వొడాఫోన్‌ డీల్‌: ఐటీ భారీ జరిమానా

సాక్షి, న్యూఢిల్లీ : వొడాఫోన్‌ భారీ డీల్‌కు సంబంధించి పన్ను సరిగ్గా కట్టనందుకు బిలీనియర్‌ లీ కా-సింగ్‌కు చెందిన హచిసన్‌ హోల్డింగ్స్‌ లిమిటెడ్‌కు ఆదాయపు పన్ను శాఖ జారీ మొత్తంలో జరిమానా విధించింది. రూ.7900 కోట్ల పన్ను డిమాండ్‌కు అంతేమొత్తంలో పెనాల్టీ వేసింది. పన్ను, వడ్డీ, జరిమానాలు మొత్తం కలిపి రూ.32,320 కోట్లు చెల్లించాలని హచిసన్‌ను ఆదాయపు పన్ను శాఖ ఆదేశించింది. భారత్‌లో తమ మొబైల్‌ వ్యాపారాలను 11 బిలియన్‌ డాలర్లకు 2007లో యూకే వొడాఫోన్‌ గ్రూప్‌కు విక్రయించారు. ఈ డీల్‌లో హచిసన్‌ టెలికాం భారీగా లబ్ది పొందిందని, కానీ పన్నులు సరిగ్గా చెల్లించలేదని తెలిసింది. ఈ నోటీసుల్లో పన్ను రూ.7900 కోట్లు కాగ, రూ.16,430 కోట్లు వడ్డీ, రూ.7900 కోట్లు పెనాల్టీ కింద తమకు చెల్లించాలని ఆదాయపు పన్ను శాఖ నోటీసులు జారీచేసినట్టు హచిసన్‌ తన హాంకాంగ్‌ స్టాక్‌ ఎక్స్చేంజ్‌ ఫైలింగ్‌లో పేర్కొంది.