అమెరికాలో విమాన ప్రమాదం.. 67 మంది దుర్మరణం

అమెరికాలోని వాషింగ్టన్ డీసీలో విమాన ప్రమాదం  చోటుచేసుకుంది. అమెరికన్ ఎయిర్‌లైన్స్(American Airlines) ఫ్లైట్ 5342,  బ్లాక్ హాక్ హెలికాప్టర్ విమానాశ్రయం సమీపంలో ఢీకొంది. ఈ ఘటనలో  67 మంది దుర్మరణం చెందారు. విమానంలో ప్రయాణిస్తున్న 64 మంది, హెలికాప్టర్‌లో ఉన్న ముగ్గురు మృతి చెందారు. రోనాల్డ్ రేగన్ వాషింగ్టన్ నేషనల్ ఎయిర్‌పోర్ట్ సమీపంలో ఉన్న పొటోమాక్ నదిపై ఈ  ఉదంతం చోటుచేసుకుంది. 

విమానం-హెలికాప్టర్‌లు నది పైనుంచి వెళుతున్న సమయంలో ఈ ఘోరం జరిగింది. విమానాన్ని హెలికాప్టర్‌ ఢీకొట్టడంతో ఒక్కసారిగగా మంటలు వ్యాపించి నదిలో పడిపోయాయి.  

విమానం-హెలికాప్టర్‌ ఢీకొన్న సమాచారం అందుకున్న అగ్నిమాపక సిబ్బంది ప్రమాద స్థలానికి  చేరుకుని సహాయ చర్యలు చేపట్టారు. సోషల్ మీడియాలో ఇందుకు సంబంధించిన వీడియోలు వైరల్‌గా మారాయి. రేగన్ ఎయిర్‌పోర్ట్‌లో ల్యాండింగ్ సమయంలో విమానం- హెలికాప్టర్‌ను(aircraft incident) ఢీకొన్న దృశ్యాలు దీనిలో స్పష్టంగా కనిపించాయి. విమానాశ్రయంలో అన్ని విమానాల టేకాఫ్‌లు, ల్యాండింగ్‌లను తాత్కాలికంగా నిలిపివేశారు.

VIDEO OF CRASH

A video showing the crash between a Blackhawk helicopter and American Airlines flight below.

pic.twitter.com/fqYlUTqXD3

— Life Lessons Academy (@LifeLessonsAcad) January 30, 2025

పెరిగిన విమాన ప్రమాదాలు.. అన్నీ ఈ నెలలోనే..
ఇటీవలి కాలంలో విమాన ప్రమాదాలు తరచూ చోటుచేసుకుంటున్నాయి. వాతావరణంలో మార్పులు, సాంకేతిక లోపాలు వీటికి కారణంగా నిలుస్తున్నాయి. ఇటీవల జరిగిన కొన్ని విమాన ప్రమాదాలు..

హియాలియా (ఫ్లోరిడా) 
2025, జనవరి 25న ఇంజిన్‌లో తలెత్తిన సమస్య కారణంగా సెస్నా 172 విమానం హియాలియా సమీపంలోని ఎవర్‌గ్లేడ్స్‌లో ఒక మట్టి రోడ్డుపై కూలిపోయింది. ఈ విమాన ప్రమాదంలో ఇద్దరు మృతిచెందారు. ఈ ఘటనపై ఎఫ్‌ఏఏ దర్యాప్తు(FAA investigation) చేస్తోంది.

నెవార్క్ (న్యూజెర్సీ) 
2025, జనవరి 25న విమానం డెక్‌లో అగ్ని ప్రమాదం చోటుచేసుకుంది. దీంతో యునైటెడ్ ఎయిర్‌లైన్స్ విమానం 2143.. నెవార్క్ లిబర్టీ అంతర్జాతీయ విమానాశ్రయానికి సురక్షితంగా తిరిగి వచ్చింది.

ఎలోయ్ (అరిజోనా) 
2025, జనవరి 24న, ఎలోయ్ మున్సిపల్ విమానాశ్రయం సమీపంలో స్కైడైవింగ్  చేస్తున్నప్పుడు ప్రమాదం చోటుచేసుకుంది.

క్లీవ్‌ల్యాండ్ (ఒహియో) 
2025, జనవరి 24న, డెన్వర్ అంతర్జాతీయ విమానాశ్రయం నుండి టేకాఫ్‌ అయిన యునైటెడ్ ఎయిర్‌లైన్స్ విమానం 621 టైర్‌ పేలిపోయింది. దీంతో ఈ విమానం క్లీవ్‌ల్యాండ్ హాప్కిన్స్ అంతర్జాతీయ విమానాశ్రయంలో సురక్షితంగా ల్యాండ్ అయింది.

మయామి (ఫ్లోరిడా)
2025 జనవరి 24న క్యాబిన్‌లో విద్యుత్ కాలిన వాసన వచ్చిందని సిబ్బంది  గుర్తించడంతో అమెరికన్ ఎయిర్‌లైన్స్ విమానం 1300 మయామి అంతర్జాతీయ విమానాశ్రయానికి సురక్షితంగా తిరిగి వచ్చింది.

కొలంబియా (కాలిఫోర్నియా)
2025, జనవరి 23న సెస్నా 172 విమానం కొలంబియాలోని ఒక పొలంలో కూలిపోయింది. ఈ ఘటనలపై ఎఫ్‌ఏఏ దర్యాప్తు చేస్తోంది.