రోడ్డుపై బైఠాయించిన గ్రామస్తులు
 
 సోమందేపల్లి : పంది దాడిలో బాలికకు గాయాలయ్యాయి. మండల కేంద్రంలోని సప్తగిరి కాలనీకి చెందిన గీత (16) సోమవారం సరుకుల కోసం దుకాణానికి వెళ్లి వస్తుండగా అక్కడే ఉన్న ఓ పంది దాడిచేసింది. ఎడమ చెయ్యి, కుడివైపు ముఖ భాగంలో గాయపరిచింది. బాధితురాలు గట్టిగా కేకలు వేయడంతో స్థానికులు వచ్చి రక్షించారు. అనంతరం ఆమెను తల్లి అంజినమ్మ స్థానికుల సాయంతో పెనుకొండ ఆస్పత్రికి తీసుకెళ్లారు.
 రోడ్డుపై బైఠాయించిన గ్రామస్తులు : పందుల బెడద నుంచి కాపాడాలని గ్రామస్తులు కొత్తపల్లి క్రాస్‌ వద్ద రోడ్డుపై బైఠాయించారు. వాహనాల రాకపోకలు నిలిచిపోవడంతో ఎస్‌ఐ ప్రసాద్‌ సంఘటన స్థలానికి చేరుకుని బాధితులతో చర్చించారు. పెంపకందారులను పిలిపించి చర్యలు తీసుకుంటామని హామీ ఇచ్చి ఆందోళనను విరమింపజేశారు.