ఇప్పటికే రెండు సినిమాలతో బిజీగా ఉన్న యువ కథానాయకుడు రామ్ ముచ్చటగా మూడో సినిమాకు శ్రీకారం చుట్టేశారు. శ్రీస్రవంతీ మూవీస్ పతాకంపై ‘స్రవంతి’ రవికిశోర్ ఈ కొత్త చిత్రాన్ని నిర్మిస్తున్నారు. ‘హరికథ’ అనే టైటిల్ ప్రచారంలో ఉన్న ఈ కొత్త చిత్రం షూటింగ్ బుధవారం మొదలైంది. తమిళనాడులోని పొల్లాచ్చిలో మొదలైన షూటింగ్ ఈ నెల 15 వరకు అక్కడే జరగనుంది. ‘‘చక్కటి ఫ్యామిలీ యాక్షన్ ఎంటర్‌టైనర్’’గా నిర్మాత పేర్కొంటున్న ఈ చిత్రంలో రామ్ సరసన కీర్తీ సురేష్ నాయిక. ఈ ఏడాది వచ్చిన తొలి హిట్ ‘రఘువరన్ బి.టెక్’కి మంచి సంభాషణలు అందించిన కిశోర్ తిరుమల ఈ చిత్రానికి దర్శకుడు. ‘‘రామ్ పోషించే పాత్ర చాలా ఉత్సాహంగా సాగుతుంది. ఈ షెడ్యూల్‌లో ఒక పాట, కీలక సన్నివేశాలు చిత్రీకరిస్తాం’’ అని నిర్మాత రవికిశోర్ పేర్కొన్నారు.
  
   సత్యరాజ్, ప్రదీప్ రావత్, నరేశ్, విజయకుమార్, రోహిణి లాంటి పేరున్న నటీనటులు ముఖ్యపాత్రధారులు. దేవిశ్రీ ప్రసాద్ సంగీతం, సమీర్‌రెడ్డి ఛాయాగ్రహణం అందిస్తున్నారు. నిజానికి, ఇప్పటికే ‘శివమ్’ అనే చిత్రాన్ని రామ్ హీరోగా కృష్ణచైతన్య సమర్పణలో రవికిశోర్ నిర్మిస్తున్నారు. అదే నిర్మాత, హీరోల కాంబినేషన్‌లో ఏకకాలంలో రెండో సినిమా కూడా సెట్స్‌పైకి వచ్చింది. మరోపక్క ‘పండగ చేస్కో’లో కూడా రామ్ హీరో. వరుసగా ఇలా మూడు చిత్రాల షూటింగ్‌లతో ఒక యువ హీరో బిజీగా ఉండడం విశేషమే.
  


 రఘువరన్ చాలా మంచి కుర్రాడు. బుద్ధిగా చదువుకుంటాడు. బీటెక్ కూడా పూర్తి చేస్తాడు. మంచి ఉద్యోగం దొరికితే హ్యాపీగా సెటిలైపోవచ్చు. కానీ, అనుకున్నామని అన్నీ జరుగుతాయా? ఉద్యోగం రాదు. మరి.. ఈ నిరుద్యోగ యువకుడు ఏం చేస్తాడు? అతని జీవితంలో జరిగిన సంఘటనలేంటి? అనే కథాంశంతో రూపొందిన తమిళ చిత్రం ‘వేలై ఇల్లా పట్టదారి’. ధనుష్, అమలాపాల్ జంటగా ఆర్. వేల్‌రాజ్ దర్శకత్వంలో రూపొందిన ఈ చిత్రం ఘనవిజయం సాధించింది. ఈ చిత్రం అనువాద హక్కులను శ్రీస్రవంతి మూవీస్ అధినేత రవికిశోర్ దక్కించుకున్నారు.
  
  కృష్ణచైతన్య సమర్పణలో ఈ చిత్రాన్ని ‘రఘువరన్ బీటెక్’ పేరుతో తెలుగులోకి అనువదించారు. ఈ సందర్భంగా రవికిశోర్ మాట్లాడుతూ -‘‘తెలుగు నేటివిటీకి అనుగుణంగా ఉన్న కథ కావడంతో ఇక్కడ విడుదల చేస్తున్నాం. బలమైన కథ, కథనాలు ఉంటాయి. ‘కొలవెరి..’ ఫేం అనిరుధ్ స్వరపరచిన పాటలు ఓ హైలైట్. వచ్చే వారంలో పాటలను, అతి త్వరలో చిత్రాన్ని విడుదల చేయనున్నాం. మా స్రవంతి మూవీస్ నుంచి ఇప్పటివరకు వచ్చిన చిత్రాలు కుటుంబ సమేతంగా చూడదగ్గ విధంగా ఉంటాయి. ఈ చిత్రం కూడా అలానే ఉంటుంది’’ అని చెప్పారు. ఈ చిత్రానికి మాటలు: కిశోర్ తిరుమల, పాటలు: రామజోగయ్య శాస్త్రి