Smriti Mandhana: డబ్ల్యూపీఎల్‌లో చేసిన ఒక్కో పరుగు విలువ 2.28 లక్షలు

డబ్ల్యూపీఎల్‌లో అత్యంత ఖరీదైన ప్లేయర్‌గా (రూ. 3.4 కోట్లు) రికార్డు నెలకొల్పిన రాయల్‌ ఛాలెంజర్స్‌ బెంగళూరు కెప్టెన్‌ స్మృతి మంధన.. ప్రస్తుత సీజన్‌లో చేసిన ఒక్కో పరుగు విలువ ఎంతో తెలిస్తే షాక్‌ అవ్వాల్సిందే. డబ్ల్యూపీఎల్‌-2023లో మంధన సాధించిన పరుగుల ప్రకారం​ ఆమె ఒక్కో పరుగు విలువ రూ. 2. 28 లక్షలవుతుంది.

ఈ సీజన్‌లో ఆమె ఆడిన 8 మ్యాచ్‌ల్లో 18.62 సగటున, 111.19 స్ట్రయిక్‌రేట్‌తో కేవలం 149 పరుగులు మాత్రమే చేసింది. ఇందులో ఒక్కటంటే ఒక్క అర్ధసెంచరీ కూడా లేకపోగా ఓ సారి డకౌట్‌ కూడా అయ్యింది. మంధన అత్యధిక వ్యక్తిగత స్కోర్‌ (37) గుజరాత్‌ జెయింట్స్‌పై నమోదు చేసింది. ఆమె ఆడిన 8 ఇన్నింగ్స్‌ల్లో 7 సార్లు స్పిన్నర్ల చేతిలో ఔటై, స్పిన్‌ బౌలింగ్‌ను ఎదుర్కోవడంలో తానెంత పూరో నిరూపించుకుంది.  

కాగా, డబ్ల్యూపీఎల్‌-2023 సీజన్‌ తుది దశకు చేరింది. పాయింట్ల పట్టికలో తొలి మూడు స్థానాల్లో ఉన్న ఢిల్లీ క్యాపిటల్స్‌ (8 మ్యాచ్‌ల్లో 6 విజయాలతో 12 పాయింట్లు, 1.856 రన్‌రేట్‌), ముంబై ఇండియన్స్‌ (8 మ్యాచ్‌ల్లో 6 విజయాలతో 12 పాయింట్లు, 1.711 రన్‌రేట్‌), యూపీ వారియర్జ్‌ (8 మ్యాచ్‌ల్లో 4 విజయాలతో 8 పాయింట్లు, -0.200 రన్‌రేట్‌) ప్లే ఆఫ్స్‌కు అర్హత సాధించగా.. రాయల్‌ ఛాలెంజర్స్‌ బెంగళూరు (8 మ్యాచ్‌ల్లో 2 విజయాలతో 4 పాయింట్లు, -1.137 రన్‌రేట్‌), గుజరాత్‌ జెయింట్స్‌ (8 మ్యాచ్‌ల్లో 2 విజయాలతో 4 పాయింట్లు, -2.220 రన్‌రేట్‌) ఫ్రాంచైజీలు లీగ్‌ను ఎలిమినేట్‌ అయ్యాయి.

మార్చి 24న జరిగే ఎలిమినేటర్‌ మ్యాచ్‌లో యూపీ వారియర్జ్‌.. ముంబై ఇండియన్స్‌తో తలపడనుండగా, ఈ మ్యాచ్‌లో విన్నర్‌ మార్చి 26న జరిగే ఫైనల్‌ మ్యాచ్‌లో ఢిల్లీ క్యాపిటల్స్‌ను ఢీకొంటుంది.