సాక్షి, ముంబై: ఆన్‌లైన్‌ వీడియో గేమ్‌ పబ్జీ పిచ్చి మహారాష్ట్రలో ఇద్దరు యువకులను బలితీసుకుంది. హింగోలి ప్రాంతంలో నాగేశ్‌ గోరే (22), స్వన్నిల్‌ అన్నపూర్ణ (24) అనే ఇద్దరు ఈ ఆటలో మునిగిపోయి ఉండగా వారిని రైలు ఢీకొంది. శనివారం సాయంత్రం ఖటకాళీ బైపాస్‌ వద్ద ఉన్న రైల్వే ట్రాక్‌ దగ్గరకు వీరిద్దరూ మోటర్‌ సైకిల్‌పై వచ్చారు. ట్రాక్‌ పక్కన బైక్‌ను ఉంచి పట్టాలపై కూర్చుని పబ్జీ ఆడసాగారు. ఆటలో నిమగ్నమైన వీరు అజ్మీర్‌–హైదరాబాద్‌ రైలు వస్తున్న విషయాన్ని కూడా గమనించలేదు. రైలు డ్రైవర్‌ హార్న్‌ కొట్టినా పట్టించుకోలేదు. దీంతో వేగంగా దూసుకొచ్చిన రైలు ఇద్దరినీ ఢీ కొంది. అక్కడికక్కడే వారు మరణించారు. ప్రమాదవశాత్తూ సంభవించిన మరణంగా పోలీసులు కేసు నమోదు చేశారు.

పశ్చిమ గోదావరి /వీరవాసరం: రోడ్డు ప్రమాదంలో ఇద్దరు యువకులు శనివారం మృత్యువాత పడ్డారు. వివరాలు ఇలా ఉన్నాయి. వీరవాసరం మండలం రాయకుదురు గ్రామానికి చెందిన దుర్గేష్‌ (25), అత్తిలి మండలం ఉరదాళ్లపాలెంకు చెందిన వివేకానంద (26) మోటార్‌ బైక్‌పై వీరవాసరం–పెనుమంట్ర రహదారిలో వెళుతుండగా నౌడూరు పద్మాలయ కాన్వెంట్‌ సమీపంలో పెనుమంట్ర నుంచి వీరవాసరం వైపు వస్తున్న లోడు ట్రాక్టర్‌ మోటర్‌ బైక్‌ను ఎదురుగా ఢీకొట్టింది. ప్రమాద ఘటనా స్థలంలో ఇద్దరూ అక్కడికక్కడే మృతి చెందారు. ట్రాక్టర్‌ చక్రాల కింద పడి మృతదేహాలు నుజ్జయ్యాయి.  సమాచారం అందుకున్న పోలీసులు ఘటనా ప్రాంతానికి వెళ్లి పరిశీలించి మృతదేహాలను పోస్ట్‌మార్టం నిమిత్తం భీమవరం ప్రభుత్వాసుపత్రికి తరలించారు. కేసు నమోదు చేసి దర్యాప్తు చేస్తున్నామని వీరవాసరం ఎస్సై ఎన్‌.శ్రీనివాసరావు తెలిపారు. దుర్గేష్‌ కుటుంబం చింతలపూడి నుంచి గత కొంతకాలం క్రితం రాయకుదురు వచ్చి స్థిరపడ్డారు. దుర్గేష్‌ ప్రస్తుతం ప్రైవేట్‌ రైస్‌మిల్లులో గుమస్తాగా పనిచేస్తున్నాడు. అతడికి తల్లిదండ్రులతో పాటు, సోదరి ఉంది. వివేకానంద కొమ్మర సొసైటీలో తాత్కాలిక ఉద్యోగిగా పనిచేస్తున్నాడు. దుర్గేష్, వివేకానంద వరుసకు అన్నదమ్ములు. రాయకుదురులో ఉన్న బంధువుల ఇంటి నుంచి పొలమూరిలో ఉన్న బంధువుల ఇంటికి కలిసి వెళుతుండగా ఈ ప్రమాదం చోటు చేసుకుంది.  


 పెండ్లిమర్రి(వైఎస్సార్‌జిల్లా): వైఎస్సార్‌ కడప జిల్లాలో విషాదం చోటుచేసుకుంది. రోడ్డు పై నుంచి నడుచుకుంటూ వెళ్తున్న పెళ్లి బృందంపైకి టిప్పర్‌ దూసుకెళ్లడంతో.. ఇద్దరు మృతిచెందగా.. మరో ఆరుగురికి తీవ్ర గాయాలయ్యాయి. ఈ సంఘటన జిల్లాలోని పెండ్లిమర్రి మండలం వెల్లటూరు గ్రామంలో ఆదివారం ఉదయం చోటుచేసుకుంది.
 
 వేగంగా వెళ్తున్న టిప్పర్‌ అదుపుతప్పి పెళ్లి బృదం పైకి దూసుకెళ్లడంతో.. ఇద్దరు అక్కడికక్కడే మృతిచెందారు. మృతుల్లో ఓ గర్భిణి ఉంది. ఇది గుర్తించిన స్థానికులు క్షతగాత్రులను ఆస్పత్రికి తరలించి పోలీసులకు సమాచారం ఇచ్చారు. కేసు దర్యాప్తు చేస్తున్నారు.