గవర్నర్‌వి చిన్న పిల్లల చేష్టలు: సీఎం స్టాలిన్‌

చెన్నై:  తమిళనాట అటు ప్రభుత్వానికి ఇటు గవర్నర్‌కు ఏమాత్రం పొసగడం లేదు. వారి మధ్య ప్రతీ విషయం అగ్గి రాజేస్తే భగ్గుమన్న చందంగానే తయారైంది. ఇటీవల తమిళనాడు అసెంబ్లీ సమావేశాలు ప్రారంభమైన వేళ.. గవర్నర్‌ ఆర్‌ఎన్‌ రవి సభ నుంచి ఉన్న పళంగా వాకౌట్‌ చేశారు. దీనిపై తమిళనాడు సీఎం ఎంకే స్టాలిన్‌ మరోసారి మండిపడ్డారు. ఆ రోజు అసెంబ్లీ నుంచి గవర్నర్‌ వెళ్లిపోయి రూల్స్‌ను అతిక్రమించిన క్రమం కూడా  ఒక ప్రణాళిక బద్ధకంగా జరిగిందని విమర్శించారు.

శుక్రవారం(జనవరి 10వ తేదీ) తమిళనాడు అసెంబ్లీ సమావేశాల్లో భాగంగా సీఎం స్టాలిన్‌ మాట్లాడుతూ..  గవర్నర్‌ ఆర్‌ఎన్‌ రవి సభను వాకౌట్‌ చేసిన సంగతిని గుర్తు చేసుకున్నారు. అలా వెళ్లిపోవడం నిజంగా చిన్న పిల్లల చేష్టల వలే ఉంది. రాష్ట్ర అభివృద్ధిని గవర్నర్‌ జీర్ణించుకోలేకపోతున్నారని ఆరోపించారు. గవర్నర్‌గా ఆర్‌ఎన్‌ రవి వచ్చిన దగ్గర్నుంచీ చూస్తూ తమిళనాడు రాష్ట్ర అసెంబ్లీలో గత కొన్నేళ్లుగా వింత వింత పరిణామాలు చోటు చేసుకుంటున్నాయి.

అసలు గవర్నర్‌ అసెంబ్లీకి ఎందుకొచ్చారో.. ఎందుకు వెళ్లిపోయారో అర్థం కావడం లేదననారు. ఈ విషయం ఎందుకు చెప్పాల్సివస్తుందంటే ఆయన చేష్టలు చిన్న పిల్లల మాదిరిగా ఉన్నాయనే విషయాన్ని గుర్తు చేస్తున్నానని ఉద్ఘాటించారు.

కాగా, జనవరి 6వ తేదీన అసెంబ్లీకి హాజరైన గవర్నర్‌ ఆర్‌ఎన్‌ రవి.. ఎటువంటి సమాచారం లేకుండా వాకౌట్‌ చేశారు. అయితే ఈ విషయాన్ని తమిళనాడు రాజ్‌భవన్‌ తర్వాత ప్రకటించింది. గవర్నర్‌ రవి అసెంబ్లీ నుంచి బయటకు వచ్చేయడాన్ని సమర్థించుకుంది. జాతీయ గీతాన్ని రాష్ట్ర అసెంబ్లీలో  ఆలపిస్తారు. అది జరగలేదని, అందుకే గవర్నర్‌ ఎటువంటి సమాచారం లేకుండా వచ్చేశారని స్పష్టం చేసింది రాజ్‌భవన్‌.

రాజ్యాంగంలోని ఆర్టికల్‌ 176 ప్రకారం అసెంబ్లీ సెషన్‌ ప్రారంభమైనప్పుడు గవర్నర్‌ అసెంబ్లీకి వచ్చి తన ప్రసంగాన్ని ఇవ్వాలి.  ముందు రాష్ట్ర గీతాన్ని ఆలపించిన తర్వాత చివర్లో జాతీయ గీతాన్ని ఆలపించడం జరుగుతూ ఉంటుంది.