IPL 2022 DC Vs KKR Records: ఢిల్లీని ఢీకొట్ట‌నున్న కేకేఆర్‌.. పంత్‌పై శ్రేయ‌స్ ప్ర‌తీకారం తీర్చుకునేనా..?

photo courtesy: IPL

ఐపీఎల్ 2022 సీజ‌న్‌లో ఢిల్లీ క్యాపిట‌ల్స్‌, కోల్‌క‌తా నైట్‌రైడ‌ర్స్ జ‌ట్లు రెండోసారి ఎదురెదురుప‌డ‌నున్నాయి. వాంఖ‌డే వేదిక‌గా ఇరు జ‌ట్లు ఇవాళ (ఏప్రిల్ 28) మ‌రోసారి త‌ల‌ప‌డ‌నున్నాయి. ఈ మ్యాచ్ రాత్రి 7:30 గంట‌ల‌కు ప్రారంభంకానుంది. సీజ‌న్ తొలి అర్ధ భాగంలో ఈ ఇరు జ‌ట్లు ఏప్రిల్ 10న తొలిసారి ఎదురెదురుప‌డ‌గా, ఆ మ్యాచ్‌లో ఢిల్లీ క్యాపిట‌ల్స్ స‌మిష్టిగా రాణించి కేకేఆర్‌పై 44 ప‌రుగుల తేడాతో ఘ‌న విజ‌యం సాధించింది. నాటి మ్యాచ్‌లో ఢిల్లీ చేతిలో ఎదురైన ప‌రాభ‌వానికి శ్రేయ‌స్ సేన నేడు ప్ర‌తీకారం తీర్చుకోవాల‌ని ప‌ట్టుద‌ల‌గా ఉంది. 

ఢిల్లీ జ‌ట్టు ఇప్ప‌టివ‌ర‌కు ఆడిన 7 మ్యాచ్‌ల్లో 3 విజ‌యాలు 4 ప‌రాజ‌యాల‌తో పాయింట్ల ప‌ట్టిక‌లో ఏడో స్థానంలో ఉండ‌గా, కేకేఆర్ 8 మ్యాచ్‌ల్లో 3 విజ‌యాలు 5 అప‌జ‌యాల‌తో 8వ‌ స్థానంలో నిలిచింది. ఈ మ్యాచ్‌లో గెలిచే జ‌ట్టు ప్లే ఆఫ్స్ రేసులో ముందుకు వెళ్ల‌నుండ‌గా, ఓడిన జ‌ట్టు ప్లే ఆఫ్స్ అవ‌కాశాల‌ను సంక్లిష్టం చేసుకోనుంది. 

రాజస్థాన్ రాయల్స్‌తో ఉత్కంఠ‌భ‌రితంగా  సాగిన త‌మ చివ‌రి మ్యాచ్‌లో ఢిల్లీ క్యాపిటల్స్..చివరి ఓవర్ వ‌ర‌కు పోరాడి ఓట‌మిపాల‌వ్వ‌గా, కేకేఆర్ గత 4 మ్యాచ్‌ల్లో అప‌జ‌యాల‌ను ఎదుర్కొని ఢీలా ప‌డిపోయింది. గుజరాత్ టైటాన్స్‌తో జరిగిన చివ‌రి మ్యాచ్‌లో రసెల్ చెలరేగినా.. కేకేఆర్ గెలవలేకపోయింది. ఇక ఇరు జ‌ట్ల మ‌ధ్య హెడ్ టు హెడ్ రికార్డ్స్ విష‌యానికొస్తే.. క్యాష్ రిచ్ లీగ్‌లో ఇప్ప‌టివ‌ర‌కు ఇరు జ‌ట్లు మొత్తం 31 మ్యాచ్‌ల్లో ఎదురెదురుప‌డ‌గా.. కేకేఆర్ 16, డీసీ 14 మ్యాచ్‌ల్లో విజ‌యాలు సాధించాయి.  

ఢిల్లీ క్యాపిటల్స్ తుది జ‌ట్టు (అంచ‌నా): పృథ్వీ షా, డేవిడ్ వార్నర్, మిచెల్ మార్ష్, రిషబ్ పంత్ (కెప్టెన్), రోవ్‌మన్ పావెల్, లలిత్ యాదవ్, అక్షర్ పటేల్, శార్దూల్ ఠాకూర్, కుల్దీప్ యాదవ్, ముస్తాఫిజుర్ రెహమాన్, ఖలీల్ అహ్మద్

కోల్‌కతా నైట్ రైడర్స్ తుది జ‌ట్టు (అంచ‌నా): అజింక్య రహానే, సునీల్ నరైన్, శ్రేయాస్ అయ్యర్ (కెప్టెన్‌), నితీష్ రాణా, సామ్ బిల్లింగ్స్, రింకూ సింగ్, ఆండ్రీ రస్సెల్, టిమ్ సౌతీ, శివమ్ మావి, ఉమేష్ యాదవ్, వరుణ్ చక్రవర్తి
చదవండి: DC VS KKR: న్యూలుక్‌తో బ‌రిలోకి దిగ‌నున్న ఢిల్లీ క్యాపిట‌ల్స్‌