న్యూఢిల్లీ: లిస్టెడ్ సంస్థల బోర్డుల్లో కనీసం ఒక్క మహిళా డెరైక్టరయినా ఉండాలన్న నిబంధన అమలుకి గడువు దగ్గరపడుతున్నా చాలా మటుకు కంపెనీలు ఇప్పటిదాకా ఈ దిశగా ఎటువంటి చర్యలు తీసుకోలేదు. ఇలాంటి కంపెనీలు దాదాపు 904 ఉన్నాయి. ఎన్‌ఎస్‌ఈలో లిస్టయిన 1,492 కంపెనీల్లో ఇది దాదాపు 62 శాతం. ఇక మరికొన్ని కంపెనీల్లో నియమితులైన డెరైక్టర్లలో చాలా మంది ప్రమోటరు గ్రూపునకు చెందిన వారే కావడం గమనార్హం.
 
  ఎన్‌ఎస్‌ఈ, ప్రైమ్ డేటాబేస్ సంస్థలు కలిసి ఏర్పాటు చేసిన ఇండియాబోర్డ్స్‌డాట్‌కామ్ డేటాబేస్ ఈ గణాంకాలను విడుదల చేసింది. జూన్ 30 దాకా అందుబాటులో ఉన్న డేటాను బట్టి చూస్తే వచ్చే మూడు నెలల్లో రోజుకు 10 మంది డెరైక్టర్ల నియామకం జరగాల్సి ఉంటుంది. లిస్టెడ్ కంపెనీల బోర్డుల్లో కనీసం ఒక్క మహిళా డెరైక్టరయినా ఉండేలా చూసే దిశగా కొత్త కంపెనీల చట్టం, సెబీ నిర్దేశించిన నిబంధనలు అక్టోబర్ 1 నుంచి అమల్లోకి రానున్న సంగతి తెలిసిందే. కొన్ని కంపెనీల్లో ప్రమోటర్ల కుటుంబాలకు చెందిన మహిళలనే డెరైక్టర్లుగా తీసుకోవడంతో ఈ నిబంధన ప్రధాన లక్ష్యమే దెబ్బతినే అవకాశం ఉందని ప్రైమ్ డేటాబేస్ ఎండీ పృథ్వి హల్దియా అభిప్రాయపడ్డారు. ఈ డెరైక్టర్లు ప్రమోటరు బాణీనే వినిపిస్తారు కనుక.. స్వతంత్ర డెరైక్టర్లుగా వ్యవహరించలేరని పేర్కొన్నారు.
 
 ఇండియన్‌బోర్డ్స్‌డాట్‌కామ్ నివేదికలో మరికొన్ని విశేషాలు ఇవి..
 ఈ ఏడాది ఫిబ్రవరిలో సెబీ నిబంధనలను ప్రకటించిన తర్వాత నుంచి నాలుగున్నర నెలల వ్యవధిలో నికరంగా 78 కంపెనీలు మాత్రమే మహిళా డెరైక్టర్ల నియామకం జరిపాయి. 80 పదవుల్లో 74 మందిని తీసుకున్నాయి. కొందరు రెండు పైగా కంపెనీల్లో డెరైక్టర్లుగా నియమితులయ్యారు.
 
  74 మందిలో 59 మంది తొలిసారిగా ఈ హోదా చేపట్టారు. వీరిలో 15 మంది ప్రమోటరు గ్రూప్‌నకు చెందిన వారు.
 
  అపోలో హాస్పిటల్స్ ఎంటర్‌ప్రైజ్‌లో అత్యధికంగా నలుగురు మహిళా డెరైక్టర్లు ఉన్నారు. వీరిలో స్వతంత్రులెవరూ లేరు. ఇక, ఇతర సంస్థల్లో ప్రమోటర్ కుటుంబానికి చెందిన వారిలో నీతా అంబానీ (రిలయన్స్ ఇండస్ట్రీస్ చైర్మన్ ముకేశ్ అంబానీ సతీమణి) కూడా ఉన్నారు.
 
 ఎన్‌ఎస్‌ఈలో లిస్టయిన కంపెనీల్లోని 11,527 డెరైక్టర్ పదవుల్లో 8,987 మంది కొనసాగుతున్నారు. వీరిలో కేవలం 673 పదవుల్లో మాత్రమే మహిళలు ఉన్నారు.


 తమిళ సినిమా : ప్రస్తుతం మహిళలు అన్ని రంగాల్లోనూ పురుషులకు దీటుగా ఎదుగుతున్నారు.  అయితే సినిమా రంగంలో ప్రధాన శాఖ అయిన దర్శకత్వంలో మహిళ ప్రతిభ మెరుగు పడాల్సి ఉంది. మెగాఫోన్ పట్టడంలో ప్రతిభను కనబరచలేకపోతున్నారు. అయితే ఈ శాఖలో సాధించిన వారు కూడా కొందరు ఉన్నారు. ప్రఖ్యాత దివంగత నటీమణులు టి.పి.రాజ్యలక్ష్మి, అష్ఠావధాని పి.భానుమతి రామకృష్ణ, మహానటి సావిత్రి, గిన్నిస్ రికార్డు సాధించిన విజయ నిర్మల వంటి వారు దర్శకులుగా ఎంతగానో సాధించి నేటితరం మహిళలకు స్ఫూర్తిగా నిలిచారు. అయితే ఆ తరువాత తరం మహిళా దర్శకులు మాత్రం అంతగా రాణించలేకపోతున్నారు. సీనియర్ నటీమణులు లక్ష్మీ, శ్రీప్రియ, జయదేవి తదితరులు దర్శకత్వ రంగంలో సాధించడానికి కృషి చేస్తూనే ఉన్నారు. కొందరు మాత్రం ఊహించిన విజయాలు అందకపోవడంతో మెగాఫోన్‌కు దూరమయ్యారు. మరి కొందరు మాత్రం అందులో సక్సెస్ కోసం పోరాడుతూనే ఉన్నారు.
  
  సీనియర్ నటీమణులు సుహాసిని ఇందిరా చిత్రంతో, రేవతి మిత్రామై ఫ్రెండ్‌తో, సుష్మా అహుజా ఉయిరుక్కు ఉయిరాగ చిత్రాలతో దర్శకత్వ రంగంలోకి ప్రవేశించినా ఆ చిత్రాలు అంతగా విజయం సాధించకపోవడంతో దర్శకత్వానికి స్వస్తి చెప్పారు. మరి కొందరు మహిళలు కూడా ఇలాంటి నిరాశకు గురయ్యారు. అనితా ఉదిప్ (కుళిర్ 100 డిగ్రీ), రేవతి ఆరు, (జూన్ ఆరు), జానకి విశ్వనాథన్ (కుట్టి), శారదా రామనాథన్ (సింగారం), ప్రియ.వి (కండనాళ్ ముదల్), మధుమిత  (వల్లమైతారాయో), సుధ (ద్రోహి), అంజనా (వెప్పం), జె.ఎస్. నందిని (తిరు తిరు తురు తురు) వంటి దర్శకుల్లో చాలా మంది మరో ప్రయత్నం చెయ్యలేకపోయారు.
  
  కార ణం ఆ చిత్రాలు విజయాలకు చేరువకాలేకపోవడమే. శారదా విశ్వనాథన్ దర్శకత్వం వహించిన తాజా చిత్రం పుదియ తిరుపుంగళ్ నిర్మాణ కార్యక్రమాలు పూర్తి చేసుకుని చాలా కాలం అయినా విడుదలకాలేదు. కన్నామూచ్చి ఏనడా చిత్రం తరువాత ప్రియ.వి, కొలకొలయా ముం దిరికా చిత్రం తరువాత మధుమిత తదుపరి ప్రయత్నం చెయ్యలేదు. అదే విధంగా తన కొడుకును హీరోగా పరిచయం చేస్తూ నాన్ ఎన్నుళ్ ఇల్లై చిత్రాన్ని తెరకెక్కించిన సీనియర్ నటి జయచిత్ర ఇప్పటి వరకు మరో చిత్రం చెయ్యలేదు. అలాగే నందకి చిత్ర దర్శకురాలు విజయ పద్మ, చట్టం ఒరు ఇరుట్టరై (రీమేక్) దర్శకురాలు స్నేహ ప్రింటో, చంద్ర చిత్ర దర్శకురాలు రూపా అయ్యర్ తొలి ప్రయత్నంతోనే సరిపెట్టుకున్నారు.
  
    మరో ప్రయత్నం
  కేరెక్టర్ ఆర్టిస్ట్‌గా మంచి పేరు తెచ్చుకున్న లక్ష్మీ రామకృష్ణన్ ఆరోహణం చిత్రంతో దర్శకురాలిగా మెగాఫోన్ పట్టారు. ఆ చిత్రం పలువురి ప్రశంసలు పొందడంతో ప్రస్తుతం నెరింగి వా ముత్తమిడాదే చిత్రాన్ని తెరకెక్కిస్తున్నారు. 3 చిత్రంతో మెగా ఫోన్ పట్టిన రజనీకాంత్ పెద్దకూతురు నటుడు ధనుష్ భార్య ఐశ్వర్య ఆ చిత్రం ఆశించిన విజయం సాధించకపోయినా అనూహ్య ప్రాచుర్యం పొందింది. ప్రస్తుతం గౌతమ్ కార్తిక్ హీరోగా వై రాజా వై చిత్రానికి దర్శకత్వం వహిస్తున్నారు. ఇక ఆమె సోదరి సౌందర్య తన తండ్రి సూపర్ స్టార్ రజనీకాంత్ హీరోగా కోచ్చడయాన్ చిత్రాన్ని తెరకెక్కించారు. మోషన్ క్యాప్చరింగ్ టెక్నాలజీతో 3డి ఫార్మెట్‌లో రూపొందిన ఈచిత్రం సక్సెస్ సాధించింది. ఇప్పుడు ఈ చిత్రానికి సీక్వెల్ తెరకెక్కిస్తానంటున్నారామే. అలాగే యువ నిర్మాత, నటుడు ఉదయనిధి స్టాలిన్, భార్య కృతిక తొలి ప్రయత్నంగా వడ చెన్నై చిత్రాన్ని తెరపై ఆవిష్కరించారు. ఈ చిత్రం మంచి రిజల్ట్‌నే సాధించడంతో ఆమె మరో ప్రయత్నం చేయడానికి సిద్ధం అవుతున్నారు. నటి అంబికా కూడా మలయాళంలో ఒక చిత్రానికి దర్శకత్వం వహించారు. ఇప్పుడా చిత్రాన్ని నిళరు పేరుతో తమిళంలోకి అనువాదం చేస్తున్నారు.
  
     సక్సెస్ కోసం..
  దర్శకురాలిగా అవతారమెత్తి సక్సెస్ కోసం వేచి ఉన్న నటీమణుల్లో నటి రోహిణి, బృందా దాస్, షకిల్ తదితరులు ఉన్నారు. నటి రోహిణి అప్పావిన్ మీసై చిత్రాన్ని తెరకెక్కిస్తున్నారు. బృందాదాస్ హాయ్ చిత్రానికి దర్శకత్వం వహిస్తున్నారు. శృంగార తార షకీలా తెలుగు చిత్రానికి దర్శకత్వం వహిస్తున్నారు. వీరితోపాటు బాలీవుడ్ నృత్య దర్శకురాలు, నటుడు ప్రకాష్ రాజ్ భార్య అయిన బోనివర్మ, నటి ఐశ్వర్య, నటుడు విష్ణువిశాల్ అర్ధాంగి రజిని నటుడు పార్తిపన్ కూతురు కీర్తన, నటి సిమ్రాన్, బేబి షాలిని తదితరులు త్వరలో మెగా ఫోన్ పట్టడానికి రెడీ అవుతున్నారు.
  
  ఇలా పలువురు మహిళలు దర్శకత్వంపై ఆసక్తి చూపుతున్నా, సరైన సక్సెస్‌లను రాబట్టుకోలేకపోతున్నారు. అం దుకు కారణం ప్రస్తుతం సినిమా ఖర్చు కోట్లు దాటింది. అలా పెట్టిన పెట్టుబడిని తిరిగి రాబట్టుకోవాలంటే కమర్షియల్ చిత్రాల వల్లే సాధ్యం అవుతుంది. అలాంటి ఫార్ములా చిత్రాలను మహిళా దర్శకత్వంలో సాధ్యమా? అనే ప్రశ్న తలెత్తుతోందని ఎవరయినా ఆ విధంగా చిత్రం చేసి విజయం సాధిస్తే మహిళా దర్శకుల సంఖ్య మరింత పెరుగుతుందని సినీ విశ్లేషకులు అభిప్రాయపడుతున్నారు.