శ్రీలంక వెళ్లాలని భావిస్తున్న సూపర్‌స్టార్‌ రజినీకాంత్‌కు ఆ దేశం వీసా నిరాకరించిందనే వార్తలు కొద్ది రోజులుగా ప్రచారంలో ఉన్నాయి. కొన్ని అనివార్య కారణాల వల్ల శ్రీలంక ప్రభుత్వం ఆ నిర్ణయం తీసుకుందని వాటి సారాంశం. అయితే ఆ వార్తలను శ్రీలంక ప్రధాని మహిందా రాజపక్స తనయుడు నమల్‌ రాజపక్స కొట్టిపారేశారు. రజనీకాంత్‌కు శ్రీలంక ప్రభుత్వం వీసా నిరాకరించిందనడంలో ఏ మాత్రం నిజం లేదని స్పష్టం చేశారు. రజినీ సినిమాలకు తను పెద్ద అభిమానినని తెలిపారు. ఈ మేరకు ఆయన ట్విటర్‌లో ఓ పోస్ట్‌ చేశారు.  ‘ప్రముఖ నటుడు రజినీకాంత్‌కు శ్రీలకం ప్రభుత్వం వీసా నిరాకరించదనేది కేవలం రూమర్‌ మాత్రమే. శ్రీలంకలోని ప్రజల మాదిరిగానే నేను, మా నాన్న రజినీకాంత్‌ సినిమాలకు చాలా పెద్ద అభిమానులం. ఒకవేళ ఆయన మా దేశాన్ని సందర్శించుకోవాలంటే ఎలాంటి అవాంతరాలు ఉండబోవని’ చెప్పారు. అయితే కొద్ది రోజుల క్రితం శ్రీలంక నార్తర్న్‌ ప్రొవిన్స్‌ మాజీ ముఖ్యమంత్రి సీవీ విఘ్నేశ్వరన్ రజనీకాంత్‌ను కలిసిన సంగతి తెలిసిందే. ఈ సందర్భంగా శ్రీలంకలోని తమిళుల సమస్యలను ఆయన రజినీకాంత్‌తో చర్చించారు. ఈ భేటీ అనంతరం రజనీకాంత్‌ తమ దేశం రావాల్సిందిగా ఆహ్వానించారు. కాగా, ఇటీవల విడుదలైన రజనీకాంత్‌ దర్బార్‌ చిత్రం మంచి విజయం సాధించిన సంగతి తెలిసిందే. ప్రస్తుతం ఆయన సన్‌ పిక్చర్స్‌ బ్యానర్‌లో ‘తలైవార్‌ 168’ చిత్రంలో నటిస్తున్నారు. 


 శ్రీలంక ఉత్తరాది రాష్ట్రంలో ఘనవిజయం సాధించిన ప్రధాన తమిళ రాజకీయ పార్టీ ప్రభుత్వంతో కలసి పనిచేసేందుకు సుముఖత వ్యక్తం చేసింది. ఈ ప్రాంతంలో ఎల్టీటీఈ ప్రాబల్యం తగ్గాక 25 ఏళ్ల అనంతరం నిర్వహించిన ఎన్నికల్లో తమిళ్ నేషనల్ అలయెన్స్ (టీఎన్ఏ) సత్తచాటింది. నార్తర్న ప్రావిన్సియల్ కౌన్సిల్ (ఎన్పీసీ) ముఖ్యమంత్రిగా సి.వి.విఘ్నేశ్వరన్ ఎన్నికకావడం లాంఛనమే. తమిళుల ప్రాబల్యం ఎక్కువగా ఉన్న ఈ ప్రాంతంలో సమస్యల పరిష్కారానికి ప్రభుత్వంతో కలసి తమ పార్టీ పనిచేస్తుందని ఆయన చెప్పారు.
 
 ఐతే ప్రభుత్వంలో తాము చేరబోమని విఘ్నేశ్వరన్ స్పష్టం చేశారు. కౌన్సిల్ ప్రమాణ స్వీకారం చేశాక రాష్ట్రంలో పోలీసుల అధికారాలు, భూ సమస్యల గురించి చర్చించనున్నట్టు తెలిపారు. ఎన్నికల్లో టీఎన్ఏకు తమిళులు మూకుమ్మడిగా మద్దతు పలికారు. 38 స్థానాలకు గాను టీఎన్ఏ 30 సీట్లు గెలుచుకుంది. జాఫ్నాలో పోటీచేసిన విఘ్నేశ్వరన్కు లక్షా 30 వేలకు పైగా ఓట్లు పడ్డాయి. కాగా శ్రీలంకలో యూపీఎఫ్ఏ అధికారంలో ఉంది. అధ్యక్షుడు మహీందా రాజపక్సే ఈ పార్టీకి సారథ్యం వహిస్తున్నారు.