TV
ధనమేరా అన్నిటికీ మూలం...
పరిపరి శోధన
‘ధనమేరా అన్నిటికీ మూలం...’ అని తెలుగు సినీకవి ఏనాడో చెప్పిన మాట అక్షర సత్యమని ఒక తాజా అధ్యయనంలో తేలింది. ముఖ్యంగా డబ్బు మనుషుల్లో స్వార్థాన్ని పెంచుతుందని ఈ అధ్యయనాన్ని నిర్వహించిన పరిశోధకులు చెబుతున్నారు. అమెరికాలోని మిన్నెసోటా వర్సిటీకి చెందిన కార్ల్‌సన్ స్కూల్ ఆఫ్ మేనేజ్‌మెంట్, ఇల్లినాయీ వర్సిటీ పరిశోధకులు వివిధ దేశాలకు చెందిన 550 మంది చిన్నారులపై పరీక్షలు జరిపి ఈ విషయాన్ని నిగ్గు తేల్చారు.
మూడు నుంచి ఆరేళ్ల వయసు లోపు పిల్లల చేతికి డబ్బు ఇచ్చి, వారి ప్రవర్తనను నిశితంగా పరిశీలించారు. ఆ వయసు చిన్నారులకు డబ్బు విలువ అర్థం కాకున్నా, చేతికి డబ్బు వచ్చే సరికి వారి ప్రవర్తన స్వార్థపూరితంగా మారిందని ఈ పరిశోధకులు చెబుతున్నారు.
