చిన్నతనంలో ఎవరినైనా తొండి చేస్తే ఏదో సరదా కోసం అని ఊరుకుంటారు. మరి అదే పెద్దయ్యాక కూడా అలాగే చేస్తే మోసం చేశావంటారు. ఓ యువకుడు తన ప్రేమ విషయంలో ఇలానే ప్రవర్తించాడు. ఆ తర్వాత ఏం జరిగిందనే కథాంశంతో తెరకెక్కుతున్న చిత్రం ‘తొండి’. సందీప్, ప్రియ జంటగా శ్రీకృష్ణ శంకర ప్రొడక్షన్స్ పతాకంపై ప్రసాద్ వెలంపల్లి దర్శకత్వంలో కె. కోటేశ్వరరావు ఈ సినిమా నిర్మిస్తున్నారు. డా. రాజేంద్రప్రసాద్, బ్రహ్మానందం, సంపూర్ణేష్ బాబు, దీక్షాపంత్‌లు కీలక పాత్రలు పోషిస్తున్నారు. ‘‘ఓ వాస్తవ సంఘటన ఆధారంగా ఈ చిత్రాన్ని రూపొందిస్తున్నాం.
 
 కచ్చితంగా అందరినీ అలరించే చిత్రమిది’’ అని దర్శకుడు చెప్పారు. నిర్మాత మాట్లాడుతూ-‘‘మలేసియా, హైదరాబాద్, వైజాగ్‌ల్లోని ఆసక్తికరమైన లొకేషన్స్‌లో చిత్రీకరణ జరిపాం. వచ్చేవారం పాటలను, త్వరలోనే చిత్రాన్ని విడుదల చేస్తాం’’ అని తెలిపారు. ఈ చిత్రానికి కెమెరా:జయరాం, అంజి, బ్యాక్‌గ్రౌండ్ స్కోర్: ‘సాగర్’ మహతి, పాటలు: రెహమాన్, సహనిర్మాత: కె. వంశీధర్.