కనీ వినీ ఎరుగని రీతిలో...

 

  ప్రపంచ చరిత్రలో న భూతో న భవిష్యత్ అన్న చందాన కాకతీయ సామ్రాజ్యానికి రక్షణగా... రాతికోట, మట్టికోట, ముళ్ల కోట, కంకర కోట... ఇలా ఏడు రకాల కోట గోడల్ని శత్రుదుర్భేద్యంగా రాణీరుద్రమ నిర్మించినట్లు చరిత్ర. నాటి కట్టడాలను ప్రేక్షకుల కళ్లకు కట్టే ప్రయత్నంలో ఉన్నారు ఈ చిత్ర కళా దర్శకుడు తోట తరణి. గోపనపల్లిలో గత 40 రోజులుగా ఈ కోట గోడల నిర్మాణం జరుగుతోంది. దీని గురించి గుణశేఖర్ మాట్లాడుతూ -‘‘వేలాది మంది దేవగిరి సైన్యం ఈ కోట గోడల్ని ముట్టడించే ప్రయత్నం చేస్తే... ఆ ప్రయత్నాన్ని కాకతీయ సైన్యంతో రుద్రమ ఎలా ఎదుర్కొన్నారో ఈ సెట్‌లో చిత్రీకరించనున్నాం. కనీ వినీ ఎరుగని రీతిలో ఈ పోరాట సన్నివేశాలుంటాయి. 

 

 ఈ నెల 29 నుంచి ఫిబ్రవరి 20 వరకూ ఈ సన్నివేశాల్ని చిత్రీకరిస్తాం. ఈ చిత్రాన్ని స్టీరియోస్కోపిక్ త్రీడీ టెక్నాలజీతో తెరకెక్కిస్తున్న విషయం తెలిసిందే. ఈ టెక్నాలజీ కారణంగా ప్రేక్షకులు అప్పటి కాలానికి, ఆయా సంఘటనల్లోకి స్వయంగా వెళ్లిన అనుభూతికి లోనవుతారు. అనుష్క, రానాలతో పాటు కృష్ణంరాజు, సుమన్, ప్రకాష్‌రాజ్, ఆదిత్యమీనన్, విక్రమ్‌జీత్, నిత్యామీనన్, కేథరిన్, హంసానందిని, బాబా సెహగల్ తదితరులు ఈ పోరాట సన్నివేశాల్లో పాల్గొంటారు’’ అని తెలిపారు. ఈ చిత్రానికి మాటలు: పరుచూరి బ్రదర్స్, సంగీతం: ఇళయరాజా, కూర్పు: శ్రీకరప్రసాద్, నిర్మాత: కె.రామ్‌గోపాల్, సమర్పణ: రాగిణీ గుణ.