చెల్లెలి చిత్రం అక్కకు తెగ నచ్చేసిందట. ఈ సోదరి ద్వయం ఎవరన్నది ప్రత్యేకంగా చెప్పనక్కర్లేదు. ఒక నాటి అందాల తార రాధ పుత్రికలు కార్తీక, తులసి. నటి తులసి తొలి చిత్రం కడల్ ఆమెను నిరాశ పరిచింది. అయినా యాన్ అనే చిత్రంలో నటించే అవకాశం వచ్చింది. జీవా సరసన నటించిన ఈ చిత్రంపై తులసి చాలా ఆశలు పెట్టుకుంది. ప్రముఖ ఛాయాగ్రహకుడు రవి కె చంద్రన్ దర్శకత్వం వహించిన ఈ చిత్రాన్ని ఆర్‌ఎస్ ఇన్ఫోటెంట్ పతాకంపై ఎల్‌రెడ్ కుమార్, జయరామన్ నిర్మించారు.
  
  ఈ చిత్రం ఇటీవల తెరపైకి వచ్చింది. దీనిన తులసి అక్క కార్తీక విడుదల సమయంలో చూడలేదట. ఆమె పొరంబొక్కు చిత్రంతో పాటు తెలుగులో అల్లరినరేష్‌తో నటిస్తున్న చిత్ర షూటింగుల్లో బిజీగా ఉందట. షూటింగ్ షెడ్యూల్స్ పూర్తి చేసుకుని ముంబయి చేరుకున్న కార్తీక చెల్లి తులసి నటించిన యాన్ చిత్రం చూడాలని తహతహ లాడిందట. ఈ చిత్రం మంబయిలో విడుదల కాలేదు. త్వరలో అనువాదమై రిలీజ్ అవుతుందట. దీంతో కార్తీక చెల్లెలు తులసిని తీసుకుని తన సొంత ఊరైన కేరళ రాష్ట్రం త్రివేండ్రం వెళ్లి యాన్ చిత్రాన్ని తిలకించింది. తన గెస్ట్‌హౌస్‌లో స్టాఫ్‌తో సహా యాన్ చిత్రాన్ని ఏకంగా రెండుసార్లు చూసిందట. చిత్రం ఆమెకు అంతగా నచ్చేసిందట. ఈ విషయం గురించి నటి తులసి చెబుతూ తన చిత్రం చూసిన అక్క తన ను గట్టిగా కౌగిలించుకుని ముద్దాడిందని చెప్పింది.
  


 సాంకేతిక ప్రేమ
 
  ప్రేమికుడు అంటే పదహారేళ్ల తర్వాత పరిచయం అయ్యేవాడా! ప్రాయంలోకి వచ్చాక ప్రియమైన అనుభూతులను అందించే వాడా! దాదాపుగా ప్రపంచంలోని ప్రతి ప్రేమికుడూ ఇలాగే ఉంటాడేమో! అయితే తాను దానికి భిన్నంగా ఉండాలని అనుకొన్నాడు వాన్. చైనాకు చెందిన ఈ ప్రేమికుడు తన ప్రియురాలికి ఒక అరుదైన బహుమతిని ఇచ్చాడు.
 
  యాన్ ఫొటోషాప్ నిపుణుడు. అందులోని తన నైపుణ్యాన్ని ఉపయోగించుకొని తన ప్రియురాలికి సర్‌ప్రైజ్‌ను ఇచ్చాడు అతడు. యాన్ తన ప్రియురాలి చిన్నప్పటి ఫొటోలను అడిగి తీసుకొన్నాడు. వాటిని స్కాన్ చేసి తన కంప్యూటర్‌లో ఫొటోషాప్ టెక్నిక్స్ ద్వారా చిన్న మాయ చేశాడు. ప్రియురాలు చిన్నప్పటి ఫొటోల్లో తను కూడా ఉన్నట్టుగా భ్రమింపజేశాడు. ఇతడి ఫొటోషాప్‌లో ఎంత సహజత్వం ఉందంటే... అవి ఫోటోషాప్ ట్రిక్స్ అంటే ఎవ్వరూ నమ్మలేరు. దాదాపు 15 యేళ్ల కిందట తీసిన ఫోటోల్లో తన లేటెస్ట్‌స్టిల్స్‌ను ఒదిగిపోయేలా చేశాడు యాన్.
 
  తన ప్రియురాలు చిన్నారిగా ఉన్నప్పుడు తను ఆమె పక్కనే ఉన్నట్టుగా, ఫొటోల్లోని సహజత్వం దెబ్బతినకుండా అతడు ఫొటోషాప్ ద్వారా మాయ చేయడం చాలామందిని అబ్బురపరుస్తోంది. ఈ విధంగా ఆమె బాల్యంలోకి చొరబడి ఒక అరుదైన గిఫ్ట్‌ను అందించాడు యాన్. ఈ ఫోటోలను చూసి అతడి ప్రియురాలు తెగమురిసిపోతోందని ప్రత్యేకంగా చెప్పనక్కర్లేదు.