‘‘నేను చిత్రసీమకొచ్చి పదేళ్లవుతోంది. గేయ రచయితగా మంచి పేరు తెచ్చుకున్నాను. సంగీత దర్శకునిగా మాత్రం అనుకున్న స్థానానికి చేరుకోలేకపోయాను. నాలాగా స్ట్రగుల్ అవుతోన్న ప్రతిభావంతులకు వేదికగా ఈ సినిమా చేశాం’’ అని చిన్ని చరణ్ చెప్పారు. ఆయన దర్శకత్వంలో రూపొందిన ‘అదీ లెక్క’ ఈ నెల 9న విడుదల కానుంది. మనోజ్ నందం, మహి, కృష్ణుడు, ప్రియాంక, నిక్కి అన్విల్ ముఖ్య తారలుగా మల్లేష్ కొండేటి సమర్పణలో చిన్ని చరణ్, రమ్య ప్రవీణ్ ఈ చిత్రాన్ని నిర్మించారు. ఈ సినిమా ప్లాటినమ్ డిస్క్ వేడుక హైదరాబాద్‌లో జరిగింది. తన ప్రతిభ నిరూపించుకోవడానికి ఈ సినిమాతో చక్కటి అవకాశం దొరికిందని మనోజ్ నందం చెప్పారు. ఈ వేడుకలో సాయికార్తీక్, మహి, ప్రియాంక, వినాయకరావు, సురేష్ కొండి పాల్గొన్నారు.
  


 సంగీత దర్శకుడు చిన్నిచరణ్ దర్శకుడిగా మారి తెరకెక్కిస్తున్న చిత్రం ‘అదీ లెక్క’. మనోజ్ నందం, మహి, కృష్ణుడు, ప్రియాంక, నిక్కి, అన్విక ప్రధాన పాత్రలు పోషిస్తున్న ఈ చిత్రానికి మోహన్ జీఎంసీ, ఎన్.అంజన్‌బాబు, రమ్య ప్రవీణ్ నిర్మాతలు. చిన్నిచరణే  స్వరాలందించిన ఈ చిత్రం పాటలను మంత్రి ఉత్తమకుమార్‌రెడ్డి చేతుల మీదుగా హైదరాబాద్‌లో విడుదల చేశారు. ఆయనతో పాటు అతిథులుగా పాల్గొన్న జయసుధ, టీఆర్‌ఎస్ నాయకుడు జితేందర్‌రెడ్డి, సునీల్‌కుమార్‌రెడ్డి, ఎన్.శంకర్, శేఖర్‌రెడ్డి, రమేష్ పుప్పాల, సురేష్ కొండేటి, రాహుల్ సినిమా విజయం సాధించాలని ఆకాంక్షించారు. ఈ సినిమా విషయంలో సహకరించిన ప్రతి ఒక్కరికీ కృతజ్ఞతలని, దర్శకునిగా తన తొలి ప్రయతం సఫలం అవుతుందనే నమ్మకం ఉందని చిన్నిచరణ్ చెప్పారు.