‌ కార్యక్రమం ఉంటుందని తెలిపారు. పట్టణంలో బస్టాండ్‌ చౌరస్తాతోపాటు ప్రధాన ప్రాంతాల్లో ఫ్లాగ్‌ మార్చ్‌ నిర్వహించారు. కార్యక్రమంలో ట్రాఫిక్‌ సీఐ ప్రవీణ్‌కుమార్‌, రాపిడ్‌ యాక్షన్‌ ఫోర్స్‌ డిప్యూటీ కమాండెంట్‌ బగేల్‌, సిబ్బంది తదితరులు పాల్గొన్నారు.

● బండపై ఆది మానవులుతయారు చేసుకున్న పనిముట్ల గుర్తులు ● క్రీస్తు పూర్వం 5 వేల ఏళ్ల నాటి పునరావాస ఆనవాళ్లు ● చరిత్ర పరిశోధకుల అన్వేషణలో వెలుగులోకి..దుబ్బాక : దుబ్బాక మండలం ఎనగుర్తిలో కొత్తరాతి యుగం నాటి ఆనవాళ్లు వెలుగుచూశాయి. ఇటీవలె చరిత్ర పరిశోధకుల అన్వేషణలో ఎనగుర్తిలో కాశీ విశ్వనాథస్వామి ఆలయం సమీపంలో బండల మీద పురమానవుల ఆనవాళ్లు భయడపడటం విశేషం. ఎతైన గుట్ట మీద పెద్ద బండరాయిలపై పుర మానవులు తమ ఆహార సేకరణలో భాగంగా ఉపయోగించే రాతి పనిముట్లు (రాతి గొడ్డళ్లు) నూరుకున్న గుంతలను (గ్రూవ్స్‌) దాదాపు 20కి పైగా ఉన్నట్లు చరిత్ర పరిశోధకులు గుర్తించారు. ఈ ఆనవాళ్లను బట్టి ఈ ప్రాంతంలో క్రీస్తు పూర్వం 5 వేల ఏళ్ల కిందట నాటి ఆదిమ మానవులు నివసించినట్లు చరిత్ర పరిశోధకులు తెలిపారు. ఎనగుర్తితోపాటు జిల్లాలోని సిద్దిపేట, నంగునూర్‌, నర్మెట్ట, వీరారెడ్డిపల్లిల్లోనూ ఆదిమ మానవుల ఆనవాళ్లు ఇది వరకే గుర్తించారు. తాజాగా ఎనగుర్తిలో వెలుగులోకి రావడం ఆసక్తికరంగా మారింది. దీనిపై ఇంకా లోతుగా పరిశోధిస్తున్నట్లు చరిత్ర పరిశోధకులు కొలిపాక శ్రీనివాస్‌ తెలిపారు.

బెజ్జంకి(సిద్దిపేట): మండల కేంద్రానికి చెందిన ఒజ్జపల్లి శ్రీమాన్‌ ఇస్రోలో శాస్త్రవేత్తగా ఎంపికయ్యారు. ప్రభుత్వ ఉపాధ్యాయుడు ఒజ్జపల్లి నాగయ్య, సత్యలక్ష్మిల కుమారుడు. 2023లో ఇస్రోలో రాసిన పరీక్షలకు గాను బుధవారం వచ్చిన ఫలితాలలో ఆయన శాస్త్రవేత్తగా ఎంపికయ్యారని తండ్రి నాగయ్య తెలిపారు. బెంగళూరులోని ఐఐఎస్‌సీలో ఎంటెక్‌ చదివి గోల్డ్‌ మెడల్‌ సాధించారు. అమెరికాలోని ప్రసిద్ధ సంస్థ కెడెల్స్‌లో డిజైన్‌ ఇంజనీర్‌గా ప్రస్తుతం పనిచేస్తున్నారు. బెజ్జంకి యువకుడు ఇస్రో శాస్త్రవేత్తగా ఎంపికకావడంతో గ్రామస్తులు హర్షం వ్యక్తం చేస్తున్నారు.

● అసెంబ్లీలో మంత్రి ప్రకటనతో మళ్లీ తెరపైకి ● పెండింగ్‌లోనే ఉన్న దుబ్బాక ● చిరకాల కల నెరవేరుతుందనేఆశతో ఎదురుచూస్తున్న ప్రజలు ● సీఎం రేవంత్‌రెడ్డిని కలవడంతోపాటు అసెంబ్లీలోనూ ఎమ్మెల్యే కొత్త ప్రభాకర్‌రెడ్డి ప్రస్తావనదుబ్బాక పట్టణం వ్యూ..దుబ్బాక : రాష్ట్ర వ్యాప్తంగా కొత్త రెవెన్యూ డివిజన్లు, మండలాలు ఏర్పాటు చేయాలనే డిమాండ్‌లపై చర్చిస్తున్నామని అసెంబ్లీ సమావేశాల్లో మంత్రి పొంగులేటి శ్రీనివాస్‌ రెడ్డి ప్రకటించారు. ఈ నేపథ్యంలో దుబ్బాక రెవెన్యూ డివిజన్‌ కల కాంగ్రెస్‌ ప్రభుత్వంలో నెరవేరుతుందనే ఆశ ప్రజల్లో నెలకొంది. ఈ సమావేశాల్లోనే రెవెన్యూ డివిజన్‌పై ప్రభుత్వం ప్రకటన వెల్లడిస్తుందని నమ్మకంతో ప్రజలు ఎదురుచూస్తున్నారు. దుబ్బాక రెవెన్యూ డివిజన్‌కు అన్ని విధాలుగా అర్హత ఉన్నప్పటికీ ఏర్పాటు చేయకపోవడంతో 2016లో ఈ విషయంపై దుబ్బాక పట్టణంలో 45 రోజులపాటు ఉద్యమం తీవ్రంగా జరిగింది. పాత సమితి కేంద్రంగా, తాలుకాగా, నియోజకవర్గం కేంద్రంగా మున్సిపాల్టీగా ఉన్న దుబ్బాకకు రెవెన్యూ డివిజన్‌కు కావాల్సిన అన్ని అర్హతలు ఉన్నా కాకపోవడంపై ప్రజల్లో తీవ్ర నిరాశ నెలకొంది. అప్పటి నుంచి ఇప్పటి వరకు రెవెన్యూ డివిజన్‌ కోసం నిరంతరం ఉద్యమాలు కొనసాగుతూనే ఉన్నాయి. అఖిల పక్షం ఆధ్వర్యంలో ఉద్యమాన్ని తీవ్రతరం చేస్తున్నారు. నియోజకవర్గం కేంద్రాలైన గజ్వేల్‌, హుస్నాబాద్‌లను రెవెన్యూ డివిజన్లు చేసి నియోజకవర్గం కేంద్రమైన దుబ్బాకను చేయకపోవడం శోఛనీయమని ప్రజలు వాపోతున్నారు. సీఎం రేవంత్‌రెడ్డి హామీ.. అసెంబ్లీ ఎన్నికల సందర్భంగా దుబ్బాకలో నిర్వహించిన బహిరంగ సభలో సీఎం రేవంత్‌రెడ్డి కాంగ్రెస్‌ ప్రభుత్వం అధికారంలోకి రాగానే దుబ్బాకను రెవెన్యూ డివిజన్‌ను ఏర్పాటు చేస్తామని హామీ ఇచ్చారు. సీఎం ఇచ్చిన హామీ ఈ అసెంబ్లీ సమావేశాల్లోనే తప్పకుండా నెరవేరుతుందన్న గంపెడాశ ఈ ప్రాంత ప్రజల్లో నెలకొంది. 8 నెలల కిందట సీఎం రేవంత్‌రెడ్డిని ఎమ్మెల్యే కొత్త ప్రభాకర్‌రెడ్డి ప్రత్యేకంగా కలువడం రాష్ట్ర రాజకీయాల్లో తీవ్ర చర్చ జరగడం అందరికీ తెలిసిందే. కాకపోతే తాను దుబ్బాక రెవెన్యూ డివిజన్‌తోపాటు పలు అభివృద్ధి కార్యక్రమాల కోసమే సీఎం ను కలిశానని ఎమ్మెల్యే ప్రభాకర్‌రెడ్డి స్పష్టం చేశారు. రెవెన్యూ డివిజన్‌ ఏర్పాటుపై సీఎం సానుకూలంగా ఉన్నారని తప్పకుండా ఈ దిశగా చర్యలు జరుగుతున్నాయనే ప్రచారం జోరందుకుంది.92 రెవెన్యూ గ్రామాలతో డివిజన్‌ దుబ్బాక నియోజక వర్గంలో ప్రస్తుతం 8 మండలాలు ఉండగా చేగుంట, నార్సింగ్‌ మండలాలు తూప్రాన్‌ డివిజన్‌లో ఉన్నాయి. సిద్దిపే ట డివిజన్‌లో ఉన్న దుబ్బాక, మిరుదొడ్డి, తొగుట, భూంపల్లి–అక్బర్‌పేట మండలాలతోపాటు గజ్వేల్‌ డివిజన్‌లో ఉన్న దౌల్తాబాద్‌, రాయపోల్‌ మండలాలతో కలిపి మొత్తం 6 మండలాలతో దుబ్బాక రెవెన్యూ డివిజన్‌ ను ఏర్పాటు చేసే అవకాశాలు ఉన్నాయి. ప్రస్తుతం ఈ ఆరు మండలాల పరిధిలో దుబ్బాక మున్సిపాల్టీతోపాటు 92 రెవెన్యూ గ్రామాలు 115 గ్రామ పంచాయతీలు ఉన్నాయి. 2 లక్షలకు పైగా జనాభాతో పాటు ఫారెస్ట్‌ రేంజ్‌ ఆఫీస్‌, ఐసీడీఎస్‌, వ్యవసాయ శాఖ సబ్‌ డివిజన్‌, పీఆర్‌, ఆర్‌అండ్‌బీ, ఇరిగేషన్‌, మిషన్‌ భగీరథ, హర్టీకల్చర్‌ సబ్‌ డివిజన్‌ కార్యాలయాలతోపాటు బస్‌ డిపో ఉంది. కాబ ట్టి డివిజన్‌ ఏర్పాటు చేయాలని కోరుతున్నారు.ఉద్యమం తీవ్రతరం చేస్తాం దుబ్బాక రెవెన్యూ డివిజన్‌ కోసం అఖిల పక్షం ఆధ్వర్యంలో ఉద్యమాన్ని తీవ్రతరం చేస్తాం. రాజకీయాలకు అతీతంగా అన్ని పార్టీలు, కుల సంఘాలు, యువజన సంఘాలు, విద్యార్థి, మేధావులతో కలిసి ప్రత్యేక కార్యాచరణను రూపొందించుకొని అఖిల పక్షం ఆధ్వర్యంలో సీఎం, మంత్రులను కలుస్తాం. – మాడవోయిన శ్రీకాంత్‌,అఖిల పక్షం నాయకులు

● 6 గ్యారంటీలు, 66 హామీలనువిస్మరించిన కాంగ్రెస్‌ ప్రభుత్వం ● రాష్ట్రంలో రైతుల, విద్యార్థుల మరణాలు కలిచివేస్తున్నాయి ● బీజేపీ రాష్ట్ర ప్రధాన కార్యదర్శికాసం వెంకటేశ్వర్లు ప్రశాంత్‌నగర్‌(సిద్దిపేట): రాష్ట్రంలో కాంగ్రెస్‌ అధికారంలోకి వచ్చాక సంక్షేమం సంక్షోభంగా మారిందని, అభివృద్ధి అవినీతిగా మారిందని బీజేపీ రాష్ట్ర ప్రధాన కార్యదర్శి కాసం వెంకటేశ్వర్లు అన్నారు. కాంగ్రెస్‌ అధికారంలోకి వచ్చి ఏడాదైన సందర్భంగా ఆ పార్టీ ప్రజలకు ఇచ్చిన హామీలపై గురువారం బీజేపీ జిల్లా కార్యాలయంలో వెంకటేశ్వర్లు విలేకర్ల సమావేశం నిర్వహించి మాట్లాడారు. సీఎం రేవంత్‌ రెడ్డి ఏడాది పాలనలో అవినీతి తప్ప ఎక్కడ అభివృద్ధి దాఖలాలు కనిపించడం లేదని విమర్శించారు. ప్రతి పక్షాలపై నిందలు వేయడం తప్ప సీఎం చేసిన ఒక్క మంచి పని లేదన్నారు. రేవంత్‌ రెడ్డి లక్కీగా సీఎం అయ్యాడని ఆయనకు పరిపాలన చేయడం తెలియదని విమర్శించారు. ఏడాది కాంగ్రెస్‌ పాలనలో 50 మందికి పైగా రైతులు ఆత్మహత్య చేసుకున్నారన్నారు. ఫార్మా కంపెనీకి భూములు ఇవ్వనందుకు లగచర్ల రైతులను ఇబ్బందులు పెట్టి వారి చేతులకు సంకెళ్లు వేయడం సిగ్గుచేటన్నారు. వరి ధాన్యం కొనుగోలులో తీవ్ర జాప్యం చేసిందన్నారు. రేవంత్‌ రెడ్డికి పరిపాలన చేతకాక హైడ్రా, మూసీ సుందరీకరణ, ప్రతిపక్షాల అరెస్ట్‌లతో డైవర్షన్‌ పాలిటిక్స్‌ చేస్తూ తెలంగాణను అన్ని రంగాల్లో వెనుకకు నెట్టేస్తున్నాడన్నారు. రాష్ట్రంలో విద్యాశాఖ పూర్తిగా విఫలమయ్యిందన్నారు. ఇప్పటికై నా సీఎం రాష్ట్ర అభివృద్ధికి కృషి చేయాలన్నారు. కార్యక్రమంలో జిల్లా అధ్యక్షుడు గంగాడి మోహన్‌ రెడ్డి, దూది శ్రీకాంత్‌ రెడ్డి, సొప్పదండి విద్యాసాగర్‌, విబిషన్‌ రెడ్డి, కోడూరి నరేశ్‌, గోనె మార్కండేయులు, లక్కిరెడ్డి తిరుమల, ఉమా సురేష్‌ రెడ్డి పాల్గొన్నారు.

సిద్దిపేటరూరల్‌: సమాజంలో హింసలకు, గృహ హింసలకు, లైంగిక వేధింపులు గురయ్యే పేదలకు సేవ చేసేందుకే లీగల్‌ సర్వీసెస్‌ అథారిటీ ఉందని జిల్లా లీగల్‌ సర్వీసెస్‌ అథారిటీ కార్యదర్శి స్వాతిరెడ్డి సూచించారు. గురువారం మండల పరిధిలోని పుల్లూరు గ్రామంలో లైంగిక వేధింపులు, గృహ హింసల చట్టాలపై న్యాయ విజ్ఞాన సదస్సును నిర్వహించారు. కార్యక్రమానికి ముఖ్య అతిథిగా స్వాతిరెడ్డి హాజరై మాట్లాడారు. ఎవరైనా పని ప్రదేశాల్లోగాని, మరెక్కడైనా గాని లైంగికంగా వేధింపులకు గురి చేస్తేఅధైర్య పడకుండా తమ దృష్టికి తీసుకురావాలన్నారు. లీగల్‌ సర్వీసెస్‌ అథారిటీ టోల్‌ ఫ్రీ నంబర్‌ 15100 కు ఫోన్‌ చేసి ఫిర్యాదు చేయొచ్చన్నారు. అంతకుముందు ఏసీపీ మధు మాట్లాడుతూ.. మహిళలపై ఎలాంటి అరాచకాలు జరిగినా వెంటనే తమ దృష్టికి తీసుకురావాలని, 24 గంటల పాటు పోలీసు యంత్రాంగం అందుబాటులో ఉంటుందని డయల్‌ 100కు ఫోన్‌ చేసి సమాచారం అందించాలన్నారు. అనంతరం స్వాతిరెడ్డిని గ్రామ మహిళలు ఘనంగా శాలువాతో సన్మానించారు. కార్యక్రమంలో సీఐ శ్రీను, ఎస్‌ఐ అపూర్వరెడ్డి, మల్లేశం, పంచాయతీ కార్యదర్శి గౌస్‌, కానిస్టేబుళ్లు, తదితరులు పాల్గొన్నారు.

తూప్రాన్‌: జాతీయ స్థాయి సబ్‌ జూనియర్‌ సాఫ్ట్‌బాల్‌ పోటీలకు జిల్లా క్రీడాకారులు ఎంపికై నట్లు జిల్లా అసోసియేషన్‌ అధ్యక్షుడు కోడిప్యాక నారాయణగుప్త గురువారం పేర్కొన్నారు. ఈ సందర్భంగా ఆయన మాట్లాడుతూ.. 20 నుంచి జమ్మూ కాశ్మీర్‌లోని ఎంఏ క్రీడా మైదానంలో 37వ జాతీయ స్థాయి సబ్‌ జూనియర్‌ సాఫ్ట్‌ బాల్‌ బాల, బాలికల చాంపియన్‌షిప్‌ పోటీలు జరుగుతున్నాయని తెలిపారు. 24 వరకు పోటీలు జరుగనున్న నేపథ్యంలో ఈ పోటీలకు రాష్ట్ర బాల, బాలికల జట్టుకు జిల్లాకు చెందిన 8 మంది క్రీడాకారులు ఎంపికయ్యారని వివరించారు. నవంబరు నెలలో రాష్ట్ర స్థాయిలో జరిగిన పోటీల్లో ఉత్తమ ప్రతిభ కనబర్చి బాలికల జట్టులో కార్తీక, శ్రీకృతి, శిరీష, గీతిక, బాలుర జట్టులో విజయ్‌, శ్రీవాత్సవ, వరుణ్‌, నిషాంత్‌ రాష్ట్ర జట్టులో స్థానం పొందినట్లు తెలిపారు. ఈ సందర్భంగా క్రీడాకారులను పలువురు అభినందించారు. కార్యక్రమంలో జిల్లా అసోసియేషన్‌ ఉపాధ్యక్షుడు అజయ్‌ కుమార్‌ గౌడ్‌, ప్రధాన కార్యదర్శి శ్యాం సుందర్‌ శర్మ, కోశాధికారి గోవర్దన్‌ గౌడ్‌, అసోసియేషన్‌ సభ్యులు వెంకట్‌ రెడ్డి, కుమార్‌గౌడ్‌, శ్రీనివాస్‌, తదితరులు పాల్గొన్నారు.

జిల్లా వ్యవసాయ అధికారి రాధికమర్కూక్‌(గజ్వేల్‌): రైతులు ఆయిల్‌పామ్‌ సాగు వైపు మొగ్గు చూపాలని, అధిక లాభాలు గడించవచ్చని జిల్లా వ్యవసాయ అధికారి రాధిక, జిల్లా పట్టు, ఉద్యానవన శాఖ అధికారి సువర్ణ తెలిపారు. బుధవారం మండల కేంద్రంలోని రైతు వేదికలో రైతులకు ఆయిల్‌పామ్‌పై అవగాహన సదస్సు నిర్వహించారు. ఈ సందర్భంగా వారు మాట్లాడుతూ ప్రతి ఏడాదీ రైతులు ఈ సాగు వైపు మొగ్గు చూపుతున్నారన్నారు. అంతర పంటలను సాగు చేసుకోవచ్చని వివరించారు. ప్రభుత్వం 90 శాతం సబ్సిడీ సౌకర్యం కల్పిస్తోందని పేర్కొన్నారు. డ్రిప్‌పై ఎస్సీలకు, వందశాతం, బీసీలకు 90 శాతం, ఇతర రైతులకు 80 శాతం కల్పిస్తోందన్నారు. వాణిజ్య పంటలకు అనుకూలంగా లేని భూముల్లో సాగు మంచిదని వివరించారు. అనంతరం మర్కూక్‌లో సాగులో ఉన్న ఆయిల్‌పామ్‌ను పరిశీలించారు. కార్యక్రమంలో ఏడీఏ అనిల్‌, ఏఓ వసంతరావు, ఏఈఓలు, రైతులు పాల్గొన్నారు.

● వెంటనే ఇథనాల్‌ ఫ్యాక్టరీ పనులు నిలివేయాల్సిందే ● కలెక్టరేట్‌ ఏఓకు సీపీఎం వినతిసిద్దిపేటరూరల్‌: బెజ్జంకి మండలం గుగ్గిళ్ల, పోతారం గ్రామాల పరిధిలో నిర్మిస్తున్న ఇథనాల్‌ ఫ్యాక్టరీ అనుమతులు రద్దు చేయాలని సీపీఎం పార్టీ జిల్లా కమిటీ కోరింది. బుధవారం కలెక్టరేట్‌ ఏఓకు నేతలు వినతి పత్రం అందించారు. ఈ సందర్భంగా జిల్లా కార్యదర్శివర్గ సభ్యులు రాళ్లబండి శశిధర్‌ మాట్లాడారు. జిల్లాలోని బెజ్జంకి మండలం గుగ్గిళ్ల, పోతారం గ్రామాల శివారులో నిర్మిస్తున్న ఇథనాల్‌ కంపెనీ వల్ల చుట్టూ 10 గ్రామాల పరిధిలో భూసారం దెబ్బతిని పంటలు పండక ఎడారిగా మారే అవకాశం ఉందన్నారు. ఈ కంపెనీ నుంచి వెలువడే విషవాయువుల వల్ల ప్రజల ప్రాణాలకు ముప్పు వాటిల్లే ప్రమాదం ఉందన్నారు. ప్రకృతి ధ్వంసమై కాలుష్యం బారిన పడి ప్రజల ఆరోగ్యాలకు, ప్రాణాలకు ముప్పు వాటిల్లే ప్రమాదం ఉందన్నారు. కంపెనీ నిర్మాణం చేపట్టవద్దని ప్రజ లు నిరసనలు తెలియజేస్తున్నా యాజమాన్యం పట్టించుకోకుండా పనులను కొనసాగిస్తోందన్నా రు. ఇప్పటికై నా ఇథనాల్‌ కంపెనీ అనుమతులు రద్దు చేయాలన్నారు. లేనిపక్షంలో పెద్ద ఎత్తున ఉద్యమిస్తామని ప్రభుత్వాన్ని హెచ్చరించారు. కార్యక్రమంలో జిల్లా కార్యదర్శివర్గ సభ్యులు గోపాలస్వామి, బెజ్జంకి మండల కార్యదర్శి శ్రీనివాస్‌, జిల్లా కమిటీ సభ్యులు పాల్గొన్నారు.

సిద్దిపేటరూరల్‌: ఇందిరమ్మ మహిళా శక్తి కార్యక్రమంలో తెలంగాణ మైనార్టీస్‌ ఫైనాన్స్‌ కార్పొరేషన్‌ హైదరాబాద్‌ ద్వారా మైనార్టీ మహిళలకు ఉచితంగా కుట్టుమిషన్‌లను అందించనున్నట్లు జిల్లా మైనార్టీస్‌ శాఖ అధికారి షేక్‌ ఆహ్మద్‌ బుధవారం తెలిపారు. జిల్లాలోని ముస్లిం, సిక్కులు, బుద్దిస్ట్‌, జైన్స్‌, పార్సిస్‌కు చెందిన వారు అర్హులని పేర్కొన్నారు. గ్రామీణ ప్రాంతాలకు చెందిన వారై తెల్లరేషన్‌కార్డు ఉండి, వార్షిక ఆదాయం రూ. లక్షా యాభై వేలకు మించకుండా ఉండాలని తెలిపారు. పట్టణ ప్రాంతాలకు చెందిన వారైతే రూ. 2 లక్షల ఆదాయం మించకుండా ఉండాలని సూచించారు. 18 నుంచి 55 సంవత్సరాల వయసు కలిగి ఉండాలని తెలిపారు. టైలరింగ్‌ కోర్సు నేర్చుకుని సర్టిఫికెట్‌ కలిగి ఉండి, కనీసం 5వ తరగతి పాసై ఉండాలని పేర్కొన్నారు. 5 సంవత్సరాల నుంచి మైనార్టీ కార్పొరేషన్‌ ద్వారా ఎలాంటి లబ్ధి పొంది ఉండరాదని సూచించారు. tgobmms.cgg.gov.in వెబ్‌సైట్‌లో నమోదు చేసుకోవాలని సూచించారు. దరఖాస్తు అనంతరం హార్డ్‌ కాపీని జిల్లా మైనార్టీ శాఖ కార్యాలయంలో అందించాలని తెలిపారు. నిరుద్యోగ నిరుపేద మహిళలు, విడాకులు తీసుకున్న మహిళలు, వితంతువులు, అనాధ, ఒంటరి మహిళలకు ప్రాధాన్యత కల్పించనున్నట్లు పేర్కొన్నారు.

● వెంటనే ఇథనాల్‌ ఫ్యాక్టరీ పనులు నిలివేయాల్సిందే ● కలెక్టరేట్‌ ఏఓకు సీపీఎం వినతిసిద్దిపేటరూరల్‌: బెజ్జంకి మండలం గుగ్గిళ్ల, పోతారం గ్రామాల పరిధిలో నిర్మిస్తున్న ఇథనాల్‌ ఫ్యాక్టరీ అనుమతులు రద్దు చేయాలని సీపీఎం పార్టీ జిల్లా కమిటీ కోరింది. బుధవారం కలెక్టరేట్‌ ఏఓకు నేతలు వినతి పత్రం అందించారు. ఈ సందర్భంగా జిల్లా కార్యదర్శివర్గ సభ్యులు రాళ్లబండి శశిధర్‌ మాట్లాడారు. జిల్లాలోని బెజ్జంకి మండలం గుగ్గిళ్ల, పోతారం గ్రామాల శివారులో నిర్మిస్తున్న ఇథనాల్‌ కంపెనీ వల్ల చుట్టూ 10 గ్రామాల పరిధిలో భూసారం దెబ్బతిని పంటలు పండక ఎడారిగా మారే అవకాశం ఉందన్నారు. ఈ కంపెనీ నుంచి వెలువడే విషవాయువుల వల్ల ప్రజల ప్రాణాలకు ముప్పు వాటిల్లే ప్రమాదం ఉందన్నారు. ప్రకృతి ధ్వంసమై కాలుష్యం బారిన పడి ప్రజల ఆరోగ్యాలకు, ప్రాణాలకు ముప్పు వాటిల్లే ప్రమాదం ఉందన్నారు. కంపెనీ నిర్మాణం చేపట్టవద్దని ప్రజ లు నిరసనలు తెలియజేస్తున్నా యాజమాన్యం పట్టించుకోకుండా పనులను కొనసాగిస్తోందన్నా రు. ఇప్పటికై నా ఇథనాల్‌ కంపెనీ అనుమతులు రద్దు చేయాలన్నారు. లేనిపక్షంలో పెద్ద ఎత్తున ఉద్యమిస్తామని ప్రభుత్వాన్ని హెచ్చరించారు. కార్యక్రమంలో జిల్లా కార్యదర్శివర్గ సభ్యులు గోపాలస్వామి, బెజ్జంకి మండల కార్యదర్శి శ్రీనివాస్‌, జిల్లా కమిటీ సభ్యులు పాల్గొన్నారు.

జిల్లా వ్యవసాయ అధికారి రాధికమర్కూక్‌(గజ్వేల్‌): రైతులు ఆయిల్‌పామ్‌ సాగు వైపు మొగ్గు చూపాలని, అధిక లాభాలు గడించవచ్చని జిల్లా వ్యవసాయ అధికారి రాధిక, జిల్లా పట్టు, ఉద్యానవన శాఖ అధికారి సువర్ణ తెలిపారు. బుధవారం మండల కేంద్రంలోని రైతు వేదికలో రైతులకు ఆయిల్‌పామ్‌పై అవగాహన సదస్సు నిర్వహించారు. ఈ సందర్భంగా వారు మాట్లాడుతూ ప్రతి ఏడాదీ రైతులు ఈ సాగు వైపు మొగ్గు చూపుతున్నారన్నారు. అంతర పంటలను సాగు చేసుకోవచ్చని వివరించారు. ప్రభుత్వం 90 శాతం సబ్సిడీ సౌకర్యం కల్పిస్తోందని పేర్కొన్నారు. డ్రిప్‌పై ఎస్సీలకు, వందశాతం, బీసీలకు 90 శాతం, ఇతర రైతులకు 80 శాతం కల్పిస్తోందన్నారు. వాణిజ్య పంటలకు అనుకూలంగా లేని భూముల్లో సాగు మంచిదని వివరించారు. అనంతరం మర్కూక్‌లో సాగులో ఉన్న ఆయిల్‌పామ్‌ను పరిశీలించారు. కార్యక్రమంలో ఏడీఏ అనిల్‌, ఏఓ వసంతరావు, ఏఈఓలు, రైతులు పాల్గొన్నారు.

సమీకృత కార్యాలయంలో సిబ్బంది సమయపాలన పాటించడం లేదు. నిర్దేశించిన సమయానికి కుర్చీలో ఉండాలి. కానీ వారు లేకపోవడంతో ఆ స్థానాలు ఖాళీగా దర్శనమిచ్చాయి. సిబ్బంది లేక శాఖల కార్యాలయాలు బోసిపోయాయి. అధికారులు ఎప్పుడు వస్తారో తెలియక వివిధ పనుల నిమిత్తం కార్యాలయానికి వచ్చిన పలువురు పడిగాపులు పడ్డారు. ఎవరికీ ఎలాంటి ఇబ్బందులు కల్గించవద్దనే ఉద్దేశంతో నిర్మించిన సమీకృత కార్యాలయం లక్ష్యం నీరుగారుతోంది. కలెక్టరేట్‌ల్లో ‘సాక్షి’ విజిట్‌ నిర్వహించగా ఈ విషయాలు వెలుగుచూశాయి. –సాక్షి, సిద్దిపేటఉదయం 10.45లకు తెరుచుకోని డీఎస్‌ఓ కార్యాలయం కలెక్టరేట్‌లో ఉన్న జిల్లా పౌరసరఫరాల శాఖ అధికారి కార్యాలయం ఉదయం 10.45 గంటలైనా తెరుచుకోలేదు. కార్యాలయంలో డీఎస్‌ఓతో సహా సిబ్బంది ఉంటారు. ఇక్కడికి పని నిమిత్తం సిద్దిపేట, హుస్నాబాద్‌ల నుంచి పలువురు ప్రజలు వచ్చి కార్యాలయం ఎదుట పడిగాపులు పడ్డారు. ఉదయం 10.50 గంటలకు ఇద్దరు సిబ్బంది వచ్చి కార్యాలయం డోర్‌ తీశారు.

రైతులతో అధికారులు కొమురవెల్లి(సిద్దిపేట): కొమురవెల్లి రైల్వే స్టేషన్‌ ఏర్పాటు కోసం 6 ఎకరాల 13 గుంటల భూమి అవసరమవుతుందని, ఇంకా మీకు ఏమైనా అభ్యంతరాలు ఉంటే రాత పూర్వకంగా దరఖాస్తు చేసుకోవాలని తహసీల్దార్‌ లక్ష్మీనారాయణ, అధికారులు.. రైతులకు తెలిపారు. బుధవారం సంబంధిత 18 మంది రైతులతో కలిసి వారు పంచాయతీ కార్యాలయంలో గ్రామ సభ నిర్వహించారు. ఏమైనా అభ్యంతరాలు ఉంటే ఇవ్వాలని ఉన్నతాధికారుల దృష్టికి తీసుకెళ్తానన్నారు. ఆమేరకు సమస్య పరిష్కారానికి కృషి చేస్తామన్నారు. కార్యక్రమంలో రైల్వే ఏఈ సంజీవ్‌కుమార్‌, డిప్యూటీ తహసీల్దార్‌ వేణుగోపాల్‌రావు, చేర్యాల సీఐ శ్రీను, ఆర్‌ఐ శ్రీనివాస్‌, పంచాయతీ కార్యదర్శి హరిప్రసాద్‌ తదితరులు పాల్గొన్నారు. 22 నుంచి మూలవిరాట్‌ దర్శనం నిలిపివేత కొమురవెల్లి(సిద్దిపేట): కొమురవెల్లి మల్లికార్జున స్వామి మూలవిరాట్‌ దర్శనం ఈనెల 22 నుంచి నిలిపివేస్తున్నట్లు ఆలయ ఈఓ బాలజీ బుధవారం తెలిపారు. స్వామివారి కల్యాణ మహోత్సవం ఈనెల 29న జరగనుందన్నారు. దీంతో స్వామి మూలవిరాట్‌తో పాటు అమ్మవార్ల మూలవిరాట్‌లకు రంగులను అద్దనున్నారన్నారు. దీంతో ఆరోజు నుంచి దర్శనాలు నిలిపేస్తున్నామన్నారు. ఈనెల 29న ఉదయం 6 గంటల నుంచి పునరుద్ధరిస్తామన్నారు. సంబరాలను ఘనంగా నిర్వహించాలి మిరుదొడ్డి(దుబ్బాక): విద్యా సాంస్క ృతిక సంబరాలను ఘనంగా నిర్వహించాలని డీఈఓ శ్రీనివాస్‌రెడ్డి అన్నారు. అక్బర్‌పేట–భూంపల్లి మండల వనరుల కేంద్రంలో ఈ నెల 28న నిర్వహించే మండల స్థాయి విద్యా సాంస్క ృతిక సంబరాలకు సంబంధించిన పోస్టర్లను తెలంగాణ ఎస్సీ, ఎస్టీ కమిషన్‌ రాష్ట్ర చైర్మన్‌ వెంకటయ్యతో కలిసి ఆయన బుధవారం ఆవిష్కరించారు. భూంపల్లి ఉన్నత పాఠశాలలో జరిగిన కార్యక్రమంలో విద్యార్థులు విద్యతో పాటు సాంస్క ృతిక రంగంలో రాణించడానికి ఈ సంబరాలు దోహదం కావాలన్నారు.

చిన్నారులతో దూర ప్రయాణం చేయొద్దు పొగమంచులో వేగంగా నడపొద్దుసాక్షి, సిద్దిపేట: మీ ముందు వచ్చే వాహనాలతో సురక్షితమైన దూరం పాటించాలి. ముందున్న మార్గం అర్థం చేసుకోవాలి. వారికి, మీకు మధ్య సురక్షితమైన దూరాన్ని ఉంచుకోవాలి. ముందు ఉన్న వాహనాల టెయిల్‌ లైట్లను అనుసరించడానికి ప్రయత్నించండి. హెడ్‌ల్యాంప్‌లను వాడుతుండాలి. వాటితో పాటు, టెయిల్‌ ల్యాంప్‌లు కూడా స్విచ్‌ ఆన్‌ చేసుకోవాలి. పొగమంచు వాతావరణంలో వేగంగా నడపడం మానుకోండి. నాలుగు చక్రాల కంటే ఎక్కువ వాహనాలు విండ్‌షీల్డ్‌ వైపర్‌లు సరిగ్గా పనిచేస్తున్నాయని చెక్‌ చేసుకోవాలి. పొగమంచు పరిస్థితుల్లో లేన్‌ మార్పులు, దూకుడు డ్రైవింగ్‌ను తగ్గించుకోవాలి. ప్రమాదాన్ని తగ్గించడానికి ఇది మంచి పద్ధతి. రహదారి చిహ్నాల పట్ల జాగ్రత్తగా ఉండండి. – కొండల్‌ రావు, జిల్లా రవాణా అధికారిసాక్షి, సిద్దిపేట: చలికాలంలో చిన్న పిల్లలతో ద్విచక్ర వాహనాలపై దూర ప్రయాణాలు చేయకూడదు. చలి తీవ్రత ఎక్కువగా ఉండడం వలన బయట ఆహారానికి దూరంగా ఉండాలి. చిన్నపిల్లల శరీరాన్ని పూర్తిగా కప్పేలా ఉన్ని దుస్తులు ధరించాలి. పిల్లలు ఆహారం తీసుకునే ముందు చేతులు శుభ్ర పరుచుకోవాలి. చలికాలంలో ఫ్లూ వచ్చే అవకాశం ఎక్కువగా ఉంటుంది. ఫ్లూ వ్యాక్సిన్‌ తీసుకోవడంతో పాటు మాస్కులు ధరించాలి. ఆరు నెలల లోపు పిల్లలకు శ్వాసకోశ నాళాలు మూసుకుపోయే సమస్య, ఫ్లూ, నిమోనియా వంటి వ్యాధులు వచ్చే అవకాశం ఎక్కువగా ఉంటుంది. చిన్నపిల్లలు, గర్భిణులు తగు జాగ్రత్తలు తీసుకోవాలి. ప్రోటీన్స్‌, విటమిన్స్‌ ఎక్కువగా ఉండే ఆహారం, తాజా పండ్లు ఎక్కువగా తీసుకోవాలి. – డాక్టర్‌ మనోహర్‌, అసిస్టెంట్‌ ప్రొఫెసర్‌, సిద్దిపేట ప్రభుత్వ మెడికల్‌ కళాశాల

హుస్నాబాద్‌లోకి పది గ్రామాలు ● స్థానిక సంస్థల ఎన్నికలకు ముందే ప్రక్రియ ● హుస్నాబాద్‌ మున్సిపాలిటీలోకి కిషన్‌నగర్‌ ● ప్రజలకు తగ్గనున్న దూరాభారం అక్కన్నపేట మండలానికి చెందిన 10 గ్రామాలు హుస్నాబాద్‌ మండలంలో విలీన చేసే ప్రక్రియ ముమ్మరంగా సాగుతోంది. గత ప్రభుత్వం అసెంబ్లీ ఎన్నికల ముందు గెజిట్‌ ఇస్తే ఎలాంటి అభ్యంతరాలు రాలేదు. దీంతో ప్రస్తుత కాంగ్రెస్‌ ప్రభుత్వం ఆ దిశగా అడుగులు వేస్తోంది. ఆ మేరకు స్థానిక ఎన్నికలు నిర్వహించేందుకు సన్నద్ధమవుతున్నట్లు తెలుస్తున్నది. హుస్నాబాద్‌రూరల్‌: తెలంగాణ రాష్ట్రం ఏర్పడిన తర్వాత జిల్లాలు, మండలాల విభజనలో హుస్నాబాద్‌ మండలంలోని 32 గ్రామ పంచాయతీలతో అక్కన్నపేట కొత్త మండలం ఏర్పాటు చేశారు. హుస్నాబాద్‌ పట్టణాన్ని మున్సిపాలిటీ చేశారు. 17 గ్రామాలతో హుస్నాబాద్‌ చిన్న మండలంగా ఏర్పడింది. హుస్నాబాద్‌, హుస్నాబాద్‌రూరల్‌ మండలాల ఏర్పాటు చేయాలని ప్రతిపాదనలు పంపారు. కానీ రాజకీయ జోక్యంతో అక్కన్నపేట కేంద్రం మండలం ఏర్పాటు చేశారని ఆరోపణలున్నాయి. ఇందులో గోవర్ధనగిరి, మల్‌చెర్వుతండా, రేగొండ, గౌరవెల్లి, బొడిగెపల్లి, జనగామ, గుబ్బడి, కేశ్వాపూర్‌, మంచీళ్లబండ గ్రామాల ప్రజలు రెవెన్యూ ఇతర పనుల కోసం అక్కన్నపేటకు వెళ్లాల్సి వస్తుందని దీంతో దూరం అవుతోందని చెబుతున్నారు. ఇదే గోర్ధనగిరి, రేగొండ, బొడిగెపల్లి గ్రామాల ప్రజలు హుస్నాబాద్‌కు వచ్చి అక్కడి నుంచి 15 కిలోమీటర్లు ప్రయాణించి అక్కన్నపేటకు వెళ్తున్నారు. అందువల్ల హుస్నాబాద్‌లోనే గ్రామాలు కొనసాగించాలని వారూ కోరుతున్నారు. శాసనసభ ఎన్నికలకు ముందే 10 గ్రామాలను హుస్నాబాద్‌ మండలంలో విలీనం చేయడానికి గెజిట్‌ను కూడా గత ప్రభుత్వం విడుదల చేసింది. ఎలాంటి అభ్యంతరాలు రాలేదు. దీంతో కాంగ్రెస్‌ ప్రభుత్వం విలీనం చేసే ప్రక్రియను ముమ్మరం చేస్తున్నట్లు అధికార వర్గాలు అభిప్రాయపడుతున్నారు. హుస్నాబాద్‌ సరిహద్దులోని కిషన్‌నగర్‌ను మున్సిపాలిటీలో విలీనానికి పంచాయతీ తీర్మానం చేసింది. మున్సిపాలిటీ పాలకవర్గం గడువు ముగియనుండటంతో విలీన ప్రక్రియను అధికారులు వేగం పెంచారు. వివరాలు అడిగారు హుస్నాబాద్‌ మండలంలో అక్కన్నపేట మండలం నుంచి 10 పంచాయతీలను విలీనం చేయడం, పందిల్ల స్టేజీ వద్ద కొత్త గ్రామ పంచాయతీ ఏర్పాటు చేయడం ప్రక్రియ కొనసాగుతోంది. జిల్లా పరిషత్‌ అధికారులు ఆ 10 గ్రామాల వివరాలను అడుగుతున్నారు. స్థానిక సంస్థల ఎన్నికలకు ముందే గ్రామాల విలీన ప్రక్రియ పూర్తి చేసి పందిల్ల స్టేజీ వద్ద కొత్త గ్రామ పంచాయతీ ఏర్పాటు చేయనున్నారు. – వేణుగోపాల్‌రెడ్డి, ఎంపీడీఓ, హుస్నాబాద్‌