చిత్రలహరి... ఇది టీవీ ప్రోగ్రామ్‌ కాదు

‘చిత్రలహరి’... కేబుల్‌ టీవీ రాకముందు దూరదర్శన్‌ ప్రేక్షకులకు పరిచయం అవసరం లేని ప్రోగ్రామ్‌. ప్రతి శుక్రవారం పసందైన పాటలతో టీవీలకు కళ్లప్పగించేలా చేసిన ఈ ప్రోగ్రామ్‌ పేరు మళ్లీ సీన్లోకొచ్చింది. అయితే చిన్నితెరపై కాదు.. ఈసారి పెద్ద తెరకొచ్చింది. ‘నేను శైలజ’, ‘ఉన్నది ఒక్కటే జిందగీ’ వంటి హార్ట్‌ టచింగ్‌ మూవీస్‌ తెరకెక్కించిన కిశోర్‌ తిరుమల దర్శకత్వంలో నాని హీరోగా ఓ సినిమా రూపొందనున్న విషయం తెలిసిందే. ఆ సినిమాకు ‘చిత్రలహరి’ అనే టైటిల్‌ను పరిశీలిస్తున్నట్టు ఫిల్మ్‌నగర్‌ సమాచారం.

మైత్రీ మూవీ మేకర్స్‌ బ్యానర్‌పై నవీన్‌ ఎర్నేని, మోహన్‌ చెరుకూరి, రవిశంకర్‌ ఈ సినిమాను నిర్మించనున్నారు. ఫిబ్రవరి చివరి వారంలో ఈ సినిమా సెట్స్‌కు వెళ్లనుందట. ప్రస్తుతం నాని ‘కృష్ణార్జున యుద్ధం’ సినిమా షూటింగ్‌లో పాల్గొంటున్నారు. ఈ సినిమా ఏప్రిల్‌లో విడుదల కానుంది. అలాగే శ్రీరామ్‌ ఆదిత్య దర్శకత్వంలో నాగార్జునతో చేయనున్న మల్టీస్టారర్‌ సినిమా షూటింగ్‌ను ఫిబ్రవరి మొదటి వారంలో మొదలు పెట్టనున్నారు నాని. ఇలా సినిమా తర్వాత సినిమాలు ఒప్పేసుకుంటూ మోస్ట్‌ బిజీగా ఉన్నారీ సక్సెస్‌ఫుల్‌ హీరో.