సాక్షి ప్రతినిధి, శ్రీకాకుళం: స్టాంపులు, రిజిస్ట్రేషన్‌శాఖ ఆదాయార్జనలో వెనకడుగేస్తోంది. లక్ష్యం బారెడు కాగా ఆదాయం మూరెడులా ఉంది ఈ శాఖ పరిస్థితి. గతేడాది సంభవించిన హుద్‌హుద్ తుపానుతో పాటు రాష్ట్ర విభజన, శూన్యమాసం వెరసి ఆదాయానికి దెబ్బకొట్టాయి. రియల్ బూమ్ లావాదేవీలు కూడా కొన్ని చోట్ల మందగించడంతో ఆ ప్రభావం లక్ష్యంపై పడింది. 2015-16 మధ్య కాలానికి రిజిస్ట్రేషన్ శాఖ శ్రీకాకుళం, విజయనగరం జిల్లాల్లో రూ.102 కోట్లు లక్ష్యంగా పెట్టుకుంటే కేవలం రూ.67 కోట్లే సాధించగలిగాయి. ఏటా రియల్టర్ల భూ క్రయ విక్రయదారుల వల్ల ఆదాయం వస్తున్నా పలు చోట్ల వెలసిన అనధికార లే అవుట్లపై మున్సిపల్, పంచాయతీ అధికారులు కొరడా ఝులిపిస్తుండడంతో లావాదేవీలు నిలిచిపోతున్నాయి.
  
  ఇదో కారణం
  ఆదాయపన్నుశాఖలో మరింత సరళీకృతానికి వీలుగా రిజిస్ట్రేషన్‌శాఖలో జరిగే ప్రతి రూ.5 లక్షల లావాదేవీకి పాన్‌కార్డు జత చేయడం తప్పనిసరి చేస్తూ ప్రభుత్వం తీసుకున్న నిర్ణయం కూడా కొన్నిచోట్ల ఇబ్బందులకు గురిచేస్తోంది. రిజిస్ట్రేషన్ల సమయంలో ఇరువర్గాలూ తమ ఆధార్‌కార్డుల వివరాలు కూడా పొందుపర్చాలని చెబుతుండడం వెనుక ఏదో మతలబు ఉంటుందన్న అనుమానాలు ఆస్తుల క్రయవిక్రయదారుల్లో నెలకుంది. శ్రీకాకుళం, విజయనగరం జిల్లాల పరిధిలో 30 సబ్ రిజిస్ట్రార్ కార్యాలయాలున్నాయి. రిజిస్ట్రేషన్లు జరిగేటప్పుడు పాన్ నంబర్ పొందుపర్చడం వల్ల మోసాలకు తావుండదని, ఆదాయం ఏ రూపంలో వస్తుందో, ఏ రూపంలో వెళ్తుందో సులభంగా తెలుసుకోవచ్చని అధికారులు చెబుతున్నారు. అయితే చాలా మందికి ఇప్పటికీ ఆధార్, పాన్‌కార్డుల్లేవ్. ఆధార్ సీడింగ్ శతశాతం పూర్తి చేశామని చెబుతున్నా వాటిల్లోని సాంకేతిక కారణాలు, నిర్లక్ష్యం కారణంగా వేలాది మందికి ఆధార్ కార్డులు ఇప్పటికీ రాలేదు.
  
  అలాగే పాన్ కార్డు తీసుకుంటే ముప్పు వాటిల్లుతుందేమోనన్న భయంతో చాలామంది వీటిని తీసుకునేందుకు వెనకడుగు వేస్తున్నారు. అలాగేగ్రామీణ ప్రాంతాల్లో జరిగే ప్రతీ క్రయ విక్రయం వెనుక ఇప్పటివరకూ డాక్యుమెంట్ రైటర్లు, దళారులే చక్రం తిప్పేవారు. ఇప్పుడా వ్యవస్థను నిర్వీర్యం చేసేందుకే ప్రభుత్వం పకడ్బందీగా ఆధార్, పాన్ నెంబర్ల నమోదును తప్పనిసరి చేసిందని చెబుతున్నా దీని వెనుక ఏదో మతలబు ఉందని అనుమానిస్తున్నారు. నిరుద్యోగుల పొట్టకొట్టేందుకు ఇదీ ఓ కారణం కావచ్చుని ఆక్షేపిస్తున్నారు. రిజిస్ట్రేషన్ల సమయంలో ఆధార్, పాన్ నంబర్లు పొందుపర్చడం వల్ల భవిష్యత్తులో ఇరువర్గాల మధ్య విభేదాలు రాకుండా ఉంటాయని, డాక్యుమెంట్ రైటర్లు, బ్రోకర్ల బారిన పడకుండా ఉండొచ్చుని, రిజిస్ట్రేషన్ కార్యాలయ సిబ్బందికి రూపాయి కూడా అనధికారికంగా చెల్లించకుండా ఉండేందుకు వీలవుతుందని చెబుతున్నా ఇప్పటికప్పుడు ఇది సాధ్యం కాదని సిబ్బందే చెబుతున్నారు.
  


 - ఉద్యోగుల్లో టెన్షన్.. టెన్షన్
 - ఇంకా ప్రకటించని ప్రభుత్వం
 - నెల రోజుల్లో పూర్తరుుతే మేలు
 - విద్యా సంవత్సరం ప్రారంభమైతే కష్టం..
 - డిప్యూటేషన్లపై గుర్రుగా ఉన్న ఉద్యోగులు
 అవసరం అనుకున్న చోటకు అధికారుల బదిలీలు జరుగుతూనే ఉంటారుు. ఎటొచ్చీ ఉద్యోగులు బదిలీ కావాలని కోరుకుంటే మాత్రం కుదరదు. ఇతర సమస్యలు చెప్పి బదిలీ కావడానికి చట్టం ఒప్పుకోదు.
  
 సాధారణ బదిలీల కోసం సర్కారు గ్రీన్‌సిగ్నల్ ఎప్పుడిస్తుందా అని ఉద్యోగులు ఎదురుచూస్తున్నారు. రాష్ట్ర విభజన నేపథ్యంలో దాదాపు రెండేళ్లుగా బదిలీలు నిలిచిపోరుున విషయం విదితమే. ఏప్రిల్ ఆఖరు లేదా మే నెల మొదట్లో సాధారణ బదిలీ విషయమై ప్రభుత్వం ప్రకటన చేయడం ఆనవారుతీ. ఈ తతంగమంతా నెల రోజుల్లో పూర్తరుుతే ఉద్యోగులు వారి పిల్లలను బదిలీ అరుున చోట విద్యా సంస్థల్లో చేర్చుకోవడానికి, ఇతర ప్రత్యామ్నాయూలు చూసుకోవడానికి అవకాశం ఉంటుంది.
 
 హన్మకొండ అర్బన్: రాష్ట్ర విభజన నేపథ్యంలో సివిల్ సర్వీసు అధికారులు మినహా ఇతర స్థాయి అధికారుల పంపకాలు పూర్తి కాలేదు. దీనికి ప్రభుత్వం గడువు పొడిగించడంతో లెక్కలు ఇప్పట్లో తేలేట్టు లేవు. ఒకవేళ ఇదే కారణంతో సాధారణ బదిలీలపై ప్రభుత్వం నిషేధం ఎత్తివేయకుండా ఉంటుందా అన్న ఆందోళన ఉద్యోగుల్లో వ్యక్తమవుతోంది. ఎందుకంటే.. సాధారణ బదిలీల విషయంలో ప్రభుత్వం నిషేధం ఉన్నా అత్యవసరాలు.. పరిపాలనా సౌల భ్యం పేరుతో సర్దుబాట్లకు అవకాశం కల్పించింది. దీంతో అవసరం అనుకున్న చోటకు అధికారుల బది లీలు జరుగుతూనే ఉన్నారుు. ఎటొచ్చీ ఉద్యోగులు బదిలీ కావాలని కోరుకుంటే మాత్రం కుదరదు.. ఇతర సమస్యలు చెప్పి బదిలీ కావడానికి చట్టం ఒప్పుకోదు. దీంతో వందల మంది ఉద్యోగులు ఇబ్బందులు పడుతున్నారు.
 
 కొందరికే ‘సౌలభ్యం’
 బదిలీలపై నిషేధం ఉన్నప్పుడు ఉన్నతాధికారులు పరిపాలనా సౌలభ్యం పేరుతో చేసే బదిలీల్లో కొం దరు ఉద్యోగులకు మాత్రమే న్యాయం జరుగుతోం ది. మారుమూల, ప్రాధాన్యం లేని ప్రాంతంలో పని చేసేవారికి బయటపడే మార్గం ఉండటం లేదు. జిల్లాలో ఇదే విషయం చర్చనీయాంశంగా మారింది.
 
 ఆర్‌ఐ పోస్టుల కోసం..
 ప్రస్తుతం రెవెన్యూ శాఖలో సీనియర్ అసిస్టెంట్ స్థాయికి సంబంధించి ఆర్‌ఐ పోస్టు విషయంలో తీవ్ర పోటీ నెలకొంది. నిబంధనల ప్రకారం సీనియర్ అసిస్టెంట్ నుంచి డీటీగా పదోన్నతి పొందడానికి సదరు ఉద్యోగి రెండేళ్ల ఆర్‌ఐ పీరియడ్ పూర్తి చేసి ఉండాలి. అయితే జిల్లాలోని కొన్ని మండలాల్లో ఆర్‌ఐ పోస్టుల్లో ఉన్నవారు ఏళ్ల తరబడి పాతుకుపోయి ఉన్నారు. మరికొందరు మండలం మారినా ఐదేళ్లకుపైగా ఆర్‌ఐలుగా కొనసాగుతున్న వారున్నారు. ఉదాహరణకు.. ఆర్‌ఐ పీరియడ్ పూర్తయిన వారు.. దీర్ఘకాలంగా కొనసాగుతున్న వారిని మండలాలవారీగా పరిశీలిస్తే.. వరంగల్, పర్వతగిరి, జఫర్‌గఢ్, మంగపేట, పరకాల, రేగొండ, గణపురం, భూపాలపల్లి, తాడ్వాయి, ములుగు, వెంకటాపుర్, నర్సంపేట, దుగ్గొండి, గూడూరు, కొత్తగూడ, చెన్నారావుపేట, ఖానాపురం, మహబూబాబాద్ డివిజన్‌లో దాదాపు మొత్తం మండలాలు, జనగామ, లింగాలగణపురం, రఘునాథపల్లి, చేర్యాల, నర్మెట, కొడకండ్ల, దేవరుప్పుల మండలాల్లో ఉన్న కొందరు ఏఆర్‌ఐలు, కొందరు ఎమ్మారైలు ఈ జాబితాలో ఉన్నారు. సాధారణ బదిలీలు లేకపోవడంతో అధికారులు వీరిని కదిలించడంలేదు.
 
 అయితే 2013 సాధారణ బదిలీల సమయంలో చాలామంది పైరవీల వల్ల ఆర్‌ఐ పోస్టుల్లో కొనసాగుతున్నారనే ఆరోపణలున్నారు. ప్రస్తుతం రెవెన్యూ శాఖలో దీనిపై తీవ్ర చర్చ నడుస్తోంది. బదిలీలకు ప్రభుత్వం అవకాశం ఇచ్చిన సమయంలో స్థానిక నేతలతో ఉన్నతాధికారులకు చెప్పించడం, లేదా అర్డీఓలతో సిఫార్సు లేఖలు ఇవ్వడం షరా మామూలుగా మారుతోంది. వెరసి నిజాయితీగా ఆర్‌ఐ పోస్టుల కోసం ఎదురు చూస్తున్న వారికి అవకాశం రావడం లేదు. పదోన్నతుల విషయానికి వచ్చేసరికి తప్పనిసరి కావడంతో నిబంధనలు పక్కన పెట్టి వారిని ఆర్‌ఐ పోస్టుకు పంపాల్సిన పరిస్థితులు కనిపిస్తున్నాయి.
 
 వీఆర్వోలదీ అదే తీరు..
 ఇక వీఆర్వోల పరిస్థితి మరీ దారుణంగా ఉంది. హ న్మకొండ లాంటి మండలాలకు 2009లో వచ్చిన వీ ఆర్వోలు ఇప్పటివరకు కదల్లేదు. ఇంకా చెప్పాలం టే కాస్త ‘రెవెన్యూ’ ఉన్న గ్రామాల్లో వీఆర్వోలు కదలిక లేకుండా ఉన్నారు. ఏళ్ల తరబడి ఒకేచోట పని చే య డం వల్ల కూడా కొన్నిచోట్ల వీఆర్వోల పరిస్థితి ఉన్నతాధికారులకు ఇబ్బందిగా మారుతోంది. ఇలాంటి వారిలోనే కొందరు అక్రమ వసూళ్లు, ఏసీబీ దాడు లు, భూముల అన్యాక్రాంతం, ప్రజలను ఇబ్బందులకు గురిచేస్తున్న వారి జాబితాలో చేరుతున్నట్లు ఆరోపణలు ఉన్నాయి. దీంతో మారుమూల ప్రాంతాల్లో పనిచేసే వారికి మంచి ప్రదేశాలకు వచ్చే అవకాశం తగ్గుతుంది కూడా.
 
 త్వరలో ఉత్తర్వులు
 బదిలీలపై విధి విధానాలను ప్రభుత్వం ఇప్పటికే ఖరారు చేసినట్లు సమాచారం. ఉత్తర్వులు వెలువడిన నాటి నుంచి ఈ నెలాఖరు వరకు సాధారణ బది లీలకు అవకాశాలు ఉంటాయని సమాచారం.


 కలెక్టరెట్: ఆత్మీయ అనుబంధాలను గుర్తు చేస్తున్న పండుగ.. గుండెల్లో ఆనంద క్షణాలు నింపే సాంప్రదాయం మనది. కష్ట సుఖాలను జీవితంలో చవిచూడాలి. మాధుర్యం, షడ్రుచుల ఉగాది పచ్చడి తెలియ చెప్పే నిజం అదేనని ఆంధ్రప్రదేశ్ డిప్యూటీ సీఎం, రెవె న్యూశాఖ మంత్రి కే.ఈ కృష్ణమూర్తి అన్నారు. ఆదివారం కింగ్‌కోఠిలోని భారతీయ విద్యాభవన్‌లో ఢిల్లీ తెలుగు అకాడమీ అంతర్జాతీయ సాంస్కృతిక సంస్థ 27వ ఉగాది వేడుకలు, 2015 పురస్కారాలు ఘనంగా నిర్వహించారు. ఈ కార్యక్రమానికి న్యూ ఇండియా ఎస్యూరెన్సు, ఇండియన్ బ్యాంక్ ఆఫ్ మహారాష్ట్ర, ఇండియన్ ఆయిల్, కరూర్ వైశ్యా బ్యాంక్, హెచ్‌యూడీసీఓ, ఎన్‌ఎండీసీ సంస్థలు సంయుక్తంగా ఈ కార్యక్రమానికి సహకారాన్ని అందిచాయి.
 
 ఈ సందర్భంగా ప్రముఖులకు ఉగాది పురస్కారాలు (ఉద్యోగ రత్న), అవార్డులు అందజేశారు. అవార్డు పొందిన వారిలో  ఎన్‌ఎండీసీ సీఎండీ నరేంద్ర కొఠారి, ఐఎఎస్‌లు దాసరి శ్రీనివాస్‌లు, కేఆర్‌బీహెచ్‌ఎన్ చక్రవర్తి, ఐటీఐఎల్ సీఎండీ కే.ఎల్ డింగ్ర, మెట్రో ఇండియా సీఎండీ సీఎల్ రాజం, ఎస్బీహెచ్ ఎండీ సంతను ముఖర్జీ, దూరదర్శన్ డెరైక్టర్ శైలజా సుమన్, కరూర్ వైశ్యా బ్యాంక్ సీనియర్ అధికారి కె.వెంకటేశ్వర్లు తదితరులను డిప్యూటీ సీఎం, సినారేలు ఘనంగా సత్కరించారు. ఈ కార్యక్రమానికి ముఖ్య అతిథిగా విచ్చేసిన కేఈ కృష్ణమూర్తి మాట్లాడుతూ ఇంటింటా తెలుగు ఆటాపాటా కొనసాగాలని, ప్రతి నోటా తెలుగు వినిపించాలని, ప్రతి ఒక్కరూ తెలుగును అనుసరించాలని ఆకాంక్షించారు.
 
 ఎన్ని దేశాలు మారిన ఎలా విడిపోయినా తెలుగు సంస్కృతి, తెలుగు భాషను మరువద్దన్నారు. అన్నదమ్ముల్లా ఉండాల్సిన తెలుగువారిని కొందరు స్వార్థపరులు స్వలాభాల కోసం విడదీశారని ఆవేదన వ్యక్తం చేశారు. ఎవరు ఎందుకు చేశారో కానీ ఈ రోజు తెలుగువారంతా బాధపడాల్సి వస్తుందన్నారు. ఈ ఉగాది నూతన కొంతమందికి ఆనందంగా ఉంటుందని, కానీ కొంతమందికి విభజన చేదు అనుభవంగా మిగిలిందన్నారు. కలిసి పనిచేసి మంచి ఫలితాలను పొందాలని సూచించారు. ఈ కార్యక్రమంలో ప్రముఖ రచయిత సి.నారాయణరెడ్డి, రిటైర్డ్ ఐఏఎస్ అధికారి మోహన్‌కందా, ఐఏఎస్‌లు ఎన్.గోపాలకృష్ణ, బీవీ రామారావు, ఆర్‌ఎస్‌జీ రావు, డాక్టర్ జె. చెన్నయ్య, డాక్టర్ ఎన్‌వీఎల్ నాగరాజు, చొక్కాపు వెంటరమణ, సతీష్ తదితరులు పాల్గొన్నారు.


 పేద తల్లిదండ్రులకు
  ఆసరాగా నిలిచే ‘బంగారు తల్లి’కి భరోసా కరువైంది. ఆడపిల్లలపై వివక్షను రూపమాపేందుకు గత ప్రభుత్వం ఎంతో ఆర్భాటంగా ప్రవేశపెట్టిన ఈ పథకానికి జిల్లాలో ఆదరణ కరువైంది. రాష్ట్ర విభజన తర్వాత తెలంగాణ ప్రభుత్వం ఈ పథకానికి బడ్జెట్‌లో నిధుల కేటాయింపుపై స్పష్టత ఇవ్వలేదు. దీంతో ఈ పథకంపై నీలినీడలు కమ్ముకున్నాయి.
  
  ‘బంగారు తల్లి’ అమలు ఇలా..
  దరఖాస్తు చేసుకున్న వారు                     32,008
  మొదటి విడ త డబ్బులు అందుకున్న వారు     12,942
  అర్హులుగా గుర్తించినా డబ్బులు రానివారు        13,799
  ఇంటివద్ద ప్రసవం అయినవారు                3,115
  
   సాక్షి, మహబూబ్‌నగర్:  జననీ సురక్ష యోజన, సుఖీభవ, రాజీవ్ విద్యాదీవెన వంటి పథకాలతో సంబంధం లేకుండా బంగారు తల్లి పథకాన్ని రూపొందించారు. జిల్లాలో ఈ పథకం కింద ఇప్పటివరకు 32,008 మంది రిజిస్ట్రేషన్ చేయించుకున్నారు. వీరిలో కేవలం 12,942 మందికి జనన నమోదు సమయంలో ఇచ్చే రూ.2,500 మాత్రమే అందాయి. మిగతా పద్దుల మాటే మరిచారు.
 
 ఈ పథకానికి అర్హత సాధించిన 13,799 మంది లబ్ధిదారుల జాబితాను సెర్ప్‌కు పంపించారు. వీరికి ఇప్పటివరకు ఒక్క రూపాయి కూడా అందలేదు. అలాగే ఇంటి వద్ద డెలివరీ జరిగిన 3,115 మంది కూడా డబ్బులు రాలేదు. పది నెలలుగా లబ్ధిదారులకు ఒక్క రూపాయి కూడా రాకపోవడంతో దరఖాస్తు చేసుకోవడానికి ఆసక్తి చూపలేకపోతున్నారు.
 
  స్పందన కరువు
  బంగారు తల్లికి దరఖాస్తు చేసుకున్న వారికి అధికారుల నుంచి ఎలాంటి సమాచారం రావడంలేదు. అయితే ఈ పథకాన్ని ప్రాథమికంగా నమోదు చేసుకునే వారు మండల సమాఖ్య కోఆర్డినేషన్(ఏపీఎం), మండల సమాఖ్య ప్రతినిధి, సీడీపీఓ అధికారులకు సైతం స్పష్టమైన ఆదేశాలు లేకపోవడంతో వారేమీ చేయలేకపోతున్నారు. అయితే మరికొన్ని చోట్ల బ్యాంకులతో సమస్య తలెత్తింది.
 
 ఈ పథకానికి సంబంధించి ప్రభుత్వం అందించే డబ్బులు నేరుగా తల్లి ఖాతాలో జమచేస్తారు. ఈ ప్రక్రియ ఆన్‌లైన్‌లో జరుగుతుంది. కొన్నిఖాతాల్లో డబ్బులు జమ అవుతున్నట్లు అధికారుల రికార్డుల్లో పేర్కొంటున్నా వాస్తవానికి చేరడం లేదు.
 
  లబ్ధిపొందే తీరు..
  ఆడపిల్ల పుట్టగానే జనన నమోదు సమయంలో నెలరోజుల వ్యవధిలోనే రూ.2,500 బ్యాంకు ఖాతాలో జయచేస్తారు. ఆ తర్వాత 1-2 సంవత్సరాల వరకు టీకాల నిమిత్తం ఏడాదికి రూ.వెయ్యి చొప్పున అందనున్నాయి.
 
   3- 5 ఏళ్ల మధ్య సంవత్సరానికి రూ.1,500, 6-10 ఏళ్ల వరకు ఏడాదికి రూ.రెండు వేల చొప్పున అందనుంది. 11-13 ఏళ్లవరకు అంటే ఆరు నుంచి 8వ తరగతి వరకు ఏడాదికి రూ.2,500 అందుతుంది.
   14-15 ఏళ్ల వరకు అంటే తొమ్మది, పదో తరగతి చదివే సమయంలో ఏడాదికి రూ.మూడువేల చొప్పున అందనుంది.
 
   16-17 ఏళ్ల వరకు ఇంటర్ చదివే వరకు ఏడాదికి రూ.3,500, 18- 21 ఏళ్ల వరకు గ్రాడ్యుయేషన్ చదివే సమయంలో ఏడాదికి రూ.4వేల చొప్పున అందుతుంది. ఇలా మొత్తం రూ.55,500 బ్యాంకు ఖాతాలో జమ అయ్యే విధంగా రూపొందించారు.
 
   అమ్మాయికి 21 ఏళ్లు వచ్చిన తర్వాత ఇంటర్‌మీడియట్ పాసైతే రూ.50,000, గ్రాడ్యుయేషన్ పాసైతే రూ.లక్ష ఇలా మొత్తం రూ.1,55,000 అదనంగా అందనుంది. మొత్తం మీద బంగారు తల్లికి రూ.రెండు లక్షల మేర లబ్ధి చేకూరనుంది.
  
  డిసెంబర్‌లో డబ్బులు వచ్చే అవకాశముంది
  బంగారుతల్లి పథకం సంబంధించి డబ్బులు అందని మాట వాస్తవమే. ఈ ఏడాది ఫిబ్రవరి నుంచి లబ్ధిదారులకు డబ్బులు రావడంలేదు. అర్హులైన 13వేల మందికి కూడా మొదటి విడతగా అందజేయాల్సిన డబ్బులు రాలేదు. రాష్ట్ర విభజన తర్వాత విధివిధానాలు ఖరారు కాలేదు. ప్రస్తుతం సభలో బడ్జెట్ ఆమోదం పొందిన నేపథ్యంలో బంగారుతల్లి అర్హులకు వచ్చే నెలలో డబ్బులు వచ్చే అవకాశముంది.  
  - చంద్రశేఖర్‌రెడ్డి, డీఆర్‌డీఏ పీడీ
  
  ఎవర్ని అడిగినా సమాధానం లేదు
  బంగారు తల్లి పథకం కోసం ధరకాస్తులు చేసుకుని నాలుగు నెలలు అ వుతున్నా ఇప్పటివరకు ఒక్కపైసా రాలేదు. కా ర్యాలయాల చుట్టూ తిరుగుతున్నాం. పైసలు వస్తాయో రావో కూడా చెప్పడం లేదు. మా మండలంలో 680 మంది దరఖాస్తులు చేసుకున్నారు. 120మందికి మాత్రమే రూ.2500 చొప్పున అందించారు.
    - సుమేరా, మానవపాడు
  
  ఒక్క రూపాయి ఇవ్వలేదు
  బంగారుతల్లి పథకం కింద గ తేడాది నవంబర్ 9న అధికారులు బాండ్ పేపర్ ఇచ్చారు. ఏడాదిగా ఒక్కరూపాయి కూడా అందలేదు. ఐకేపీ అధికారులు బ్యాంకు ఖాతాలో జమ చేశామని చెబుతున్నా.. డబ్బులు మాత్రం రాలేదు. ఎన్నోసార్లు అధికారులకు చెప్పినా పట్టించుకోవడం లేదు.
   పాలెం యూబీఐ పరిధిలో బంగారు తల్లి పథకం లబ్ధిదారులకు ఏ ఒక్కరికీ డబ్బులు రాలేదు.
  - గన్నోజు సుమతి, పాలెం


 సాక్షి,గుంటూరు
  రాష్ట్ర సరిహద్దులో ఏర్పాటు చేసిన చెక్ పోస్ట్‌ల్లో అధికారుల ధనదాహం కారణంగా అక్రమ రవాణా యథేచ్ఛగా కొనసాగుతోంది. రాష్ట్ర విభజన అనంతరం జిల్లాలో సరిహద్దు చెక్‌పోస్టులు రెండింటిని ఏర్పాటు చేశారు. ఒకటి నాగార్జునసాగర్, మరొకటి పొందుగల వద్ద ఉంది.
 
   ఇక్కడి అధికారులు నిబంధనలకు విరుద్ధంగా పనిచేస్తూ క్యాష్ కొట్టిన వాహనాన్ని చెక్ చేయకుండా పంపివేయడంతోపాటు ప్రభుత్వ ఆదాయానికి గండికొడుతున్నారనే విమర్శలు వెల్లువెత్తుతున్నాయి.
   ఇక్కడ జరుగుతున్న దందా ఉన్నతాధికారులకు తెలియనీయకుండా  కొందరు సిబ్బంది తమదైన శైలిలో వ్యవహరిస్తున్నట్టు తెలుస్తోంది.
 
   రాత్రివేళ వారి ఆగడాలకు హద్దు లేకుండా పోతోందని, దొరికిన కాడికి దోచెయ్ అన్న చందంగా విధులు నిర్వహిస్తున్నారని వాహనదారులు ఆందోళన వ్యక్తం చేస్తున్నారు.
 
   ఒక వేళ ఇక్కడి తంతు అధికారుల దృష్టికి వెళ్లినా, వారు స్పందించేలోపు వాహనాలు రాష్ట్రం దాటి వెళుతున్నాయి.
 
  అసలు లక్ష్యం ఇది...
   దాచేపల్లి మండలం పొందుగల, నాగార్జున సాగర్‌లోని విజయపురి సౌత్ వద్ద ఉన్న రాష్ట్ర సరిహద్దు చెక్ పోస్ట్‌ల్లో రవాణా, కమర్షియల్ ట్యాక్స్, ఎక్సైజ్, పోలీస్ తదితర శాఖలకు చెందిన సిబ్బందిని వాహనాల తనిఖీ కోసం నియమించారు. ఆయా వాహనాల రికార్డులను తనిఖీ చేయడంతో పాటు వాహనంలో వున్న సరకు కూడా పరిశీలించాల్సి వుంది.
 
    అనుమానం వున్న వాహనాలను సమీపంలోని పోలీస్ స్టేషన్‌కు తరలించాలి. మితిమీరిన లోడుతో వచ్చే వాహనాలపై కేసులు నమోదు చేయాలి.
 
   ప్రభుత్వ పన్నుల వసూలు చేపట్టాలి. అలాగే రాత్రింబవళ్లు పటిష్ట నిఘా కొనసాగిస్తూ సమర్థంగా విధులు నిర్వహించాల్సి వుంది.
 
    దీనివల్ల ప్రభుత్వ ఆదాయం పెరగడంతోపాటు ఇతర రాష్ట్రాల నుంచి వచ్చే నకిలీలు, మన జిల్లా నుంచి తరలివెళ్లే బియ్యం, ఇసుక అక్రమ రవాణాను అరికట్ట వచ్చనేది ప్రభుత్వ ఉద్దేశం.
  సరిహద్దులు దాటుతున్న బియ్యం, ఇసుక బియ్యం, ఇసుక అక్రమ రవాణా వ్యాపారులు, జీరో బిల్ వ్యాపారులు సరిహద్దు చెక్‌పోస్ట్‌లను తమ అక్రమాలకు అడ్డాలుగా మలచుకుంటున్నారు.
 
   అక్కడ ఎవరు విధుల్లో వున్నారు. అనే సమాచారాన్ని ముందుగానే సేకరిస్తున్నారు. వారికి అనుకూలమైన వ్యక్తులు వుంటే చాలు. వెంటనే వారి వాహ నాలను హడావుడిగా చెక్‌పోస్ట్‌లను దాటిస్తున్నారు.
 
   నిమిషాల వ్యవధిలో బియ్యం, ఇసుక, వంటివి రాష్ట్ర సరిహద్దులు దాటి బ్లాక్‌మార్కెట్‌కు తరలిపోతున్నాయి. అక్రమ సరకుతో ఉన్న లారీని చెక్‌పోస్ట్ దాటించినందుకు ప్రతిగా వేలల్లో నగదు చేతులు మారుతున్నట్లు సమాచారం.
 
   భారీ వాహనాలు మితి మీరిన లోడుతో వచ్చినా కేసులు నమోదు చేయకుండా, ప్రభుత్వానికి చెల్లించాల్సిన బకాయిలను వసూలు చేయకుండా అక్కడి సిబ్బంది అక్రమ వసూళ్లకు పాల్పడుతున్నారని వాహనాల డ్రైవర్లు బహిరంగంగానే చెబుతున్నారు.
 
  సరిహద్దు చెక్‌పోస్ట్‌లపై పూర్తి స్థాయిలో దృష్టి సారిస్తే ప్రభుత్వ ఆదాయం పెరగడంతోపాటు జిల్లా నుంచి బ్లాక్‌మార్కెట్‌కు తరలుతున్న బియ్యం,ఇసుక తదితర వాటిని పట్టుకోవచ్చని పలువురు సూచిస్తున్నారు.
  


 సాక్షి, సిటీబ్యూరో: జంట కమిషనరేట్ల పరిధిలో ఆదివారం భారీగా ఐపీఎస్ అధికారులు బదిలీలు జరిగాయి. తొమ్మిది మంది కొత్తవారికి పోస్టింగ్ ఇచ్చారు. ఇందులో ఇద్దరిని సైబరాబాద్‌కు, ఏడుగురిని హైదరాబాద్‌కు కేటాయించారు. ఇక్కడ విధులు నిర్వహించిన 13 మంది ఇతర జిల్లాలకు, డీజీపీ కార్యాలయానికి బదిలీ అయ్యారు. జంట కమిషనరేట్లు ఏర్పాటయ్యాక ఇంత పెద్ద సంఖ్యలో ఐపీఎస్‌లు బదిలీ కావడం ఇదే తొలిసారి.
 
 రాష్ట్ర విభజన నేపథ్యంలోనే ఈ బదిలీలు జరిగినట్టు తెలుస్తోంది. నగర పోలీసు కమిషనరేట్‌లో శాంతి భద్రతల విభాగానికి చెందిన ఐదుగురు, ట్రాఫిక్ విభాగానికి చెందిన ఇద్దరు ఐపీఎస్‌లకు స్థానచలనం కల్పించారు. సైబరాబాద్‌లో జాయింట్ పోలీసు కమిషనర్ వై.గంగాధర్‌తోపాటు ఐదు జోన్లలో కేవలం మాదాపూర్ మినహా మిగిలిన నాలుగు జోన్ల డీసీపీలు విశ్వప్రసాద్, రమేష్‌నాయుడు, ఏఆర్ శ్రీనివాస్, కోటేశ్వరరావులను కదిలించారు. వీరి స్థానంలో కేవలం మల్కాజిగిరి జోన్‌కు మాత్రమే కొత్తగా అధికారిని నియమించారు.
 
 బాలానగర్, ఎల్బీనగర్ జోన్‌లకు అధికారులను నియమించాల్సి ఉంది. జాయింట్ పోలీసు కమిషనర్‌గా వచ్చిన కొత్త అధికారికి శంషాబాద్ జోన్ డీసీపీ బాధ్యతలను అదనంగా అప్పగించారు. త్వరలో సైబరాబాద్‌కు మరో ముగ్గురు ఐపీఎస్‌లు రావాల్సి ఉంది. ఇంటెలిజెన్స్‌లో ఎస్పీగా పనిచేసిన డాక్టర్ వి.రవీందర్ తూర్పు మండలం డీసీపీగా బదిలీ అయ్యారు.
  
 సమర్ధవంతంగా..
 
 వరంగల్ డీఐజీగా బదిలీ అయిన 1998 బ్యాచ్ ఐపీఎస్ అధికారి ఎం.మల్లారెడ్డి సిటీ కమిషనరేట్‌లో సుదీర్ఘకాలం పని చేశారు. నాలుగేళ్ల మూడు నెలల పాటు సేవలందించారు. కడప జిల్లా ఎస్పీగా పని చేస్తూ మల్లారెడ్డి 2010 ఆగస్టులో హైదరాబాద్ కమిషనరేట్‌కు బదిలీ అయ్యారు. ట్రాఫిక్ డీసీపీ-2గా ఏడాదికి పైగా విధులు నిర్వర్తించారు. అక్కడ నుంచి నగర భద్రతా విభాగం (సీఎస్‌డబ్ల్యూ) డీసీపీగా బదిలీ అయ్యారు. ఇక్కడ పని చేస్తుండగానే 2012 జూన్‌లో డీఐజీగా పదోన్నతి పొంది సిటీ ఆర్డ్మ్ రిజర్వ్ హెడ్-క్వార్టర్స్ సంయుక్త పోలీసు కమిషనర్‌గా బాధ్యతలు చేపట్టారు. ఏడాదిన్నర క్రితం స్పెషల్ బ్రాంచ్‌కు బదిలీ అయ్యారు. అనేక ఉద్యమాలు, ఉద్రిక్తతలతో పాటు కీలక ఘట్టాల్లోనూ ఎలాంటి అవాంఛనీయ ఘటనలను సమర్ధవంతంగా పర్యవేక్షించారు.
  


 గవర్నర్ ఆమోదం..
 సంచిత నిధి నుంచి వినియోగం
 డిసెంబర్ 2 వరకు వినియోగించుకునే అవకాశం
 
 హైదరాబాద్: తెలంగాణ రాష్ట్ర ప్రభుత్వం అక్టోబర్ రెండో తేదీ నుంచి డిసెంబర్ రెండో తేదీ వరకు సంచిత నిధి నుంచి రూ.16,890.85 కోట్లు వ్యయం చేయడానికి గవర్నర్ నరసింహన్ ఆమోదం తెలిపారు. దీనితో ఆర్థిక శాఖ ముఖ్యకార్యదర్శి వి.నాగిరెడ్డి సోమవారం ఉత్తర్వులు జారీ చేశారు. రాష్ట్ర విభజన తరువాత అప్పట్లో గవర్నర్  జూన్ 2వ తేదీ నుంచి అక్టోబర్ రెండో తేదీ వరకు దాదాపు రూ. 26,573 కోట్లను సంచిత నిధి నుంచి వినియోగించుకోవడానికి అనుమతించారు. అక్టోబర్ రెండో తేదీలోగా తెలంగాణ రాష్ట్ర ప్రభుత్వం శాసనసభను సమావేశపరిచి బడ్జెట్‌కు ఆమోదం పొందాల్సి ఉండింది. అయితే విభజన చట్టంలో ఆరు నెలల కాలానికి సంచిత నిధి నుంచి పాలన, వేతనాలు ఇతర వ్యయానికి గవర్నర్ అనుమతిస్తే చాలన్న వెసులుబాటు ఉంది.
 
 దీనితో ముఖ్యమంత్రి  చంద్రశేఖర్‌రావు సెప్టెంబర్‌లో నిర్వహించాల్సిన బడ్జెట్ సమావేశాలను వాయిదా వేశారు. రెండు నెలల కాలానికి సంచిత నిధి నుంచి నిధులు తీసుకోవడానికి వీలుగా మంత్రివర్గ సమావేశం లేకుండా.. సర్క్యులేషన్ పద్ధతిలో మంత్రుల వద్ద సంతకాలు తీసుకుని గవర్నర్ ఆమోదం కోసం పంపించారు. ఈ రెండు నెలల వ్యయానికి గవర్నర్ అనువుతించడంతో ఆర్థిక శాఖ తదనుగుణంగా ఉత్తర్వులు జారీ చేసింది.
  


 యూనివర్సిటీ క్యాంపస్ : ఎన్నో అవాంతరాలు, అటంకాల అనంతరం గురువారం ప్రారంభమైన ఎంసెట్ కౌన్సెలింగ్‌కు స్పందన అంతంతమాత్రమే లభించింది. రాష్ట్ర విభజన నేపథ్యంలో ఫీజు రీయింబర్స్‌మెంట్ అంశం తేలక కౌన్సెలింగ్ ప్రక్రియ ఆలస్యమైంది. ఈనెల 31లోపు అడ్మిషన్ల షెడ్యూల్ పూర్తి చేయాలని సుప్రీంకోర్టు ఇచ్చిన తీర్పుతో ప్రభుత్వం కౌన్సెలింగ్‌కు శ్రీకారం చుట్టింది. తొలిరోజైన గురువారం ఒకటి నుంచి ఐదువేల ర్యాంకులు పొందిన విద్యార్థుల ధ్రుపత్రాల పరిశీలన జరిగింది.
 
 జిల్లాలో మూడు హెల్ప్‌లైన్ సెంటర్లలో ఈప్రక్రియను ప్రారంభించారు. చిత్తూరులోని పీవీకేఎన్ డిగ్రీ కళాశాల, తిరుపతిలోని ఎస్వీ ఆర్ట్స్ కళాశాల, ఎస్వీ పాలిటెక్నిక్ కళాశాలల్లో హెల్ప్‌లైన్ సెంటర్లు ఏర్పాటు చేశారు. ఎస్వీ ఆర్ట్స్ కళాశాలలో 15 మంది, ఎస్వీ పాలిటెక్నిక్ కళాశాలలో అయిదుగురు, చిత్తూరు పీవీకేఎన్ డిగ్రీ కళాశాలలో ఏడుగురు మాత్ర మే హాజరయ్యారు. హాజరైన విద్యార్థులకు ధ్రువపత్రాలను పరిశీలించి స్క్రాచ్‌కార్డులు అందజేశారు. వీరు ఆన్‌లైన్‌లో లాగిన్ అయి వెబ్ ఆప్షన్స్ ఇచ్చుకోవాల్సి ఉంది.
 
 తొలి ఐదు వేల ర్యాంకులు సాధించినవారిలో చాలామంది ఐఐటిలు, విట్, నిట్ లాంటి ప్రతిష్టాత్మక సంస్థల్లో చేరి ఉంటారని అందువల్ల కౌన్సెలింగ్‌కు ఎక్కువ మంది రాలేదని ఎస్వీ ఆర్ట్స్ కళాశాలలోని హెల్ప్‌లైన్ సెంటర్ కో-ఆర్డినేటర్ ఎల్‌ఆర్ మోహన్‌కుమార్‌రెడ్డి తెలిపారు. శుక్రవారం 5001 నుంచి 10వేల లోపు ర్యాంకుల వారికి కౌన్సెలింగ్ ఉంటుంది.
  


 
 తిరుపతిలో ఐఐటీ, సెంట్రల్ వర్సిటీ, ఐఐఎస్‌ఈఆర్ ఏర్పాటుకు ప్రభుత్వం నిర్ణయం
 
  మూడు జాతీయ విద్యాసంస్థల ఏర్పాటుకు కనీసం వెయ్యి ఎకరాల భూమి అవసరం
 
  భూమిని అన్వేషించాలని కలెక్టర్‌ను ఆదేశించిన విద్యాశాఖ మంత్రి గంటా!
 
 ప్రపంచ చిత్రపటంలో ఆధ్యాత్మిక కేంద్రంగా ప్రకాశిస్తున్న తిరుపతి ఇక విద్యా కేంద్రంగానూ విరాజిల్లనుంది. రాష్ట్ర విభజన నేపథ్యంలో తిరుపతిలో జాతీయ స్థాయి విద్యా సంస్థలు, పరిశోధన కేంద్రాలను ఏర్పాటుచేస్తామని ఇచ్చిన హామీని కేంద్రం నిలబెట్టుకుంది. తిరుపతి పరిసర ప్రాంతా ల్లో ప్రతిష్టాత్మక ఐఐటీ(ఇండియన్ ఇన్‌స్టిట్యూట్ ఆఫ్ టెక్నాలజీ), సెంట్రల్ వ ర్సిటీ(కేంద్రీయ విశ్వవిద్యాలయం), ఐఐఎస్‌ఈఆర్(ఇండియన్ ఇన్‌స్టిట్యూట్ ఆఫ్ సైన్స్ ఎడ్యుకేషన్ అండ్ రీసెర్చ్) సంస్థలను ఏర్పాటు చేస్తామని విద్యాశాఖ మంత్రి గంటా శ్రీనివాసరావు బుధవారం హైదరాబాద్‌లో ప్రకటించారు.
  
 సాక్షి ప్రతినిధి, తిరుపతి: సమైక్యాంధ్రప్రదేశ్‌లో జాతీయ స్థాయి విద్యాసంస్థలు, పరిశోధన కేంద్రాలు తెలంగాణలోనే నెలకొల్పారు. రాష్ట్ర విభజన నేపథ్యంలో జాతీయ విద్య, పరిశోధన కేంద్రాలను సీమాంధ్రలోనూ ఏర్పాటు చేస్తామని అప్పటి కేంద్ర ప్రభుత్వం హామీ ఇచ్చింది. రాష్ట్ర విభజన ప్రకటన వెలువడిన తర్వాత అప్పటి కేంద్ర మంత్రి జైరాం రమేష్ జిల్లాలో పర్యటించారు.
 
 ఈ సందర్భంగా ఆయన తిరుపతిలో విలేకరులతో మాట్లాడుతూ తిరుపతి పరిసర ప్రాంతాల్లో ఐఐటీ, సెంట్రల్ వర్సిటీ, ఐఐఎస్‌ఈఆర్ ఏర్పాటుచేస్తామని ప్రకటించారు. ఆ మేరకు విభజన బిల్లులో కూడా పొందుపరిచారు. హైదరాబాద్‌లో సెంట్రల్ వర్సిటీ, ఐఐటీని మెదక్ జిల్లా దోమ మండల కేంద్రానికి కూతవేటు దూరంలో అప్పట్లో ఏర్పాటు చేశారు. ఐఐఎస్‌ఈఆర్‌ను ఏర్పాటుచేయకపోవడం గమనార్హం. ఇక రాష్ట్ర విభజన తర్వాత ఇచ్చిన మాటను కేంద్రం నిలబెట్టుకుంది.
 
 తిరుపతిలో ఐఐటీ, సెంట్రల్ వర్సిటీ, ఐఐఎస్‌ఈఆర్‌ల ఏర్పాటుకు ఉత్తర్వులు జారీచేసింది. ఈ అంశాన్ని విద్యాశాఖ మంత్రి గంటా శ్రీనివాసరావు బుధవారం హైదరాబాద్‌లో వెల్లడించారు. ఆ మూడు జాతీయ విద్య, పరిశోధన కేంద్రాల ఏర్పాటుకు వెయ్యి ఎకరాల భూమిని అన్వేషించి.. ఈనెల 20లోగా నివేదిక పంపాలని కలెక్టర్ రాంగోపాల్‌ను ప్రభుత్వం ఆదేశించింది.
  
 భూ సేకరణలో అధికార యంత్రాంగం
 
 దేవదేవుడు వేంకటేశ్వరుడు కొలువైన తిరుపతికి ఆధ్యాత్మిక కేంద్రంగా పేరుంది. శ్రీవారు వెలసిన జిల్లాలో శ్రీవెంకటేశ్వర విశ్వవిద్యాలయం, పద్మావతి మహిళా విశ్వవిద్యాలయం, శ్రీవెంకటేశ్వర వెటర్నరీ యూనివర్సిటీ, వేదిక్ వర్సిటీ, కుప్పంలో ద్రవిడ విశ్వవిద్యాలయం నెలకొల్పారు. తిరుపతిలో చీనీ, నిమ్మ, వరి, చెరకు పరిశోధన కేంద్రాలను ఏర్పాటుచేశారు.
 
 ఇక కొత్తగా మూడు ప్రతిష్ఠాత్మక విద్యాసంస్థల ఏర్పాటుకు రాష్ట్ర ప్రభుత్వం తొలి అడుగు వేసింది. అయితే వీటి ఏర్పాటుకు తిరుపతి పరిసర ప్రాంతాల్లో ఎక్కడా ఖాళీగా ఉన్న ప్రభుత్వ భూములు లేవు. తుడా (తిరుపతి అర్బన్ డెవలప్‌మెంట్ అథారిటీ) పరిధిలోని శ్రీకాళహస్తి, ఏర్పేడు, చంద్రగిరి ప్రాంతాల్లో కూడా ప్రభుత్వ భూములు లేవు. ఆ ప్రాంతాల్లో డీకేటీ భూములు మాత్రమే ఉన్నాయి.
 
 ఆ భూములను రైతుల నుంచి సేకరించాల్సి ఉంది. ఇదే అంశంపై కలెక్టర్ రాంగోపాల్‌ను ‘సాక్షి’ సంప్రదించగా.. ఐఐటీకి 400 ఎకరాలు, సెంట్రల్ వర్సిటీకి 400 ఎకరాలు, ఐఐఎస్‌ఈఆర్‌కు 200 ఎకరాల భూమి అవసరమని చెప్పారు. తిరుపతి పరిసర ప్రాంతాల్లో ప్రభుత్వ భూములు అందుబాటులో లేవన్నారు. ఏర్పేడు, చంద్రగిరి, శ్రీకాళహస్తి ప్రాంతాల్లో డీకేటీ భూములను సర్వే చేస్తున్నామని.. ఒకటి రెండు రోజుల్లో ప్రభుత్వానికి నివేదిక పంపుతామని వివరించారు.
  


 
      సబ్సిడీ వేరుశెనగ విత్తనాల పంపిణీలో వ్యవసాయశాఖ జాప్యం
 
      అధిక ధరలకు విత్తనాలు కొంటున్న రైతులు
 
      రుణాల కోసం బ్యాంకుల చుట్టూ  ప్రదక్షిణలు
 
      రాష్ట్ర విభజన, రుణమాఫీ పథకంతో ‘సహకారం’ నిల్
 
 సాక్షి, తిరుపతి: జిల్లాలో ఖరీఫ్ సాగుకు రైతుల అగచాట్లు మొదలయ్యాయి. ఈ సీజన్‌లో రైతులకు అవసరమైన విత్తనాలుగానీ, రుణాలుగానీ అందే పరిస్థితి కనిపించడం లేదు. ఈ క్రమంలో రైతాంగం ఆందోళన చెందుతోంది. ఖరీఫ్‌లో జిల్లాలో ప్రధాన పంట అయిన వేరుశెనగ విత్తనాలు ఇప్పటి వరకు జిల్లాకు చేరుకోలేదు. ఇంకా కొంత సమయం పడుతుందని అధికారులు బహిరంగంగానే చెబుతున్నారు.
 
 ఈ పరిస్థితుల్లో సబ్సిడీ విత్తనాల కోసం ఎదురుచూడలేక రైతులు ప్రైవేటు వ్యాపారుల నుంచి విత్తన కొనుగోలు చేయాల్సిన దుస్థితి ఏర్పడింది. రైతు ల అవసరాన్ని వ్యాపారులు సొమ్ము చేసుకుంటున్నారు. నిన్నటివరకు వేరుశెనగ విత్తనాలు కిలో రూ.33 ఉండగా, శుక్రవారం పది రూపాయలు పెంచి అమ్మకాలు సాగించినట్టు రైతులు చెబుతున్నారు.
 
 దీంతో వేరుశెనగ రైతులు పంటల సాగు ప్రారంభంలోనే పెట్టుబడులపై ఆందోళనకు గురవుతున్నారు. జిల్లాలో ఈ సీజన్‌లో వేరుశెనగ సాధారణ విస్తీర్ణం 1,36,400 హెక్టార్లు. ఇందుకోసం లక్షా ఐదు వేల క్వింటాళ్ల వేరుశెనగ విత్తన కాయలు అవసరమవుతాయి. అయితే ఇప్పటివరకు ఒక్క గింజ కూడా పంపిణీ జరగలేదు. విత్తన కాయల రేటుకు సంబంధించి నోడల్ ఏజెన్సీ లు, అధికారుల మధ్య అవగాహన కుదరలేదు.
 
 దీంతో సబ్సిడీ విత్తనాల పంపిణీలో జాప్యం జరుగుతున్నట్టు సమాచారం. ఒక వైపు సీజన్ ముంచుకొచ్చినా అధికారులు మాత్రం రేటు పేరుతో జాప్యం చేస్తున్నారు. జిల్లాలోని పడమటి మండలాల రైతులు మాత్రం సబ్సిడీ విత్తనాల కోసం వేచి చూడకుండా తమ దగ్గర ఉన్న విత్తన కాయలు, ప్రైవేటు వ్యాపారుల నుంచి కొనుగోలు చేస్తున్నారు. తంబళ్లపల్లె, మదనపల్లె, పలమనేరు, కుప్పం తదితర ప్రాంతాల్లో రైతులు ఇప్పటికే విత్తనాలు వేయడం మొదలుపెట్టారు. రుతుపవనాలు ప్రవేశించే సమయం ఆసన్నం కావడంతో ఇప్పటికే భూమిలో ఉన్న తేమ ఆరిపోకుండా నాట్ల వైపు మొగ్గు చూపుతున్నారు.
  
 బ్యాంకులకు వెళితే రైతులపై చిన్నచూపు
  
 రుణాల కోసం బ్యాంకులకు వెళ్లే రైతులపై అధికారులు చిన్నచూపు చూస్తున్నారు. తెలుగుదేశం ప్రభుత్వం ప్రకటించిన రుణమాఫీతో బ్యాంకర్లు కొత్త రుణాలు ఇచ్చేందుకు ముందు కు రావడం లేదు. దీంతో పాత రుణాలు తీర్చలేక కొత్త అప్పు పుట్టక లబోదిబోమనే పరిస్థితి ఉత్పన్నమవుతోంది. ప్రతిఏటా ఈ పాటికి రుణాల మంజూరు జరిగేది. కానీ ఈ ఏడాది రుణమాఫీ పథకంతో కొత్తగా అప్పులు ఇచ్చేం దుకు బ్యాంకర్లు నిరాకరిస్తున్నారు.
 
 కొత్త రుణా ల మంజూరుకు సంబంధించి ఇంకా స్పష్టత రాకపోవడంతో రైతులు తీవ్ర నిరాశనిస్పృహలకు లోనవుతున్నారు. ఈ ఏడాది మార్చి వరకు జాతీయ బ్యాంకులు రూ. 7,660 కోట్ల రుణాలు ఇచ్చాయి. సుమారు ఎనిమిది లక్షల మంది రైతులు ఈ రుణాలు తీసుకున్నారు. ఈ ఏడాది జనవరి నుంచి మార్చి చివరి వరకు రూ. 1,500 కోట్లు ఇచ్చారు. వీటి సంగతి తేల్చకుండా కొత్తగా రుణాలు ఎలా ఇస్తామంటూ బ్యాంకులకు వెళ్లిన రైతులను అధికారులు ఎదురు ప్రశ్నిస్తున్నారు. దీంతో రైతులు ప్రైవేటు వడ్డీ వ్యాపారులను ఆశ్రయించాల్సిన పరిస్థితి ఎదురవుతోంది.
  
 సహకారం నిల్
  
 జాతీయ బ్యాంకుల పరిస్థితి అలా ఉంటే సహకార బ్యాంకులు పూర్తిగా చేతులెత్తేశాయి. రాష్ట్ర విభజన నిర్ణయంతో ఈ ఏడాది ప్రారంభం నుంచే రుణాల మంజూరు నిలిపివేయాలని సహకార బ్యాంకులను ఆప్కాబ్ ఆదేశించింది. దీంతో ఈ ఏడాది ఏప్రిల్ నుంచి ఒక్క రూపా యి కూడా రైతులకు రుణం మంజూరు చేయలేదు. ఈ ఏడాది మార్చి వరకు రూ. 200 కోట్లు స్వల్ప కాలిక రుణాలు, మరో  రూ. 70 కోట్లు దీర్ఘకాలిక రుణాలు మంజూరు చేసి ఉన్నారు.
 
 ఇవి కాకుండా మరో పది కోట్ల రూపాయలు బంగా రు నగలపై వ్యవసాయ రుణాలు ఉన్నాయి. ఈ పరిస్థితుల్లో ఆప్కాబ్ ఆదేశాల మేరకు కొత్త రుణాలు ఇచ్చేందుకు సహకార బ్యాంకులు నిరాకరిస్తున్నాయి. రుణమాఫీ పథకానికి సంబంధించి ప్రభుత్వం నుంచి స్పష్టత లేకపోవడంతో భారీ మొత్తంలో ఇప్పటికే ఇచ్చిన రుణాల సంగతి తేల్చకుండా కొత్త రుణాలు ఇచ్చే పరిస్థితిలో సహకార బ్యాంకులు లేవని అధికారులు ఖరాకండిగా చెబుతున్నారు. ఇన్ని అవరోధాల నడుమ ఖరీఫ్ సీజన్‌లో రైతుల అవస్థలు దయనీయంగా ఉన్నప్పటికీ ప్రభుత్వం ఉదాశీనంగా వ్యవహరిస్తోందనే విమర్శలు ఎదుర్కొంటోంది.
  


 
       కమిటీ ఏర్పాటు  నిర్ణయంపై రైతుల్లో గుబులు
 
      పంట రుణాలు ఇవ్వడంపై   బ్యాంకులకు అందని హామీ
 
      కొత్త రుణాలు    ఇప్పట్లో లేనట్టేనా?
 
      వడ్డీ వ్యాపారస్తుల వైపు రైతుల చూపు
 
 పంట రుణాల మాఫీ ప్రశ్నార్థకంగా మారడంతో రైతుల్లో దిగులు పట్టుకుంది. అధికారంలోకి రాగానే పంట రుణాల మాఫీపై తొలి సంతకం చేస్తానని ఎన్నికల ప్రచారంలో చంద్రబాబు నాయుడు ఇచ్చిన హామీ నీటి మీద రాతలా మిగిలిపోనుంది. రాష్ట్ర విభజన నేపథ్యంలో రెండు కళ్ల సిద్ధాంతాన్ని పాటించిన చంద్రబాబు ఆంధ్రప్రదేశ్ (సీమాంధ్ర)కు తొలి ముఖ్యమంత్రిగా ప్రమాణ స్వీకారం చేసిన తర్వాత పంట రుణాల మాఫీపై ఇదే వైఖరి అనుసరిస్తున్నారని తేటతెల్లమవుతోంది. రుణమాఫీ ఫైల్‌పై కాకుండా ఇందుకోసం కమిటీ ఏర్పాటు చేసేందుకు తీసుకున్న నిర్ణయూనికి సంబంధించిన ఫైల్‌పై చంద్రబాబు తొలి సంతకం చేయడంతో రైతుల ఆశలు ఆవిరైపోయాయి.
          
 చిత్తూరు(కలెక్టరేట్): రుణమాఫీ కాగానే బ్యాంకుల నుంచి కొత్త రుణాలు తీసుకుని పంటలు సాగు చేస్తామని భావించిన రైతులు చివరకు నిరుత్సాహానికి గురయ్యారు. ఈ ఏడాది ఖరీఫ్‌కు పెట్టుబడి ఎక్కడ నుంచి తీసుకురావాలంటూ ఆందోళన చెందుతున్నారు.
 
 ఇప్పటికే బంగారు తాకట్టుపై బ్యాంకుల నుంచి రుణాలు తీసుకున్న రైతులు, ఈ ఏడాది పంట రుణాలు ఎలా చేయాలంటూ మల్లగుల్లాలు పడుతున్నారు. పంట రుణాల మాఫీపై విధి విధానాలు తెలియజేసేందుకు చంద్రబాబు ప్రభుత్వం కమిటీ వేసేందుకు నిశ్చయించింది. 15 రోజుల్లో ప్రాథమిక నివేదిక, 45 రోజుల్లో తుది నివేదికను కమిటీ ప్రభుత్వానికి అందించనుంది. ఈ తతంగమంతా ఏమిటంటూ రైతులు రగిలిపోతున్నారు.
  
 అయోమయంలో కరువు మండలాల రైతులు
  
 జిల్లాలో మూడేళ్లుగా ఖరీఫ్ సీజన్‌లో నెలకొన్న వర్షాభావ పరిస్థితుల కారణంగా వేరుశెనగ రైతులు నష్టాల ఊబిలో చిక్కుకుపోయారు. గత ఏడాది కూడా ఇదే పరిస్థితి నెలకొనడంతో జిల్లాలోని 33 మండలాలను అప్పటి కిరణ్‌కుమార్‌రెడ్డి ప్రభుత్వం కరువు ప్రాంతాలుగా ప్రకటించింది. ఈ మండలాల్లోని దాదాపు 80 వేల మంది రైతులు పంట రుణాలు మాఫీ అయితే కొత్త రుణాలు తీసుకోవాలని భావించారు. ప్రస్తుతం ఆ పరిస్థితులు కనిపించడం లేదనే ఆందోళనలో ఉన్నారు.
  
 ప్రశ్నార్థకంగా పంట రుణాలు
  
 రుణమాఫీతో పాటు పంట రుణాల రీషెడ్యూల్‌పై ప్రభుత్వం నుంచి ఇప్పటి వరకు బ్యాంకర్లకు ఎలాంటి ఆదేశాలు అందలేదు. దీంతో ఈ ఏడాది రైతులకు బ్యాంకుల నుంచి పంట రుణాలు అందేది గగనంగా మారనుంది. పంట నష్టపోయిన రైతులు రీషెడ్యూల్ చేసుకునే అవకాశం లేకపోవడంతో ఈ ఏడాది పంట రుణాలు ఇచ్చేందుకు బ్యాంకర్లు ముందుకు రారు. ఒకవేళ పంట రుణాలు రీషెడ్యూల్ చేస్తే కొత్త రుణాలుగా బ్యాంకర్లు వాటిని పరిగణిస్తారు. ఈ రుణాలు మాఫీకి వర్తించవు.
  
 వడ్డీ వ్యాపారుల వైపు రైతుల చూపు
  
 బ్యాంకర్లు పంట రుణాలను రీషెడ్యూల్ చేయక పోవ డం, కొత్త రుణాలు ఇవ్వక పోవడంతో పెట్టుబడి కోసం రైతులు వడ్డీ వ్యాపారుల వైపు ఎదురు చూస్తున్నారు. ఖరీఫ్ సీజన్‌లో ఏటా 2.2 లక్షల మంది రైతులకు దాదాపు 2 వేల కోట్ల రూపాయలు పంట రుణాలుగా ఇవ్వాలని బ్యాంకర్ల సమావేశంలో నిర్ణయిస్తారు. అయి తే ఖరీఫ్ సీజన్ మొదలైనా రైతులకు పంట రుణాలు ఇవ్వాలనే దానిపై ప్రభుత్వం నుంచి ఎలాంటి స్పష్టత బ్యాంకు అధికారులకు రాలేదు. దీంతో రైతులు వడ్డీ వ్యాపారులను ఆశ్రయించక తప్పడం లేదు.
  
 కమిటీ ఏర్పాటుతో రైతుల్లో ఆందోళన
  
 పంట రుణాల మాఫీపై చంద్రబాబు ప్రభుత్వం కమిటీని ఏర్పాటు చేస్తుండడంతో రైతుల్లో ఆందోళన నెలకొంది. కమిటీ ఇచ్చే నివేదికల ఆధారంగా ఎంత మంది రైతులకు ఎంత మొత్తం పంట రుణాలు మాఫీ చేస్తారు.. ఆ జాబితాలో తమ పేర్లు ఉంటాయా లేదా అని రైతులు ఆందోళన చెందుతున్నారు. జిల్లాలోని బ్యాంకు అధికారుల గణాంకాలను ఒక్కసారి పరిశీలిస్తే 2014 మార్చి నెలాఖరు వరకు వ్యవసాయ, వ్యవసాయేతర, దీర్ఘకాలిక, స్వల్ప కాలిక రుణాలు రూ.7693.75 కోట్లు ఉన్నట్టు తెలుస్తోంది. జిల్లా వ్యాప్తంగా చిన్న, సన్నకారు, మధ్య, పెద్ద రైతులు 8 లక్షల 70 వేల 321 మంది ఉన్నట్టు బ్యాంకు అధికారులు చెబుతున్నారు.
 
 జిల్లా వ్యాప్తంగా 40 ప్రధాన బ్యాంకుల కింద 478 బ్రాంచీలు ఉన్నాయి. ఈ బ్యాంకుల నుంచి వ్యవసాయ రుణాల కింద 7 లక్షల 55 వేల 270 మంది రైతులు రూ. 5810.84 కోట్లు తీసుకున్నారు. ప్రధానంగా 4 లక్షల 53 వేల 162 మంది రైతులకు నగలు తాకట్టుపై పంట రుణాల కింద రూ. 3486.50 కోట్లు ఇవ్వగా, దీర్ఘకాలిక, స్వల్ప కాలిక (టర్ము) రుణాల కింద 68,671 మంది రైతులకు రూ.1129.75 కోట్లు ఇచ్చారు. వ్యవసాయ అనుబంధ శాఖల ద్వారా 45 వేల 780 మంది రైతులకు రూ.753.16 కోట్ల రుణాలు ఇచ్చినట్టు బ్యాంకు అధికారుల గణాంకాలు చెబుతున్నాయి.


  రాష్ట్ర విభజన అంశంలో సీమాంధ్ర ఉద్యోగ సంఘాలు భయపడినంతా జరుగబోతోందా? విభజన వల్ల ముందుగా నష్టపోయేది ఉద్యోగులేనంటూ అవి ఆందోళన చెందినట్టే ప్రమాద పరిస్థితులు చుట్టుముడుతున్నాయా? ప్రస్తుత పరిణామాలు ఆ అనుమానాలను బలపరిచేలా ఉన్నాయి. విభజన నేపథ్యంలో రెండు రాష్ట్రాల ఉద్యోగులు భిన్నమైన పరిస్థితిని చవిచూస్తున్నారు. తెలంగాణ ఉద్యోగులకు మోదం.. సీమాంధ్ర ఉద్యోగులకు ఖేదం అనే రీతిలో పరిస్థితులు మారాయని తాజా పరిణామాలను బట్టి అర్థమవుతోంది.
  
  సాక్షి, మచిలీపట్నం : రాష్ట్ర విభజన నేపథ్యంలో ఈ నెల రెండో తేదీన తెలంగాణ తొలి ముఖ్యమంత్రిగా పదవీ ప్రమాణ స్వీకారం చేసిన కల్వకుంట్ల చంద్రశేఖర్ అక్కడి ఉద్యోగులపై ఎనలేని ప్రేమ చూపారు. ప్రమాణ స్వీకారం రోజునే తెలంగాణలో పనిచేసే ఉద్యోగులపై వరాల జల్లు కురిపించారు. జీతభత్యాలు, పదోన్నతులు తదితర అంశాలపై ఆయన సానుకూలంగా స్పందించడంతో తెలంగాణ ఉద్యోగుల్లో ఆనందం ఉప్పొంగింది.
  
 ఇటువంటి పరిస్థితిలో ఈ నెల ఎనిమిదిన అవశేష ఆంధ్రప్రదేశ్ ముఖ్యమంత్రిగా పదవీ ప్రమాణం చేస్తున్న చంద్రబాబు ఉద్యోగుల సమస్యలకు పరిష్కారం చూపుతారా అనే అనుమానాలు రేగుతున్నాయి. ప్రస్తుత పరిస్థితిలో ఆంధ్రప్రదేశ్ రూ.15 వేల కోట్ల లోటు బడ్జెట్‌లో ఉందని, దీంతో ఉద్యోగులకు కొత్త రాయితీల మాటెలా ఉన్నా జీతాల చెల్లింపులు సకాలంలో జరుగుతాయా అనే అనుమానాలు వ్యక్తమవుతున్నాయి.
  
 నిధుల లభ్యతను బట్టే చెల్లింపు!
 జిల్లాలో సుమారు 35 వేల మంది రాష్ట్ర ప్రభుత్వ ఉద్యోగులు, సుమారు 15 వేల మంది ఉపాధ్యాయులు ఉన్నారు. వీరందరికీ ట్రెజరీ (ప్రభుత్వ ఖజానా) నుంచి జీతాలు చెల్లించాల్సి ఉంది. రాష్ట్ర విభజన ప్రక్రియ జూన్ రెండో తేదీతో పూర్తికావడంతో మే నెల జీతాలు సక్రమంగానే వచ్చాయి. ఇప్పుడు లోటు బడ్జెట్‌తో ఉన్న ఆంధ్రప్రదేశ్ రాష్ట్రంలో జూన్ జీతాల చెల్లింపు కష్టమేనని ఉద్యోగులు కలవరపడుతున్నారు. జీతాల బిల్లులు ఈ నెల 20న ట్రెజరీకి చేరే అవకాశం ఉండటంతో ఆ రోజు ఉన్న నిధుల లభ్యతను బట్టి చెల్లింపుపై నిర్ణయం ఉంటుందని పలువురు అధికారులు చెబుతున్నారు. జూన్ జీతాలపై నీలినీడలు కమ్ముకోవడంతో ఉన్నతాధికారులు స్పందించి ఉద్యోగులకు తగిన హామీ ఇవ్వాల్సి ఉంది.
  
  బాబు ఏం చేస్తారో?
  ఈ నెల ఎనిమిదిన సీఎంగా ప్రమాణ స్వీకారం చేస్తున్న చంద్రబాబుపై ఉద్యోగులు గంపెడాశలు పెట్టుకున్నారు. తెలంగాణలో ఉద్యోగులకు కేసీఆర్ వరాలు ఇవ్వడంతో సీమాంధ్ర ఉద్యోగులకు చంద్రబాబు ఎటువంటి వరాలు ఇస్తారోనని ఉద్యోగ సంఘాలు ఆసక్తిగా గమనిస్తున్నాయి.


 సచివాలయంలో వింత పరిస్థితి  వారిని ఏ రాష్ట్రానికి కేటాయించని కేంద్రం
 సాధారణ పరిపాలన శాఖ నిర్వాకమే కారణం
 తెలంగాణకు చెందిన వారినీ ఆ రాష్ట్రానికి కేటాయించలేదు
  
 హైదరాబాద్:కేం రాష్ట్ర విభజన నేపథ్యంలో సచివాలయ ఉద్యోగుల పంపిణీ విషయంలో సాధారణ పరిపాలన (సర్వీసెస్) శాఖ నిర్వాకం కారణంగా చాలా మంది ఉద్యోగుల పరిస్థితి ఎటూ తేలకుండా గాలిలో ఉన్నట్లుంది .కేంద్ర ప్రభుత్వం ఈ నెల 31వ తేదీన జారీ చేసిన ఉద్యోగుల పంపిణీ ఆదేశాల్లో సచివాలయంలో పనిచేస్తున్న సుమారు 200 మంది అధికారులు, ఉద్యోగుల పేర్లు లేవు. తెలంగాణకు చెందిన ఉద్యోగులను కూడా ఆ రాష్ట్రానికి కేటాయించలేదు. రాష్ట్ర ప్రణాళికా శాఖలో డెరైక్టర్, జాయింట్ డెరైక్టర్ స్థాయి అధికారులతో పాటు మొత్తం 30 మంది పరిస్థితి ఇలానే ఉంది. మున్సిపల్ శాఖలోను, అలాగే సచివాలయంలోని పలు శాఖల్లో రికార్డు అసిస్టెంట్లను ఏ రాష్ట్రానికి కేటాయించకుండా వదిలేశారు. దీంతో తెలంగాణకు చెందిన అధికారులు, ఉద్యోగులు ఎక్కడ పనిచేయాలో తెలియక తికమకపడుతున్నారు. ఈ విషయంపై ఆర్థిక శాఖను సంప్రదించగా కేంద్రం నుంచి ఆదేశాలు రావాల్సి ఉందని బదులిస్తున్నారు.
 
 సర్వీసెస్ అధికారుల నిర్వాకం కారణంగానే ఈ ఉద్యోగులు ఇలా మధ్యస్థంగా మిగిలిపోయారనే విమర్శ వినిపిస్తోంది. కొన్ని విభాగాలకు చెందిన ఉద్యోగులు, అధికారులు సచివాలయంలో రెగ్యులర్‌గా పనిచేయడానికి వీలుంది. అయితే ఇలాంటి అధికారులు, ఉద్యోగులను డిప్యుటేషన్ పేరుతో సాధారణ పరిపాలన శాఖ కేంద్రానికి జాబితా పంపడం వల్లే ఆ అధికారులు, ఉద్యోగులను పంపిణీ చేయలేదని అధికార వర్గాలు పేర్కొంటున్నాయి. ఇప్పుడు మళ్లీ తప్పును సరిచేసి జాబితాను కేంద్రానికి పంపాల్సి ఉందని, అప్పుడే ఆ ఉద్యోగులు, అధికారులను పంపిణీ చేస్తూ కేంద్రం ఆదేశాలు జారీ చేస్తుందని అధికార వర్గాలు పేర్కొంటున్నాయి. ఎవరికీ పంపిణీ చేయని అధికారులు ఆంధ్రప్రదేశ్ ప్రభుత్వంలోనే ఉంటారనేది ఆంధ్రప్రదేవ్ పునర్ విభజన - 2014 చట్టం చెపుతోంది. సర్వీసెస్ అధికారుల నిర్వాకం వల్లే తెలంగాణ ఉద్యోగులు, అధికారులను ఆ రాష్ట్రానికి పంపిణీ చేయలేదని సచివాలయ ఉద్యోగులు విమర్శిస్తున్నారు.
  
  


 చిత్తూరు(జిల్లాపరిషత్) న్యూస్‌లైన్: రాష్ట్ర విభజన నేపథ్యంలో రవాణా శాఖ సోమవారం నుంచి నూతన సర్వర్ ద్వారా ప్రజలకు సేవలను ప్రారంభించింది. నూతన వాహనాల రిజిస్ట్రేషన్లు, పర్మిట్లు, ఫిట్‌నెస్ సర్టిఫికెట్లు, ఇతర సేవలను నూతన సర్వర్ ద్వారా అందించినట్టు జిల్లా రవాణా శాఖ ఉప కమిషనర్ ఎం.బసిరెడ్డి తెలిపారు. నూతన రాష్ట్రానికి సం బంధించి ఏపీ జిల్లా సీరీస్ త్వరలో మారుతుందన్నారు. తెలంగాణ రా ష్ట్రానికి ఇచ్చిన టీజీ కోడ్‌ను టీఎస్‌గా మార్చాలని ఆ రాష్ట్ర ముఖ్యమంత్రి కేసీఆర్ కేంద్రాన్ని కోరిన నేపథ్యంలో కొద్ది రోజులు ఆలస్యమయ్యే అవకా శం ఉందని ఆయన పేర్కొన్నారు.
  
 పాత పర్మిట్లు చెల్లుతాయి
  
 ఉమ్మడి రాష్ట్రంలో ఉన్నప్పుడు తీసుకు న్న పర్మిట్లు రెండు రాష్ట్రాల్లో చెల్లుబాటవుతాయని, దీనికి సంబంధించి ప్రభుత్వం జూన్ 1న 46 జీవోను జారీ చేసిందని ఎం.బసిరెడ్డి తెలిపా రు. దీంతో పర్మిట్ ఉన్నంత వరకు రెండు రాష్ట్రాల్లో సంబంధిత వాహనా లు తిరగవచ్చన్నారు. జూన్ 1వ తేదికి ముందు జీవితకాలం పన్ను చెల్లించి న వాహనాలు తెలంగాణలో తిరిగి చెల్లించాల్సిన అవసరం లేదని, తెలంగాణ  పరిధిలో చెల్లించిన వారు ఆంధ్రప్రదేశ్‌లో చెల్లించాల్సిన అవసరం లేద ని ప్రభుత్వం ఉత్తర్వులు జారీ చేసిం దన్నారు.
 
 ఏపీఎస్ ఆర్టీసీకి సంబంధిం చి ఇప్పుడున్న పర్మిట్లు అలాగే కొనసాగించనున్నట్టు తెలిపారు. నూతన రాష్ట్రంలో జరిగే లావాదేవీలు ఆయా రాష్ట్రాలకు పరిమితం కానున్నాయని, మన రాష్ట్రంలో పర్మిట్ తీసుకున్న వాహనాలు అక్కడకు వెళితే అక్కడ తప్పనిసరిగా పర్మిట్ తీసుకోవాల్సి ఉంటుందని ఆయన పేర్కొన్నారు.
  


 
 చెలరేగిపోతున్న దొంగలు
 
  అసాంఘికశక్తులకు అడ్డా
 
  షెల్టర్‌జోన్‌గా మారుతున్న వైనం
 
  మహానగరంగా మారుతున్న వేళ పోలీసులకు పెనుసవాల్
 
 సాక్షి, విజయవాడ : అసాంఘికశక్తులకు విజయవాడ అడ్డాగా మారుతోంది. ఇతర ప్రాంతాల్లో దొంగతనాలు, దోపిడీలు, కిడ్నాపులు, కిరాయి హత్యలు చేసే ముఠాలకు షెల్టర్‌జోన్‌గా తయారైంది. ఒకప్పుడు రౌడీయిజానికి బెజవాడ రాష్ట్రస్థాయిలోనే పేరుగాంచింది. పోలీసులు తీసుకున్న చర్యలు.. రౌడీల ప్రవర్తనలో వచ్చిన మార్పులు.. ఏదైతేనేం రౌడీయిజం కనుమరుగైంది.
 
 ఆ స్థానాన్ని వైట్‌కాలర్  నేరాలు ఆక్రమించాయి. నగర పరిధి విస్తృతంగా పెరిగిన క్రమంలో ఇంటా బయటా చోరీలు, బైక్ దొంగతనాలు నిత్యకృత్యమయ్యాయి. పశ్చిమగోదావరి జిల్లాకు చెందిన వ్యాపారిని కిడ్నాప్ చేయాలని పథకం రచించిన ముఠా పోలీసులకు చిక్కడంతో నగరవాసులు మళ్లీ ఉలిక్కిపడ్డారు. రాష్ట్ర విభజన నేపథ్యంలో అతి పెద్ద నగరంగా అవతరించనున్న విజయవాడకు ఇవన్నీ సవాళ్లేనని చెప్పాలి.
  
 కౌన్సెలింగ్‌లతో తెరమరుగు..
 
 విజయవాడ నగరంలో దాదాపు 15 ఏళ్ల క్రితం వరకు రౌడీలు తమ కార్యకలాపాలు నిరాటంకంగా కొనసాగించేవారు. పోలీసుల వరుస ట్రీట్‌మెంట్లు, కౌన్సెలింగ్‌లతో అనేకమంది రౌడీలు తెరమరుగయ్యారు. మరికొందరు జిల్లాను వీడి దూరంగా వెళ్లిపోయారు. విజయవాడ కమిషనరేట్ పరిధిలో 20 పోలీసుస్టేషన్లు ఉన్నాయి. వీటిలో మొత్తం 340 మంది రౌడీషీటర్లు ఉన్నారు. వీరిలో ఏ ప్లస్ కేటగిరీలో 80 మంది ఉన్నారు.
 
 రౌడీషీటర్లు దాదాపు నాలుగేళ్లుగా తమ కార్యకలాపాలకు దూరంగా ఉంటున్నారు. కాగా బ్లేడ్‌బ్యాచ్ ముఠాలు, గంజాయి విక్రయించే ముఠాలు ఉన్నాయి. వీరితోపాటు ఇతరప్రాంతాల్లో కిరాయి హత్యలు, దొంగతనాలకు పాల్పడే వారు అనేకమంది నగరాన్ని షెల్టర్‌జోన్‌గా వినియోగిస్తున్నారు. ముఖ్యంగా సింగ్‌నగర్, వాంబే కాలనీ, న్యూరాజరాజేశ్వరీపేట తదితర ప్రాంతాలను సురక్షిత ప్రాంతాలుగా మార్చుకున్నట్లు పోలీసులకు సమాచారం ఉంది.
 
 తాజాగా పశ్చిమగోదావరి జిల్లా నర్సాపురానికి చెందిన బంగారు నగల వ్యాపారిని కిడ్నాప్ చేసి కోటి  రూపాయలుడిమాండ్ చేయాలని చూసిన ముఠా గుట్టును పోలీసులు రట్టుచేశారు. మొత్తం తొమ్మిది మందిని అరెస్ట్ చేశారు. ఈ ముఠాకు నేరచరిత్ర లేనప్పటికీ కేవలం డబ్బు ఆశతోనే ఇలా చేశారు. దీన్నిబట్టి చూస్తే నగరంలో నేరాలు ఏ స్థాయిలో ఉన్నాయో అవగతమవుతుంది.
 
 విజయవాడ కమిషనరేట్ అయినప్పటికీ నగర పరిధి బాగా పెరగడం, చుట్టూ జాతీయ రహదారులు ఉండడం పోలీసులకు సవాల్‌గా మారుతోంది. కిరాయి హత్యలు, కిడ్నాప్‌లను నియంత్రించడంలో మాత్రం పోలీసులు సఫలీకృతులయ్యారు. ఏడేళ్లుగా ఇలాంటి నేరాలు జరగకపోవడమే దీనికి నిదర్శనం.
  
 నిత్యం దొంగతనాలు...
 
 నగరంలో దొంగతనాలు నిత్యకృత్యంగా మారాయి. రోజూ ఏదో ఒక ప్రాంతంలో ఏదో ఒక చోరీ తప్పక జరుగుతుంది. నగరం నలుదిక్కులా జాతీయ రహదారి ఉండడంతో దొంగతనం చేసిన పదిహేను నిమిషాల్లో దొంగలు నగరం వదిలి పారిపోతున్నారు. ఫలితంగా దొంగతనాల జోరు బాగా పెరిగింది. ఇతర రాష్ట్రాలు, జిల్లాల నుంచి వచ్చిన దొంగల ముఠాలు ప్రస్తుతం నగరంలో స్వైరవిహారం చేస్తున్నాయి. నకిలీ పోలీసుల ముఠాలు కూడా తమ హవా కొనసాగిస్తున్నాయి.
  
 నెలకు 200కు పైగా కేసులు..
 రెండు నెలలుగా సగటున నెలకు 200కు పైగా దొంగతనాల కేసులు
  
 గత నెల 19న కమిషనరేట్ పరిధిలోని కంకిపాడులో పట్టపగలే రెండిళ్లలో చోరీలు జరిగాయి. రెండు లక్షల సొత్తు అదృశ్యమైంది.
  
 అదేరోజు ఆటోనగర్‌లో పోలీసులమని చెప్పి నకిలీ పోలీసులు వృద్ధురాలి నుంచి తొమ్మిది కాసుల బంగారం అపహరించారు.
  
 గత నెల 21న ఆటోనగర్ స్టేషన్ పరిధిలో రోడ్డుపై వెళ్తున్న మహిళ నుంచి రూ.40 వేల విలువైన బంగారం అపహరించారు.
  
 గత నెల 25న కృష్ణలంక ప్రాంతంలోని ఓ ఇంట్లో దొంగలు చొరబడి 20 కాసుల బంగారం, 50 వేల నగదు అపహరించారు.
  
 ఇలా వరుస దొంగతనాలు జరుగుతున్న క్రమంలో పోలీసులు నాకాబందీ నిర్వహించి తనిఖీలు చేస్తున్నా ఆశించిన మేర ప్రయోజనం కలగడం లేదు. దీనికితోడు పోలీసులే  మైకు ప్రచారం నిర్వహించి నగరవాసులను అప్రమత్తం చేస్తున్నారు.
  


 
 నేటితో రెండుగా విడిపోతున్న శాఖ
 
  రెండు రాష్ట్రాలకు విడివిడిగా సర్వర్లు
 
  రాజధాని అంచనాలతో ‘రియల్’ బూమ్
 
  జిల్లాలో ఊపందు కోనున్న క్రయవిక్రయాలు
 
  కైకలూరు, న్యూస్‌లైన్ : జిల్లాలో స్టాంప్స్ అండ్ రిజిస్ట్రేషన్ కార్యక్రమాలు శుక్రవారం నుంచి నిలిచిపోయాయి. రాష్ట్ర విభజన నేపథ్యంలో ఆంధ్రప్రదేశ్, తెలంగాణ రెండు రాష్ట్రాలకు విడివిడిగా సర్వీసు సర్వర్లు ఏర్పాటు చేయడంతో ఈ పరిస్థితి ఏర్పడింది. దీంతో రెండు రోజులుగా ఆయా మండలాల్లోని రిజిస్ట్రార్ కార్యాలయాల్లో సేవలు నిలిచిపోయాయి. దీంతో క్రయవిక్రయాలకు సంబంధించిన స్టాంప్ డ్యూటీ, ఈసీల కోసం ప్రజలు అవస్థలు పడ్డారు.
 
 జిల్లాలో మొత్తం 50 మండలాల్లో సబ్‌రిజిస్ట్రార్ కార్యాలయాలు పనిచేస్తున్నాయి. హైదరాబాదు కేంద్రంగా సర్వర్ పనిచేస్తోంది. జూన్ 2న రాష్ట్రం రెండుగా విభజన జరగనుండటంతో నూతనంగా ఏర్పడే ఇరు రాష్ట్రాలకు కొత్త సర్వీసు సర్వర్లు సోమవారం నుంచి విడివిడిగా ఏర్పాటు కానున్నట్లు సమాచారం.
  
 రెండుగా విడిపోనున్న సిబ్బంది...
  
 విభజన నేపథ్యంలో ఇప్పటి వరకు హైదరాబాదు ప్రధాన కేంద్రంగా జరిగిన రిజిస్ట్రేషన్ సేవలు రెండుగా విడిపోనున్నాయి. తెలంగాణ, ఆంధ్రప్రదేశ్ రాష్ట్రాలకు వేర్వేరు సర్వర్లు రానున్నాయి. శాఖాపరమైన విధులు, సిబ్బంది విషయానికి వస్తే సెంట్రల్ సీ అండ్ ఐజీ ఆఫీస్, జోనల్ ఆఫీస్ అనే రెండంచెల విధానంలో రాష్ట్రంలో స్టాంప్స్ అండ్ రిజిస్ట్రేషన్స్ శాఖ పనిచేస్తుంది.
 
 రాష్ట్రవ్యాప్తంగా కమిషనర్ ఐజీ, అడిషనల్ కమిషనర్ ఐజీ, జాయింట్ ఐజీ, డిస్ట్రిక్ట్ రిజిస్ట్రార్స్, సబ్ రిజిస్ట్రార్ గ్రేడ్-1,  సబ్ రిజిస్ట్రార్ గ్రేడ్-2, సీనియర్ అసిస్టెంట్స్, టైపిస్టు, షరాఫ్, డ్రైవర్లు, ఆఫీస్ సబార్డినెంట్లు కలిపి 3,997 మంది ఈ శాఖలో పనిచేస్తున్నారు. హైదరాబాదులోని ప్రధాన కార్యాలయాన్ని రెండుగా విభజించి పదేళ్ల పాటు అదే కార్యాలయాల్లో విడివిడిగా విధులు నిర్వహించనున్నారు. సెంట్రల్ కార్యాలయంలో సిబ్బందిని ఆయా ప్రాంతాల ప్రాతిపాదికన బదలాయిస్తున్నారని, జోనల్ వ్యవస్థలో ప్రాంతాలవారీ బదిలీలపై స్పష్టమైన ఆదేశాలు రాలేదని కార్యాలయ సిబ్బంది ఒకరు తెలిపారు.
  
 స్టాంపు డ్యూటీపై గంపెడాశలు...
  
 అవశేష ఆంధ్రప్రదేశ్ నిర్మాణం కారణంగా జిల్లాలో భూముల ధరలకు రెక్కలు వస్తాయని, ఈ పరిణామం స్టాంపు అండ్ రిజిస్ట్రేషన్ శాఖకు కలిసొచ్చే అంశంగా మారుతుందని జిల్లా శాఖ అధికారులు భావిస్తున్నారు. ఇప్పటికే ఆంధ్రప్రదేశ్ రాజధాని గుంటూరు - విజయవాడల మధ్య ఏర్పాటుచేసే ఆలోచనలో ఉన్నట్లు తెలుస్తోంది. దీంతో రియల్ ఎస్టేట్ రంగం ముందుకు దూసుకుపోతుందని, రాజధాని ప్రభావం కారణంగా క్రయ విక్రయాలు ఊపందుకుంటాయని అందరూ భావిస్తున్నారు.
  


 చిత్తూరు (జిల్లాపరిషత్), న్యూస్‌లైన్ : జిల్లాలో ప్రభుత్వ ప్రధానశాఖలైన రవాణా, వాణిజ్య విభాగాలకు సంబంధించిన ప్రజాసేవలు రెండు రోజుల పాటు బంద్ అవుతున్నారుు. నూతన రాష్ట్రం ఏర్పడనున్న సందర్భంగా ఈ రెండు శాఖలు కొత్త సర్వర్ల ద్వారా  సోమవారం నుంచి సేవలను నిర్వహించనున్నాయి. ట్రెజరీ అకౌంట్స్‌కు సంబంధించి పాతపద్ధతుల్లోనే సేవలు అందిస్తారని సమాచారం.
 
 రాష్ట్ర విభజన నేపథ్యంలో తెలంగాణ, ఆంధ్రప్రదేశ్ రాష్ట్రాలకు విడివిడిగా సర్వర్లు రూపొందించి ఉన్నందున మే 31న (శనివారం) ఆన్‌లైన్ సేవలన్నింటినీ నిలిపివేయాలని రాష్ట్ర రవాణాశాఖ కమిషనర్ గతంలోనే ఆదేశాలు జారీ చేశారు. ఈ నేపథ్యంలో శనివారం నూతన వాహనాల రిజిస్ట్రేషన్లు, పర్మిట్లు, ఎఫ్‌సీలు చేయబోరని జిల్లా రవాణాశాఖ ఉపకమిషనర్ ఎం.బసిరెడ్డి తెలిపారు. జూన్ 1వ తేదీ ఆదివారం సెలవు కావడంతో ఆ రోజు కూడా సర్వర్లు పనిచేయవని, ఆదివారం అర్ధ రాత్రి నుంచి నూతన సర్వర్ ఓపెన్ అవుతుందని, సోమవారం యథావిథిగా రవాణా శాఖ సేవలు అందుతాయని చెప్పారు.
 
 జూన్ 2వ తేదీ సోమవారమే వాణిజ్య పన్నుల శాఖకు సంబంధించిన నూతన సర్వర్ ప్రారంభమవుతుందని, ఇందుకు అనుగుణంగానే జిల్లాలోని వస్త్ర దుకాణాలు, ఇతర వ్యాపార సంస్థల యజమానులు, వారికి కేటాయించిన టిన్ నెంబర్ల ద్వారా లావాదేవీలను జరపాలని చిత్తూరు వాణిజ్య పన్నుల శాఖాధికారులు సూచించారు. ఖజానా శాఖ సేవలను యథావిథిగా అందిస్తుందని ఆ శాఖ ఉపసంచాలకులు పాలేశ్వరరావు పేర్కొన్నారు.
 
 రాష్ట్ర విభజన నేపథ్యంలో ఇప్పటివరకు తమకు ఎలాంటి సూచనలు అందలేదని, ఉత్తర్వులు అందేంతవరకు సేవలు యథావిథిగా కొనసాగిస్తామని తెలిపారు. ఉద్యోగులకు జూన్ 1వ తేదీ చెల్లించాల్సిన మే నెల జీతాన్ని ఈ నెల 24వతేదీ నాటికే వారి ఖాతాల్లో జమ చేశామన్నారు. పెన్షన్‌దారులకు పెన్షన్ కూడా అదే రోజుకే వారి ఖాతాల్లో జమచేశామని తెలిపారు. ఇతర లావాదేవీలకు సంబంధించి తమకు ఎలాంటి సమాచారం రాలేదని పేర్కొన్నారు.
  


 
 ‘విభజన’ నేపథ్యంలో..
 
  జిల్లాలో మూతపడిన లిక్కర్ బేవరేజెస్
 
  జూన్ 7 వరకు అదే పరిస్థితి
 
  ప్రత్యామ్నాయ ఏర్పాట్లు చేసిన అధికారులు
 
  జిల్లాలో అదనంగా 50 వేల కేసుల విక్రయం
 
   వైన్, బార్ షాపుల వద్ద నిల్వలు ఫుల్
 
  సాక్షి, విజయవాడ : జిల్లాలో మద్యం సరఫరా నిలిచిపోయింది. రాష్ట్ర విభజన నేపథ్యంలో రాష్ట్రవ్యాప్తంగా ఉన్న లిక్కర్ బేవరేజెస్‌ను విభజించి ఆదాయ వ్యయాలు, అప్పులు, ఇతర లెక్కలు చూసుకోవటానికి బేవరేజెస్‌కు సెలవులు ప్రకటించారు. దీంతో ఎక్సైజ్ శాఖ, బేవరేజ్ అధికారులు జిల్లాలో మద్యం కొరత తలెత్తకుండా ఉండేందుకు ప్రత్యామ్నాయ ఏర్పాట్లు చేశారు. దీంతో వైన్‌షాపులు, బార్‌లకు నెలవారీగా లెసైన్స్ స్థాయిని బట్టి కేటాయించే దానికంటే అదనంగా కేటాయింపులు జరిపారు. దీంతో ఉమ్మడి రాష్ట్రంలో చివరి నెలలో జిల్లాలో మద్యం విక్రయాలు భారీగా జరిగినట్లయింది.
  
 మూడు నెలలుగా వ్యాపారాలూ అంతంతే..
  
 జిల్లాలో 294 వైన్‌షాపులు, 155 బార్‌లు ఉన్నాయి. వీటి ద్వారా నెలకు జిల్లాలో మూడు లక్షల కేసుల మద్యం విక్రయాలు జరుగుతుంటాయి. దీంతో జిల్లాలో నెలకు సుమారు రూ.105 కోట్ల మద్యం అమ్మకాలు సాగుతుంటాయి. గడిచిన మూడు నెలలుగా జిల్లాలో మద్యం విక్రయాలు బాగానే జరిగాయి కానీ వ్యాపారాలు ఆశించిన రీతిలో జరగలేదు. ఎన్నికల కోడ్, వరుస ఎన్నికల నేపథ్యంలో పోలీసు, ఎక్సైజ్ అధికారుల తనిఖీలు, దాడులు ముమ్మరంగా సాగాయి. ఈ క్రమంలో వ్యాపారులు భారీగా నిల్వలు చేసుకోకపోవటంతో ఆశించిన మేరకు వ్యాపారం జరగలేదు.
  
 సెలవులతో మరింత ఇబ్బంది...
  
 ఈ క్రమంలో ప్రస్తుతం వేసవికాలం కావటంతో మద్యం విక్రయాలు బాగుంటాయని ఆశించిన వ్యాపారులకు బేవరేజెస్ సెలవులు కొంత ఇబ్బందికరంగా మారాయి. ఇప్పటివరకు రాష్ట్రవ్యాప్తంగా ఉన్న వివిధ రకాల మద్యం కంపెనీల నుంచి వచ్చే మద్యానికి ఏపీ బేవరేజెస్ స్టిక్కర్ల ద్వారా విక్రయాలు జరిపేవారు. జూన్ 2న అపాయింటెడ్ డే కావటంతో రెండు రాష్ట్రాలు ఏర్పడనున్నాయి.
 
 దీంతో రాష్ట్ర విభజనకు ముందే బేవరేజస్‌ను రెండు రాష్ట్రాలకు సమ పద్ధతిలో కేటాయించాలని ఎక్సైజ్‌శాఖ నిర్ణయించింది. దీంతో ఈ నెల 27 నుంచి జూన్ 7 వరకు ఈ ప్రక్రియ నిర్వహించనున్నారు. ఈ క్రమంలో విభజన ప్రకియ పూర్తయ్యే వరకు బేవరేజస్ మూసివేయాలని నిర్ణయించి నిల్వలు ఉన్న మద్యాన్ని పూర్తిస్థాయిలో విక్రయించారు. పదిరోజుల పాటు మద్యం సరఫరా ఉండకపోవటంతో అనివార్యంగా కొరత ఏర్పడనుంది.
 
 రోజుకి జిల్లాలో సగటున పదివేల కేసుల విక్రయాలు జరగుతుంటాయి. నెలాఖరు కావటం, లెసైన్స్ కాలపరిమితి ముగియనుండటంతో వైన్‌షాపుల్లో దాదాపు 30 శాతం కంటే తక్కువగానే నిల్వలు ఉన్నాయి. ఈక్రమంలో పదిరోజుల విక్రయాలుకు గాను జిల్లాలో లక్ష కేసుల మద్యం అవసరం ఉంది. కాని కొరత నేపథ్యంలో 10 రోజులకు అదనంగా 50 వేల కేసులను మాత్రమే బేవరేజెస్ అధికారులు మంజూరు చేసి వ్యాపారులకు విక్రయించారు.
 
 వ్యాపారుల వద్ద ఉన్న నిల్వలు, కేటాయింపులు పదిరోజులకు పూర్తిస్థాయిలో సరిపోయే అవకాశం ఉంది. జిల్లాలోని విజయవాడ, గుడివాడ ఎక్సైజ్ సర్కిళ్ల పరిధిలో రెండు బేవరేజ్‌లు ఉన్నాయి. వీటిద్వారా జిల్లాలోని వైన్‌షాపులకు, బార్‌లకు మద్యం సరఫరా జరుగుతుంది. జిల్లాలో షాపులకు అదనపు నిల్వలు కేటాయించామని ఎక్సైజ్‌శాఖ డిప్యూటీ కమిషనర్ గోళ్ల జోసఫ్ తెలిపారు. జిల్లాలో పదిరోజులు మద్యం సరఫరా జరిగే అవకాశం లేకపోవటంతో ముందస్తు ఏర్పాట్లు చేశామని చెప్పారు.
  


 కేబినెట్ భేటీని ఏర్పాటు చేసిన గవర్నర్
 హాజరుకానున్న సలహాదారులు
 గురువారమే మరో రెండు కీలక సమావేశాలు
  
  హైదరాబాద్: రాష్ట్ర విభజనకు సంబంధించి గురువారం మూడు కీలక సమావేశాలు జరగనున్నాయి. ఇందులో రెండు సమావేశాలు హైదరాబాద్‌లో మరొకటి ఢిల్లీలో జరగనుంది. విభజనకు ఐదు రోజులు మాత్రమే గడువు ఉండటంతో సంబంధిత ప్రతిపాదనల ఆమోదం కోసం రాష్ట్ర గవర్నర్ నరసింహన్ గురువారం సాయంత్రం కేబినెట్ సమావేశాన్ని ఏర్పాటు చేశారు. గవర్నర్ సలహాదారులు సలావుద్దీన్ అహ్మద్, ఎ.ఎన్.రాయ్ ఈ భేటీలో పాల్గొంటారు. ప్రభుత్వ ప్రధాన కార్యదర్శి మహంతి కూడా ఈ సమావేశానికి హాజరయ్యే అవకాశం ఉంది. పదో షెడ్యూల్‌లో చేర్చాల్సిన సంస్థలకు సంబంధించిన ప్రతిపాదనలకు ఈ భేటీలో అమోదం తెలుపనున్నారు. అలాగే పోలవరం ముంపు ప్రాంతాలను ఖమ్మం జిల్లా నుంచి సీమాంధ్ర జిల్లాలకు మార్చాల్సి ఉంది.
 
 ఈ ప్రతిపాదనలకు గవర్నర్ ఆమోదం తెలుపనున్నారు. అలాగే రాష్ట్ర విభజనకు సంబంధించిన మిగతా ప్రతిపాదనలన్నింటికీ గ్రీన్‌సిగ్నల్ ఇవ్వనున్నారు. ఈ నేపథ్యంలో ప్రతిపాదనలు పంపాల్సిందిగా గవర్నర్ కార్యాలయం మంగళవారం అన్ని శాఖలకు ఆదేశాలు జారీ చేసింది. మరోవైపు ఉమ్మడి రాష్ట్రంలో చివరి రాష్ట్రస్థాయి బ్యాంకర్ల సమావేశాన్ని (ఎస్‌ఎల్‌బీసీ) సీఎస్ మహంతి గురువారం సాయంత్రం ఏర్పాటు చేశారు. ఇందులో గత ఆర్థిక సంవత్సరంలో వ్యవసాయ రుణ ప్రణాళిక అమలు పురోగతిని వివరించనున్నారు. అలాగే జూన్ నుంచి ఖరీఫ్ సీజన్ ప్రారంభమవుతున్న నేపథ్యంలో రైతులకు వ్యవసాయ రుణాల మంజూరుపై కూడా చర్చించాల్సిందిగా గవర్నర్ ఆదేశాలు జారీ చేశారు. జూన్ 2వ తేదీ నుంచి రాష్ట్ర విభజన నేపథ్యంలోనూ బ్యాంకర్లు ఎప్పటిలాగానే రెండు రాష్ట్రాల రైతులకు వ్యవసాయ రుణాలను మంజూరు చేయాల్సిందిగా సీఎస్ కోరే అవకాశం ఉంది.
 
 ఢిల్లీలో కేంద్ర ఆర్థిక శాఖ సమావేశం
 
 రాష్ట్ర విభజన నేపథ్యంలో ఆర్థిక అంశాలకు సంబంధించి కేంద్ర ఆర్థిక మంత్రిత్వ శాఖ ఉన్నతాధికారులు గురువారం ఉదయం ఢిల్లీలో సమావేశం ఏర్పాటు చేశారు. ఈ భేటీలో సీఎస్ మహంతితో పాటు రాష్ట్ర ఆర్థిక శాఖ ఉన్నతాధికారులు పాల్గొనున్నారు. విభజన నేపథ్యంలో ఉమ్మడి రాష్ట్రంలో గత కొన్నేళ్లుగా కేంద్ర ప్రభుత్వం రుణంగా ఇచ్చిన రూ.17 వేల కోట్లను మాఫీ చేయాల్సిందిగా రాష్ట్ర ప్రభుత్వం కేంద్ర ఆర్థిక శాఖను కోరనుంది. అలాగే ఉమ్మడి రాష్ట్రంలో శాంతిభద్రత ల పరిరక్షణకు, ఇతర సందర్భాల్లో కేంద్ర పోలీసు బలగాలను పంపినందున రాష్ట్ర ప్రభుత్వం కేంద్రానికి రూ.1,000 కోట్లు చెల్లించాల్సి ఉంది. విభజన నేపథ్యంలో ఈ రూ.1,000 కోట్లను కూడా మాఫీ చేయాల్సిందిగా కేంద్రాన్ని కోరనున్నారు. అలాగే కొత్తగా ఏర్పడే రెండు రాష్ట్రాలు ఆర్థిక ఒడిదుడుకులను ఎదుర్కోవాల్సి ఉంటుందని, అందువల్ల రెండు ఆర్థిక సంవత్సరాల పాటు రెండు రాష్ట్రాలకు ద్రవ్య జవాబుదారీ బడ్జెట్ నిర్వహణ చట్టం నిబంధనల నుంచి మినహాయింపు ఇవ్వాల్సిందిగా రాష్ట్ర ప్రభుత్వం కోరనుంది. విభజన నేపథ్యంలో సీమాంధ్ర రాష్ట్రానికి, అలాగే రెండు రాష్ట్రాల్లో వెనుకబడిన ప్రాంతాలకు ఆర్థిక సాయం చేస్తామని మాజీ ప్రధాని మన్మోహన్‌సింగ్ ఇచ్చిన హామీకి అనుగుణంగా ఎంత మేరకు ఆర్థిక సాయం అందిస్తారనే అంశంపై కూడా ఈ భేటీలో చర్చించనున్నారు. సీమాంధ్ర రాష్ట్రానికి ఏర్పడే రెవెన్యూ లోటులో ఎంతవరకు కేంద్ర ప్రభుత్వం ఆర్థిక సాయం అందిస్తుందనే అంశంపైనా చర్చించనున్నారు.
 
  
 నేడు ఢిల్లీలో కీలక భేటీ
 
 రాష్ట్ర స్థాయి కేడర్ ఉద్యోగుల పంపిణీ మార్గదర్శకాలపై చర్చ
 
 హైదరాబాద్: రాష్ట్ర విభజన నేపథ్యంలో రాష్ట్ర స్థాయి కేడర్ ఉద్యోగుల పంపిణీ ముసాయిదా మార్గదర్శకాలను ఖరారు చేసేందుకు బుధవారం ఢిల్లీలో కీలక సమావేశం జరగనుంది. రాష్ట్ర స్థాయి కేడర్ ఉద్యోగుల పంపిణీ మార్గదర్శకాలు, ఉద్యోగుల పంపిణీకి సంబంధించి ఏర్పాటైన రాష్ట్ర సలహా కమిటీ చైర్మన్ కమలనాథన్‌తోపాటు రాష్ట్రప్రభుత్వ ప్రధాన కార్యదర్శి మహంతి, ఆర్థికశాఖ ముఖ్యకార్యదర్శి పీవీ రమేశ్, సాగునీటి శాఖ ముఖ్యకార్యదర్శి నాగిరెడ్డి, కేంద్ర హోం, సిబ్బంది మంత్రిత్వ శాఖల ఉన్నతాధికారులు బుధవారం ఉదయం ఢిల్లీలో 10 గంటలకు సమావేశం కానున్నారు. ఉద్యోగుల పంపిణీ మార్గదర్శకాల ఖరారు అంశంలో భాగమైన రాష్ట్రపతి ఉత్తర్వులు, అధికరణ 371(డి), సీమాంధ్ర ఉద్యోగ సంఘాలు, తెలంగాణ ఉద్యోగ సంఘాల ప్రతినిధులు ఇచ్చిన వినతిపత్రాలపై ఇందులో ప్రధానంగా చర్చించనున్నారు. తద్వారా స్థూలంగా ముసాయిదా మార్గదర్శకాలపై ఒక అవగాహనకు రానున్నారు. అనంతరం వీటిని ప్రజల ముందు చర్చకు పెడతారు. అభ్యంతరాలు, సూచనలు, సలహాలకు రెండువారాల గడువిస్తారు. ఢిల్లీ సమావేశంలో పాల్గొనేందుకు కమలనాథన్, మహంతి, పీవీ రమేశ్, నాగిరెడ్డి మంగళవారం రాత్రి ఢిల్లీకి బయల్దేరి వెళ్లారు. మరోవైపు ఐఏఎస్, ఐపీఎస్, ఐఎఫ్‌ఎస్‌ల పంపిణీ మార్గదర్శకాల ఖరారుకు ఏర్పాటైన ప్రత్యూష్ సిన్హా కమిటీ కూడా బుధవారం ఢిల్లీలో సమావేశం కానుంది. ఇదిలా ఉండగా ఈ నెల 29, 30న ఉద్యోగ సంఘాలతో సమావేశం ఏర్పాటు చేస్తామని సీఎస్ మహంతి మంగళవారం హైదరాబాద్‌లో తనను కలసిన ఉద్యోగ సంఘాల నేతలతో చెప్పారు.
  
  


 28లోగా పాస్ కాని ఉమ్మడి రాష్ట్ర బిల్లులు తెలంగాణ పీఏవోలో చెల్లింపు
 
  హైదరాబాద్: రాష్ట్ర విభజన నేపథ్యంలో ఉమ్మడి రాష్ట్రంలో రాష్ట్ర ప్రభుత్వ ఖజానా చెల్లింపులన్నింటినీ సోమవారం సాయంత్రం నుంచి ఆర్థిక శాఖ నిలుపుదల చేసింది. అత్యంత అత్యవసరం మినహా ఎటువంటి సాధారణ బిల్లుల చెల్లింపులను చేయరు. ఆఖరికి అధికారులు, ఉద్యోగుల టీఏ, డీఏ బిల్లులతో సహా అన్ని రకాల బిల్లుల చెల్లింపులను నిలుపుదల చేయాల్సిందిగా ఆర్థిక శాఖ ఖజానా, ఉప ఖజానా విభాగాలకు ఆదేశాలు జారీ చేసింది.
 
 మే నెల 21వ తేదీ వరకు వచ్చిన బిల్లులన్నింటినీ ఖజానా కార్యాలయాలు సోమవారం సాయంత్రం వరకు చెల్లింపులను పూర్తి చేశాయి. ఈ నెల 28వ తేదీ నాటికి పాస్ కాని ఉమ్మడి రాష్ట్రంలోని బిల్లులను జూన్ నెలలో ఆడిట్ అనంతరం హైదరాబాద్‌లోని తెలంగాణ పీఏవోలు ఆ బిల్లులను స్వీకరించడంతో పాటు చెల్లింపులను చేయాలని ఆర్థిక శాఖ ఉత్తర్వులు జారీ చేసింది.
 
 జూన్ 2 నుంచి ఆర్థిక శాఖతో పాటు, ట్రెజరీ అండ్ అకౌంటెంట్ విభాగాలు ఇటు తెలంగాణ, అటు ఆంధ్రప్రదేశ్ ప్రభుత్వాలకు వేర్వేరుగా పనిచేయనున్నాయి. ప్రస్తుతం నాంపల్లిలోని ఎం.జె. రోడ్డులో గల డెరైక్టర్ అండ్ వర్క్స్ అకౌంటెంట్ కార్యాలయంలోనే ఈ విభాగాలు పని చేస్తాయి. నగరంలోని ఇన్సూరెన్స్ భవనంలో ఆంధ్రప్రదేశ్ రాష్ట్రానికి ప్రత్యేకంగా ట్రెజరీ కార్యాలయం ఏర్పాటు చేయనున్నారు. ఆంధ్రప్రదేశ్‌కు చెందిన వాణిజ్య పన్నులు, ఎక్సైజ్, గనులు పన్నులతో పాటు ఉద్యోగుల పెన్షన్ల చెల్లింపులను ప్రత్యేకంగా ఏర్పాటు చేసిన ట్రెజరీ నుంచి నిర్వహించాలి.
 
 ఆంధ్రప్రదేశ్ ట్రెజరీ కార్యకలాపాలను జూన్ 2వ తేదీ నుంచి గన్‌ఫౌండ్రీలో గల ఎస్‌బీఐ నిర్వహించనుంది. తెలంగాణ ట్రెజరీ కార్యకలాపాలను జూన్ 2వ తేదీ నుంచి రాష్ట్రపతి రోడ్‌లోని ఎస్‌బీహెచ్, ఉస్మాన్‌గంజ్‌లోని ఎస్‌బీఐ బ్రాంచ్‌లు నిర్వహిస్తాయి.  ఆర్థిక శాఖ జూన్ 2వ తేదీ నుంచి తెలంగాణ, ఆంధ్రప్రదేశ్ రాష్ట్రాలకు వేర్వేరుగా వెబ్‌సైట్లను అమల్లోకి తేనుంది. అలాగే జూన్ 2వ తేదీ నుంచి ట్రెజరీ వెబ్‌సైట్లు తెలంగాణ, ఆంధ్రప్రదేశ్ రాష్ట్రాలకు వేర్వేరుగా పనిచేస్తాయి. తెలంగాణ రాష్ట్రానికి లీడ్ బ్యాంకుగా స్టేట్ బ్యాంక్ ఆఫ్ హైదరాబాద్, ఆంధ్రప్రదేశ్ రాష్ట్రానికి లీడ్ బ్యాంకుగా ఆంధ్రా బ్యాంక్ వ్యవహరించనున్నాయి.
  


 రాష్ట్ర విభజన నేపథ్యంలో ఎక్సైజ్ శాఖ నిర్ణయం
 
  హైదరాబాద్: రాష్ట్ర విభజన.. మద్యం దుకాణదారులకు బంపర్ బొనాంజా ఇవ్వబోతోంది. వైన్‌షాపుల లెసైన్స్ గడువు జూన్ 30తో ముగుస్తున్నప్పటికీ.. అదనపు ఫీజు చెల్లించి మరో మూడు నెలల పాటు మద్యం అమ్మకాలు కొనసాగించుకునే వెసులుబాటు రాబోతుంది. జూన్ 2 నుంచి రాష్ట్ర విభజన అధికారికంగా అమలులోకి వచ్చి తెలంగాణ, ఆంధ్రప్రదేశ్ కొత్త రాష్ట్రాలు ఏర్పాటవుతుండటంతో కీలక అంశాల్లో నిర్ణయాలు తీసుకునేందుకు కొంత సమయం పడుతుందని అధికార వర్గాలు చెప్తున్నాయి.
 
 మద్యం లెసైన్సులకు సంబంధించి ప్రొహిబిషన్, ఎక్సైజ్ శాఖ పాటించే తుది గడువు ‘జూన్ 30’ లోగా రెండు రాష్ట్రాల్లో కొత్త ప్రభుత్వాలు కొత్త మద్యం విధానాన్ని రూపొందించి అమలు చేయటం కష్టమని అధికార యంత్రాంగం భావిస్తోంది. రెండు రాష్ట్రాలకు ప్రధాన ఆదాయ వనరుగా ఉండే ఎక్సైజ్ శాఖ విషయంలో ప్రస్తుత అధికారులు కీలక నిర్ణయాలు తీసుకునే పరిస్థితి కూడా లేదు. దీంతో.. ఈ ఏడాది ప్రస్తుతం ఉన్న మద్యం దుకాణాల లెసైన్సులనే మరో మూడు నెలలు పొడిగించాలని నిర్ణయించినట్లు సమాచారం.
  


   సాక్షి ప్రతినిధి, ఖమ్మం: జిల్లాలో పనిచేస్తున్న అఖిల భారత సర్వీసులకు చెందిన అధికారుల్లో ఎక్కువ మంది ‘తెలంగాణ’ కేడర్‌నే ఎంచుకున్నట్టు సమాచారం. రాష్ట్ర విభజన నేపథ్యంలో అవిభక్త ఆంధ్రప్రదేశ్‌లోని ఐఏఎస్‌లు, ఐపీఎస్‌లు, ఐఎఫ్‌ఎస్‌లను తెలంగాణ, ఆంధ్రప్రదేశ్ రాష్ట్రాలకు పంపకం చేసే ప్రక్రియలో భాగంగా తమ ప్రాధాన్యతను తెలియజేస్తూ వారు ప్రభుత్వానికి సమాచారం ఇచ్చినట్టు తెలిసింది. జిల్లాలో ఉన్న ఇద్దరు ఐపీఎస్ అధికారులు తెలంగాణ కేడర్‌లోనే పనిచేస్తామని సాధారణ పరిపాలనా విభాగానికి సమచారం అందించారు. జిల్లా పోలీస్ బాస్ ఎ.వి.రంగనాథ్, ఏఎస్పీ ప్రకాశ్‌రెడ్డి ఇద్దరూ తెలంగాణ కేడర్‌నే ఎంచుకున్నారని విశ్వసనీయ వర్గాల ద్వారా తెలిసింది.
 
 ఇక ఐఏఎస్‌ల విషయానికి వ స్తే జాయింట్ కలెక్టర్ సురేంద్రమోహన్‌ది నల్లగొండ జిల్లా. ఆయన విద్యాభ్యాసమంతా ఇక్కడే జరిగింది. ఈ పరిస్థితిలో ఆయన కూడా తన ఆప్షన్ తెలంగాణే అని, ఇక్కడే పనిచేస్తానని ప్రభుత్వానికి తెలియజేసినట్టు సమాచారం. కలెక్టర్ శ్రీనివాస శ్రీనరేశ్ ఏ కేడర్‌ను ఎంచుకున్నారనే విషయంలో కొంత స్పష్టత రావాల్సి ఉంది. ఐటీడీఏ పీవో దివ్య తమిళనాడుకు చెందిన అధికారిణి కాగా, కలెక్టర్ ముల్కీ నిబంధనల ప్రకారం తెలంగాణకే చెందుతారని అధికారవర్గాలు అంటున్నాయి. ఇక ఐఎఫ్‌ఎస్ అధికారులుగా ఉన్న కన్జర్వేటర్ ఆనందమోహన్ ఏ కేడర్‌ను ఎంచుకున్నారనేది తెలియాల్సి ఉంది. డీఎఫ్‌వోగా ఉన్న ప్రసాద్ మాత్రం తాను తెలంగాణ కేడర్‌లోనే పనిచేస్తానని తన ప్రాధాన్యతను ప్రభుత్వానికి తెలియజేశారని సమాచారం.
 
  వీరందరినీ తమ ఆప్షన్ తెలియజేయాలని కోరుతూ ప్రభుత్వం ఈనెల 9న సమాచారం పంపి, 16 వరకు గడువిచ్చింది. ఈ గడువులో అధికారులంతా తమ ఆప్షన్‌ను తెలియజేశారు. అయితే, తమ ప్రాధాన్యతను అయితే అడిగారు కానీ... దాని ప్రకారమే పంపకాలు చేస్తారా అనేది అర్థం కావడం లేదని అధికారులంటున్నారు. లాటరీ ద్వారా ఆలిండియా అధికారులను పంపకం చేస్తారని కొందరు చెపుతున్నారని, అలాంటి పరిస్థితుల్లో తమను ప్రాధాన్యం ఎందుకు అడిగారో అర్థం కావడం లేదని వారంటున్నారు. మరోవైపు ఆంధ్రప్రదేశ్‌లో పుట్టి ఆంధ్రప్రదేశ్ కేడర్‌కు ఎంపికయిన ‘ఇన్‌సైడర్స్’కి ఆప్షన్ ఏమీ లేదని, వారు పుట్టిన జిల్లా ఎక్కడ ఉంటే ఆ కేడర్ కిందకు తీసుకుంటారనే చర్చ కూడా జరుగుతోంది.
 
 ఈ పరిస్థితుల్లో వేరే రాష్ట్రానికి చెందిన ఐటీడీఏ పీవో దివ్య కేడర్ ఎంపిక చేయడంలో ఏం జరుగుతుందనేది తెలియాల్సి ఉంది. ఆమె మాత్రం తెలంగాణ కేడర్‌లోనే ఉండేందుకు ఆసక్తి చూపుతున్నట్టు సమాచారం. అయితే, ఆలిండియా సర్వీసు అధికారుల పంపకానికి సంబంధించిన మార్గదర్శకాలు ఇంకా విడుదల కాలేదని, ఆ మార్గదర్శకాలు ఎలా ఉంటాయో చూస్తేనే కానీ తాము ఏ కేడర్ కిందకు వస్తామో స్పష్టత రాదని కొందరు అధికారులు చెపుతున్నారు. తెలంగాణ రాష్ట్ర ఏర్పాటుకు నిర్దేశించిన అపాయింటెడ్ డే దగ్గర పడుతున్న నేపథ్యంలో జిల్లాకు చెందిన ఆలిండియా సర్వీసు అధికారులు ఏ కేడర్ కిందకు వస్తారో... ఎవరిని ఏ రాష్ట్రానికి పంపుతారో వేచిచూడాల్సిందే.


 జూన్ 2నుంచి వ్యయానికి గవర్నర్ గ్రీన్‌సిగ్నల్
 ఆంధ్రప్రదేశ్‌కు రూ. 34, 595 కోట్లు
 తెలంగాణకు రూ. 26,516 కోట్లు
 విభజన ప్రక్రియపై నరసింహన్ సమీక్ష
 రాష్ర్ట విభజన చట్ట సవరణకు కేంద్రానికి పలు ప్రతిపాదనలు
  సలహా కమిటీ పునర్వ్యవస్థీకరణకు నిర్ణయం
  
 హైదరాబాద్: రాష్ట్ర విభజన నేపథ్యంలో జూన్ 2 నుంచి నాలుగు నెలల కాలానికి తెలంగాణ, ఆంధ్రప్రదేశ్‌లకు సంబంధించిన వేర్వేరు బడ్జెట్లను గవర్నర్ నరసింహన్ ఆమోదించారు. ఆంధ్రప్రదేశ్ రాష్ట్రానికి రూ. 34,595 కోట్లు, తెలంగాణకు రూ. 26,516 కోట్లు కేటాయించారు. ఇందులో ఆంధ్రప్రదేశ్  ఉద్యోగుల వేతనాలు, ప్రభుత్వ నిర్వహణకు రెవెన్యూ బడ్జెట్ కింద రూ. 28,626 కోట్లు, ఆస్తుల కల్పనకు రూ. 3,882 కోట్లు కేటాయించారు. బడ్జెట్ లోటును ఆ రాష్ర్ట ప్రభుత్వం రుణాల రూపంలో భర్తీ చేసుకోవాల్సి ఉంటుంది. అలాగే తెలంగాణ రాష్ట్రానికి రెవెన్యూ బడ్జెట్ కింద రూ. 21,295 కోట్లు, ఆస్తుల కల్పన కోసం రూ. 3,046 కోట్లు మంజూరు చేశారు. ఇక్కడ కూడా మిగిలిన నిధులను తెలంగాణ ప్రభుత్వం రుణంగా సమకూర్చుకోవాల్సి ఉంటుంది. ఆదివారం రాజ్‌భవన్‌లోని సుధర్మ బ్లాక్‌లో ప్రభుత్వ ప్రధాన కార్యదర్శి మహంతితోపాటు ఆర్థిక శాఖ ఉన్నతాధికారులతో గవర్నర్ నరసింహన్ సమావేశం నిర్వహించారు. ఆరు నెలల కాలానికి ఓటాన్ అకౌంట్ బడ్జెట్‌ను ఇప్పటికే శాసనసభ ఆమోదించిన విషయం విదితమే. కాగా రాష్ర్టపతి పాలన సందర్భంగా రెండు నెలల బడ్జెట్‌ను వ్యయం చేయగా.. మిగిలిన నాలుగు నెలల కాలానికి ఈ బడ్జెట్‌ను ఇరు రాష్ట్రాలకు గవర్నర్ కేటాయించారు. కాగా రాష్ట్ర పునర్వ్యవస్థీకరణ చట్టంలోని షెడ్యూల్ పదిలో ఉన్న 107 సంస్థలకు అదనంగా మరో 38 సంస్థలను చేర్చి కేంద్ర ప్రభుత్వ ఆమోదం కోసం పంపించాలని ఈ సందర్భంగా నిర్ణయించారు.
 
 ఇక కృష్ణా నదీ జలాల నిర్వహణ బోర్డుకు సంబంధించిన ప్రతిపాదనలు అసంబద్ధంగా ఉన్నట్లు నీటిపారుదల శాఖ ముఖ్య కార్యదర్శి నాగిరెడ్డి.. గవర్నర్ దృష్టికి తీసుకుని వచ్చారు. కృష్ణా, గోదావరి నదులపై నిర్మిస్తున్న 16 ప్రాజెక్టుల సమాచారాన్ని షెడ్యూల్ తొమ్మిదిలో చేర్చలేదన్నారు. నాగిరెడ్డి చేసిన ప్రతిపాదనను కూడా గవర్నర్ ఆమోదించి.. కేంద్రానికి పంపించారు. ఆ మేరకు చట్ట సవరణ చేయాలని కోరనున్నారు. రాష్ట్ర విభజనకు సంబంధించి ఫైళ్ల విభజన, వాటి డిజిటలైజేషన్ ప్రక్రియ పూర్తయిందని సీఎస్ వివరించారు. రెండు రాష్ట్రాలకు సంబంధించిన స్థిర, చరాస్తుల పంపిణీ కూడా పూర్తయినట్లు తెలిపారు. వాహనాల కేటాయింపు ప్రక్రియ కూడా ముగిసిందన్నారు. రాష్ట్ర విభజనకు సంబంధించి ఏర్పాటైన కమిటీలన్నీ తమ నివేదికలను అందించాయని, వాటిని కేంద్రానికి పంపిస్తున్నట్లు సీఎస్ చెప్పారు. సలహా, అపెక్స్ కమిటీలను పునర్వ్యవస్థీకరిస్తున్నట్లు కూడా ఆయన వివరించారు.
  
 సలహా కమిటీలకు చైర్మన్‌గా కమలనాథన్ వ్యవహరిస్తారు. సభ్యులుగా ఇరు రాష్ట్రాల ప్రభుత్వ ప్రధాన కార్యదర్శులు, హోం, ఆర్థిక, న్యాయ శాఖల కార్యదర్శులు, రాష్ట్ర పునర్వ్యవస్థీకరణ శాఖ కార్యదర్శి ఉంటారు. అపెక్స్ కమిటీలో ఇరు రాష్ట్రాల ప్రభుత్వ ప్రధాన కార్యదర్శులు కో చైర్మన్లుగా, ప్రణాళిక, హోం, ఆర్థిక, నీటిపారుల, ఇంధన, ఉన్నత విద్య, పరిశ్రమలు, పబ్లిక్ ఎంటర్‌ప్రైజెస్, రెవెన్యూ విభాగాల కార్యదర్శులు సభ్యులుగా ఉంటారు. షెడ్యూల్ తొమ్మిదిలోని పరిశ్రమలు, కార్పొరేషన్లు.. వాటి విభజన ప్రతిపాదనలను ముగ్గురు నిపుణుల కమిటీకి ఇవ్వాలని సీఎస్ సూచించారు. అఖిల భారత, రాష్ట్ర సర్వీసు అధికారుల సమస్యలను కూడా ఈ సందర్భంగా సమీక్షించారు. ప్రభుత్వ క్వార్టర్ల విభజన కూ గవర్నర్ ఆమోదం తెలిపారు.
  
  


 గవర్నర్ ఆధ్వర్యంలో కేబినెట్ ప్రత్యేక సమావేశం
 
 శాశ్వతంగా భవనాల కేటాయింపు
 పోలవరం ముంపు ప్రాంతాల్లో మార్పులు
 షెడ్యూల్ 9, 10లోని సంస్థల విభజన
 పదేళ్ల పాటు ప్రస్తుత ప్రవేశ పరీక్షల విధానం
 పలు విభజన కమిటీల ప్రతిపాదనలకు ఆమోదం
  
  హైదరాబాద్: రాష్ట్ర విభజన ప్రతిపాదనల ఆమోదానికి గవర్నర్ నరసింహన్ ఆదివారం కేబినెట్ సమావేశాన్ని ఏర్పాటు చేశారు. కేబినెట్ సమావేశాన్ని గవర్నర్ ఏర్పాటు చేయడం ఏమిటని ఆశ్యర్యపడుతున్నారా? రాష్ట్రపతి పాలనలో గవర్నర్ సీఎంగా, ఆయన సలహాదారులు మంత్రులుగా వ్యవహరిస్తారు. ఈ నేపథ్యంలోనే విభజన ప్రతిపాదనలపై చర్చించి ఆమోదం తెలపడానికి ఆదివారం సాయంత్రం రాజ్‌భవన్‌లో కేబినెట్ సమావేశాన్ని ఏర్పాటు చేశారు. ఈ సమావేశంలో గవర్నర్ సలహాదారులు సులావుద్దీన్ అహ్మద్, ఏ.ఎన్.రాయ్, ప్రభుత్వ ప్రధాన కార్యదర్శి మహంతి పాల్గొంటారు. ఈ సమావేశంలో అన్ని శాఖలకు  చెందిన విభజన ప్రతిపాదనలను ఆమోదించనున్నారు. సచివాలయంతో పాటు రాజధానిలోని ప్రభుత్వ శాఖలు, సంస్థల భవనాలను ఇరు రాష్ట్రాలకు తాత్కాలికంగా కేటాయింపులు చేస్తూ శుక్రవారం ప్రభుత్వం ఉత్తర్వులు జారీ చేసింది. అయితే గవర్నర్ నరసింహన్ తాత్కాలిక కేటాయింపులు కాకుండా శాశ్వత కేటాయింపులు చేయాలని నిర్ణయించడంతో జారీ చేసిన జీవోలు ఓపెన్ కాకుండా కాన్ఫిడెన్షియల్‌గా ఉంచారు. ఆదివారంనాటి సమావేశంలో సచివాలయంతోపాటు పలు శాఖల భవనాలను శాశ్వత కేటాయింపులుగా ఆమోదం తెలుపుతారు.
 
   భద్రాచలం డివిజన్‌లోని పోలవరం ముంపు గ్రామాలను ఆంధ్రప్రదేశ్‌లో కలపాలని కేంద్రం నిర్ణయించిన విషయం తెలిసిందే. గతంలో పోలవరం ప్రాజెక్టు ముంపు గ్రామాలుగా జారీ చేసిన జీవోలో మరికొన్ని గ్రామాలను చేర్చాల్సి ఉంది. ఈ మార్పులకు సంబంధించిన ప్రతిపాదనలకు గవర్నర్ నిర్వహించే కేబినెట్ సమావేశం ఆమోదం తెలుపుతుంది. అలాగే రాష్ట్రం విడిపోయిన తరువాత కూడా రెండు రాష్ట్రాల్లో పదేళ్ల పాటు విద్యా సంస్థల్లో ప్రవేశపరీక్ష ప్రస్తుత విధానంలోనే కొనసాగే ప్రతిపాదనలకు కేబినెట్ ఆమోదం తెలుపుతుంది.
   రాష్ట్ర పునర్‌వ్యవస్థీకరణ చట్టంలోని షెడ్యూల్ 9, 10లో గల సంస్థలను రెండుగా విభజించడంతో పాటు ఏడాది పాటు అవే సంస్థలు ఇరు రాష్ట్రాలకు సేవలందించే ప్రతిపాదనలకు కేబినెట్ ఆమోదం తెలపనుంది.  అలాగే పలు శాఖలకు చెందిన విభజన కమిటీల ప్రతిపాదనలకు కేబినెట్ ఆమోదం తెలపనుంది.
 
   తెలంగాణ, ఆంధ్రప్రదేశ్ రాష్ట్రాల ఫైళ్ల విభజన ప్రతిపాదనలకు కేబినెట్ ఆమోదం తెలుపుతుంది. ఫైళ్ల విభజనతో పాటు ఇరు రాష్ట్రాలకు చెందిన ఉమ్మడి కరెంట్ ఫైళ్ల స్కానింగ్ కూడా పూర్తి అయింది. 4.53 కోట్ల పేజీలను స్కానింగ్ చేశారు. ఉమ్మడి రాజధాని హైదరాబాద్‌లో 42 వేల ప్రభుత్వ వాహనాలున్నట్లు గుర్తించారు. ఈ వాహనాలను రెండు రాష్ట్రాలకు పంపిణీ చేయనున్నారు. అలాగే చరాస్తులు 4.69 లక్షలు కాగా స్థిరాస్తులు 66 వేలుగా గుర్తించారు.
 
  శాఖల విలీనం, విభాగాల కుదింపు ఇరు రాష్ట్రాల సీఎంల ముందు రాష్ట్ర విభజన నేపథ్యంలో శాఖల విలీనం, విభాగాల కుదింపు ప్రతిపాదనలను తెలంగాణ, ఆంధ్రప్రదేశ్ సీఎంల ముందు ఉంచాలని అధికారులు నిర్ణయించారు. రాష్ట్ర విభజన నేపథ్యంలో తెలంగాణ, ఆంధ్రప్రదేశ్ రాష్ట్రాల్లో మంత్రుల సంఖ్య తక్కువగా ఉంటుంది. ఈ నేపథ్యంలో పంచాయతీరాజ్-గ్రామీణాభివృద్ధి శాఖలను ఒకే శాఖ కింద విలీనం చేయడానికి అధికారులు ప్రతిపాదించారు. అలాగే విభాగాల సంఖ్య కుదింపునకు ప్రతిపాదించారు. కొత్త రాష్ట్రాల్లోని సీఎంల నిర్ణయం మేరకు శాఖల విలీనం, విభాగాల కుదింపు ఆధారపడి ఉంటుంది.
  
  ఫైళ్ల విభజన ఇలా...
  
 ఉమ్మడి రాష్ట్రంలో కరెంట్ ఫైళ్లు    15.48 లక్షలు
 ఆంధ్రప్రదేశ్ ఫైళ్లు    6.46 లక్షలు
 తెలంగాణ ఫైళ్లు    6.26 లక్షలు
 రెండు రాష్ట్రాలకు చెందిన ఫైళ్లు    2.76 లక్షలు
 ఉమ్మడి రాష్ట్రంలో డిస్పోజల్ ఫైళ్లు    28.75 లక్షలు
 ఆంధ్రప్రదేశ్ ఫైళ్లు    8.93 లక్షలు
 తెలంగాణ ఫైళ్లు    10.33 లక్షలు
 రెండు రాష్ట్రాలకు చెందిన ఫైళ్లు    9.49 లక్షలు
  


 గవర్నర్ ఆమోదించినా, పెండింగ్‌లో పెట్టిన అధికారులు
 జీవో జారీలో జాప్యం
 బిల్లుల సమర్పణకు గడువు 17 వరకే
 ఐఏఎస్‌లకు మాత్రం డీఏ వచ్చేసింది    
  
  హెదరాబాద్: రాష్ట్ర ప్రభుత్వ ఉద్యోగుల కరువు భత్యం (డీఏ) ఫైలును ఆర్థిక శాఖ తొక్కిపెట్టింది. రాష్ట్ర విభజన నేపథ్యంలో ఉమ్మడి రాష్ట్రంలోనే ఉద్యోగులు, పెన్షనర్లకు డీఏ మంజూరు చేస్తూ గవర్నర్ నరసింహన్ ఫైలుపై సంతకం చేశారు. ఇది జరిగి నాలుగు రోజులు గడిచినా, ఆర్థిక శాఖ జీవో జారీ చేయకుండా ఫైలును పెండింగ్‌లో పెట్టింది. వచ్చే నెల 2న రాష్ట్రం రెండుగా విడిపోతున్న నేపథ్యంలో ఉద్యోగుల జీతాలు, పెన్షనర్లకు పెన్షన్‌ను ఈనెల 24నే చెల్లించేందుకు ఆర్థిక శాఖ జీవో కూడా జారీ చేసింది. ఈ నేపథ్యంలో జనవరి నుంచి జూన్ వరకు ఉద్యోగులు, పెన్షనర్లకు డీఏ కూడా ఉమ్మడి రాష్ట్రంలోనే ఇవ్వాలన్న ఉద్యోగుల కోరికను ‘సాక్షి’ వెల్లడించింది. దీంతో ఆర్థిక శాఖ 8.56 శాతం డీఏ మంజూరు ఫైలును గవర్నర్‌కు పంపింది. గవర్నర్ వెంటనే దానికి ఆమోదం తెలిపారు. ఎన్నికల కోడ్ అమలులో ఉన్నందున, గవర్నర్ సూచన మేరకు ఫైలును రాష్ట్ర ప్రధాన ఎన్నికల అధికారి భన్వర్‌లాల్ ఆమోదం కోసం పంపారు. భన్వర్‌లాల్ వెంటనే ఆమోదించారు. ఈ ఫైలు శుక్రవారం ఆర్థిక శాఖకు చేరింది. అప్పటి నుంచి ఆర్థిక శాఖ జీవో జారీ చేయకుండా ఫైలును పెండింగ్‌లో పెట్టింది. మరో పక్క ఉమ్మడి రాష్ట్రంలో ఉద్యోగుల వేతనాలు, పెన్షన్ల చెల్లింపునకు బిల్లుల సమర్పణ గడువు ఈ నెల 17తో ముగుస్తోంది. అంటే గడువు ఇంకా 3 రోజులే ఉంది.
 
 ఈలోగా డీఏ జీవోను ఇవ్వకపోతే ఉద్యోగులకు కరువు భత్యం శాతం లెక్కకట్టి బిల్లుల సమర్పణ సాధ్యం కాదు. డీఏ ఇవ్వకపోతే గవర్నర్ సంతకానికి విలువ ఉండదని, ఆ ఉద్దేశంతోనే జీవో జారీ చేయకుండా ఆర్థిక శాఖ జాప్యం చేస్తోందని ఉద్యోగులు ఆవేదన వ్యక్తం చేస్తున్నారు. ఇప్పుడు డీఏ జీవో జారీ కాకపోతే, వచ్చే నెలలో రాష్ట్ర విభజన జరిగాక సంబంధిత రాష్ట్ర ప్రభుత్వాలే డీఏ చెల్లించాల్సి వస్తుంది. అంటే డీఏ మరింత జాప్యమవుతుంది. గవర్నర్ వెంటనే జోక్యం చేసుకుని ఉమ్మడి రాష్ట్రంలోనే డీఏ మంజూరుకు వీలుగా వెంటనే జీవో జారీ చేయించాలని ఉద్యోగులు కోరుతున్నారు. ఇదిలా ఉండగా ఐఏఎస్ అధికారులకు మాత్రం డీఏ మంజూరయ్యింది. ఉమ్మడి రాష్ట్రంలోనే ఐఏఎస్‌లు డీఏ తీసుకోనున్నారు.