న్యూఢిల్లీ: ప్రపంచ చాంపియన్, భారత బ్యాడ్మింటన్‌ స్టార్‌ ప్లేయర్‌ పీవీ సింధు ఖాతాలో మరో అవార్డు వచ్చి చేరింది. ఈఎస్‌పీఎన్‌ గురువారం ప్రకటించిన అవార్డుల్లో సింధు ‘ఈ ఏటి మేటి మహిళా క్రీడాకారిణి’ పురస్కారాన్ని గెలుచుకుంది. ఈఎస్‌పీఎన్‌ ఫిమేల్‌ స్పోర్ట్స్‌ పర్సన్‌ ఆఫ్‌ ద ఇయర్‌గా నిలవడం సింధుకిది వరుసగా మూడోసారి. పురుషుల విభాగంలో యువ షూటర్‌ సౌరభ్‌ వర్మ ఈ అవార్డును అందుకున్నాడు. 2019 ఐఎస్‌ఎస్‌ఎఫ్‌ వరల్డ్‌ కప్‌లో సౌరభ్‌ ప్రదర్శన అతనికి ఈ అవార్డును తెచ్చి పెట్టింది. ఈ మెగా టోర్నీలో సౌరభ్‌ 5 స్వర్ణాలతో మెరిశాడు. 10మీ. ఎయిర్‌ పిస్టల్‌ వ్యక్తిగత విభాగాల్లో రెండు పసిడి పతకాలను గెలుచుకున్న సౌరభ్‌... మిక్స్‌డ్‌ టీమ్‌ ఈవెంట్‌లో మరో 3 స్వర్ణాలను హస్తగతం చేసుకున్నాడు. అథ్లెటిక్స్‌లో సత్తా చాటుతూ యువతరానికి ఆదర్శంగా నిలుస్తోన్న ఒడిశా స్ప్రింటర్‌ ద్యుతీ చంద్‌కు ‘కరేజ్‌’ అవార్డు లభించింది.  పునరాగమనంలో అద్భుత విజయాలు సాధిస్తోన్న ఆంధ్రప్రదేశ్‌ గ్రాండ్‌ మాస్టర్‌ కోనేరు హంపి ‘కమ్‌ బ్యాక్‌ ఆఫ్‌ ద ఇయర్‌’ పురస్కారాన్ని అందుకుంది. బిడ్డకు జన్మనిచ్చాక రెండేళ్లు ఆటకు దూరమైన హంపి... గతేడాది డిసెంబర్‌లో రష్యా వేదికగా జరిగిన ప్రపంచ మహిళల ర్యాపిడ్‌ చెస్‌ చాంపియన్‌షిప్‌లో విజేతగా నిలిచిన ఆమె విశ్వ విజేతగా అవతరించింది. రెజ్లర్‌ దీపక్‌ పూనియా ‘ఎమర్జింగ్‌ స్పోర్ట్స్‌ పర్సన్‌ ఆఫ్‌ ద ఇయర్‌’ అవార్డును గెలుచుకోగా... బ్యాడ్మింటన్‌లో ఒలింపిక్స్‌ పతక విజేతలను తయారు చేసిన కోచ్‌ పుల్లెల గోపీచంద్‌ ‘కోచ్‌ ఆఫ్‌ ద ఇయర్‌’ పురస్కారాన్ని సొంతం చేసుకున్నాడు. సింధు ప్రపంచ చాంపియన్‌షిప్‌ గెలిచిన క్షణం ‘మూమెంట్‌ ఆఫ్‌ ద ఇయర్‌’గా ఎంపికైంది. 10మీ. ఎయిర్‌ పిస్టల్‌ మిక్స్‌డ్‌ టీమ్‌ ఈవెంట్‌లో ఆకట్టుకున్న మను భాకర్‌–సౌరభ్‌ చౌదరి జోడీకి ‘టీమ్‌ ఆఫ్‌ ద ఇయర్‌’ అవార్డు దక్కింది. మాన్సీ జోషికి ‘ పారా అథ్లెట్‌ ఆఫ్‌ ద ఇయర్‌’ పురస్కారం దక్కగా... జీవిత కాల సాఫల్య పురస్కారం హాకీ లెజెండ్‌ బల్‌బీర్‌ సింగ్‌కు దక్కింది.


 ముంబై: రియో ఒలింపిక్స్‌ రజత పతక విజేత, తెలుగు తేజం పీవీ సింధు ఖాతాలో మరో అవార్డు చేరింది. మారుతీ సుజుకి ‘స్పోర్ట్స్‌ పర్సన్‌ ఆఫ్‌ ద ఇయర్‌’ అవార్డును సింధు గెలుచుకుంది. స్పోర్ట్స్‌ ఇలస్ట్రేటెడ్‌ ఇండియా మేగజైన్‌ ఆధ్వర్యంలో గురువారం రాత్రి ఈ అవార్డుల కార్యక్రమం జరిగింది. సింధుతో పాటు భారత బ్యాడ్మింటన్‌ చీఫ్‌ కోచ్‌ పుల్లెల గోపీచంద్‌ ‘కోచ్‌ ఆఫ్‌ ద ఇయర్‌’ అవార్డును అందుకున్నారు. తన శిష్యురాలు సింధు చేతుల మీదుగా గోపీచంద్‌ అవార్డును స్వీకరించడం విశేషం. ఈ కార్యక్రమంలో పలువురు క్రీడా ప్రముఖులు సందడి చేశారు.
  
 బ్యాడ్మింటన్‌ డబుల్స్‌ కోచ్, ప్లేయర్‌ గుత్తా జ్వాల, ఫుట్‌బాల్‌ దిగ్గజం బైచుంగ్‌ భూటియా, బాక్సర్‌ ఆమిర్‌ ఖాన్, క్రికెటర్‌ ప్రజ్ఞాన్‌ ఓజా ఈ కార్యక్రమంలో పాల్గొన్నారు. ఫ్లయింగ్‌ సిఖ్‌ మిల్కా సింగ్‌ ‘లివింగ్‌ లెజెండ్‌’ అవార్డును పొందారు. ఆస్ట్రేలియాతో జరిగిన టెస్టు సిరీస్‌లో రాణించిన భారత టెస్టు క్రికెటర్‌ లోకేశ్‌ రాహుల్‌ ‘గేమ్‌ చేంజర్‌ ఆఫ్‌ ద ఇయర్‌’ అవార్డును అందుకోగా... బీజింగ్‌ ఒలింపిక్స్‌ స్వర్ణ పతక విజేత, షూటర్‌ అభినవ్‌ బింద్రా ‘లైఫ్‌ టైమ్‌ అచీవ్‌మెంట్‌’ పురస్కారాన్ని గెలుచుకున్నారు. వీరితో పాటు రియో పారాలింపిక్స్‌లో పతకాలు సాధించిన దేవేంద్ర జజారియా, మరియప్పన్‌ తంగవేలు, వరుణ్, దీపా మలిక్‌లు కూడా అవార్డులను అందుకున్నారు. జూనియర్‌ పురుషుల హాకీ జట్టు ‘టీమ్‌ ఆఫ్‌ ద ఇయర్‌’ అవార్డును గెలుచుకుంది.
  


 హైదరాబాద్‌: రియో ఒలింపిక్స్‌ రజత పతక విజేత, తెలుగమ్మాయి పీవీ సింధు ఖాతాలో మరో అవార్డు చేరింది. భారత స్పోర్ట్స్‌ జర్నలిస్ట్స్‌ సమాఖ్య (ఎస్‌జేఎఫ్‌ఐ) వార్షిక  అవార్డుల్లో భాగంగా అందించే ‘స్పోర్ట్స్‌ పర్సన్‌ ఆఫ్‌ ద ఇయర్‌’ పురస్కారానికి సింధు ఎంపికైంది. ఆదివారం జరిగిన ఎస్‌జేఎఫ్‌ఐ వార్షిక సాధారణ సర్వసభ్య సమావేశంలో ఈ నిర్ణయాన్ని తీసుకున్నారు.
  
 మరోవైపు గత డిసెంబర్‌ లక్నోలో జరిగిన జూనియర్‌ హాకీ వరల్డ్‌ కప్‌ను నెగ్గిన భారత హాకీ జట్టు ‘బెస్ట్‌ టీమ్‌ ఆఫ్‌ ద ఇయర్‌’ అవార్డును గెలుచుకుంది. గతేడాది జూలై నుంచి ఇప్పటివరకు క్రీడాకారుల ప్రదర్శనను పరిగణనలోకి తీసుకొని అవార్డులను ప్రకటించినట్లు ఎస్‌జేఎఫ్‌ఐ పేర్కొంది. ఈ అవార్డులను సెప్టెంబర్‌లో అందజేయనున్నారు.