సాక్షి, సిటీబ్యూరో: కుతుబ్‌షాహీ, ఆసఫ్‌జాహీల పాలనా కాలంలోనే ట్రెజరీ వ్యవస్థ ఉంది. అప్పుడే నగరంలో ఖజానా బిల్డింగుల నిర్మాణం జరిగింది. ఇబ్రహీం కుతుబ్‌షా (1550–80) గోల్కొండ కోటలో ఖజానా బిల్డింగ్‌ నిర్మించగా... రెండో నిజాం నిజామ్‌అలీ 1876లో ఖిల్వత్‌ ప్యాలెస్‌ ఎదుట ఖజానా భవనం నిర్మించాడు. వీటిలో ప్రభుత్వ డబ్బు, విలువైన పత్రాలు, ధాన్యం, ఆభరణాలు తదితర ఉండేవి. ఔరంగజేబు దాడి వరకు గోల్కొండలోని ఖజానా బిల్డింగ్‌ ప్రభుత్వ ఖజానాగానే కొనసాగింది. అనంతరం కుతుబ్‌షాహీల సైన్యం ప్రధాన కార్యాలయంగా మారింది. తర్వాత ఆసఫ్‌జాహీల కాలంలోనూ ఇది అలాగే కొనసాగింది. ఇప్పటికీ ఇది చెక్కుచెదరకుండా ఉంది. ఇందులో మ్యూజియం ఏర్పాటు చేసేందుకు పురావస్తు శాఖ ప్రణాళికలు చేస్తోంది. ఇక ఖిల్వత్‌ ఖజానా భవనం కూల్చివేయగా, స్థలం ట్రెజరీ డిపార్ట్‌మెంట్‌ అధీనంలో ఉంది.


 కోవూరు : రూ.10 కోట్ల నిధులతో జిల్లా ఖజానా నూతన కార్యాలయ భవనం నిర్మించేందుకు ప్రతి పాదనలను ప్రభుత్వానికి పంపినట్లు జిల్లా ఖజానా అధికారి వీ ఉదయలక్ష్మి తెలిపారు. గురువారం కోవూరు ఉప ఖజానా కార్యాలయంలో తనిఖీలు చేశారు. ఆమె మట్లాడుతూ జిల్లాలో రాపూరు, వెంకటగిరి, నాయుడుపేట, పొదలకూరు, డక్కిలి మండలాలకు సంబంధించి ఉప ఖజానా కార్యాలయాలు అద్దె భవనాల్లో కొనసాగుతున్నాయన్నారు. వీటికి సొంత భవనాలు నిర్మించేందుకు కలెక్టర్‌కు నివేదించామన్నారు. ఆయా ప్రాంతాల్లో ఉప ఖజానా కార్యాలయాలు నిర్మించేందుకు ప్రభుత్వ స్థలాలను చూపాలని రెవెన్యూ అధికారులను కోరామన్నారు. ఈ పాస్‌ విధానం రాష్ట్ర్రంలో అమలు చేయాలని పైలెట్‌ ప్రాజెక్ట్‌ కింద సత్తెనపల్లి, కైకలూరు ఉప ఖజాన కార్యాలయాలను ఎంపిక చేశారన్నారు. వివిధ శాఖలకు సంబంధించిన ఉద్యోగులు వేతనాల సమయంలో అధిక సంఖ్యలో పేపర్లు ద్వారా నివేదికలు అందించడంతో జాప్యం జరుగుతుందన్నారు. ఈపాస్‌ విధానం వస్తే పేపర్‌ రహిత కార్యాలయాలుగా తయారు చేయొచ్చునన్నారు. ఆమె వెంట కోవూరు ఎస్టీఓ శ్రీనివాసులు, కార్యాలయ సిబ్బంది ఉన్నారు.