ఎదురుకాల్పుల్లో మావోయిస్టు మృతి

హైదరాబాద్: ఛత్తీస్‌గఢ్ సుకుమా జిల్లాలో మంగళవారం వేకువజామున జరిగిన ఎదురు కాల్పుల్లో ఒక మావోయిస్టు మృతి చెందాడు. ఎస్పీ ఎలిసెల కల్యాణ్ తెలిపిన వివరాలివీ.. కుంట పట్టణ శివారులో ఉన్న పోటా క్యాబిన్ స్కూల్ సమీపంలో సోమవారం రాత్రి కొందరు వ్యక్తులు ఆయుధాలతో సంచరిస్తున్నట్లు స్థానికులు పోలీసులకు సమాచారం అందించారు. ఈ మేరకు వెంటనే పోలీసులు ఆ ప్రాంతాన్ని చుట్టుముట్టారు. ఈ సందర్భంగా పరస్పరం కాల్పులు జరిగాయి. అనంతరం వేకువజామున 4 గంటల ప్రాంతంలో అటవీప్రాంతంలోకి కొందరు పారిపోయారు. ఆ ప్రాంతంలో పోలీసులు గాలింపు చేపట్టగా ఒక మావోయిస్టు మృతదేహం కనిపించింది. ఒక తుపాకీ, ఒక పిస్టల్‌ను స్వాధీనం చేసుకున్నారు. చనిపోయిన నక్సల్‌ను గుర్తించాల్సి ఉంది.