నిఘా నీడలో నగరం

 

 నగరాల్లో:  చెన్నై, మదురై నగరాల్లో భద్రతను ఏడంచెలకు పెంచారు. తిరునల్వేలి, కన్యాకుమారి, కోయంబత్తూరు, తిరుచ్చి, సేలంలో అప్రమత్తంగా వ్యవహరిస్తున్నారు. రాష్ట్రంలోని చెన్నై మీనంబాక్కం అంతర్జాతీయ విమానాశ్రయంతో పాటుగా, మదురై, తిరుచ్చి, కోయంబత్తూర్, సేలం విమానాశ్రయాల్లో భద్రతను పటిష్టం చేశారు.  రైల్వే స్టేషన్లు, బస్టాండులు, ఆలయాలు, పర్యాటక కేంద్రాల్లో భద్రతను పెంచారు.  ఆయా నగరాల సరిహద్దుల్లో ప్రత్యేకంగా చెక్ పోస్టులను ఏర్పాటు చేసి వాహనాల తనిఖీల్లో నిమగ్నమయ్యారు.

 వదంతి కలకలం: భద్రత కట్టుదిట్టంగా ఉన్న సమయంలో శనివారం ఉదయం చెన్నై కమిషనరేట్ కంట్రోల్ రూంకు వచ్చిన సమాచారం పోలీసు యంత్రాంగాన్ని ఉరకలు తీయించింది. రాష్ట్ర రాజధాని నగరంలోని అన్నా వంతెన, కోయంబేడు బస్టాండ్, ఎగ్మూర్ రైల్వే స్టేషన్, రిజర్వు బ్యాంక్, ఎల్‌ఐసీ, హైకోర్టు భవనాలు తీవ్ర వాదుల హిట్‌లిస్టులో ఉన్నట్టు గతంలో తేలింది.

 

 దీంతో ఇక్కడ భద్రత యథాప్రకారం కట్టుదిట్టంగానే ఉంటుంది. ఈ ప్రదేశాల్లో బాంబులు పెట్టినట్టు, గణతంత్ర  వేడుకల్ని విచ్చిన్నం చేయాబోతున్నామంటూ వచ్చిన హెచ్చరికతో పోలీసులు పరుగులు పెట్టారు. ఉదయాన్నే కంట్రోల్ రూంకు ఈ బెదిరింపు కాల్ రావడంతో బాంబ్, డాగ్ స్క్వ్డాడ్‌లు తనిఖీలు ముమ్మరం చేశాయి. ఎలాంటి బాంబులు లభించకున్నా, ముందు జాగ్రత్త చర్యగా మరింత భద్రతను ఆ ప్రదేశాల్లో పెంచారు. నగరంలో భద్రతను ఏడంచెలకు పెంచారు. గణతంత్ర వేడుకలు జరిగే మెరీనా తీరంలో భద్రతా ఆంక్షలు విధించారు. వేడుకల్ని తిలకించే వాళ్లు ఉదయాన్నే అక్కడికి చేరుకోవాల్సి ఉంటుంది. తనిఖీల అనంతరం లోనికి అనుమతించనున్నారు.  ఆ తీరం వెంబడి విమానాలు ఎగిరేందుకు నిషేధం విధించారు. సముద్ర తీరంలో గస్తీని ముమ్మరం చేశారు. 

 

 మెరీనా తీరంలోని గాంధీ విగ్రహం వద్ద వేడుకలకు సర్వం సిద్ధం చేశారు. ఆ మార్గాన్ని పోలీసులు పూర్తిగా తమ ఆధీనంలోకి తీసుకున్నారు. తొలుత సీఎం జయలలిత అక్కడికి చేరుకుంటారు. అనంతరం గవర్నర్ రోశయ్య హాజరై వేడుకల్లో పాల్గొంటారు. రాష్ట్ర ప్రభుత్వ ప్రగతిని చాటే రీతిలో శకటాలు సిద్ధం అయ్యాయి. తివర్ణ దళాల కవాతులు, విద్యార్ధుల సాంస్కృతిక ప్రదర్శనలు, శకటాల ప్రదర్శనలు  కనువిందుచేయబోతున్నాయి.