అమెరికాలో విప్రో ఎన్ని ఉద్యోగాలిచ్చిందో తెలుసా?

బెంగళూరు : అమెరికాలో దేశీయ టెక్ కంపెనీలు ఉద్యోగాలు కల్పించడం లేదంటూ వస్తున్న ఆరోపణలకు ధీటుగా తాము కల్పిస్తున్న ఉద్యోగాలపై టెక్ దిగ్గజాలు ప్రకటనలు చేస్తున్నాయి. 2017 ఆర్థిక సంవత్సరంలో అమెరికాలో 3000 మంది ఉద్యోగులను నియమించుకోనున్నట్టు విప్రో ప్రకటించింది. దీంతో ఆ దేశంలో తమ ఉద్యోగుల సంఖ్యను 14వేలకు పైగా పెంచుకున్నట్టు తెలిపింది. కంపెనీ సమర్పించిన వార్షిక రిపోర్టులో ఈ విషయాలు వెల్లడించింది. అంతేకాక 2018 ఆర్థికసంవత్సరం తొలి క్వార్టర్ ముగిసేలోపల అమెరికాలోని ఉద్యోగుల్లో సగానికి పైగా ఉద్యోగులను స్థానికులనే ఉంచుకుంటామని బెంగళూరుకు చెందిన ఈ ఐటీ సంస్థ పేర్కొంది. హెచ్-1బీ వీసా ప్రొగ్రామ్ లో అమెరికా కఠినతరమైన నిబంధనలు తీసుకురావడంతో కంపెనీలు స్థానిక ఉద్యోగులను విపరీతంగా నియమించుకుంటున్న సంగతి తెలిసిందే. ఈ క్రమంలోనే అమెరికాలో కొత్త ఉద్యోగాలను కూడా కల్పిస్తున్నాయి.