సాక్షి, చెన్నై : స్నేహితుడిని ఆటపట్టించాలని చేసిన చిన్న పని ఓ విద్యార్థి ప్రాణాన్ని బలిగొంది. ఈ విషాద ఘటన శుక్రవారం తేనిలో చోటుచేసుకుంది. వివరాలు.. అల్లీనగరమ్‌ కంబర్‌ వీధికి చెందిన మురుగన్‌ భవన నిర్మాణ కార్మికుడు. ఇతని కుమారుడు తిరుమాల్‌ (17) అల్లినగరమ్‌ ప్రభుత్వ మహోన్నత పాఠశాలలో ప్లస్‌ 2 చదువుతున్నాడు. శుక్రవారం మధ్యాహ్నం పాఠశాల ఆవరణలో ఉండగా ఓ స్నేహితుడు తిరుమాల్‌ నడుముని గిల్లాడు. అలా చేయొద్దని హెచ్చరించిన తిరుమాల్‌.. క్లాస్‌ రూంలోకి వెళ్లాడు. అతన్ని వెంబడిస్తూ అతని స్నేహితుడు సైతం వెళ్లాడు. మరలా అదే పనిచేయడంతో ఇద్దరి మధ్య స్వల్ప గొడవ జరిగింది. ఆగ్రహించిన స్నేహితుడు తిరుమాల్‌ గొంతు పట్టుకుని నులిమాడు. దీంతో తిరుమాల్‌ స్పృహ తప్పి పడ్డాడు. ఇది చూసిన తోటి విద్యార్థులు కేకలు వేయడంతో ఉపాధ్యాయులు అతన్ని హుటాహుటిన తేని ప్రభుత్వ ఆస్పత్రికి తరలించారు. పరిశీలించిన వైద్యులు అప్పటికే తిరుమాల్‌ మృతి చెందినట్లు తెలిపారు. విషయం తెలుసుకున్న తిరుమాల్‌ బంధువులు పాఠశాల వద్ద రాస్తారోకో నిర్వహించారు. పరిస్థితి ఉద్రిక్తంగా మారడంతో తేని పోలీసులు కొందరిని అదుపులోకి తీసుకున్నారు. తిరుమాల్‌ మృతికి కారణమైన విద్యార్థిన్ని(17) పోలీసులు అరెస్టు చేసి విచారణ చేస్తున్నారు.


 కొమరోలు (ప్రకాశం) : వేగంగా వెళ్తున్న ఆటో అదుపుతప్పి బోల్తా కొట్టిన ఘటనలో ఐదుగురికి తీవ్ర గాయాలయ్యాయి. ఈ సంఘటన ప్రకాశం జిల్లా కొమరోలు మండలం అల్లీనగరం వద్ద సోమవారం చోటుచేసుకుంది. ప్రయాణికులతో వెళ్తున్న ఆటో అల్లీనగరం శివారులో అదుపుతప్పి బోల్తా కొట్టింది. ఈ ప్రమాదంలో ఐదుగురు ప్రయాణికులకు తీవ్ర గాయాలయ్యాయి. ఇది గుర్తించిన స్థానికులు క్షతగాత్రులను ఆస్పత్రికి తరలించి పోలీసులకు సమాచారం అందించారు.