బాలుడిపై మహిళ లైంగిక వేధింపులు

అజిత్‌సింగ్‌నగర్‌(విజయవాడ సెంట్రల్‌): పదిహేనేళ్ల బాలుడిపై ఓ మహిళ(45) లైంగిక వేధింపులకు పాల్పడింది. ఈ ఘటన శనివారం కృష్ణా జిల్లాలో వెలుగు చూసింది. పోలీసులు తెలిపిన వివరాల ప్రకారం.. విజయవాడలోని అజిత్‌సింగ్‌నగర్‌ వాంబే కాలనీకి చెందిన ఓ మహిళ(45)కు ఇద్దరు కుమార్తెలున్నారు. ఆమె భర్త ఎనిమిదేళ్ల కిందట చనిపోగా.. కొంత కాలం కిందట ఇద్దరు కుమార్తెలకు వివాహం చేసింది. ఈ నేపథ్యంలో ఒంటరిగా ఉంటున్న ఆమె కన్ను.. తన ఎదురింటిలో ఉంటున్న బాలుడిపై పడింది. 

టీవీ సరిగా రావడం లేదని.. ఫ్యాను తిరగడం లేదంటూ బాలుడిని తరచూ ఇంటిలోకి పిలిచి లైంగిక వేధింపులకు పాల్పడుతుండేది. ఆమె చేష్టలతో విసిగిపోయిన ఆ బాలుడు గతేడాది వేరే ఊరిలో ఉంటున్న తన బంధువుల ఇంటికి వెళ్లి అక్కడే పదో తరగతి పూర్తిచేసి ఇటీవల తిరిగి ఇంటికి వచ్చాడు. ఆ మహిళ మళ్లీ బాలుడిని తన ఇంటికి రమ్మని పదేపదే పిలవడం.. రాత్రి సమయంలో అపార్ట్‌మెంట్‌ పై నిద్రిస్తున్న బాలుడి వద్దకు వెళ్లి లైంగికంగా వేధిస్తుండేది. ఆమె చేష్టలను గమనించిన బాలుడి స్నేహితులు..

 పది రోజుల కిందట ఈ విషయాన్ని అతని తల్లిదండ్రుల దృష్టికి తీసుకెళ్లారు. దీంతో వారు ఆ మహిళకు దేహశుద్ధి చేశారు. కాగా, తనను అకారణంగా కొడుతున్నారంటూ ఆమె ‘నున్న’ పోలీస్‌స్టేషన్‌లో ఫిర్యాదు చేసింది. దీనిపై విచారణ చేపట్టిన పోలీసులు ఆ బాలుడికి, మహిళకు వైద్య పరీక్షలు నిర్వహించగా.. అసలు విషయం బయటపడింది. దీంతో నిందితురాలిపై పోలీసులు.. ఫోక్సా చట్టం కింద కేసు నమోదు చేశారు. మహిళను అరెస్టు చేసి కోర్టులో హాజరపరచగా.. న్యాయస్థానం ఆమెకు 15 రోజుల రిమాండ్‌ విధించింది.