పన్నుల చెల్లింపులో పారదర్శకతకు వాణిజ్యపన్నుల శాఖ కసరత్తు 
  
 సాక్షి, హైదరాబాద్‌: జీఎస్టీ అమలు నేపథ్యంలో పన్ను ఎగవేతలను అరికట్టేందుకు రాష్ట్ర వాణిజ్య పన్నుల శాఖ మొబైల్‌ యాప్‌ను అందుబాటులోకి తేనుంది. బిల్లులు ఇవ్వడం, వాటిని అప్‌లోడ్‌ చేయడంలో కొందరు డీలర్లు పారదర్శకంగా వ్యవహరించడం లేదని గుర్తించిన నేపథ్యంలో ఆ శాఖ ముఖ్య కార్యదర్శి సోమేశ్‌కుమార్‌ ఈ నిర్ణయం తీసుకున్నారు. డీలర్లు పన్నుతో ఒకటి, పన్ను లేకుండా మరొక బిల్లు ఇస్తున్నారని.. రోజువారీ బిల్లుల సంఖ్యను తమ కు అనుకూలంగా మార్చుకుంటున్నారని దృష్టికి వచ్చింది.
 
 గతంలో ఉన్న యాప్‌ ప్రతిపాదనలకు మెరుగులు దిద్ది అందుబాటులోకి తేవాలని నిర్ణయిం చారు. ఈ యాప్‌లో వినియోగదారులు తమ బిల్లులను అప్‌లోడ్‌ చేయవచ్చు. ఎక్కువ బిల్లు వేసినా, బిల్లు ఇవ్వకపోయినా సదరు సమాచారాన్ని యాప్‌ ద్వారా ప్రభుత్వానికి తెలియజేయవచ్చు. బిల్లు అప్‌లోడ్‌ చేసే వినియోగదారులకు లాటరీ పద్ధతిలో ప్రోత్సాహకాలూ ఇవ్వనున్నారు. ఈ ప్రతిపాదనను సీఎంకు పంపారు. ఆయన ఆమోదం లభిస్తే త్వరలోనే ఈ యాప్‌ అందుబాటులోకి వస్తుంది.