మున్సిపల్ ఎన్నికల ప్రక్రియకు విభజన సెగ

సాక్షి, గుంటూరు : మున్సిపల్ ఎన్నికల ప్రక్రియకు విభజన సెగ తగిలిన సంకేతాలు కనిపిస్తున్నాయి. అనుకున్న సమయానికి ‘పురపోరు’ జరిగే అవకాశాలు మందగించాయి. జిల్లాలోని 12 పురపాలక సంఘాల్లో ఎన్నికలు నిర్వహించేందుకు ఆయా మున్సిపల్ కమిషనర్లు పది రోజుల కిందటే సన్నాహాలు ప్రారంభించారు.  ఆయా మున్సిపాల్టీల్లోని 371 వార్డుల రిజర్వేషన్లను కూడా ప్రకటించారు. 2011 జనాభా లెక్కల ప్రకారం చైర్‌పర్సన్ల రిజర్వేషన్ల ప్రతిపాదనలను తయారు చేసిన అన్ని మున్సిపాల్టీల కమిషనర్లు హైదరాబాద్‌లోని మున్సిపల్ పరిపాలనా డెరైక్టర్(డీఎంఏ)కు పంపారు. మరో రెండు మూడు రోజుల్లో చైర్‌పర్సన్ల రిజర్వేషన్లు ఖరారవుతాయనగా, రాష్ట్ర విభజన ప్రకటన వెలువడింది. అప్పటి నుంచి వరసగా సీమాంధ్ర ఉద్యోగుల బంద్‌లు, ధర్నాలు మొదలయ్యాయి. హైదరాబాద్‌లోని పురపాలక శాఖ పరిపాలనా కార్యాలయంలో ఉద్యోగులు సైతం సీమాంధ్ర ఆందోళనల్లో పాల్గొంటున్నారు.